1 Mu kwuye kwongwu Ɛrɔdu, ɔsu uwu ɛzhi iyi Ogalili, a pwa eza iyi Ɔzhizɔsi. 2 Akwɛyi a za la ɛmɛgba wu tee, <<Onzu ele akwu Ɔzhɔnu uwo Obatisima, uwu bɔkɔ e yimo mu lukwu, ɛlɛ gba i shi e yi ekpasu iyi apula iyi amɛ iwomo le.>>

3 Moo Ɛrɔdu e yi Ɔzhɔnu ma, a kpawakyi akwɛyi a ta wu mu ugu ugyi. E wo ɛlɛ kwuwongu Ɛrɔdiya, oko uwu umanyi wu Ofilipu. 4 Moo Ɔzhɔnu e koko e so wu tee, <<Ishoshi te kaa to Ɛrɔdiya lakwu oko ŋɔ mo!>> 5 Ɛrɔdu a gyi tee laa ngbɛ wu ma, ba ee wiyi iyi enzu umba Azhu, kwuwongu umba o to Ɔzhɔnu tee akwu anukenzu uwu Ukpo.

6 Ɔnu uwu bɔkɔ Ɛrɔdu e wo odumudumu uwu kwɔfyi ungwu o mba wu, umɛ uwu Ɛrɔdiya e komo leyi iyi agboga wu. Ɛrɔdu a mwɔnyɛ mu eko wu ɛlɛ 7 akwɛyi e to wu ishi tee, <<Mi vungɔma mi shi ŋɔ kiya ingyinangyina ingyi ŋɔ nda!>>

8 Anyi wu e lo wu mu ubwu, akwɛyi a za wu tee, <<Shi mi reshi ingyi Ɔzhɔnu u wo obatisima mu kaatu munɛ kekelele!>>

9 Ɔsu Ɛrɔdu e wo ubugyi, akwɛyi kwuwongu bɔkɔ e tishi leyi iyi agboga wu lɛɛbi awu, akwɛyi e shi ɔkpa tee ingyi bɔkɔ a gyi awu, lo shi wu ngyi. 10 Akwɛyi a lɔma tee lo kpolo kwoshi ungwu Ɔzhɔnu ma mugu ugyi . 11 Akwɛyi o bo la kwoshi wu mu kwuso akwɛyi o shi ngwu umoko awu, uwu ba e to ngwu a ka la anyi wu. 12 Akwɛyi Wavɔngɔkiya umba Ɔzhɔnu o bo, o to ukpɛzhi wu ma, o ko kpa wu ami; akwɛyi o ka o so yi Ɔzhizɔsi.

13 Tabɔkɔ Ɔzhizɔsi a pwa ingyi ri wo, akwɛyi e yimo e fye mu kwoda a ka ŋɔma kɛɛkyi wu mu riyi ingyifo. Tabɔkɔ riba ingyi enzu o pwa ɛlɛ o wɔ mu ese mba ɔ zɛ malɛ o mbwalu wu. 14 Kwuye ungwu bɔkɔ Ɔzhizɔsi a wɔ mu kudu mu kwoda, akwɛyi a ma enzu riba, inyashi mba i wo wu mo, akwɛyi umba bɔkɔ o yi efya e bo yi mbo mo.

15 Mu onoyo ɔwu Wavɔngɔkiya wu o bo munyi wu akwɛyi o za wu tee, <<Munɛ akwu ɛzhi ɛngbarara, ɔnu ba u bo-o, lafya la enzu mbɔlɛ kaa lo fye mu kwuse kaa lo ya kiya ingyirimo lɛmba.>>

16 Ɔzhizɔsi ba a gba mba opwu tee, <<Akwu mɛga tee oo gba o rimo mo, la lu shi mbo kiya ka lo ri!>>

