1 Mizhikembo iyi ɛlɛ mi ma ɔlɔgbulɔ uwu Ukpo uwufo tee a wɔ moshi e yi mu inyɔma mɛzhi. E yi idomo iyɛku, ilemo wu i shi ɛzhi iyi kwudu kwɔlɛ lɛɛbi ɛbɛ. 2 A tara oga mu opwu uwɔkwuu tee: <<A ta ma-a! Ɔbabilɔ Uwakwuu a ta ma-a! Kekelele akwu kizɛ ingyi invyemo ingyi eyo umbeyi mbala ɛndu iyira; ɛnyinyi ikikɔ ikikɔ mbala afyi umboshi umba bɔkɔ o gyi mba mo gba o kpo mɔmɔ le ŋa. 3 Moo ɛzhi iyi kwudu kwɔlɛ lɛɛbi o wo atɛ umba oko awu-o, atɛ umba ekpasu iyi kaya itomo wu. Asu umba kwudu kwɔlɛ o to kaya mbala wu, wa ya rishi umba kwudu kwɔlɛ o yi kwuwo kwuwongu kaya itomo wu kanga.>>

4 Akwɛyi mi pwa opwu uwufo u wɔ moshi, u zɔ tee,

<<enzu mi! La lu wɔ kwudu, La lu wɔma munyi wu!

La lu kyo mu ingbomo wu mo;

kaa inyashi wu li du yi mo!

5 Moo ingbomo wu i kpala ɛlu i ka moshi-e,

akwɛyi Ukpo e lolo ingbomo wu.

6 La lu wo wu pwaa mate bɔkɔ e wo yi awu;

Apula lɛɛbi iyi bɔkɔ e wo yi awu la lu wa wu kwusa yi izhepo.

Apula iyi bɔkɔ e yoro yi mo e shi yi awu,

La lu nyɔlɔ ago wu ma mu atɛ umba bɔkɔ o ka ekpasu laa umba bɔkɔ e shi yi awu izhepo.

7 La lu lo wu inyashi mbala ubugyi

kyamate bɔkɔ e to ɛnwu e fulo kadu laa ɔnyɛ uwu bɔkɔ e shi ɛnwu wu awu.

Moo e koko e so ɛnwu wu tee:

<Mi ŋɔ le munɛ, ɔsu okokpayi!

Imi mi kwu oko u kpo ɔnu ma mo,

Mi yi ubugyi gbee mo!>

8 Kwuwo kwɔlɛ, ubugyi uwu lukwu

mbala obobyi mbala lonzu lu kpo mu Ɔbabilɔ kwɔfyi kukpɛnyi.

Akwɛyi o pwu wu mo mɔyi,

kwuwongu Ɔkwu Ukpo, uwu bɔkɔ a zɔ ombu wu awu, e yi ekpasu.>>

9 Asu umba kwudu kwɔlɛ umba bɔkɔ o kyo mu kaya itomo mbala apula iyira iwomo mbala wu awu o lo oga o wa la ɛnyɛ kwuwongu kwuse kwɔngu kwuyengwu bɔkɔ o ma uwu uwɔyi uwu bɔkɔ u ye wo mu ipwumo. 10 O ri shaaru, kwuwongu o wiyi iyi i kyo mu inyashi wu. O zɔ tee, <<Kyakwokwo! kyakwokwo! Ɔbabilɔ! Kwuse ungwɔkwu kwɔlɛ! Mu awa ikpɛnyi byi akwɛyi o lo ŋɔ inyashi!>>

