1 Mizhikembo iyi ɛlɛ akwɛyi mi ma alɔgbulɔ umba Ukpo wendo o rima mu eko endo iyi ɛzhi iyi kwudu kwɔlɛ, o yi mu igba la kwokpo kembo mu eko endendo yi, kaa ekpo li to mu ɛzhi nana mu embyi nana li fya mu kwuwɛyi kwunyinyi mo. 2 Akwɛyi mi ma ɔlɔgbulɔ uwu Ukpo uwufo e ngyi mu ɔnuwu kwoto la urɔ uwu Ukpo uwu bɔkɔ e yi la reyi awu. A ya alɔgbulɔ wendo umba bɔkɔ Ukpo e shi mbo ekpasu kaa lo tutu ɛzhi mbala risu ma awu mu opwu uwɔkwu. 3 Ɔlɔgbulɔ awu a zɔ tee, << la lu tutu ɛzhi nana risu, nana ɛwɛyi ma-a mo, la ki wo ɛmɛgba umba Ukpo nzu kɛzɔ mu undu mbo dɛ.>> 4 Akwɛyi o za mi tee enzu umba bɔkɔ o wo mbo kɛzɔ unga Ukpo mu undu mbo awu, akwu 144,000. O wɔ mu lunzu luwo la lopo undu Izirɛ ndɔndu. 5 Mu ɛdɔ iyi Ozhuda, o wo enzu 12,000 kɛzɔ, mu ɛdɔ iyi Ɔrubɛ, o wo enzu 12,000 kɛzɔ, mu ɛdɔ iyi Ogadi, o wo enzu 12,000 kɛzɔ, 6 mu ɛdɔ iyi Asha, o wo enzu 12,000 kɛzɔ, mu ɛdɔ iyi Onafitali, o wo enzu 12,000 kɛzɔ, mu ɛdɔ iyi Omanase, o wo enzu 12,000 kɛzɔ, 7 mu ɛdɔ iyi Ɔsamɔ , o wo enzu 12,000 kɛzɔ, mu ɛdɔ iyi Olevi, o wo enzu 12,000 kɛzɔ, mu ɛdɔ iyi Isaka, o wo enzu 12, 000 kɛzɔ, 8 mu ɛdɔ iyi Ɔzɛbulu, o wo enzu12,000 kɛzɔ, mu ɛdɔ iyi Ɔzhɔsɛfu o wo enzu 12,000 kɛzɔ, mu ɛdɔ iyi Obezhami o wo enzu 12,000 kɛzɔ.

9 Mizhikembo iyi ɛlɛ, mi yesemo akwɛyi mi ma enzu gyɔɔ o kpalɛlu onzonzu ukpɛnyi te e do mbo i wama lɛɛbi mo! O wɔ mu ɛdɔ, ese, ekeshi, mbala lunzu ikikɔ ikikɔ. O rima mu keyi unga ukpa uwu ɛsu mbala uwu Umɛ uwu Ilɔ awu, o lo ɛriga ewururu iruwu laa epederi mu ewo. 10 O yama mu opwu uwɔkwu tee: <<Isama i wɔ mbaa Ukpo nzu, uwu bɔkɔ a ŋɔma mu ukpa uwu ɛsu awu, mbala mbaa Umɛ uwu Ilɔ awu!>> 11 Alɔgbulɔ umba Ukpo lɛɛbi o rima o lo ukpa uwu ɛsu awu meka, laa enzu umbakɔ, laa apula iyi i yela reyi ekpendo ɛnyi akwɛyi o kwumo o kpo eyi mu ɛzhi mu idu iyi Ukpo akwɛyi o gbo wu oya, 12 akwɛyi o zɔ tee <<Li yi tayi! Iduma, mbala inzumbɛku, mbala ilukwu, mbala ɛnyi igbɛlɛma, mbala igba, mbala ekpasu mbala idomo, lakwu iyi Ukpo nzu iyɔkpɔ ba ɔkpɔɔ! Li yi tayi>>

13 Akwɛyi onzu ukpɛnyi meka iyi enzu umbakɔ mbamba e yo mi tee, <<Enzu umba bɔkɔ o lo ɛriga ewururu iruwu ele akwu umbana, ba o wɔ muna?>>

14 Akwɛyi mi gba opwu tee, <<Ada, mi yitu mo. Uŋɔ ŋɔ yi mbo.>>

Akwɛyi a za mi tee, <<Mbɔlɛ akwu enzu umba bɔkɔ o lo mbo inyashi iyɛkɔkɔ ba o wɔma moloto. O gbɔ ɛriga ewururu mba ma mu ɛnzhi umba Umɛ uwu Ilɔ awu akwɛyi akwu iru puratata. 15 Akwu kwuwo ngwɔlɛ gba o rima mu idu iyi Ukpo gba o wo wu ɛduma la utu la ɔnu mu ɔtɛpu wu le. Ukpo uwu bɔkɔ a ŋɔma mu ukpa uwu ɛsu wu awu ee gbo mbo mo. 16 Lonzu nana ugbembyi u wo mbo mo gbee fo; ɔnu nana uzu uwunawuna u fu mbo mɛnwu gbee fo, 17 moo Umɛ uwu Ilɔ uwu bɔkɔ a ri mbaa ukpa uwu ɛsu awu a bɔ mba eyi, akwɛyi aa za mba e rembo mbaa embyi umba kwunyɔ umba bɔkɔ o yi mu itumo awu. Ukpo ba aa nwu mba ɛnyɛ ma lɛɛbi meyi.>>