1 Kwuye ungwu Ɔzhizɔsi a kalama mu lɔwa, enzu gyɔɔ o mbwalu wu. 2 Akwɛyi onzu uwufo uwu e yi ofya umbu embyi umba ɔyi e bo e kwumo mu idu wu akwɛyi a za wu tee, <<Ɔkwu, gba ŋɔ nyama, ŋɔ do tee ŋɔɔ bo mi ofya ma.>>

3 Akwɛyi Ɔzhizɔsi a nda kwuwo a pwu wu afyi, a za wu tee, <<Mi nyama,>> <<Ofya ŋa lu bomo!>> Mɔmɔɔmɔ akwɛyi ofya wu u bo mo. 4 Akwɛyi Ɔzhizɔsi a za wu tee, <<Ngbɛndu! Ki shi onzu onzu uwunawuna le yitu yi mo. So kaa zɔ ɛnwu ŋɔ ma mbaa obwoshi uwu Ukpo kaa le yese ŋɔ ma; akwɛyi wo isabo iyi bɔkɔ Omosisi a zɔ tee lo awu kaa onzu uwunawuna la nyama tee ofya ŋa u bo-o.>>

5 Kwuye ungwu Ɔzhizɔsi e fye mu Okapanawu, akwɛyi u to keyi uwu asozha uwu Oroma e bo mbaa wu akwɛyi a kpawu ɛshɛku tee la mbwa wu ma: 6 A za wu tee <<Adakwogba, umɛgba mi a nɔma mɛzhi iyi ofya mogba, ofya umbu ɛnwu kpokapiya, e yi mu inyashi imama gyɔɔ.>>

7 Akwɛyi Ɔzhizɔsi a gba wu opwu tee, <<Mi ri mi bi bo wu ofya ma.>>

8 U to keyi uwu asozha uwu Oroma a gba opwu tee, <<Adakwogba, ayimo. Imi mi domo iyi ŋɔ nyɔ mogba mi mo. So iso bi akwɛyi ofya umbu umɛgba mi u bo mo. 9 Moo, Imi tete, mi yi wa to keyi, la asozha mu idu mi tete. Gba mi za la ele tee, <Sheyimo!> ee sheyimo; gba mi za la awu tee, <Bo!> a nyɔ. Gba mi za la unye mi tee, <Wo te!> ee wo.>>

10 Tabɔkɔ Ɔzhizɔsi a pwa ɛlɛ, i shi wu kenzu iyama, akwɛyi a za la enzu umba o mbwalu wu awu tee, <<Mi so yi ongbulolo, mu ɛzhi iyi Izirɛ lɛɛbi lala mi fya onzu uwu bɔkɔ e yi ikwu idu fulo kyamate ele mo. 11 Mi so yi te, enzu gyɔɔ oo wɔ mu ɔnu uwu kwoto mbala ɔnu uwu onoyo o nyɔ, oo ŋɔma o ri kiya kyaa mbala Aburamu mbala Aziki mbala Ɔzhɛkɔbu mu ɛsu iri mo iyoshi. 12 Akwɛyi ɛmɛ umba ɛsu oo wa mba ma oo fu mbo mu kizɛ ingyi ipwu, mɔmɔ gba o lo oga mbala ɛnyi ilamesu le.>>

13 Akwɛyi Ɔzhizɔsi a za la u to keyi uwu asozha awu tee, << Sheyimo iya ŋa mogba! Iyi ŋɔ kwu idu lu fulo ma yi awu,o wo ŋɔ yi tayi.>> Akwɛyi ofya umbu umɛgba wu u bo mo mu kwotota kwɔngwu.

14 Kwuye ungwu Ɔzhizɔsi e fye mu kwogba ungwu Opita, e du anyi wu oko wu tee a nɔma e yi okpaki. 15 Akwɛyi a pwa wu afyi mu kwuwo, akwɛyi okpaki wu e bomo, akwɛyi e yi mo e wo wu kiya ngyirimo.