11 Wa ya rishi umba kwudu kwɔlɛ o lo oga akwɛyi o wo obobyi kwuwo ungwu Ɔbabilɔ tete, moo onzu ukpukpɛnyi te a ya ewulo mbo fo, 12 onzu ukpukpɛnyi te a ya apula mba fo, inyi gba akwu egolu, esiliva, ekyi iyi abwa mbala ekyi ilemo; apula mba iyi ɔlinɛ, mbala ekpayi ifyobyo, osiliki, mbala ekpayi ifyobyo; apula ikikɔ iyi abɛ mbala apula ikikɔ ikikɔ iyi esepo mbala abɛ iyi abwa, esepo mbala omabo; 13 mbala ɔsinamɔ, apula iyi umbwɔ ferere, otulare uwɔyi, omiri, ɛfurakisɛ, atɛ mbala anyi, umbwu mbala owiti, endo mbala ilɔ mbala anya mbala ada iyi ewa, enye mbala kwunyɔ ungwu enzu. 14 Wa ya rishi, oo za la kwuse ungwu Ɔbabilɔ tee, <<Apula iyeshi lɛɛbi iyi bɔkɔ ŋɔ gyi te kaa yi yi le i tomo-o, apula iyi kwuwo ŋɔ lɛɛbi mbala woshi ŋɔ lɛɛbi i kpo ɛdɔma-a, uŋɔ ba ŋɔ fya apula ɛlɛ ma gbee fo!>> 15 Wa ya rishi, umba bɔkɔ o vindɔ enzu umba kwuwo mu rishi mbo iwomo mu kwuse kwɔngu awu, o ri shaaru, kwuwongu inyashi iyi Ɔbabilɔ li du mbo mo. O lo oga o wo ubugyi 16 akwɛyi o zɔ te, <<Kyakwokwo ira mbɛ bɔkɔ i du kwuse ungwɔkwu kwɔlɛ te! Enzu umba kwuse ungwu Ɔbabilɔ kwɔlɛ o koko o lo apula iyi ɔlinɛ, ifyobyo mbala ifyobyo yoo mu ɛnwu akwɛyi e kpo egolu, ekyi iyi abwa, mbala apula iyi abwa mu ɛnwu! 17 Akwɛyi mu awa ikpɛnyi apula iyi kwuwo iyi kwuse ungwu Ɔbabilɔ lɛɛbi ikpɛdɔma!>>

Enzu umba bɔkɔ o yi ada iyi embyi mbala enzu umba luzɛ, enzu umba bɔkɔ o wo ɛduma mu kwoda mbala umba bɔkɔ ifyama mba akwu mu embyi awu, o ri shaaru, 18 akwɛyi o lo oga gbɔrɔrɔ tabɔkɔ o ma uwu uwɔyi uwu bɔkɔ u ye mu kwuse ungwu Ɔbabilɔ ipwumo awu: <<I yi kwuse kwowa ungwɔkwu kyamate kwuse kwɔlɛ mo!>> 19 O kpo ɛmba kwumburu mu reshi, o lo oga akwɛyi o wo obobyi, o zɔ te, <<Kyakwokwo kyakwokwo kwuse ungwɔkwu kwɔlɛ kwu kpo ɛdɔma-a! Kwuse kwɔlɛ akwu kwuse ungwu enzu lɛɛbi umba bɔkɔ o yi ada iyi embyi mu risu o yi kwuwo kwuwongu rishi iyama mangwu! Akwɛyi mu awa ikpɛnyi byi apula lɛɛbi i kpo ɛdɔ ma!>>

20 Lunyi umba bɔkɔ lu yi moshi awu, la lu mwɔnyɛ, kwuwongu ikpɛdɔma iyi kwuse ungwu Ɔbabilɔ! La lu mwɔnyɛ , enzu umba Ukpo mbala wa zɛ ilɔ mbala anukenzu! Moo Ukpo a ngbɛ kwuse ungwu Ɔbabilɔ ɛdɔ ma-a kwuwongu kiya ingyi kwu wo awu!

21 Akwɛyi ɔlɔgbulɔ uwakwuu uwufo e to kwokyi ungwɔkwu kyamate rimɛ ingyi riko tayi akwɛyi e to ngye pyo mu risu, a zɔ tee, <<Tegba Ɔbabilɔ uwakwuu ele o bo towo pyo la ekpasu akwɛyi o gba o ma wu gbee fo. 22 O gba o pwa amwu iyi emburu mbala epwu iyi enzu, mbala wa kpa ombula mbala kwongangaraki, munyi ŋɔ fo! O gba o ma onzu uwu ɛduma iyi ewo iyinayina te munyi ŋɔ fo; o gba o pwa anu iyi ikpomo mu riko munyi ŋɔ fo! 23 O gba o ma ilemo iyi kambwu unga ɔyi munyi ŋɔ fo; o gba o pwa opwu uwu okopo mbala ɔnu uwu okopo munyi ŋɔ fo. Wa ya rishi ŋɔ o ka ekpasu le mu kwudu kwɔlɛ lɛɛbi, akwɛyi i zɛ mu apula iyi amɛ iyi imwilo ŋɔ, ŋɔ kyoro enzu umba kwudu kwɔlɛ lɛɛbi ma!>>

24 Ɔbabilɔ o lo wu inyashi kwuwongu ɛnzhi umba anukenzu mbala enzu umba Ukpo lɛɛbi o fu mbo mo mu kwuse kwɔngu; ee, ɛnzhi umba enzu lɛɛbi umba bɔkɔ o ngbɛ mba ma mu kwudu kwɔlɛ.