1 Mizhikembo iyi ɛlɛ mi pwa anu kyamate anu iyi riba ingyi enzu moshi, tee, <<Iduma lakwu iyi Ukpo! Isama, inzumbɛku, mbala ekpasu la akwiyi Ukpo nzu! 2 Ototo mbala ongbulolo gba akwu ombu izɔma wu le. A ngbɛ u to kaya uwu bɔkɔ e tutu kwudu kwɔlɛ ma mu kaya wu awu ɛdɔma-a. Ukpo e lo wu inyashi kwuwongu a ngbɛ ɛmɛgba wu ma.>> 3 O gba o wo anu kpɔ tee, <<Iduma akwiyi Ukpo! Uwu uwɔyi uwu bɔkɔ u yi mu kwuse ungwɔkwu kwɔngu ipwumo awu u ka moshi iyɔkpɔɔ ba ɔkpɔɔ!>> 4 Enzumbakɔ uwekpepo la wendo mbala apula iyi bɔkɔ i fɛnyɔ ekpendo ɛnyi i kpo mbamba mɛzhi akwɛyi o gbo Ukpo, uwu bɔkɔ a ŋɔma mu ukpa uwɛsu ɔya. O zɔ te, <<Li yi tayi! Iduma lakwu iyi Ukpo!>>

5 Akwɛyi opwu u wɔ mbaa ukpa uwɛsu, u zɔ te, <<Iduma akwiyi Ukpo nzu, ɛmɛgba wu mbala enzu lɛɛbi, ikyo enzumbakɔ mbala enzu umbɛri, umba bɔkɔ o yi iyi wu awu!>> 6 Akwɛyi mi pwa anu kyamate riba ingyi enzu tayi, kyamate embyi o yi mu ikalama moshi tayi, kyamate ina. Mi pwa o zɔ te, <<Iduma lakwu iyi Ukpo! Moo Ɔkwu, Ukpo nzu Edego ala, akwu Ɔsu! 7 La ki mwɔnyɛ la ki yi ubwu uruwu; la ki du wu ma kwuwongu imbwulama wu! Moo kwuye kwu bo-o ungwu bɔkɔ o wo okopo uwu Umɛ uwu Ilɔ, okopo wu ba e yi ɛnwu ma kwuwo yi-e. 8 Ukpo ba e shi wu okpayi uwu ɔlinɛ uwu a wuluma sɛsɛsɛ-ɛ.>> (Ɔlinɛ awu akwu ɛduma iyeshi iyi enzu umba Ukpo.)

9 Akwɛyi ɔlɔgbulɔ uwu Ukpo a za mi tee, <<Ka ɛlɛ ma: Ɔnyɛ akwu uwu enzu umba bɔkɔ o ya mba ma tee lo bo mu odumudumu uwu okopo uwu Umɛ uwu Ilɔ.>> Ɔlɔgbulɔ uwu Ukpo awu e so kpɔ te, <<Ɛlɛ gba akwu ongbulolo uwu iso iyi Ukpo le.>>

10 Mi kpo eyi mɛzhi midu wu kaa mi gbo wu ɔya, uwu ba a za mi tee, <<Ki wo tayi mo! Imi tete mi kwu umɛgba kyamate uŋɔ mbala wa mbwalu umbafo tayi, enzu lɛɛbi umba bɔkɔ o ra la ongbulolo uwu bɔkɔ Ɔzhizɔsi a wawu kwudu. Lo gbo Ukpo ɔya kɛɛkyi!>>

Moo ongbulolo uwu bɔkɔ Ɔzhizɔsi a wawu kwudu awu gba akwu kiya ingyi ki shi anukenzu ekpasu le.

11 Akwɛyi mi ma oshi u wuma, akwɛyi mi ma Onya uruwu mɔmɔ. Onzu uwu bɔkɔ a ya ma wu ele o ya wu te Ikwidufulo mbala Ongbulolo; mu ototo wu gba a zɔ ombu mbala ewa itomo wu le. 12 Eyi wu i yi kyamate ɔtinɛ uwu ɔyi te, akwɛyi a bɔ anuma umba riba mu reshi wu. E yi ɛnyi iyi o ka mɛnwu wu, onzu ukpukpɛnyi te ba e yitu yi mo, uwu kɛɛkyi gba e yitu yi le. 13 Ekpayi iyi bɔkɔ e lo le o lo yi mu ɛnzhi. Ɛnyi wu akwu <<Iso iyi Ukpo.>> 14 Asozha umba oshi o ya mu anya umba inyi iruwu o mbwalu wu akwɛyi o lo ekpayi iruwu sɛsɛsɛ iyi ɔlinɛ. 15 Ukpandɛrɛ uwu irimo a wɔ mu kenzu wu, mawu gba a byi ekeshi ma le. E ri ɛsu mu kwuwo ungwu ekpasu, a kpa agewa wu ata kyamate bɔkɔ onzu a kpa imuma iyi uwɛyi ata tayi. E wo ɛlɛ kwuwongu Ukpo Edego ala e wo amba. 16 Mu ekpayi wu mbala ubwu uwu kwɔlɛ wu i yi ɛnyi iyi bɔkɔ o ka tee: <<Ɔsu uwu asu mbala Ɔkwu uwakwu.>>

17 Akwɛyi mi ma ɔlɔgbulɔ uwu Ukpo uwufo tabɔkɔ a ri mu kadu unga ɔnu. E wo anu mu opwu uwɔkwuu a ya afyi umboshi umba bɔkɔ o o yi mu iyimo moshi awu ma te: <<La lu bu kpala ɛlu mbaa odumudumu uwu Ukpo uwakwuu ele! 18 La lu bo kaa la lu kwu ivye iyi asu, asozha umbakɔ, mbala asozha umbɛri, ivye iyi anya mbala umba bɔkɔ o ya ma anya umba inyi, ivye iyi enzu lɛɛbi, enye mbala umba bɔkɔ o kwu enye mo, umbakwu mbala umbɛri!>>

19 Akwɛyi mi ma izɔfyi awu mbala asu umba kwudu kwɔlɛ mbala asozha umba o kpala ɛlu kaa lo to ewa mbala onzu uwu bɔkɔ a ya mu kadu unga Onya uwu inyi awu mbala asozha wu. 20 Izɔfyi awu Ukpo a ta wu mu ugu ugyi, mbala anukenzu u mwilo uwu bɔkɔ e wo apula iyi amɛ mu idu mbo awu. (I zɛ meka iyi apula iyi amɛ ɛnyi gba e kyoro enzu umba bɔkɔ o yi kwɔzu ungwu izɔfyi awu mbala enzu umba bɔkɔ o gbo uwɔ uwu izɔfyi awu ɔya.) Izɔfyi awu mbala anukenzu uwu imwilo awu kpɛkpɛ mba o to mbo la reyi o fu mba mu kwoba ungwɔyi ungwu bɔkɔ kwu pwumo laa uzu ɔyi. 21 Ukpo a ngbɛ asozha mba ma mu ukpandɛrɛ uwu bɔkɔ a wɔ mu kenzu unga onzu uwu bɔkɔ a ya mu kadu unga Onya uwu inyi awu; akwɛyi afyi umboshi lɛɛbi o kwu ivye mba nzhii ba ɛnwu i kwu mbo mo.