1 <<Ka ilɔ ɛlɛ laa ɔlɔgbulɔ uwu ɔshɔshi uwu Osadisi kaa za wu tee:

<<Ilɔ ɛlɛ i ngyi mbaa onzu uwu bɔkɔ a ra laa ɛndu iyi Ukpo ekperewo mbala elovyo erewo awu. Mi yitu iyi ɛduma iyi bɔkɔ ŋɔ yi mu iwomo; uŋɔ ŋɔ yi kwɔdu tee ŋɔ yela reyi le byi moo ŋɔ kpomo-o. 2 Kwuwo kwɔlɛ, nyeyimo! Kiya ingyi ki shimo mu kwuwo ŋɔ ele, ra ngyi gbagiri kaa ri mbwa ɛdɔ ikpomo mo, moo mi ma tee ɛduma iyi bɔkɔ ŋɔ wo le, i di nyɔlɔma mu idu iyi Ukpo mi mo. 3 Kwuwo kwɔlɛ, lolo kiya ingyi bɔkɔ o zɔ ŋɔ ba lu pwa; mbwalu ngyi kaa lafya laa ingbomo ŋɔ. Gba ŋɔ nyeyimo mo, mi nyɔ kyamate uwɛlɔ tayi, ba ŋɔ yitu iyi kwuyengwu bɔkɔ mi bi nyɔ mo. 4 Tetete, umbafo yi bwɛ mu Osadisi o do tutu ekpayi mba ma mo. O lo yi ekpayi iruwu akwɛyi oo zɛma mbala mi moo o domo tee lo wo mbo tayi. 5 Enzu umba bɔkɔ o rimo, o lo mbo ekpayi iruwu kyamate mbɔlɛ tete. Mii ngbɛ ɛnyi mba ma mu kwokpo ungwu kwunyɔ mo. Mi so gedegede midu iyi Ada mi mbala alɔgbulɔ wu tee, enzu mbɔlɛ akwu umba mi. 6 Onzu uwu e yi alu ba la pwa iyi bɔkɔ Kwundu e yi mu isomo laa ɛshɔshi le!

7 <<Ka ilɔ ɛlɛ laa ɔlɔgbulɔ uwu ɔshɔshi uwu Ofiladefiya kaa za wu tee:

<<Ilɔ ɛlɛ i ngyi mbaa onzu uwu bɔkɔ akwu ɔkɛrikɛri mbala ongbulolo awu. Uwu gba a ra la ɔnu uwu Odevidi le. Gba a wu riku mo, onzu e do ngyi ikokomo mo, tatayi gba e koko riku mo, onzu e do ngyi iwuma mo. 8 Imi mi yitu iyi iwomo ŋɔ; mi yitu tee ŋɔ yi ekpasu gyɔɔ mo; tetete ŋɔ mbwalu iso mi ba ŋɔ lu mi afyima laa imbwaluma mo. Mi wu ŋɔ riku mo-o, onzu uwu e do ngyi ikokomo e yi mo. 9 Pwa! Uzhi uwu enzu umba bɔkɔ akwu umba osheta awu, wamwangba mbamba, umba bɔkɔ o ya ɛmba tee Azhu ba o kwu Azhu mo awu, mii shi mbo o nyɔ o kwumo midu ŋɔ akwɛyi o yitu tee Imi mi pwu idɛnyi ŋɔ. 10 Kwuwongwu bɔkɔ ŋɔ mbwalu ɔkpa uwu mi shi ŋɔ tee yidu awu, mii gbo ŋɔ mo mu inyashi iyi bɔkɔ i yi mu inyɔma mu kwudu kwɔlɛ kaa lɔ pwa enzu umba kwudu kwɔlɛ ma lɛɛbi awu. 11 Mi nda la inyɔma fo. Ralaa kiya ingyi ŋɔ yi ngyi kpakiri kaa onzu la na rigbɛ ŋɔ ma mo. 12 Onzu uwu bɔkɔ e rimo, mii shi wu aakwu ope mu ɔtɛpu uwu Ukpo mi, Onzu elete aa lafya la ɔtɛpu gbee fo. Mi ka ɛnyi iyi Ukpo mi mbala ɛnyi iyi kwuse ungwu Ukpo mi, Ɔzhɛrusalɛ uwepoo, ungwu kwuu wɔ moshi mbaa Ukpo mi akwɛyi kwu nyɔ mɛzhi awu. Mi kyo mi ka ɛnyi mi iyepo mamba tete.

13 Onzu uwu e yi alu ba la pwa iso iyi bɔkɔ Kwundu ee so laa ɛshɔshi le!

14 <<Ka ilɔ ɛlɛ laa ɔlɔgbulɔ uwu ɔshɔshi uwu Olawodisiya kaa za wu tee:

Ilɔ ɛlɛ i ngyi mbaa mi, Imi uwu bɔkɔ o ya mi tee Li yi tayi awu. Imi gba mi kwu u zɔ enzu ongbulolo uwu Ukpo shɛ le. Ingyi ma wu gba Ukpo e wo kiya ingyinangyina le. 15 <<Imi mi yitu iyi iwomo ŋɔ. Uŋɔ ŋɔ tumo mo ba ŋɔ yi ɔyi mo. La ŋɔ tumo naa la ŋɔ yi ɔyi lala ba i bi she mi i ka le. 16 Kwuwo kwɔlɛ, tabɔkɔ ŋɔ yi wulawula bi, ŋɔ yi ɔyi mo ba ŋɔ tumo mo awu, Imi mi ŋi waŋa ma mu kenzu mi! 17 Ŋɔ zɔ tee, <Imi mi yi kwuwo; mi yi kiya ingyinangyina ingyi bɔkɔ mi yi ugɔ ngyi.> Uŋɔ yitu tee ŋɔ kwu onzu uwu inyashi, ŋɔ kwu ɔyirewa, uwu uzhiwidɔ, upeyi. 18 Kwuwo kwɔlɛ, mi ta ŋa amasa tee ya ogolu uweshi mbaa mi kaa yi kwuwo. Ya ekpayi iruwu kaa koko uzhiwidɔ ŋɔ ma. Kyo ya anyi umba ofya umbweyi kaa la meyi ŋɔ kaa ma ɛbɛ ɔnyɔnyɛ. 19 Onzu uwu mi pwu idɛnyi wu gba mi kpa wu ɛyi mi gbi towu mo le. Kwuwo kwɔlɛ, gyakpɔɔ kaa tamɛzhi. 20 Pwa! Imi mi ri ele mu kenzugwu, mi yi mu kwuwo ilama mu riku; onzu uwu bɔkɔ a pwa opwu mi akwɛyi a wu riku ma, mi fyemo akwɛyi mi ri kiya mbala wu akwɛyi uwu tete e ri kiya mbala mi. 21 Onzu uwu e rimo, mii shi wu kapa kaa la ŋɔ la kpa mi mu ukpa mi kyamate mi rimo akwɛyi mi ŋɔma mbala Ada mi mu ukpa wu awu. 22 Onzu uwu e yi alu ba la pwa iso iyi bɔkɔ Kwundu e yi mu isomo laa ɛshɔshi.>>