1 Akwɛyi mi pwa opwu uwɔkwuu u wɔ mu ɔtɛpu u siso mbala alɔgbulɔ umba Ukpo werewo mbamba tee, <<So kaa fu lɔɔtu lorowo undu amba umba Ukpo mu kwudu kwɔlɛ!>>

2 Akwɛyi ɔlɔgbulɔ uwu Ukpo uwu kwonze a ka akwɛyi e fu kaatu ungawu mu kwudu kwɔlɛ, akwɛyi ashinakpa iyira mbala iyi iyimo shariri i wɔ mu enzu umba bɔkɔ o yi kɛzɔ unga izɔfyi awu mbala enzu umba o gbo oya la u wɔ wu.

3 Akwɛyi ɔlɔgbulɔ uwu Ukpo uwopo awu e fu ungawu mu risu. Embyi o vindɔ kyamate ɛnzhi umba ukpɛzhi tayi, akwɛyi ba kiya ki ye la reyi ingyinangyina ingyi bɔkɔ ki yi mu embyi mbamba ki kpomo.

4 Akwɛyi ɔlɔgbulɔ uwu Ukpo uwola e fu ungawu wu mu ɛkwu mbala mbaa bɔkɔ embyi o tumo, akwɛyi o vindɔ ɛnzhi. 5 Akwɛyi mi pwa ɔlɔgbulɔ uwu Ukpo uwu bɔkɔ e yi ekpasu meka iyi embyi awu a zɔ tee: <<Ombwu uwu ŋɔ zɔ awu akwu ongbulolo, Ee Uŋɔ Ɔkɛrikɛri, uŋɔ uwu ŋɔ yi kekelele ŋɔ gba ŋɔ yi mekyi! 6 Moo enzu mbɔlɛ o ngbɛ enzu umba Ukpo mbala anukenzu umba Ukpo ma, kwuwo kwɔlɛ ŋɔ shi mbo ɛnzhi te lo wo. O fya rigbɛ ingyi ki fa ma mba!>> 7 Akwɛyi mi pwa opwu uwu bɔkɔ u wɔ mu kwumbu ungwu isabɔ u zɔ tee, <<Ɔkwu Ukpo Edego! Embu ŋɔ izɔma akwu ongbulolo ba i pulemo mo.>>

8 Akwɛyi ɔlɔgbulɔ uwu Ukpo uwondo awu e fulo inyashi iyi bɔkɔ i yi mu kaatu wu awu e fu mɔnu, akwɛyi ba o shi ɔnu ekpasu tee lu pwu enzu mu iyimo wu. 9 Akwɛyi iyimo iyɛkɔkɔ iyi ɔnu ɛlɛ i pwu enzu ma, akwɛyi o pe ɛnyi iyi Ukpo ari, uwu bɔkɔ e yi idomo meka iyi inyashi ɛlɛ. Umba o ta mɛzhi mo ba o du inzumbɛku wu ma mo. 10 Akwɛyi ɔlɔgbulɔ uwɔlɔ e fulo inyashi iyi bɔkɔ i yi mu kaatu wu ma e fu mu ukpa uwu izɔfyi ele. Ipwu i kpo mu ɛzhi iyi izɔfyi ele, inyashi iyɛku i du enzu mbɔlɛ akwɛyi o le mu ɛtunɛ mba ɛnyi ikwumo, 11 akwɛyi o pe Ukpo uwoshi ari kwuwongu inyashi mbala ashinakpa mba ba o lafya la ira mba iwomo mo.

12 Akwɛyi ɔlɔgbulɔ uwu Ukpo uwɔrɛnyi e fu umba kaatu wu ma mu embyi umba risu ingyi Oyufiriti. Akwɛyi risu ngyɛngyi ri shirima, kaa ri shi ɔgwuzɛ laa asu umba bɔkɔ o ngyi mu ɔnu uwu kwoto awu. 13 Akwɛyi mi ma ɛndu iyira ɛla iyi bɔkɔ o yi mate angbɔrɔ tayi. I le mu iwɔma mu kenzu unga ɔduragɔ, mbala kenzu unga izɔfyi mbala kenzu unga anukenzu u mwilo awu. 14 Inyi gba akwu ɛndu iyi eyi iyi bɔkɔ ii wo apula iyi amɛ awu. Ɛndu iyi eyi ɛla ɛlɛ ii ka mbaa asu umba kwudu kwɔlɛ lɛɛbi kaa lo kpalamba ɛlu kwuwongu ewa iyi Kwɔfyi Ungwɔkwu ungwu Ukpo Edego-ala.

15 <<La lu ngbɛndu! Imi mi yi mu inyɔma mate uwɛlɔ tayi! Ɔnyɛ akwu uwu onzu uwu bɔkɔ a ŋɔma la reyi mbala ekpayi wu kɛlɛ, kaa la gɔma la uzhi uwu idɔ akwɛyi lovya ba la lu wo wu mu eyi iyi enzu mo>>.

16 Akwɛyi ɛndu ɛlɛ i kpala asu mbɔlɛ ɛlu mu riyi ingyi o ya ngyi mu Iburu tee Amagɛdɔ.

17 Akwɛyi ɔlɔgbulɔ uwu Ukpo uworo awu e fulo kaatu wu ma e fu moshi. Akwɛyi opwu uwɔkwuu u wɔ mu ukpa uwɛsu awu mu ɔtɛpu u zɔ tee, <<Ɔ mbwa-a!>> 18 Akwɛyi Ukpo a zɔ kawu mbala ɛyi ikpama, mbala i dungɔma, akwɛyi ɛzhi i wo akpa iyɛku iyi bɔkɔ i di wo dɛ mo tabɔkɔ Ukpo e wo onzu le; ɛzhi i dungɔma ɛlɛ ikika le. 19 Ɛzhi i dungɔma ɛlɛ i ka kwuse ungwɔkwu kwɔlɛ ma yaa ekpela, akwɛyi ese iyɛku iyi ekeshi lɛɛbi i shirimo. Ukpo ba e lolo mbaa Ɔbabilɔ kwuse ungwɔku akwɛyi Ukpo e shi mbo o wo ago iyi bɔkɔ i nyɔlɔma la amba wu umba umbakwu. 20 Itashi lɛɛbi i tomo ndii, lɔwa undɔkwuu ba o ma ndu fo ndii. 21 Akwɛyi akurungba iyɛku, ɔlu yi i yi mate ekilo uwɛkpɛlɔ tayi, i ngyi moshi i fu mu enzu umba bɔkɔ o pe Ukpo ari kwuwongu inyashi iyɛku iyi akurungba ɛlɛ, kwuwongu inyashi ɛlɛ akwu iyɛku.