1 Akwɛyi mi ma ɔlɔgbulɔ uwu Ukpo a wɔ moshi e yi mu inyɔma mɛzhi, a rala anu iyi kwuvɔ ungwu indomo ngwu kwu yi ibɔma mo mbala ɛyɛ iyɛku mu kwuwo wu. 2 Akwɛyi e yi ɔduragɔ awu ma, ɔkwu uwekyi awu, Onzu uwoyi awu, naa Osheta, akwɛyi e lo wu ɛyɛ nzhii ba lɔri odubu. 3 Ɔlɔgbulɔ uwu Ukpo awu a ta wu mu kwuvɔ ungwu indomo ngwu kwu yi ibɔma mo awu, e koko ngwu mo akwɛyi e lo ngwu mo, kaa le kyoro enzu umba kwudu kwɔlɛ ma fo nzhii ba lɔri odubu lu pikama. Mizhikembo iyi ɛlɛ o lu wu afyima iyi kwuye bwɛɛ.

4 Akwɛyi mi ma ikpa iyɛsu, enzu umba bɔkɔ o ŋɔma ma yi awu o shi mbo ekpasu kaa lo zɔ ombu. Mi gba mi ma enzu umba bɔkɔ o ngbɛ mba ma kwuwongu o ta anu iyi ongbulolo uwu bɔkɔ Ɔzhizɔsi a wa wu kwudu mbala iso iyi Ukpo. O gbo oya la izɔfyi awu naa uwɔ wu dɛ-ɛ mo, nana o na kwɔzu ungwu izɔfyi mu undu mbo naa ewo mbo mo. O gba la eyi inyima akwɛyi o ri ɛsu mbala Okrasi nzhii ba lɔri odubu. 5 (Enzu umba bɔkɔ o shi mo bɔkɔ o kpomo awu o gba la eyi inyima mo nzhii ba lɔri odubu lu pikama dɛ.) Ɛlɛ gba akwu iyimo mu kwuvɔ iyi kwonze iyi enzu umba bɔkɔ o kpomo le. 6 Ɔnyɛ mbala Ɔkɛrikɛri uwakwuu akwu uwu enzu umba bɔkɔ o kyo mu iyimo mu kwuvɔ iyi kwonze. Lukwu undopo lu yi ekpasu mamba fo; o kwu ebwoshi umba Ukpo mbala umba Okrasi, akwɛyi o ri ɛsu mbala wu lɔri odubu.

7 Mizhikembo iyi lɔri odubu lu ka ma, ɔlɔgbulɔ uwu Ukpo awu a wa la Osheta ma mu ugu ugyi, 8 akwɛyi Osheta a wɔ kwudu e re mbaa ekeshi umba kwudu kwɔlɛ lɛɛbi e kyoro mbo mo, inyi gba akwu, Ɔgɔgi mbala Ɔmagɔ le. Osheta a kpala mba ɛlu kwuwongu ewa itomo, riba mba ri yi kyamate ɔgyɛ uwu risu tayi. 9 Asozha o fu kwudu akwɛyi o lo enzu umba Ukpo mbala kwuse ungwu bɔkɔ Ukpo e pwu idɛnyi ngwu awu kwukpo. Ɔyi ba u wɔ moshi akwɛyi u pwu mbo mo. 10 Akwɛyi Onzu uwoyi, uwu bɔkɔ e kyoro mbo mo awu, o towo pyo o ta mu kwoba ungwu ɔyi mbala uzu uwu ɔyi, mbaa bɔkɔ izɔfyi awu mbala anukenzu u mulo o ta mba mɔmɔ-ɔ awu; umba ba o ma inyashi la utu la ɔnu iyɔkpɔɔ ba ɔkpɔɔ.

11 Akwɛyi mi ma ukpa uwɛsu uruwu uwakwuu mbala onzu uwu bɔkɔ a ŋɔma ma wu. Akwɛyi oshi mbala ɛzhi i tomo midu wu akwɛyi o gba o ma yi fo. 12 Akwɛyi mi ma enzu umba bɔkɔ o kpomo-o, la enzu umbakwu la umbɛri, o rima mu keyi unga ukpa uwɛsu. O wu ekpo mo akwɛyi o gba o wu kwokpo unguwufo ungwu kwunyɔ ma. Akwɛyi o zɔ ombu uwu enzu umba bɔkɔ o kpomo mu ɛduma iyi bɔkɔ o wo, kyamate bɔkɔ o ka yi ma mu ekpo ɛnyi awu. 13 Akwɛyi risu ri wala enzu umba bɔkɔ o kpomo ma ngyi awu. Lukwu mbala aleku i wala ɛkpɛzhi mba kwudu tete. Akwɛyi o zɔ yi ombu mu ɛduma iyi bɔkɔ i wo. 14 Akwɛyi o to lukwu mbala aleku pyo o ta mu kwoba ungwɔyi. ( Kwoba ungwɔyi kwɔlɛ gba akwu lukwu undopo le.) 15 Onzu uwunawuna uwu bɔkɔ o ka ɛnyi ma mu kwokpo ungwu Kwunyɔ mo o to wopyo o ta mu kwoba ungwɔyi.