1 Akwɛyi mi ma oshi uwepo mbala ɛzhi iyepo. Ɛzhi iyi iyi kwonze mbala oshi uwu kwonze i tomo, akwɛyi risu ri tomo tete. 2 Akwɛyi mi ma kwuse kɔ kɛrikɛri, Ɔzhɛrusalɛ uwepo, e yi mu ikalama moshi mbaa Ukpo, o nɔngɔ wu ma, kyamate okopo uwu bɔkɔ o wo wu agya ka le so le du ɔnu uwu tayi. 3 Mi pwa opwu uwɔkwuu u wɔ mbaa ukpa uwɛsu u yi mu iso isomo tee: <<Kwogba ungwu Ukpo kwu yi mbala enzu kekelele-e! Aa ŋɔ mbala mba, umba ba akwu enzu wu. Ukpo mafyi wu ee yi mbala mba, akwɛyi akwu Ukpo mbo. 4 A nwu mba ɛnyɛ ma meyi. Lukwu lu yi fo, ubugyi naa oga ilomo naa inyashi i yi fo. Apula iyekyi i kama-a.>>

5 Akwɛyi Ukpo uwu bɔkɔ a ŋɔma mu ukpa uwɛsu wu awu a zɔ tee, <<Kekelele mi wo apula iyepo!>> A gba za mi kpɔ tee, <<Ka yi ma, moo iso ɛlɛ akwu ongbulolo uwu o kwidu o fulo ma yi.>> 6 Akwɛyi a zɔ tee, <<O mbwa-a! Imi gba mi kwu Alifa mbala Omega le, iyomo mbala imbwama. Onzu uwunawuna uwu bɔkɔ ugbebi u wo wu mo mii shi wu embyi mbaa itumo iyi embyi kaa le wo rɛshi. 7 Enzu umba bɔkɔ o ri mo, o na ɛlɛ mbaa mi: Imi mii kwu Ukpo mbo, umba ba oo kwu ɛmɛ mi. 8 Enzu umba bɔkɔ oo wiyi, wa wo iri, wa wo apula iyi kashi, wa ngbɛ enzu mbala watokaya mbala wa wo emondo, wabyeshi mbala wa mulo, kizɛ mba akwu mu kwoba ungwu ɔyi mbala uzu uwɔyi, iyi bɔkɔ akwu lukwu undopo le.>>

