1 Akwɛyi mi ma ɔlɔgbulɔ uwu Ukpo uwu ekpasu uwufo a wɔ moshi e yi mu inyɔma mɛzhi. Amu i koko wu mo ɔwɔ ba u fula reshi wu mo; eyi wu i yi kyamate ɔnu tayi, alɛ wu ba i yi kyamate epe iyi i yi mu ipwumo tayi 2 A ra laa kwokpo ungwɛri mu kwuwo ungwu bɔkɔ kwu wuma. E fulo kwota ungwungyi wu mu risu ba e fulo kwota ungwɔzu wu mu ɛzhi, 3 akwɛyi a yama mu opwu uwɔkwu mate abaga o wanu tayi. Mizhikembo iyi bɔkɔ a yama, ina ekperewo ɛnyi i kpa ɛyi. 4 Tabɔkɔ ina ikperewo ɛnyi i kpa ɛyi, Imi mi gyi te la mi ka ɛzu ma. Akwɛyi mi ba mi pwa opwu u wɔ moshi u siso tee, <<Kiya ingyi bɔkɔ ina ikperewo ɛnyi iso awu shi ye kyoo; ki ka yi ma mo!>>

5 Akwɛyi mi ma ɔlɔgbulɔ uwu Ukpo uwu bɔkɔ mi ma wu te a rima mu risu mbala mu ɛzhi awu, e yi kwuwo ungwungyi wu mo moshi 6 akwɛyi a vungɔma e to la ɛnyi iyi Ukpo, uwu bɔkɔ e yi iyɔkpɔ ba ɔkpɔɔ awu, uwu bɔkɔ e wo oshi, ɛzhi, mbala risu mbala kiya ngyinangyina ngyi bɔkɔ ki yi ma yi. Ɔlɔgbulɔ uwu a zɔ tee, <<Kwuye ingbɛma kwu yi fo! 7 Kwuye ungwu bɔkɔ ɔlɔgbulɔ uworowo awu a kpa kwongangaraki wu, akwɛyi Ukpo a wa la kwunvyeru wu ungwu bɔkɔ e so ɛmɛgba wu, anukenzu awu kwudu.>>

8 Akwɛyi opwu uwu bɔkɔ u wɔ mu oshi bɔkɔ u so mi iso dɛ-ɛ awu u so mi iso kpɔ tee, <<So kaa na kwokpo ungwu bɔkɔ kwu wuma bɔkɔ kwu yi mu kwuwo ungwu ɔlɔgbulɔ uwu bɔkɔ a rima mu risu mbala mu ɛzhi awu.>>

9 Akwɛyi mi ka mbaa ɔlɔgbulɔ uwu Ukpo awu akwɛyi mi za wu tee le shi mi kwokpo ungwɛri kwɔngu. Akwɛyi a za mi tee, <<Na kaa kwu; kwu wuma mu ubwu ŋɔ, mu kenzu ŋɔ ba kwuu nyima mate lotu tayi.>>

10 Mi na kwokpo ungwɛri kwɔngu ma mu kwuwo wu akwɛyi mi kwu, kwu nyima mate lotu te mu kenzu mi. Mizhikembo iyi mi mbiri ngwu mo ba, kwu wuma mu ubwu mi. 11 Akwɛyi a gba a za mi tee, <<Uŋɔ gba ŋɔ tanu iyi ilɔ iyi Ukpo ɛlɛ mɛga meka iyi ekeshi riba laa, ɛdɔ, kenzu, mbala asu le.>>