1 Akwɛyi mi ma izɔfyi tee e yi mu iwɔma mu risu. E yi ilɔ uwo mbala eshi erewo; kwulɔ ungwunanguna kwu yi ɛnuma ngwu, reshi ingyinangyina ba ki yi ɛnyi iyi bɔkɔ i pye Ukpo ari. 2 Izɔfyi uwu mi ma ele e yi mate ikye tayi, atakɛzhi wu i wɔ iyi izɔfyi uwu o ya wu te ɔbiyɛ, kenzu ke yi mate unga ɔbaga tayi. Ɔduragɔ ele e shi izɔfyi ele ekpasu wu, mbala ukpa wu, mbala idomo iyɛku. 3 Reshi rikpɛnyi meka iyi eshi erewo iyi izɔfyi ele, ri yi mate o nɛ ngyi kanɛ ungakwu tayi, ofya mbɔlɛ ba u bomo-o. Izele i wo enzu umba kwudu kwɔlɛ lɛɛbi ma akwɛyi o mbwalu izɔfyi ele. 4 Enzu lɛɛbi o gbo oya laa ɔduragɔ ele kwuwongu e shi izɔfyi ele idomo wu. Enzu mbɔlɛ o gbo oya tete laa izɔfyi ele, ɔ zɔ tee, <<Uwe ba e yi mate izɔfyi ele? Uwe ba e do ewa itomo mbala wu?>>

5 Izɔfyi ele o shi wu ekpasu te le kwɛnwu kaa le pye Ukpo ari, o shi wu kapa unga e wo ɛduma mu idomo wu evya uwekpendo laa evya epo tete. 6 Akwɛyi e le mu Ukpo ari ikpama, kala ɛnyi wu, riyi ingyi bɔkɔ e yi, mbala umba bɔkɔ o yi moshi lɛɛbi. 7 O shi wu ekpasu kaa le to ewa mbala enzu umba Ukpo kaa le ri mbo mo, akwɛyi o shi wu idomo meka iyi ɛdɔ iyinayina, laa ɛzhi iyinayina, laa kenzu unganangana, mbala enzu umbanambana. 8 Enzu lɛɛbi umba bɔkɔ o yi mu kwudu kwɔlɛ o gbo awu oya , enzu umba bɔkɔ ɛnyi mba o ka yi ma mu kwokpo ungwu kwunyɔ dɛ gba o wo kwudu kwɔlɛ le awu gba o gbo wu oya mo le. Kwokpo ungwu kwunyɔ kwɔlɛ gba akwu ungwu Umɛ uwu Ilɔ uwu bɔkɔ o gbɛ wu ma awu.

9 <<Onzu uwu e yi alu iyi ipwama, ba la pwa!

10 Onzu uwu bɔkɔ o ka yi tee o yi wu mo mega o yi wu mo; onzu uwu bɔkɔ ukpandɛrɛ gba a ngbɛ wu le; mega ukpandɛrɛ gba a ngbɛ wu le. Ɛlɛ te i gyi idu iyimo mbala ikwu idu lu fulo meka iyi enzu umba Ukpo.

11 Akwɛyi mi ma izɔfyi uwufo, uwu bɔkɔ a wɔ mu ɛzhi. E yi ilɔ epo mate ilɔ iyi oturukpe tayi, akwɛyi e siso mate ɔduragɔ awu tayi. 12 E wo ɛduma mu idomo iyɛku iyi izɔfyi uwu kwonze awu la eye wu. Kwudu mbala enzu umba bɔkɔ o nɔ mangwu, e wo mbo megaa tee lo gbo oya la izɔfyi uwu kwonze uwu bɔkɔ kanɛ wu ke bo mo-o awu. 13 Izɔfyi uwopo ele e wo apula iyi izele iyi iyɛku; e shi kaa ɔyi lu wɔ moshi u bo mɛzhi leyi iyi uwewe. 14 Akwɛyi e kyoro enzu lɛɛbi umba bɔkɔ o yi mu kwudu kwɔlɛ kwuwongu apula iyi amɛ iyi bɔkɔ o shi wu ekpasu te le wo leyi iyi izɔfyi uwu kwonze awu. Izɔfyi ele a za mba te lo mbo u wɔ kaa lo shi umwɔ laa izɔfyi uwu bɔkɔ ukpandɛrɛ a nɛ wu kanɛ dɛ-ɛ ba e ye lakwunyɔ awu. 15 Ukpo e shi izɔfyi uwopo awu te le shi u wɔ awu kwunyɔ laa izɔfyi uwu kwonze awu, kaa u wɔ awu le siso akwɛyi i gba i ngbɛ enzu lɛɛbi ma umba bɔkɔ o nyama te oo gbo wu oya mo. 16 Izɔfyi ele e wo enzu mega, la enzu umbɛri laa umbakɔ, umba bɔkɔ o yi kwuwo laa ayirewa, enye laa umba bɔkɔ akwu enye mo, tee lo na kɛzɔ mu kwuwo ungwungyi mbo naa kwudu mbo. 17 Onzu uwunawuna e do te e to kiya a ya ma naa a ya kiya mo akwiyi gba e yi kwɔzu kwɔngu mo, inyi gba akwu ɛnyi iyi izɔfyi nana iwama iyi ɛnyi ɛnyi le,

18 Ɛlɛ te i gagyi ilukwu. Onzu uwunawuna uwu bɔkɔ e yi amasa e do te e yi iluma iyi iwama iyi izɔfyi ele, kwuwongu iwama ɛnyi akwu ɛnyi iyi onzu. Iwama ɛnyi akwu 666.