9 Akwɛyi ukpɛnyi meka iyi alɔgbulɔ umba Ukpo werewo umba bɔkɔ o za laa lɔɔtu lorowo undu lu nyɔlɔma la ira ekperewo iyi imbwambwa awu e bo munyi mi akwɛyi a za mi tee, <<Bo akwɛyi mi zɔ ŋɔ Okopo, oko uwu Umɛ uwu Ilɔ awu.>> 10 Kwundu uwu Ukpo e fye mami, akwɛyi ɔlɔgbulɔ uwu Ukpo e to mi a ka mya mu ikerengbe iyi lɔwa undɔkwuu. A zɔ mi Ɔzhɛrusalɛ, kwuse kwɔ kɛrikɛri kwɔngu, kwu wɔ moshi mbaa Ukpo kwu yi mu ikalama 11 laa ilemo iyi inzumbɛku iyi Ukpo. Kwuse kwɔngu kwu lemo kyamate ekyi iyi abwa, kyamate ozhasipa, i wuluma sɛsɛsɛ kyamate umɛbɛ tayi. 12 Kwuse kwɔngu kwu yi kwukoga wɔzhi ungwɔkwu, mbala lunzugu uwo la lopo, alɔgbulɔ umba Ukpo wewo la wepo umba bɔkɔ o gbo lunzugu ndɔndu ma. Mu lunzugu ndɔndu o ka ɛnyi iyi lunzu uwo la lopo undu Izirɛ. 13 Kwuko ungwunanguna kwu yi lunzugu lola: lunzugu lola mu ɔnu uwu kwoto, lola mu okanga uwu ɔnu uwu onoyo, lola mu okanga uwu ɔnu uwu kwoto mbala lola mu ɔnu uwu onoyo. 14 Kwukoga ungwu kwuse kwɔngu o mbo ngwu mu ola uwu ekyi uwo la epo, mu ekyi ɛnyi o ka ɛnyi iyi wa zɛ ilɔ wewo la wepo umba Umɛ uwu Ilɔ awu. 15 Ɔlɔgbulɔ uwu Ukpo uwu bɔkɔ e so mi iso le a ra laa upi uwu egolu uwu kasa ikpama kaa la kpakwuse kwɔngu mbala lunzugu ngwu mbala kwukoga kasa. 16 Igɔ iyi kwuse kwɔngu akwu kyakya, wowa ngwu mbala wɔzhi ngwu akwu kyakya. Ɔlɔgbulɔ uwu Ukpo awu a kpa kwuse kwɔngu kasa mu upi uwu kasa ikpama: wɔzhi ngwu akwu emelu odubu la ederi ɛlɔ, wɔzhi ngwu mbala wowa ngwu mbala ibulɔma ngwu akwu kyakya. 17 Ɔlɔgbulɔ uwu Ukpo awu a kpa kasa unga kwukoga kwɔngu, wɔzhi ngwu akwu ata ederi epo laa uwo la ɛrɛnyi, a kpa kyamate bɔkɔ enzu o kpa kasa mu kwuye mba awu. 18 Kwukoga kwɔngu o mbo ngwu mu ozhasipa, kwuse kwɔngu ba o mbo mu egolu iyi i wuluma sɛsɛsɛ kyamate umɛbɛ tayi. 19 Ɔla uwu ekyi uwu kwukoga ungwu kwuse kwɔngu o wo yi agya mu ekyi iyi abwa ikikɔ ikikɔ. Ɔla uwu kwokyi ungwu kwonze akwu mu ozhasipa, uwopo akwu mu osafaya, uwola akwu mu agate, uwondo akwu mu ɛmiradi, 20 ungwɔlɔ akwu onisi, uwɔrɛnyi akwu mu okaneliya, uworowo akwu mu okwas, uworanda akwu mu ɔbɛri, uworondo akwu mu otopazi, uwuwo akwu mu oshalidoni, uwu uwo la kwukpɛnyi akwu mu Otukosi, uwuwo la uwopo akwu mu amɛtisi. 21 Lunzugu luwo la lopo ndɔndu o wo ndu mu lɔkyɛ; kenzugu unganangana o wo ngo mu kakyɛ. Ɔgwuzɛ uwu kwuse kwɔngu o wo wu mu egolu, u yi sɛsɛsɛ kyamate umɛbɛ tayi.

22 Mi ma ɔtɛpu mu kwuse kwɔngu mo, moo ɔtɛpu uwu kwuse kwɔngu akwu Ɔkwu Ukpo Edego ala mbala Umɛ uwu Ilɔ awu. 23 Kwuse kwɔngu kwu yi ugɔ uwu ɔnu naa ovya kaa li lemo mangwu mo, moo inzumbɛku iyi Ukpo i lemo ma ngwu, Umɛ uwu Ilɔ awu gba akwu kambu unga ɔyi ngwu le. 24 Enzu umba kwudu kwɔlɛ oo zɛ o mbwalu ɛbɛ ngwu. Asu umba kwudu kwɔlɛ o nya la apula iyi kwuwo mbo ma ngwu. 25 Lunzugu undu kwuse kwɔngu lu yi ɛwu kwuyengwunanguna, o koko ndu mo mo, kwuwongu utu u yi mɔmɔ mo. 26 inzumbɛku mbala kiya ingyi kwuwo ingyi ekeshi o nya ya mu kwuse kwɔngu. 27 Kiya ingyi bɔkɔ ki wuluma mo ba ki fye mu kwuse kwɔngu mo, naa onzu uwunawuna uwu bɔkɔ e wo apula iyi lovya naa a mwilo e fye mo. Enzu umba bɔkɔ ɛnyi mba o ka yi ma mu kwokpo ungwu enzu umba o ye la reyi ungwu Umɛ uwu Ilɔ awu kɛɛkyi gba o fye mu kwuse kwɔngu le.