1 Akwɛyi ɔlɔgbulɔ uwu Ukpo awu a zɔ mi ɔkwu uwu bɔkɔ u yi embyi umba kwunyɔ, u lemo meyi mate umɛbɛ tayi, o wɔ mbaa ukpa uwɛsu uwu Ukpo mbala Umɛ uwu Ilɔ 2 o yi mu irima mekeka iyi ɔgwuzɛ uwu kwuse kwɔngu. Mu igɔ igɔ iyi risu ngɛngyi uwɛyi uwu kwunyɔ u yi mɔmɔ, uwu bɔkɔ u wa la imuma izhi uwo la epo mu kari, u gba u wa la imuma kwuzhikpɛnyi mu ovya; epu yi ba akwu iyi ekeshi lɛɛbi efya ibomo. 3 Kiya ingyinangyina ingyi bɔkɔ Ukpo e to ngyi mo, ki yi mu kwuse kwɔngu mo.

Ukpa uwɛsu uwu Ukpo mbala uwu Umɛ uwu Ilɔ ii yi mu kwuse kɔngwu, akwɛyi ɛmɛgba wu ba oo lɛ wu ma.

4 O ma eyi wu, ɛnyi wu ba o ka yi ma mu undu mbo. 5 Utu u yi fo, ugɔ uwu ɛbɛ naa ɔnu a kpama fo, kwuwongu Ɔkwu Ukpo gba akwu ɛbɛ mba le, akwɛyi o ri ɛsu iyɔkpɔɔ ba ɔkpɔɔ.

6 Akwɛyi ɔlɔgbulɔ uwu Ukpo a za mi tee, <<Iso ɛlɛ akwu ongbulolo ba o kwidu o fulo ma yi. Akwɛyi Ɔkwu Ukpo, uwu bɔkɔ e shi Kwundu wu la anukenzu awu, a lɔ ɔlɔgbulɔ wu kaa la zɔ ɛmɛgba wu kiya ingyi bɔkɔ akwu mega te ki wo kekelele.>>

7 Ɔzhizɔsi a zɔ tee, <<La lu pwa!>> <<Imi mi yi mu inyɔma kekelele! Ɔnyɛ akwu uwu enzu umba bɔkɔ o lomo la anu itama iyi iso iyi bɔkɔ i yi mu kwokpo le!>>

8 Imi, Ɔzhɔnu mi pwa mi gba mi ma apula ɛlɛ lɛɛbi, gba kwuyengwu bɔkɔ mi mbwa apula ipwama mbala imama, mi kpo eyi mbwe mɛzhi mu idu iyi ɔlɔgbulɔ uwu bɔkɔ a zɔ mi apula ɛlɛ awu, Imi ba mi gyi te la mi gbo wu ɔya. 9 Uwu ba a za mi tee, <<Ki wo tayi mo! Imi mi kwu umɛgba kya mbala ŋa mbala ɛmɛnɛ ŋɔ anukenzu mbala enzu lɛɛbi umba bɔkɔ o lomo la iso iyi i yi mu kwokpo kwɔlɛ.Gbo Ukpo ɔya!>> 10 Akwɛyi a za mi tee, <<Uŋɔ ki nvye iso iyi anu itama iyi bɔkɔ i yi mu kwokpo kwɔlɛ le mo mo, moo kwuye kwu bo kɛlɛ-ɛ bɔkɔ apula ɛlɛ lɛɛbi i wo. 11 Onzu uwunawuna uwu bɔkɔ e wo ira le so wu mu ira iwomo, onzu uwunawuna uwu bɔkɔ e wo apula iyi ɛnyinyi le so wu mu iwomo; onzu uwunawuna uwu bɔkɔ e wo esheshi le so wu mu iwomo, onzu uwunawuna uwu bɔkɔ e yi kɛrikɛri le so wu mu i yi kɛrikɛri.>>

12 Ɔzhizɔsi a zɔ tee, <<La lu pwa!>> <<Mi yi mu inyɔma kekelele! Mi nyɔ mbala rigbɛ mi, kaa mi shi uwewe kyamate bɔkɔ e wo. 13 Imi gba mi kwu Alifa mbala Omega le, uyo mbala umbwambwaa le.>>

14 Ɔnyɛ akwu uwu enzu umba bɔkɔ o gbɔ ekpayi iruwu mbo mo sɛsɛ kwuwongu o fya ekpasu te o ri imwuma iyi uwɛyi uwu kwunyɔ akwɛyi o zɛ mu lunzugu o fye mu kwuse. 15 Enzu umba o yi mu kwudu ungwu kwuse kwɔngu ba akwu enzu umba bɔkɔ oo wo apula iyi kashi, mbala wa wo emondo, mbala wa wo inyama, mbala wa ngbɛ enzu, mbala wa byeshi mbala wa mwangba mu iso mbo mbala iwomo mbo.

16 <<Imi, Ɔzhizɔsi, gba mi lɔ ɔlɔgbulɔ mi ma kaa la ta yi anu iyi iso ɛlɛ mu ɛshɔshi le. Imi mi wɔ mu ɛdɔ iyi Odevidi; Imi mi kwu kwulovyo ungwu awalɔkyi.>>

17 Kwundu mbala Okopo ɔ za mi tee, <<Bo!>>

Onzu uwunawuna uwu bɔkɔ a pwa iso ɛlɛ la zɔ te, <<Bo>> tete

Onzu uwunawuna uwu bɔkɔ ugbembyi u wo wu mo, <<Le bo>>; onzu uwu bɔkɔ a gyi embyi umba kwunyɔ, la na rɛshi.

18 Imi, Ɔzhɔnu, mi yi onzu uwunawuna uwu bɔkɔ a pwa iso iyi anukenzu iyi kwokpo kwɔlɛ malu: akwiyi gba onzu uwunawuna uwu bɔkɔ e kyo yi mo, Ukpo e kyo wu inyashi iyi bɔkɔ o ka mu kwokpo kwɔlɛ ma. 19 Onzu uwunawuna uwu bɔkɔ a gyi kiya ingyinangyina ma mu iso iyi anukenzu iyi kwokpo kwɔlɛ ma, Ukpo a gyi ogbo wu uwu imwuma iyi uwɛyi uwu kwunyɔ mbala kwuse kɔ kɛrikɛri ma, iyi bɔkɔ o ka mu kwokpo kwɔlɛ.

20 Onzu uwu bɔkɔ e to izɔgɔ iyi apula ɛlɛ lɛɛbi le a zɔ tee, <<Ee iyesheshi! Imi mi yi mu inyɔma kekelele!>>

Li yi tayi. Bo, Ɔkwu Ɔzhizɔsi!

21 Esheshi iyi Ɔkwu Ɔzhizɔsi li yi mbala uwewe.