1 Akwɛyi kiya ingyi izele ingyɛkwuu ki wɔ moshi. Okokpayi uwufo, ɔnu gba akwu ekpayi wu le akwɛyi a ri mu kadu unga ovya akwɛyi ɛnuma uwu elovyo uwo la epo e yi mu reshi wu. 2 A ra laa rifo ba a nda la kwomba fo, akwɛyi a tara oga kwuwongu ɛnyi mbala inyashi iyi kwomba.

3 Akwɛyi o ma kiya ingyi izele ingyifo kpɔ ki wɔ moshi. Akwu ɔduragɔ ufyobyo uwakwu, e yi eshi erewo mbala ilɔ uwo mbala ɛnuma mu eshi ɛnyi . 4 Mu u zɛ wu gba ee pyipyi kwuko kwukpɛnyi meka iyi eko ela iyi elovyo iyoshi akwɛyi aa ta yaa pyo mɛzhi. Akwɛyi Ɔduragɔ ele a rima mu idu iyi oko ele, kaa le kwu wu umɛ ma kwuyengwu a mba ma. 5 Akwɛyi a mba umɛ ɔnzɔnu, umɛ ele a rala upi uwu kwoso e ri ɛsu mu ɛzhi lɛɛbi. Umɛ ele ba o bɛ wa ki akwɛyi o to wu o ka wu la Ukpo mu ukpa uwɛsu wu. 6 Oko ele a rima a ka mu ɛzhi ɛngbarara, mbaa riyi ingyi bɔkɔ Ukpo a nɔngɔ e she wu, mbaa bɔkɔ o yese mbaa wu nzhii ba afyi odubu la ederi epo la uwo ɛkpɛrɛnyi (1, 260).

7 Akwɛyi ewa i yimo moshi. Ɔmakɛlu mbala alɔgbulɔ umba o yi muzhi wu o tewa mbala ɔduragɔ ele, ɔduragɔ mbala alɔgbulɔ wu ba o tewa mbala mba tete; 8 ewa ba i ri ɔduragɔ awu ma, akwɛyi uwu mbala alɔgbulɔ wu ba o nya mba ma te lo ŋɔ moshi gbee fo. 9 Ɔduragɔ umbirimbiri ele, o towo pyo o ta mɛzhi - ɔkwu uwekyekyi awu, ɛnyi wu akwu Onzu uwoyi nana Osheta, uwu bɔkɔ e kyoro kwudu kwɔlɛ lɛɛbi ma awu. Uwu mbala alɔgbulɔ wu o to mbo pyo o fu mɛzhi mu kwudu kwɔlɛ.

10 Akwɛyi mi pwa opwu uwɔkwuu moshi u zɔ tee, <<Isama, mbala ekpasu, mbala irɛsu iyi Ukpo, mbala idomo iyi Okrasi i nyɔlɔma-a kekelele! Moo u mwilo uwu ɛmɛnɛ midu iyi Ukpo la utu la ɔnu awu, o ra wu ma moshi-e. 11 Umba o byi wu ma mu ɛnzhi umba ilɔ; mbala ongbulolo uwu bɔkɔ umba o so awu; umba ba o wiyi iyi lukwu mo, o nyama tee o kpomo byi. 12 Kwuwo kwɔlɛ, lunyi umba oshi, mbala lunyi umba lu yi mɔmɔ awu la lu mwɔnyɛ! Eza ba i la laa ɛzhi mbala risu! Moo onzu uwoyi e bo mɛzhi mbaa yi, uwu ba a nyɔlɔma la amba, kwuwongu e yitu tee kwuye wu kwu shi bwɛɛ byi ŋa.>>

13 Tabɔkɔ ɔduragɔ a zɔngɔma tee o ta wu mɛzhi mu kwudu kwɔlɛ-ɛ, akwɛyi e le mu oko uwu a mba umɛ ɔnzɔnu awu italuma. 14 Ukpo e shi oko ele ekowo epo iyi okpakukpaku uwakwuu kaa le yimo la rima le so mu riyi wu mu ɛzhi ɛngbarara, mbaa bɔkɔ o bo yese mbaa wu nzhii ba lɔri lola lakwurizhi, kaa ɔduragɔ awu la ngbɛ wu ma mo. 15 Akwɛyi ɔduragɔ awu a wala embyi mu kenzu wu mate risu tayi, kaa embyi mbɔlɛ lo so wu mo. 16 Ɛzhi ba i mbwama laa oko ele; akwɛyi i ya kenzu ma akwɛyi i mbiri embyi umba bɔkɔ o wɔ mu kenzu unga ɔduragɔ awu ma. 17 Akwɛyi ɔduragɔ awu e wo amba mbala oko awu akwɛyi e yimo tee e to ewa mbala ɛmɛ wu umba o shimo awu, enzu umba bɔkɔ o lomo la iso iyi Ukpo ba oo mbwalu iso iyi Ɔzhizɔsi kwuyengwunanguna. 18 Akwɛyi ɔduragɔ awu a ri mu ɔgyɛ uwu kenzu unga risu.