1 Akwɛyi o shi mi upi uwu bɔkɔ e yi kyamate upi uwu kasa ikpama, akwɛyi o za mi tee, <<So kaa kpa kasa unga ɔtɛpu uwu Ukpo mbala kwumbu ungwu isabɔ, mbala umba bɔkɔ o yi mu Ukpo ilɛma mu ɔtɛpu mɔmɔ wa mba ma. 2 Uŋɔ ba ki kpa kasa unga okpulo uwu kwudu mo, kwuwongu o rangyi o shi umba bɔkɔ akwu Azhu mo umba bɔkɔ o bo kpa ata mu kwuse kwu kɛrikɛri kwɔngu evya uwekpendo laa epo. 3 Mi lɔ azɔgɔ mi wepo mbamba ma, umba bɔkɔ o lo ekpayi iyi obobyi, akwɛyi o tanu iyi iso iyi Ukpo mu afyi odubu ukpɛnyi la afyi ederi epo laa uwɛkpɛrɛnyi ɛnyi (1, 260).>> 4 Azɔgɔ wepo mbamba gba akwu ɛwɛyi iyi olivu epo mbala luna undɔyi lopo undu bɔkɔ lu rima mu keyi unga Ɔkwu uwu kwudu kwɔlɛ le. 5 Akwiyi gba onzu uwunawuna a pwama kaa le wo mbo iyira, ɔyi uu wɔ mu kenzu mbo akwɛyi u pwu agewa mba ma; te gba onzu uwunawuna uwu bɔkɔ a pwama kaa le wo mbo iyira o ngbɛ wu ma le. 6 Kwuye ungwu bɔkɔ o yi mu ilɔ iyi Ukpo izɛma awu, o yi idomo iyi kaa lo koko oshi mo kaa Ukpo le tumo mo. O yi idomo tete mu itumo iyi embyi, kaa lo vindɔ mba ɛnzhi; o yi idomo iyi kaa lo fu ira iyinayina mɛzhi i yi kwudu kwɔlɛ ta bɔkɔ umba o gyi. 7 Kwuye ngwu bɔkɔ o mbwa ilɔ iyi Ukpo i zɛ ma, izɔfyi uwu bɔkɔ a wɔ mu kuvɔ ungwu indomo ungwu kwu yi ibɔma mo awu e kiri mbo ewa. A byi mba ma akwɛyi a ngbɛ mba ma, 8 akwɛyi ɛkpɛzhi mba o fu mu ɔgwuzɛ uwu kwuse ungwɔkwu kwɔngu fyafya, mbaa bɔkɔ o kpa Ɔkwu mba mu kwuwɛyi ungwu lukwu awu. Ɛnyi iyi bɔkɔ i wɔ iyi kwuse kwɔngu akwu Ɔsɔdɔmu, nana Izhipiti . 9 Enzu umba ekeshi lɛɛbi, ɛdɔ, kenzu o yese ɛkpɛzhi mba afyi ela la kwurizhi ba o shi te lo pwu mbo mo mo. 10 Enzu umba kwudu kwɔlɛ o mwɔnyɛ kwuwongu lukwu undu enzu wepo mbɔlɛ. Oo wo odumudumu akwɛyi oo wo esu rɛshi, kwuwongu anukenzu wepo mbɔlɛ o lo enzu umba kwudu kwɔlɛ inyashi gyɔɔ. 11 Mizhikemo iyi afyi ela la kwurizhi ɛnyi akwɛyi ɛnyɔ iyi bɔkɔ i shi onzu kwunyɔ i wɔ mbaa Ukpo akwɛyi i fye ma mba, akwɛyi o yimo o rima; umba bɔkɔ o ma mba o wiyi lɛɛbi. 12 Akwɛyi anukenzu wepo mbamba o pwa opwu uwɔkwuu u wɔ moshi u za mba tee, <<La lu bo kadu te!>> Tabɔkɔ agewa mba o yi mu iyesemo, akwɛyi o yimo o kama moshi mu amu. 13 Mu kwotota kwɔngu ɛzhi i wakpa iyira; akwɛyi kwukpɛnyi meka iyi ikama ekpuwo iyi kwuse kwɔngu kwu shirimo, ba o ngbɛ enzu edubu erewo mo. Enzu umba bɔkɔ o shimo o wiyi akwɛyi o du Ukpo uwu oshi ma. 14 Inyashi iyopo ɛnyi i bomo-o,

Inyashi iyi ɔla ba i ndafo!

15 Akwɛyi ɔlɔgbulɔ uwu Ukpo uworowo a kpa kwongangaraki wu, akwɛyi epu iyɛku i wɔ moshi, i zɔ tee,<< Ekpasu iyi ɛsu irimo mu kwudu kwɔlɛ kekelele akwiyi Ɔkwu nzu mbala Okrasi wu, uwu e ri ɛsu iyɔkpɔ ba ɔkpɔ!>>

16 Akwɛyi enzumbakɔ uwekpepo la wendo umba bɔkɔ o ŋɔma mu ikpa mba mu idu iyi Ukpo awu o kpo eyi mɛzhi akwɛyi o gbo ɔya laa Ukpo, 17 akwɛyi o zɔ tee:

<<Ɔkwu Ukpo Edego ala, Uŋɔ uwu ŋɔ yi kekelele gba ŋɔ yi mekyi le!

Ki gbɛlɛ ŋɔ ɛnyi moo ŋɔ rala ekpasu ŋɔ iyɛku ɛnyi ŋɔ yi mu ɛsu irimo-o!

18 Enzu umba

ekeshi o nyɔlɔma mbala amba, kwuwongu

kwuyengwu amba ŋa kwu bo-o,

kwuyengwu bɔkɔ oo zɔ ombu uwu enzu umba bɔkɔ o kpomo-o.

Kwuye kwu bo-o ungwu bɔkɔ ŋɔ shi ɛmɛgba ŋa mbala anukenzu,

mbala enzu ŋɔ lɛɛbi umba bɔkɔ o wiyi ŋɔ,

laa umbɛri laa umbakwu lɛɛbi rigbɛ.

kwuye kwu ba bo-o ungwu bɔkɔ umba bɔkɔ o ngbɛ ɛzhi iyi kwudu kwɔlɛ ɛdɔma awu

o ngbɛ mba ɛdɔ ma tete!>>

19 Akwɛyi o wu ɔtɛpu uwu Ukpo mo moshi, akwɛyi o ma Kwokpati ungwu Iso Ishi mɛzhi kwɔngu mɔmɔ. akwɛyi imingɔma mbala ɛyi ikpama mbala ina, ɛzhi i wo akpa, laa akurungba iyɛku.