1 Mizhikembo iyi ɛlɛ akwɛyi mi ma riku ri wuma moshi, akwɛyi opwu uwu mi pwa wu dɛ-ɛ, uwu bɔkɔ u wanu kyamate kwongangaraki awu, u za mi tee, <<Yama kaa bo munɛ, kaa la mi zɔ ŋɔ kiya ingyi ki byi wo mizhikembo iyi ɛlɛ.>> 2 Mɔmɔɔmɔ akwɛyi Kwundu e fye mami akwɛyi mi ma ukpa uwɛsu moshi, onzu uwufo ba a ŋɔma mawu. 3 Ureyi uwu onzu awu u lemo kyamate ekyi iyi abwa iyi ozhasipa mbala okanaliya tayi. Ɔwɔ uwu bɔkɔ u yi kyamate embyi umba kwokyi ungwu ɛmɛra tayi awu ba u fula ukpa ele ma. 4 Ikpa iyɛsu uwekpepo laa endo ɛlɛ ba i lo ukpa uwu ɔsu ukpɛnyi ele mekeka. Enzumbakɔ uwekpepo laa wendo mbɔlɛ ba uwewe a ŋɔ mu ukpa wu uwɛsu wu, uwewe e lo ɔriga uruwu laa ɛnuma uwu ogolu mu reshi. 5 Imingɔma iyi lɔwu mbala ɛyikpama iyi Ukpo mbala ina ba i le mu iwɔma mbaa ukpa uwɛsu ele. Lɔmbyɔyi erewo iyi bɔkɔ akwu ɛndu erewo iyi Ukpo le ba i le mu ɔyi izɔma mu keyi unga ukpa uwɛsu ele. 6 Tatayi kiya ingyifo ingyi ki yi gelegele kyamate risu ingyi umɛbɛ tayi, ki yi mate Okirisita tayi, ki yi mu keyi unga ukpa uwɛsu ele.

Apula iyi bɔkɔ i yi kwunyɔ endo ɛlɛ iyifo i yi mu kwuko kwɔlɛ iyifo i yi mu kwuko ungufo i yi eyi mu keyi mbala mizhikembo ba i fula ukpa uwɛsu ele ma tete. 7 Apula ireyi endo ɛlɛ, ingyi kwonze ki yi kyamate ɔbaga tayi; ingyopo ki yi kyamate endo ɔnumba tayi; ingyola ki yi ureyi kyamate ureyi uwu onzu tayi; ingyondo ba ki yi kyamate okpakukpaku uwu e yi mu iyimo moshi tayi. 8 Apula iyi i yi lareyi endo ɛlɛ, ingyinangyina ki yi ekowo ɛrɛnyi, ɛnwu mba ndii i yi eyi mu kwudu mbala mɛmi. La utu la ɔnu gba o ŋɔ sawu mu amu isomo tee,

<< Ɔkwu Ukpo Edego akwu Ɔkɛrikɛri, Ɔkɛrikɛri, Ɔkɛrikɛri, U ka ekpasu le,

mekyekyi, akwu uwu, kekele tete akwu wu, uwu gba ba e yi mu inyɔma le.>> 9 Kwuye ungwunanguna bɔkɔ apula iyi i yi laa reyi endo ɛlɛ i so amu iyi iduma mbala inzumbɛku mbala iyi ɛnyi igbɛlɛma laa onzu uwu a ŋɔ mu ukpa uwɛsu awu, uwu bɔkɔ e yi kwunyɔ iyɔkpɔɔ ba ɔkpɔɔ awu, 10 akwɛyi enzu umbakɔ uwekpepo la wendo mbamba, o kpo mɛzhi mbamba mu idu iyi onzu uwu a ŋɔ mu ukpa uwɛsu awu, uwu bɔkɔ e yi kwunyɔ iyɔkpɔɔ ba ɔkpɔɔ awu, akwɛyi o gbo wu ɔya. O shi ɛnuma mba mu keyi unga ukpa uwɛsu akwɛyi o zɔ tee,

11 Ɔkwu nzu, mbala Ukpo nzu! Ŋɔ domo

kaa na inzumbɛku, mbala ilomo mbala ekpasu.

Moo uŋɔ gba ŋɔ wo apula lɛɛbi le,

akwu mu inyama ŋa gba apula lɛɛbi iwomo akwɛyi ŋɔ shi yi kwunyɔ le.>>