16 Akwɛyi mu onoyo, o ka la Ɔzhizɔsi enzu gwurugwuru umba o yi ofya umbu ɛndu iyira. Iso iyi kenzu wu kɛɛkyi i ra la ɛndu iyira ma akwɛyi e bo enzu lɛɛbi efya ma. 17 Ɛlɛ i wo te kaa li nyɔlɔ iyi iso iyi bɔkɔ anukenzu Azaya e so tee: << E to nzu inyashi ma, akwɛyi e bo nzu efya ma.>>

18 Tabɔkɔ Ɔzhizɔsi a ma enzu gwurugwuru te o fula wu ma, akwɛyi a za la Wavɔngɔkiya wu te, lo sama lo so mu ɔsɔwu uwu risu. 19 Akwɛyi onzu ukpɛnyi u zɔ ɛrama iyi Omosisi e bo munyi wu akwɛyi a za wu tee, <<U zɔ kiya, mi mbwalu ŋɔ munamuna bɔkɔ ŋɔ sheyi mo.>>

20 Ɔzhizɔsi ba a gba wu opwu tee, <<Lɔngbɔga lu yi ɛbu, afyi umba oshi o yi rigwu, ɔbulɛ Umɛ uwu Onzu ba e yi mbaa e lo reshi wu mo.>>

21 Ukpɛnyi mekeka iyi Wavɔngɔkiya wu a za wu tee, <<Ɔkwu, shi laa mi so ka mi pwu ada mi ma dɛ.>>

22 Ɔzhizɔsi ba a za wu tee, <<Mbwalu mi, lafya la ɛkpɛzhi kaa lo pwu ɛkpɛzhi mba ma.>>

23 Akwɛyi Ɔzhizɔsi e fye mu kwoda ungwu embyi akwɛyi Wavɔngɔkiya wu o mbwalu wu. 24 Kwokpo ungwɔkwu kwu yimo kporo mu risu, akwɛyi agba iyi embyi i muma i fu mu kwoda. Ɔzhizɔsi ba e yi mu ondo iyawu. 25 Wa vɔngɔ kiya wu o ka o nyi wu eyi mo akwɛyi o za wu tee, <<Ɔkwu, sa nzu ma, moo embyi o ri nzu mo!>>

26 Akwɛyi Ɔzhizɔsi a za mba tee, <<Lunyi umba ikwu idu lu fulo kɛɛkyi mbɔlɛ, kimbe ki shi lu riyi te?>> Akwɛyi e yimo, a kpa kwokpo mbala agba iyi embyi ɛyi, akwɛyi kizɛ ki gbomo ndii.

27 Uwewe a ya kenzu, akwɛyi o yo kwuyo tee, <<Onzu ele akwu uwe te bɔkɔ kwokpo mbala agba iyi embyi lala i lo wu mo te?>>.

28 Kwuye ungwu Ɔzhizɔsi a sama a ka mu ɛsɛnyi iyi risu mu ɛzhi iyi Ogadara, enzu wepo o wɔ mu agariwu akwɛyi o kpolo wo kyaa. Enzu mbɔlɛ o yi eyo umbeyi mu ɛnwu mba, o lo enzu iyi gyɔɔ, onzu u zɛ mu ɔgwuzɛ ɔnwu e yi mo. 29 Akwɛyi o le mu oga itarama tee, <<Ŋɔ gyi kwuwongumbe mbala nzu, uŋɔ, Umɛ uwu Ukpo? Kwuye kwu du bo mo ɔbulɛ, ŋɔ bo te ŋɔ lo nzu inyashi?>>

30 Uzhi uwu erusu ba o yi mu irimo kɛlɛɛ mbala mba mɔmɔ. 31 Akwɛyi eyo umbeyi ɛlɛ i nda Ɔzhizɔsi kwoya tee, <<Gba ŋɔ ranzu ma, shi nzu la ki fye mu uzhi uwu erusu mbɔlɛ.>>

32 Akwɛyi Ɔzhizɔsi a za mba tee <<La lu so!>> Akwɛyi eyo umbeyi ɛlɛ i wɔma i fye mu erusu mbamba. Akwɛyi uzhi uwu erusu mbɔlɛ ndii o solomo o fu mu risu akwɛyi embyi o ri mbo mo.

33 Enzu umba o yi mu erusu mbamba ipyama o rɛnya o fye mu kwuse akwɛyi o ba ɛza laa enzu, iyi kiya ingyi bɔkɔ ki du enzu umba o yi eyo umbeyi ele. 34 Akwɛyi enzu umba kwuse lɛɛbi o wɔ kwudu o ko du Ɔzhizɔsi akwɛyi o kpa wu ɛshɛku tee la wɔma laa lafya laa ɛzhi mba.