17 Akwɛyi Wavɔngɔkiya wu o za wu tee, <<Ki yi eburedi ɛlɔ mbala emu wepo bi.>>

18 Akwɛyi Ɔzhizɔsi a za mba tee, <<La lu ka mi yi te.>> 19 Akwɛyi a za la enzu mbamba te lo ŋɔma mɛzhi; akwɛyi e to eburedi ɛlɔ ɛnyi mbala emu wepo mbamba akwɛyi e yese moshi, a gbɛlɛ Ukpo ɛnyi akwɛyi a mu eburedi ɛnyi ma, e shi Wavɔngɔkiya wu akwɛyi o ka yi enzu mbamba. 20 Enzu lɛɛbi mba o ri ubwu e do mbo mo. Akwɛyi Wavɔngɔkiya wu o kpala iyi bɔkɔ i shimo ɛlu mu lubiri luwo la lopo. 21 Enzu umba bɔkɔ o ri kiya awu akwu anzɔnu edubu ɛlɔ, i kyo eko mbala ɛmɛshɛri mo.

22 Mizhikembo iyi ɛnyi Ɔzhizɔsi a za la Wavɔngɔkiya wu tee lo fye mu kwoda lo to keyi lo so mu ɛsɛnyi iyi risu akwɛyi uwu ba a za la enzu umba riba mbamba tee lo so mogba. 23 Mizhikembo iyi a lafya laa enzu mbamba o kama, akwɛyi a ka mu lɔwa kɛɛkyi wu kaa la lɛ Ukpo. E yi mɔmɔ kɛɛkyi wu nzhii ba mu onoyo; 24 Kwuye kwɔngu ba kwoda kwu ka sharu mɛmi iyi risu-o, akwɛyi kwu le mu imima kwuwongu kwokpo kwu yi mu itumo kwu kpo mangwu.

25 Mu eyifumo Ɔzhizɔsi a zɛ mu kadu unga embyi e bo mbaa Wavɔngɔkiya wu. 26 Tabɔkɔ o ma wu mu luzɛ mu kadu unga embyi, iyi i wo mbo mo. Akwɛyi o tara oga o zɔ tee, <<Akwu ubana!>>

27 Kɛlɛlɛ akwɛyi Ɔzhizɔsi a za mba tee, <<La lu kɔ idu ma, akwu Imi. La lu wiyi mo!>>

28 Akwɛyi Opita a za wu tee, <<Ɔkwu gba akwu uŋɔ ngboro de ba za mi te la mi zɛma mu embyi kaa la mi bi du ŋɔ.>>

29 Akwɛyi Ɔzhizɔsi a gba wu opwu tee, <<Bo>> Akwɛyi Opita a wɔma mu kwoda akwɛyi e le mu luze mu kadu unga embyi e sheye mbaa Ɔzhizɔsi. 30 Tabɔkɔ a ma kwokpo kwu yi mu ifyama iiyɛkɔkɔ mu kwoda akwɛyi a riyi akwɛyi e le mu dingbi akwɛyi a tara oga tee, <<Ɔkwu sa mi ma loo!>>

31 Kɛlɛlɛ akwɛyi Ɔzhizɔsi a nda kwuwo e yi wu akwɛyi a za wu tee <<Uŋɔ uwu ikwu idu lu fulo kɛɛkyi ele! Kimbe ki shi ŋɔ yi egbo epo?>>

32 Tabɔkɔ o fye mu kwoda akwɛyi kwokpo kwu gbo ndii. 33 Wambwalu umba bɔkɔ o yi mu kwoda mɔmɔ o gbo wu ɔya, akwɛyi o zɔ tee, <<Iyesheshi ŋɔ kwu Umɛ uwu Ukpo kego!>>

34 Akwɛyi o sa risu ma o bo mu ɛzhi iyi Ɔgɛnɛsarɛ, 35 tabɔkɔ enzu umba kwuse kwɔngu o zɔngɔ Ɔzhizɔsi ma, o lɔ ma la ese iyi bɔkɔ i ŋɔ i kpamba kɛlɛ awu akwɛyi o ka wu laa enzu mbo lɛɛbi umba o pwu ofya. 36 O kpa wu ɛshɛku kaa enzu umba o pwu ofya lo pwu afyi mu etu iyi okpayi wu, akwɛyi umba bɔkɔ o pwu afyi lɛɛbi ofya mba u bo mo.