1 Kwuye ungwu bɔkɔ Umɛ uwu Ilɔ awu a mbwumbwu urɔ uworowo ɔnwu ma, akwɛyi oshi u gbo ndii nzhii ba kwurizhi ungwu awa ikpɛnyi. 2 Akwɛyi mi ma alɔgbulɔ umba Ukpo werewo mbamba o rima mu idu iyi Ukpo, akwɛyi o shi mbo angangaraki erewo. 3 Ɔlɔgbulɔ uwu Ukpo uwufo uwu bɔkɔ a ra la kaatu unga ogolu laa apula iyi umbwɔ ferere mɛmi awu, e bo a rima mu keyi unga kwumbu ungwu isabɔ. O shi wu otulare gyɔɔ kaa le kyo mu Ukpo ilɛma iyi enzu umba Ukpo lɛɛbi kaa le wo yi mu kwumbu ungwu isabɔ ungwu ogolu ungwu bɔkɔ kwu ri mu keyi unga ukpa uwu ɛsu uwu Ukpo awu. 4 Uwu uwu apula iyi umbwɔ ferere iyi bɔkɔ u wɔ mu ewo iyi ɔlɔgbulɔ uwu bɔkɔ a rima mu idu iyi Ukpo awu mbala Ukpo ilɛma iyi enzu umba Ukpo i ka moshi. 5 Akwɛyi ɔlɔgbulɔ awu e to kaatu unga otulare kanga, e to ɔyi mu kwumbu ungwu isabɔ kwɔngu akwɛyi a nyɔlɔ nga ma mbala ɔyi, akwɛyi e fu wu mu ɛzhi iyi kwudu kwɔlɛ. Akwɛyi ina i tara anu, la kawu imingɔma, akwɛyi ɛzhi i wakpa iyɛkɔkɔ.

6 Akwɛyi alɔgbulɔ umba Ukpo werewo mbamba o yi ɛnwu ma kaa lo kpa angangaraki ɛnyi.

7 Ɔlɔgbulɔ uwu kwonze a kpa kwongangaraki wu. Akwɛyi akurungba mbala ɔyi, ikyo mbala ɛnzhi, i fu mɛzhi mu kwudu kwɔlɛ. Kuko kwukpɛnyi meka iyi eko ɛla iyi kwudu kwɔlɛ, ɔyi i pu ngwu mo, kuko kwukpɛnyi meka iyi eko ɛla iyi ɛwɛyi mbala ɔsɛ uwu ewu u pu mo lɛɛbi. 8 Akwɛyi ɔlɔgbulɔ uwu Ukpo uwopo a kpa kwongangaraki wu. Akwɛyi kiya ingyi bɔkɔ ki yi kyamate lɔwa undɔkwuu undu bɔkɔ lu yi mu ipwumo tayi, o to ngye pyo o ta mu risu. Akwɛyi kuko kwukpɛnyi meka iyi eko ɛla iyi risu kwu vindɔ ɛnzhi, 9 kuko kwukpɛnyi meka iyi eko ɛla iyi apula iyi bɔkɔ i ye la reyi mu risu i kpomo, kuko kwukpɛnyi meka iyi eko ɛla iyi ada iyi embyi ba i kpɛdɔma.

10 Akwɛyi ɔlɔgbulɔ uwɔla a kpa kwongangaraki wu. Akwɛyi kwulovyo ungwɔkwu, ungwu kwu yi mu ipwumo kyamate kambyɔyi tayi awu, kwu kala moshi kwu ta mu kuko kwukpɛnyi meka iyi eko ɛla iyi ɛkwu mbala itumo iyi embyi. 11 (Ɛnyi iyi kwulovyo kwɔngu akwu <<Wɔnu.>>) Kuko kwukpɛnyi meka iyi eko ɛla iyi embyi kwu zɛ wɔnu, enzu gyɔɔ ba o kpomo kwuwongu bɔkɔ o wo embyi mbamba, kwuwongu embyi mbamba o zɛ wɔnu. 12 Akwɛyi ɔlɔgbulɔ uwondo a kpa kwongangaraki wu. Akwɛyi kuko kwukpɛnyi meka iyi eko ɛla iyi ɔnu o fya ngwu kiya, la kuko kwukpɛnyi meka iyi eko ɛla iyi ovya, mbala elovyo, akwɛyi kuko kwukpɛnyi meka iyi eko ɛla iyi ɛbɛ yi i tomo; kuko kwukpɛnyi meka iyi eko ɛla iyi utu mbala ɔnu, ɛbɛ yi i tomo tete.

13 Akwɛyi mi yese, akwɛyi mi pwa okpakukpaku ukpɛnyi uwu bɔkɔ e yi mu luzɛ moshi a wanu mu opwu uwɔkwu tee, <<Kyakwokwo kyakwokwo! Ikyakwokwo akwiyi enzu umba bɔkɔ o ŋɔ mu ɛzhi iyi kwudu kwɔlɛ kwuyengwu bɔkɔ alɔgbulɔ wala o bo kpa angangaraki mba awu!>>