1 Akwɛyi ɔlɔgbulɔ uwɔlɔ a kpa kwongangaraki wu. Akwɛyi mi ma kwulovyo ungwu bɔkɔ kwu tama mɛzhi awu, o shi ngwu anu iyi kwuvɔ ungwu indomo ngwu kwu yi ibɔma mo awu. 2 Kwulovyo kwɔngu kwu wu kwuvɔ ungwu indomo ngwu kwu yi i bɔma mo awu ma, akwɛyi uwu ugyi u wɔ mangwu kyamate uwu uwu kwoba ungwɔyi ungwɔkwu tayi; ɔnu mbala oshi u shi ipwu kwuwongu uwu uwu kwuvɔ kwɔngu. 3 Akwɛyi ekeza i wɔ mu uwu ɔnwu akwɛyi i kpo biri mu ɛzhi iyi kwudu kwɔlɛ, o shi mbo ekpasu kyamate iyi ana tayi. 4 O za mba tee lo wo ɔsɛ nana ɛwɛyi nana apula iyinayina ira mo; o za mba tee lo wo enzu umba bɔkɔ o yi kɛzɔ unga Ukpo mu undu mbo mo awu kɛɛkyi ira. 5 Ekeza ɛnyi o nya yi ma tee li ngbɛ enzu mbamba ma mo, o shi mbo te lo lo mbo inyashi iyi ɛvya ɛlɔ bi. Ɛnyi iyi bɔkɔ inyashi ɛnyi i bo yi, i yi kyamate bɔkɔ ena a la onzu mo tayi.

6 Mu ɛvya ɛlɔ ɛnyi, oo gagyi lukwu ba o fya ndu ma mo; o gyi tee lo kpomo, lukwu ba lu ri enya luu shi mbo. 7 Ekeza ɛnyi i yi kyamate anya umbinyi umba bɔkɔ o yi ɛnwu ma iyi ewa itomo tayi; o bɔ ɛnuma uwu bɔkɔ e yi kyamate ogolu te mu reshi mbo, ureyi mbo ba u yi kyamate uwu onzu tayi. 8 Inyi mbo iyi kyamate iyi ekokpayi tayi, ɛnyi mba ba i yi kyamate iyi obaga tayi.

9 Idu mbo o kpo yi kwoso ungwu bɔkɔ kwu yi kyamate kwokpata tayi, ekowo mbo ba i wanu kyamate ata iyi anya ribariba umba bɔkɔ o pyipyi ada iyi anya o sheyi mo mbaa ewa tayi. 10 O yi i zɛ mbala kɛtu unga bɔkɔ ke yi kyamate unga ena tayi, i zɛ mba ɛlɛ gba akwu ekpasu mba iyi bɔkɔ o ra yi oo wo enzu ira mu evya ɛlɔ ɛnyi le. 11 O yi ɔsu uwu bɔkɔ e yi mu ɛsu mba irimo, uwu gba akwu ɔlɔgbulɔ uwu bɔkɔ akwu u to keyi uwu kwuvɔ ungwu idomo ngwu kwu yi i bɔma mo awu. Ɛnyi wu mu kenzu unga Iburu akwu Abadɔ; mu Agiriki ba akwu Apoliyo (iluma yi akwu <<U ngbɛ ɛdɔ ma.

12 Inyashi iyi kenze ɛnyi i bo-o; inyashi ekpepo ba i nyɔ mizhikembo iyi ɛlɛ kpɔ.

13 Akwɛyi ɔlɔgbulɔ uwɔrɛnyi a kpa kwongangaraki wu. Mi pwa opwu u wɔ mu eko endo iyi kwumbu ungwu isabɔ ungwu ogolu ungwu bɔkɔ kwu rima mu idu iyi Ukpo awu. 14 Opwu ɔnwu u za laa ɔlɔgbulɔ uwɔrɛnyi uwu Ukpo awu tee, <<Lafya laa alɔgbulɔ wendo umba bɔkɔ o ma mba ma mu risu ingyɛkwu ingyi Oyufiriti ngyɛngyi!>> 15 Akwɛyi o lafya laa alɔgbulɔ wendo mbamba mu kwuye kwɔngu, mu kwɔfyi kwɔngu, mu ovya ɔnwu mu kari kanga pwa, o shi mbo kaa lo ngbɛ kuko kwukpɛnyi meka iyi eko ɛkpɛla iyi enzu ma. 16 Akwɛyi o so mi riba ingyi asozha umba bɔkɔ o ya mu kadu unga anya tee akwu ɛmiliyɔ ederi epo (200, 000, 000.) 17 Akwɛyi mu ɛbɛ mi, mi ma anya umbinyi mbala umba bɔkɔ o ya mamba: o kpa kwokpata kwofyobyo ungwu bɔkɔ kwu yi kyamate ɔyi te mu idu, akwu kwuwembyi kyamate kwoki ungwu o ya ngwu te osafiri tayi, kwu yi embyi kyamate ona tayi. Eshi iyi anya umba inyi mbamba i yi kyamate iyi abaga tayi, akwɛyi uwu mbala ɔyi mbala ɔyi uwɔkwu u wɔ mu kenzu mbo. 18 Kuko kwukpɛnyi meka iyi eko ɛkpɛla iyi enzu o ngbɛ mba ma mu ira ɛnyi: ɔyi, uwu mbala ɔyi uwɔkwu uwu u wɔ mu kenzu unga anya mbamba. 19 Moo ekpasu iyi anya mbamba i yi mu kenzu mbo mbala mu i zɛ mba tete. I zɛ mba i yi kyamate akwu umba o yi eshi tayi, inyi mba gba ba oo ra yi o nɛ enzu kanɛ le.

20 Enzu umba bɔkɔ o shimo bɔkɔ ira ɛlɛ i ngbɛ mba ma mo awu, o lafya laa apula iyi bɔkɔ o wo mu ewo mbo awu mo. O lafya a oya igbomo laa iyo uwoyi, na eshi iyi egolu, esiliva, esepo, ekyi, mbala ɛwɛyi, iyi bɔkɔ i mɛbɛ mo, naa i pwama mo, naa ii zɛma mo awu. 21 Umba tete o kwu ira ɔsu iyi enzu ingbɛma, emondo iwomo, kaya itomo mbala ɛlɔ iwuma mo.