1 Akwɛyi ukpɛnyi meka iyi alɔgbulɔ werewo umba bɔkɔ o yi lɔɔtu lorowo awu e bo munyi mi akwɛyi a zɔ tee, <<Bo, akwɛyi mi zɔ ŋɔ ewo iyi bɔkɔ u to kaya ogiga awu o lo wu inyashi, kwuse ungwu bɔkɔ o mbo ngwu kɛlɛ mbala ɛkwu awu. 2 Asu umba kwudu kwɔlɛ o to kaya mbala wu, akwɛyi enzu umba kwudu kwɔlɛ o wo atɛ o yi mbo mo, atɛ umba kaya itomo mbala wu.

3 Kwundu e fye ma mi, akwɛyi ɔlɔgbulɔ uwu Ukpo e to mi a ka mu ɛzhi ɛngbarara. Akwɛyi mi ma okokpayi mɔmɔ tee a ŋɔma mu izɔfyi ufyobyo uwu bɔkɔ ɛnwu wu lɛɛbi o ka ɛnyi iyi bɔkɔ i pe Ukpo ari; izɔfyi awu e yi eshi ekperewo mbala ilɔ uwo. 4 Okokpayi awu e lo apula ifyobyo, iyi bɔkɔ o ki yi egolu, ekyi iyi abwa mbala apula iyi abwa. A rala ago iyi egolu mu kwuwo wu iyi bɔkɔ i nyɔlɔma laa apula iyi kashi mbala ɛnyinyi, iyi bɔkɔ i shi wu e to kaya. 5 Mu undu wu o ka ɛnyi iyi kwunvyeru iyi bɔkɔ iluma yi akwu: <<Ɔbabilɔ Uwakwuu, anyi uwu atokaya lɛɛbi mbala apula iyi kashi iyi kwudu kwɔlɛ.>> 6 Akwɛyi mi ma oko awu te ɛnzhi umba enzu umba Ukpo mbala ɛnzhi umba enzu umba bɔkɔ o ngbɛ mba ma kwuwongu anu itama iyi Ɔzhizɔsi o yi wu mo tayi.

Tabɔkɔ mi ma wu, akwɛyi mi ya kenzu gyɔɔ. 7 Akwɛyi ɔlɔgbulɔ uwu Ukpo awu e yo mi kwuyo tee, <<Kimbe ki shi ba ŋɔ ya kenzu?>> <<Imi mi wu ŋɔ kwunvyeru ungwu oko le ma mbala izɔfyi uwu bɔkɔ e shi wu awu, izɔfyi uwu bɔkɔ e yi eshi erewo mbala ilɔ uwo awu. 8 Izɔfyi awu e yi la reyi dɛ-ɛ, kekelele ba e yi la reyi fo; a ŋa wɔ mu kwuvɔ ungwu indomo ungwu kwu yi ibɔma mo awu akwɛyi e re mbaa o ngbɛ wu ɛdɔma. Enzu umba bɔkɔ o yi mu kwudu kwɔlɛ umba bɔkɔ o ka ɛnyi mba ma mu kwokpo ungwu kwunyɔ dɛ gba o wo kwudu kwɔlɛ le awu, o ya kenzu tabɔkɔ o yese izɔfyi awu. E yi la reyi dɛ-ɛ; kekelele ba e yi la reyi fo, uwu ba a gba a wɔ kpɔ.

9 Iso ɛlɛ i gyi ilukwu mbala izɔngɔma. Eshi erewo ɛnyi akwu edudu erewo, iyi bɔkɔ oko awu a ŋɔma ma yi. Eshi erewo ɛnyi akwu asu werewo tete: 10 Asu mba walɔ o kpo mo-o, ukpɛnyi e yi mu ɛsu irimo bɛnɛ, uwufo ba e de bo mo bɛnɛ; kwuyengwu e bo, e ri ɛsu kwuye bwɛɛ bi. 11 Izɔfyi uwu bɔkɔ e yi la reyi dɛ-ɛ, kekelele ba e yi la reyi fo awu, uwu mafyi wu gba akwu ɔsu uwu oranda uwu bɔkɔ akwu ukpɛnyi meka iyi werewo mbamba akwɛyi o ngbɛ wu ɛdɔma ma. 12 <<Ilɔ uwo iyi bɔkɔ ŋɔ ma awu akwu asu wewo umba bɔkɔ o ye la ɛsu irimo mo bɛnɛ, umba ba o shi mbo idomo iyi ɛsu irimo mu kwuye bwɛɛ kya mbala izɔfyi awu. 13 Asu wewo mbɔlɛ egbo mbo akwu ikpɛnyi, akwɛyi o shi ekpasu mba mbala idomo mbo laa izɔfyi awu. 14 O to ewa mbala Umɛ uwu ilɔ awu; Umɛ ilɔ awu mbala enzu umba bɔkɔ a ya mba ma, a ŋa mba, a nyama la mba ba o byi mba ma.>> Kwuwongwu uwu gba akwu Ɔkwu uwu akwu mbala Ɔsu uwu asu le.

15 Akwɛyi ɔlɔgbulɔ uwu Ukpo awu a gba a za mi tee, <<Embyi umba bɔkɔ ŋɔ ma awu, umba bɔkɔ u to kaya a ŋɔ mamba awu, akwu ɛzhi, enzu, ɛdɔ mbala lunzu. 16 Ilɔ uwo iyi bɔkɔ ŋɔ ma yi awu mbala izɔfyi awu o wo anya iyi oko u to kaya awu; o kwu apula lɛɛbi iyi bɔkɔ e yi yi awu ma akwɛyi o lu wu afyima la uzhi uwidɔɔ; o kwu ivye iyi ɛnwu wu ma akwɛyi o pwu wu mo mu ɔyi. 17 Moo Ukpo e to egbo ɛnyi a ta yi mba mu egbo mbo-o, kaa lo wo iyi bɔkɔ a gyi laa egbo ikpɛnyi akwɛyi o shi izɔfyi awu ekpasu mba kaa le ri ɛsu nzhii ba kwuyengwu iso iyi Ukpo i nyɔlɔma.

18 <<Oko uwu bɔkɔ ŋɔ ma awu akwu kwuse ungwɔkwu kwɔngu ungwu bɔkɔ kwu ri ɛsu meka iyi asu umba kwudu kwɔlɛ lɛɛbi.>>