1 Akwɛyi mi geleyi akwɛyi mi ma Ilɔ awu te a ri mu lowa undu Ɔzayɔ; enzu 144,000 umba bɔkɔ o ka ɛnyi wu mbala ɛnyi iyi Ete wu mu undu mbo o yi mbala wu tete. 2 Akwɛyi mi pwa opwu uwu u wɔ moshi u wanu mate embyi o yi mu irima, mate Ukpo a kpa ina tayi. Anu iyi bɔkɔ mi pwa i yi mate anu iyi enzu o yi mu kumburu ibyima tayi. 3 Enzu 144,000 mbɔlɛ o ri mu idu iyi ukpa uwɛsu, mbala apula iyi bɔkɔ i yi la reyi ɛlɛ, mbala enzu umbakɔ; akwɛyi o ta kwɔmu ungwepo ungwu bɔkɔ umba kɛɛkyi gba o do ngwu ivɔngɔma le. Umba kɛɛkyi gba o sa mba ma mu kwudu kwɔlɛ le. 4 Enzu mbɔlɛ akwu anzɔnu umba bɔkɔ o tutu ɛmba ma mbala eko mo, moo umba o do nɔ mbala eko dɛ mo. Umba oo mbwalu Umɛ uwu Ilɔ awu munamuna mbaa bɔkɔ a ka. Umba o sa mba ma mekeka iyi enzu akwɛyi umba akwu enzu umba kwonze umba bɔkɔ o ra mba o shi Ukpo mbala Umɛ uwu Ilɔ awu. 5 O yitu mbo te akwu enzu u mbo imwilo mo; ba o yi kwungbɛ mo.

6 Akwɛyi mi ma ɔlɔgbulɔ uwu Ukpo uwufo e yi mu iyimo moshi, a za la ɛlɔgbulɔ iyeshi iyɔkpɔ iyi bɔkɔ aa tanu laa enzu umba kwudu kwɔlɛ, laa enzu umbanambana, laa ɛdɔ iyinayina, laa kenzu unganangana, laa ɛzhi iyinayina. 7 Akwɛyi e siso mu opwu uwɔkwuu tee, <<La lu lomo la Ukpo la lu gba la lu du wu ma! Moo kwuye kwu bo-o kaa la zɔ ombu uwu enzu lɛɛbi. La lu gbo Ukpo oya uwu bɔkɔ e wo oshi, mbala ɛzhi, mbala risu, mbala itumo iyi embyi!>>

8 Ɔlɔgbulɔ uwopo a mbwalu uwu kwonze awu, a zɔ tee, <<A tama-a! Ɔbabilɔ kwuse ungwɔkwu kwu tama-a! Uwu uwu bɔkɔ e shi enzu lɛɛbi o wo atɛ, mu atɛ iwomo mbo mbamba o shi mbo kaa lo to kaya iyira iyira!>>

9 Ɔlɔgbulɔ uwu Ukpo uwola a mbwalu wepo mbamba, e siso mu opwu uwɔkwuu tee, <<Onzu uwunawuna e gbo oya la izɔfyi uwakwuu ele mbala u wɔ wu akwɛyi a gba a na kɛzɔ mudu wu nana mu kwuwo wu 10 uwu tete, Ukpo ee wo amba mbala wu iyɛkɔkɔ, ee towu mo iyɛkɔkɔ mu amba wu umbakwu mbamba! Enzu lɛɛbi umba bɔkɔ o wo ɛlɛ o lo mbo inyashi mɔyi mbala uzu uwɔyi midu iyi alɔgbulɔ wa kɛrikɛri mbala midu iyi Umɛ uwu Ilɔ. 11 Uwu uwu ɔyi uwu bɔkɔ u lo mbo inyashi awu uu yimo iyɔkpɔ ba ɔkpɔɔ. Ɛnwu igbomo i yimo la utu la ɔnu la enzu umba bɔkɔ o gbo oya la izɔfyi mbala u wɔ wu awu, mbala onzu uwunawuna uwu bɔkɔ kɛzɔ unga ɛnyi wu.>>

12 Kwuwo kwɔlɛ, enzu umba Ukpo i shoshi tee lo yidu, enzu umba bɔkɔ o lomo la ɛrama iyi Ukpo ba o kwu idu lu fulo mu Ɔzhizɔsi.

13 Akwɛyi mi pwa opwu moshi u zɔ tee, <<Ka ɛlɛ ma: I na mu ɔnɛ i sheye keyi, ɔnyɛ akwu uwu enzu umba bɔkɔ o kpomo mu ɛduma iyi Ɔkwu!>>

Kwundu a zɔ tee, <<Ee te gba i yi le!>> <<Ɛnwu ii gbo mbo mo mu ɛduma iyi bɔkɔ o wo awu, kwuwongu rigbɛ ingyi ɛduma mba rii mbwalu mba.>>

14 Akwɛyi mi yesemo, ba mi ma kwɔmu kwuruwu, akwɛyi mi ma kiya kyamate onzu tayi a ŋɔma mangwu, e yi ɛnuma uwu ogolu mu reshi wu mbala kworize ungwu irimo kwu yi mu kwuwo wu. 15 Akwɛyi ɔlɔgbulɔ uwu Ukpo uwufo a wɔ kwudu mu ɔtɛpu akwɛyi e to opwu uwɔkwu la onzu uwu bɔkɔ a ŋɔma mu amu awu tee, "Wo ɛduma mu kworize ŋɔ kwɔngu ka lɔ ewiri ma, kwuwongu kwuyengwu ilɔma kw u bo-o; kwuyengwu kwudu kwɔlɛ ilɔma kwu bo-o!" 16 Akwɛyi onzu uwu a ŋɔma mu amu awu e to kworize wu pyo mu kwudu kwɔlɛ, akwɛyi o lɔ kwudu kwɔlɛ ma.

17 Akwɛyi mi ma ɔlɔgbulɔ uwu Ukpo uwufo te a wɔ mu ɔtɛpu moshi, uwu tete e yi kworize ungwu irimo.

18 Akwɛyi ɔlɔgbulɔ uwu Ukpo uwufo, uwu bɔkɔ ɔyi u yi mɔwu wu, a wɔ mu kwumbu ungwu isabɔ a ya ɔlɔgbulɔ uwu Ukpo uwu bɔkɔ a ra la kworize ungwu irimo ma mu opwu uwɔkwu tee, "Wo ɛduma mu kworize ŋɔ, kaa bɛ imuma mu utu uwu ovanyi uwu kwudu kwɔlɛ, kwuwongu imuma i mbo-o!" 19 Akwɛyi ɔlɔgbulɔ uwu Ukpo awu e to kworize wu pyo mu kwudu kwɔlɛ, akwɛyi kwu bɛ imuma iyi ovanyi, akwɛyi e to yi pyo mu kizɛ ingyi o pyiri imuma iyi amba umbakwu umba Ukpo. 20 O pyiri imuma iyi uwɛyi iyi ovanyi ɛlɛ mu kizɛ ingyi o pyiri imuma mizhikembo iyi kwuse, akwɛyi ɛnzhi o wɔ mu kizɛ ingyi o pyiri ovanyi ɛlɛ, gba o kpa ngyi kasa, indama ngyi i yi emelu ederi epo tayi, akwɛyi indomo ngyi i yi mate ata ɛlɔ tayi.