1 Akwɛyi mi ma kwokpo mu kwuwo ungwungyi ungwu onzu uwu bɔkɔ a ŋɔma mu ukpa uwɛsu awu, kwokpo kwɔlɛ kwu yi ɛzu mɛmi mbala kwudu akwɛyi o kwungwumo akwɛyi o sengwu mo mu urɔ mu riyi ekperewo. 2 Akwɛyi mi ma ɔlɔgbulɔ uwakuu uwu Ukpo, uwu a tanu mu opwu uwɔkwu tee, <<Uwe e domo te la mbumbu urɔ ɔlɛ ma akwɛyi aa wu kwokpo kwɔlɛ ma?>> 3 Laa oshi, laa ɛzhi, laa mɛmi iyi ɛzhi ba o fya onzu uwu e domo tee aa wu kwokpo kwɔlɛ ma kaa le yese ɛmi ngwu mo. 4 Mi lɔga iyɛkɔkɔ kwuwongu o fya onzu uwu e domo tee laa wu kwokpo kwɔlɛ ma naa le yese ɛmi ngwu mo. 5 Akwɛyi onzu uwakɔ ukpɛnyi meka iyi enzu umbakɔ uwekpepo la wendo mbamba a za mi tee, <<Ki lɔga mo. Yese! Ɔbaga uwu ɛdɔ iyi Ozhuda, uwu a wɔ mu ɛdɔ iyi Odevidi awu, e to ewa e rimo o. E domo te aa mbumbu urɔ erewo ɔlɛ ma akwɛyi a wu kwokpo kwongwu ma.>>

6 Akwɛyi mi ma umɛ uwu ilɔ tee a rima mekeka iyi ukpa uwɛsu ele mbala apula iyi bɔkɔ i ye la reyi ekpendo ɛnyi mbala enzu umbakɔ mbamba. Ilɔ awu e yi kyamate o ngbɛ wu ma a tayi. E yi ilɔ erewo mbala eyi erewo iyi bɔkɔ akwu ɛndu erewo iyi Ukpo iyi bɔkɔ o lɔ yi ma tee li so munamuna mu kwudu kwɔlɛ awu. 7 Umɛ uwu ilɔ awu a ka na kwokpo kwɔngu ma mu kuwo ungwungyi ungwu onzu uwu a ŋɔ mu ukpa uwɛsu. 8 Tabɔkɔ a na ngwu ma, akwɛyi apula iyi i ye la reyi endo ɛlɛ mbala enzu umbakɔ uwekpepo la wendo mbɔlɛ, o fo mbamba mɛzhi mu idu iyi Umɛ uwu Ilɔ awu. Uwewe mbo a ra la kumburu mbala lɔbulɛ undu egolu undu bɔkɔ o nyɔlɔ nduma mu apula iyi umbwɔ ferere, ɛlɛ gba akwu kyamate Ukpo ilɛma uwu enzu umba Ukpo le.

9 Akwɛyi o so kwɔmu ungwepo tee:

<<Uŋɔ gba ŋɔ fate to kwokpo kwɔngu ma

akwɛyi ŋɔ mbumbu urɔ ngwu ma kaa wu ngwu ma le.

Moo o ngbɛ ŋɔ ma akwɛyi kwuwongu lukwu undu isabo undu ŋɔ kpo,

ŋɔ ya enzu umba ɛdɔ ikikɔ ikikɔ, lunzu ikikɔ ikikɔ, ɛzhi ikikɔ ikikɔ, mbala enzu ikikɔ ikikɔ ma,

akwɛyi ŋɔ ka mba laa Ukpo.

10 Ŋɔ wo mbo o kwu uzhi uwu ebwoshi umba bɔkɔ o wo ɛduma laa Ukpo

akwɛyi o ri ɛsu iyi kwudu kwɔlɛ.>>

11 Mi gba mi yese, akwɛyi mi pwa opwu uwu alɔgbulɔ umba Ukpo guruguru tee o fula ukpa uwɛsu, mbala apula iyi i ye la reyi ekpendo ɛlɛ, mbala enzu umbakɔ mbɔlɛ ma, 12 laa amu isomo mu opwu uwɔkwu tee:

<<Umɛ uwu Ilɔ uwu bɔkɔ o ngbɛ wu ma awu e domo tee

lo shi wu idomo, mbala kiya ingyi kwuwo, mbala ilukwu, mbala ekpasu,

mbala iduma, mbala inzumbɛku, mbala ipwɔma!>>

13 Akwɛyi mi pwa kiya ingyinangyina ingyi ki yi moshi, mbala mu kwudu kwɔlɛ, mbala mu mɛmi iyi ɛzhi, mbala risu, apula lɛɛbi iyi bɔkɔ i yi ma yi, i so amu tee:

<<Kwupwɔ, mbala iduma, mbala inzumbɛku, mbala idomo akwiyi onzu uwu a ŋɔ mu ukpa uwɛsu awu, mbala Umɛ uwu Ilɔ awu iyɔkpɔɔ ba ɔkpɔɔ!>> 14 Akwɛyi apula iyi i ye la reyi ekpendo ɛnyi i gba opwu tee, <<Li yi tayi!>> Akwɛyi enzu umbakɔ mbamba o kpo eyi mɛzhi akwɛyi o gbo wu ɔya.