1 Ɔnu uwufo Ɔzhizɔsi a rima mu kenzu unga Risu ingyi Ɔgɛnɛsarɛ, akwɛyi uwewe e bo kɛlɛ mbaa wu ka la pwa iso iyi Ukpo. 2 Akwɛyi a ma ada iyi embyi iyɛri ekpepo mu kenzu unga embyi; wa yi emu ba o lu yi afyima o yi mu iya mba igbɔma. 3 Akwɛyi Ɔzhizɔsi e fye mu kwoda ungwu Ɔsamɔ, akwɛyi a za wu tee la gyi le turu la gba mekeka iyi risu bwɛɛ. Akwɛyi a ŋɔma mɛmi iyi kwoda e le mu enzu ɛzu izɔma.

4 Kwuye ungwu a mbwa enzu ɛzu izɔma, akwɛyi a za la Ɔsamɔ tee, <<Turu kaa gba mu riyi ingyi indomo kaa uŋɔ mbala ɛmɛza ŋa la lu fu iya yi kaa lu yi emu.>>

5 Ɔsamɔ a za wu tee, <<Ɔkwu, ki wo ɛduma mu utu nzhii ba eyi i lama ba ki yi kiya kinyinyi mo. Tetete, kwuwongu ŋɔ so tayi awu, mi gba mi fu iya mu embyi bi.>>

6 Tabɔkɔ o fu iya mu embyi, o yi emu guruguru nzhii ba eya mba i le mu itarama. 7 Akwɛyi o ya ɛmɛza mba ma umba o yi mu kwɔda ungwu opo kwɔngu kaa lo bo lo mbwa mba ma. O bo o mbwa mba ma akwɛyi ɔ nyɔlɔ ada iyi embyi epepo yi ma nzhii ba ada iyi embyi ɛnyi i le mu idingbi.

8 Tabɔkɔ Ɔsamɔ Opita a ma kiya ingyi ki wo, akwɛyi a la epunu mɛzhi e kwumo mu idu iyi Ɔzhizɔsi akwɛyi a za wu tee, <<Ɔkwu, yimo munyi mi! Moo mi kwu onzu uwu ingbomo!>> 9 Moo izele i yi wu mo, uwu mbala mba bɔkɔ o yi mbala wu kwuwongu riba ingyi emu bɔkɔ o yi. 10 Izele i yi Ozhemisi mbala Ɔzhɔnu ɛmɛ umba Ozebedi ma, umba bɔkɔ akwu ɛmɛza umba Ɔsamɔ mu emu iyimo awu tete. Akwɛyi Ɔzhizɔsi a za la Ɔsamɔ tee, <<Ki wiyi mo; i na mu kwɔfyi ungwu ɔnɛ i sheye keyi, ŋɔ yi enzu ŋa moo akwu emu fo.>>

11 O wala ada ɛnyi ma mu embyi, o lafya laa kiya ingyinangyina mba akwɛyi o mbwalu Ɔzhizɔsi.

12 Ɔnu uwufo Ɔzhizɔsi e yi mu kwuse ungufo akwɛyi onzu uwufo uwu e yi ofya umbwu embyimbɔyi a ka mɔmɔ tete. Tabɔkɔ a ma Ɔzhizɔsi, akwɛyi e ke kwumo mu idu wu laa ɛshɛku ikpama tee, <<Ɔkwu, gba ŋɔ nyama, ŋɔ do tee ŋɔ bo mi ofya mi mbɔlɛ ma!>>

13 Akwɛyi Ɔzhizɔsi a nda kwuwo a pwu wu afyi, akwɛyi a za wu tee, <<Mi nyama.>> <<Yi sɛsɛsɛ!>> Akwɛyi mɔmɔɔmɔ ofya mbwɔmbwu u lu wu afyima.

14 Akwɛyi Ɔzhizɔsi a ta wu ɔkpa tee, << Ki so onzu uwunawuna mo, so kaa zɔ ɛŋɔ ma mbaa obwoshi uwu Ukpo kaa le yese ŋɔ mo; kyo kaa wo isabɔ iyi bɔkɔ Omosisi e so awu kaa enzu lo yitu tee ofya ŋa u bo o.>>

15 Tetete ɛza iyi Ɔzhizɔsi ɛlɛ i so wu mu ifulama munamuna, akwɛyi enzu o le mu ibomo kaa lɔ pwa iso wu, ikyo kaa le bo mbo efya mba ma tete. 16 Ɔzhizɔsi ba a walama bɛtɛɛ a ka mu riyi ingyifo kɛɛkyi wu kaa la lɛ Ukpo.

17 Ɔnu uwufo Ɔzhizɔsi e yi mu ɛzu izɔma akwɛyi Afarisi mbala wazɔ ɛrama iyi Omosisi umba bɔkɔ ɔ wɔ mu ese iyi Ogalili mbala Ozhudiya mbala Ɔzhɛrusalɛ, o bo ɔ ŋɔma mɔmɔ tete. Ɛkpasu iyi Ɔkwu iyi e bo enzu ofya ma ba i yi mbala Ɔzhizɔsi. 18 Enzu umbafo o shi ukpokapiya mu ɔkyɔ, o gyi tee lo fye wu mogba kaa lo shi wu mu idu iyi Ɔzhizɔsi. 19 Tabɔkɔ o fya ɔgwuzɛ ma mo kwuwongu riba ingyi enzu, akwɛyi o yama moshi uwu kɛnu akwɛyi o sa kɛnu ma, akwɛyi o kala wu laa ɔkyɔ wu o shi wu pwa mekeka iyi enzu mu idu iyi Ɔzhizɔsi. 20 Tabɔkɔ Ɔzhizɔsi a ma ikwu idu lu fulo mbo akwɛyi a za la ukpokapiya awu tee, <<Umɛza mi, ingbomo ŋɔ o gbayi o kpaŋa.>> 21 Tabɔkɔ Afarisi mbala Wazɔ ɛrama iyi Omosisi ɔ pwa tayi, akwɛyi o le mu esu isomo tee, <<Onzu ele akwu uwe dɛɛ bɔkɔ a wu ɔya tee! Ukpo kɛɛkyi gba e do tee a gba la ingbomo iyi enzu a kpa le!>>

