1 Akwɛyi mi ma Ilɔ awu a mbwumbwu urɔ uwu kwonze ɔnwu ma meka iyi urɔ ekperewo ɛnyi, akwɛyi mi pwa opwu uwu ukpɛnyi meka iyi apula iyi bɔkɔ i ye la reyi ekpendo ɛnyi, opwu ɔnwu u wanu kyamate ina tayi, u zɔ tee, <<Bo!>> 2 Mi yese, akwɛyi mi ma onya uruwu mɔmɔ. Onzu uwu bɔkɔ a ya ma wu awu a ra laa kwoto, akwɛyi o shi wu ɛnuma, akwɛyi a wɔ kwudu kyamate onzu uwu bɔkɔ e rimo tayi. 3 Akwɛyi Umɛ uwu Ilɔ awu a mbwumbwu urɔ uwopo ma; akwɛyi mi pwa kiya ingyi ki ye la reyi ingyopo ngyɛngyi ki zɔ tee, <<Bo!>> 4 Akwɛyi onya ufyobyo uwufo a wɔ kwudu. O shi onzu uwu bɔkɔ a ya ma wu awu ekpasu kaa le bo la ewa itomo mu kwudu kwɔlɛ, kaa enzu lo ngbɛ esu mo. O shi wu ukpandɛrɛ uwakwuu. 5 Akwɛyi Umɛ uwu Ilɔ awu a wu urɔ uwola ma; ba mi pwa opwu uwu kiya ngyi ki ye la reyi ingyola ki zɔ tee, <<Bo!>> Mi yesemo, akwɛyi mi ma onya ugyi. Onzu uwu bɔkɔ a ya mawu le a ra la apula iyi oo mondo kiya ma yi. 6 Akwɛyi mi pwa opwu mekeka iyi apula iyi bɔkɔ i ye la reyi ekpendo ɛnyi, u zɔ tee, <<Omudu uwu Owiti ukpɛnyi akwu rigbɛ ingyi ɛduma iyi kwɔfyi kwukpɛnyi, emudu iyi ebali ekpela ba akwu rigbɛ ingyi ɛduma iyi kwɔfyi kwukpɛyi. Lunyi ba la lu tutu ɛwɛyi iyi olivu mbala utu wu ma mo!>> 7 Akwɛyi Ilɔ awu a mbumbu urɔ uwondo awu ma; akwɛyi mi pwa kiya ingyi ki ye la reyi ingyi ondo ngyɛngyi ki zɔ tee, <<Bo!>> 8 Mi yese, akwɛyi mi ma onya unzɔri uwu e ngyimo. Onzu uwu bɔkɔ a ya ma wu awu o ya wu te lukwu, aleku ba i mbwalu wu mu izhikembo kɛlɛkɛlɛ. O shi mbo ekpasu mu kwuko kwukpɛnyi meka iyi eko endo iyi kwudu kwɔlɛ kaa lo bo la ewa itomo, lonzu, efya mbala izɔfyi umbira kaa lo ngbɛ ngwu ɛdɔma.

9 Akwɛyi Umɛ uwu Ilɔ awu a mbumbu urɔ uwɔlɔ ma. Akwɛyi mi ma mɛzhi bɛtɛ iyi kwola ungwu isabɔ ɛnyɔ iyi enzu umba bɔkɔ o ngbɛ mba ma kwuwongu o tanu iyi iso iyi Ukpo mbala izɔgɔ izɔma. 10 Akwɛyi o wanu mu opwu uwɔkwu o zɔ tee, <<Ɔkwu Edego Ala, ɔkɛrikɛri mbala ongbulolo! Kwuye ungwuna bɔkɔ ŋɔ bi zɔ ombu uwu enzu umba kwudu kwɔlɛ kaa lo mbo inyashi kwuwongu bɔkɔ o ngbɛ nzu ma awu?>> 11 Uwewe mbo o shi wu origa uruwu, akwɛyi o za mba tee ɛnwu li gbo mbo mo li kyo bwɛ dɛ, kaa ɛmɛgba mbala wa mbwalu umbafo lo mbwamba ingbɛma dɛ kyamate bɔkɔ umba o ngbɛ mba tayi.

12 Akwɛyi mi ma Umɛ uwu Ilɔ awu tee a mbumbu urɔ uwɔrɛnyi ma. Ɛzhi i wakpa iyira, ɔnu ba u vindɔ ma akwɛyi u yi kyamate okpayi ugyi tayi, ovya ba u vindɔ ufyobo akwɛyi u yi kyamate ɛnzhi tayi. 13 Elovyo i kalama i fu mɛzhi, kyamate imuma iyi uwɛyi uwu oboriyo iyi bɔkɔ i mbomo mo akwɛyi i kalama i fu mɛzhi kwuyengwu bɔkɔ kwokpo ungwu ekpasu kwu wo yi akpa tayi. 14 Akwɛyi oshi u tomo ndii kyamate kwokpo ungwu bɔkɔ o kwungwu mo tayi, akwɛyi lɔwa undunanduna mbala kutashi ungwunaguna o pya yi ma o shi riyi yi. 15 Akwɛyi asu mbala wa to keyi umba kwudu kwɔlɛ, wa to keyi umba asozha, wa yi kwuwo mbala umba ekpasu, mbala enzu lɛɛbi, enye mbala umba bɔkɔ akwu enye mo, o nvye ɛmba ma mu efyo iyi ekyi mbala lɔwa. 16 O za la lɔwa mbala ekyi tee, <<Shiri kaa kpo ma nzu kaa nvye nzu mo mbaa onzu uwu bɔkɔ a ŋɔma mu ukpa uwɛsu awu mbala amba umba Umɛ uwu Ilɔ awu! 17 Moo kwɔfyi ungwoyi ungwu amba mba kwu bo o, uwe bɔkɔ e do tee aa rima?>>