22 Ɔzhizɔsi ba e yitu iyi i yi mu egbo mbo akwɛyi a za mba tee, <<Kimbe ki shi lu bi egbo ɛlɛ tee? 23 Iyina i kɔ mu iwomo ika: isomo tee, <Ingbomo ŋɔ ɔ gbayi ɔ kpa ŋa> naa isomo tee,<Yimo kaa le mu luzɛ ŋa?> 24 Mi gyi tee la lu yitu tee Umɛ uwu Onzu e yi idomo mu kwudu kwɔlɛ iyi a gba la ingbomo iyi enzu a kpa mba.>> Akwɛyi a za la ukpokapiya awu tee, <<Yimo, to ɔkyɔ ŋɔ ma kaa so mogba.>> 25 Mɔmɔɔmɔ e yimo la eyi mbo e to ɔkyɔ wu ma akwɛyi a ka mogba laa Ukpo iduma. 26 Izele i wo mbo mo gyɔɔ! Iyi i wo mbo mo akwɛyi ɔ du Ukpo ma laa isomo tee, <<Kinzu ki ma apula iyi izele ɔnɛnɛ.>>

27 Mizhikembo iyi ɛlɛ, Ɔzhizɔsi a wɔ kwudu akwɛyi a ma onzu uwufo u na Oba uwɛzhi uwu ɔ ya wu tee Olevi mu riyi ingyi ɛduma wu. Akwɛyi Ɔzhizɔsi a za wu tee, <<Bo kaa mbwalu mi.>> 28 Akwɛyi Olevi e yimo a lafya laa kiya ingyinangyina akwɛyi a mbwalu wu.

29 Akwɛyi Olevi e wo odumudumu uwakwuu laa Ɔzhizɔsi mogba wu. Riba ingyɛkwuu ingyi wa na Oba uwɛzhi mbala enzu umbafo ɔ kpala ɛlu mbaa ewiri irimo mbala mba. 30 Afarisi mbala Wa zɔ Ɛrama iyi Omosisi umba bɔkɔ o yi kyaa mbala mba mɔmɔ awu ba o le mu anu izɔma akwɛyi o yo Wavɔngɔkiya umba Ɔzhizɔsi tee, <<Kimbe ki shi bɔkɔ lu ri lu wo mbala enzu wa na Oba uwɛzhi mbala <enzu umba ingbomo?>>

31 Ɔzhizɔsi ba a gba mba opwu tee, <<Enzu umba o yi ɔkpara uwu ɛnwu o yi ugɔ uwu onzu uwepwu mo, enzu umba o yi ɔkpara uwu ɛnwu mo gba o gagyi onzu uwepwu le. 32 Imi mi bo tee la mi ya enzu watoto ma kaa lo tamɛzhi mo, enzu wa wo ira gba mi bo kwuwo mbo le kaa lɔ kwu ira mba ɔsu.>>

33 Enzu umbafo o za la Ɔzhizɔsi tee, <<Wa vɔngɔ kiya umba Ɔzhɔnu o wo kenyo iyi ɔkpɔ mbala Ukpo ilɛma, tatayi gba Wa vɔngɔ kiya umba Afarisi o wo le tete; umba ŋa ba ɔ ma mu apula irimo mbala iwomo bi.>>

34 Ɔzhizɔsi a gba mba opwu tee, <<Lu do tee lu wo agboga umba bɔkɔ o bo mu odumudumu uwu oko itomo kaa lo ri kiya kwuyengwu ɔnu uwu okopo e yi mbala mba mo? I yi tayi mo ndiiǃ 35 Kwuye kwu yi mu inyɔma bɔkɔ o to ɔnu uwu okopo mo munyi mbo, mu afyi ɛnyi gba o wo kenyo le.>>

36 Akwɛyi Ɔzhizɔsi a ba mba kwoba tee, <<Onzu aa tara kukokpayi mu ɔkpayi uwepo kaa la kpa mu ɔkpayi uwekyi mo. Moo gba e wo tayi, ɔkpayi uwepo awu a tara wu ma shaa, moo kukokpayi ungwepo kwɔngu ba ku masa ma mbala okpayi uwekyi awu mo. 37 Tatayi onzu ee fu embyi umba inyima umbepo mu ɔgya uwekyi mo, moo gba e wo tayi, embyi umba inyima umbepo mbamba ɔ sa ɔgya awu ma, akwɛyi embyi umba inyima umbepo mbamba o fu mo shaa, ɔgya awu ba e tutumo. 38 Embyi umba inyima umbepo o fu mbo mu ɔgya uwepo! 39 Onzu gba e wo embyi umba inyima umbekyi a gba a nyama te le wo umbepo mo, kwuwongu aa zɔ tee, <mbekyi o shoshi ɔ ka umbepo mo.> >>