1 Ɔnuwu kwɔfyi ungwu ɛnwu igbomo ungufo Ɔzhizɔsi e yi mu ikakama mu itu iyi ewiri iyifo akwɛyi Wavɔngɔkiya wu ɔ mu imuma iyi ewiri, o firi yi mo mu ewo akwɛyi o kwu. 2 Akwɛyi Afarisi umbafo o yo wu tee, <<Kimbe ki shi lu wo kiya ingyi Ɛrama i nyama tee lo wo ɔnuwu kwɔfyi ungwu ɛnwu igbomo mo?>>

3 Ɔzhizɔsi ba a gba mba opwu tee, <<Lu du wa yi dɛ mo re, kiya ingyi Odevidi mbala enzu wu o wo kwuyengwu lonzu lu wo mbo mo awu? 4 E fye mu kwogba ungwu Ukpo, e to kwoburodi ungwu bɔkɔ Ɛrama nzu i zɔ tee ebwoshi umba Ukpo kɛɛkyi gba o ri le, e ri akwɛyi e shi enzu umba o yi mbala wu o ri tete.>> 5 Akwɛyi Ɔzhizɔsi a za mba tee, <<Umɛ uwu Onzu akwu Ɔkwu uwu kwɔfyi ungwu ɛnwu igbomo.>>

6 Ɔnuwu kwɔfyi ungwu ɛnwu igbomo ungufo kpɔ, Ɔzhizɔsi e fye mu udaba uwu ɛlu ikpalama mbaa ɛzu izɔma. Onzu uwufo uwu kwuwo wu ungwungyi kwu kpo kapiya ba e yi mɔmɔ tete. 7 Wa zɔ Ɛrama iyi Omosisi umbafo mbala Afarisi umbafo ba o yi mu kwuyi igagyi ma kaa lo yi Ɔzhizɔsi mo. Kwuwo kwɔlɛ, ɔ bɔ wu eyi kaa lo ma shii ee bo onzu ele ofya ma Ɔnu uwu Kwɔfyi ungwu ɛnwu igbomo. 8 Ɔzhizɔsi ba e yitu iyi egbo mbo lɛɛbi akwɛyi a za la onzu awu tee, <<Yimo kaa bi rima mu keyi te.>> Akwɛyi e yimo a rima. 9 Akwɛyi Ɔzhizɔsi a za mba tee, <<Mii yo yi kwuyo mɛɛ: iyina bɔkɔ Ɛrama nzu i zɔ tee lo wo Ɔnu uwu Kwɔfyi ungwu ɛnwu igbomo? Lo wo iyeshi nana lo wo iyi ira ŋa? Lo sa kwunyɔ ma nana lɔ ngbɛ ngwu ma ŋa?>> 10 E yese mbo lɛɛbi; akwɛyi a za la onzu awu tee, << Nda kwuwo ŋɔ ma shaa.>> E wo tayi akwɛyi kwuwo kwu gba gɛlɛ iya ngwu.

11 Amba o wo Wa zɔ Ɛrama iyi Omosisi mbala Afarisi mo gyɔɔ akwɛyi o le mu amasa ikama mbala esu iyi kiya ingyi o wo Ɔzhizɔsi.

12 Mu afyi ɛnyi Ɔzhizɔsi a wɔ kwudu a ya mu Lɔwa kaa laa lɛ Ukpo akwɛyi e to utu ngyɔɔ mu Ukpo ilɛma. 13 Tabɔkɔ eyi i lama, akwɛyi a ya Wavɔngɔkiya wu ma akwɛyi a ŋa wewo la wepo akwɛyi e kpo mbo ɛnyi tee wa zɛ ilɔ. Ɛnyi mba akwu: 14 Ɔsamɔ (uwu e kpo wu ɛnyi tee Opita awu) mbala Anduru umanyi wu; mbala Ozhemisi, mbala Ɔzhɔnu, mbala Ofilipu, mbala Obatalomi, 15 mbala Omatiyu, mbala Otoma, mbala Ozhemisi umɛ uwu Alufiyɔ, mbala Ɔsamɔ (uwu o ya wu tee Ɔzilɔtu awu), 16 mbala Ozhudasi umɛ uwu Ozhemisi, mbala Ozhudasi Isikariyɔ uwu bɔkɔ a ba kwu u to Ɔzhizɔsi a yama awu.

17 Ɔzhizɔsi a kalama e bo mɛzhi mbala wa zɛ ilɔ wu, akwɛyi a ri mu kizɛ ri dandanda mbala riba ingyɛkwu ingyi Wavɔngɔkiya wu. Riba ingyɛkwu ingyi enzu umba ɔ wɔ mu ɛzhi iyi Ozhudiya mbala Ɔzhɛrusalɛ mbala ese iyi Otaya mbala Ɔsidɔ iyi bɔkɔ i yi mu kenzu unga risu awu i yi mɔmɔ tete; 18 o bo te kaa lo pwa iso wu, kaa le kyo le bo mbo efya mba ma tete. Enzu umba bɔkɔ o yi ɛndu iyira, o wa yi mba ma tete. 19 Uwewe a gyi te la pwu Ɔzhizɔsi afyi kwuwongu ekpasu i yi mu iwɔma mu ɛnwu wu akwɛyi i bo enzu efya mba ma lɛɛbi.

20 Ɔzhizɔsi e yese Wavɔngɔkiya wu akwɛyi a zɔ tee,

Ɔnyɛ akwu uwayi lunyi ayirewa; moo

Irɛsu iyi Ukpo akwu iyayi!

21 Ɔnyɛ akwu uwayi lunyi umba lu yi lonzu kekelele;

moo ubwu e do yi mo!

Ɔnyɛ akwu uwayi lunyi umba lu yi mu oga ilomo kekelele;

moo lu nyɔngɔma memowu!

22 Ɔnyɛ akwu uwayi kwuyengwu enzu o wo anya yi, o towo yi mo, o kpayi ari, akwɛyi ɔ zɔ tee lunyi lu kwu enzu umbira kwuwongu Umɛ uwu Onzu! 23 Kwuye ungwu o wo yi tayi la lu mwɔnyɛ, la lu komo moo o sheyi rigbɛ ingyɛkwuu moshi. Moo tatayi gba asɔkwu mba o wo anukenzu umba Ukpo le tete.

24 <<Inyashi iyɛkuu i rigbo yi lunyi umba lu yi kwuwo kekelele;

moo ɔnyɛ uwayi lu mu wu-a!

25 <<Inyashi iyɛku i rigbo yi lunyi umba lu yi ubwu duduu kekelele;

moo lu kpo lonzu memowu!

<<Inyashi iyɛku i rigbo yi lunyi umba lu nyɔngɔma kekelele;

moo lu wo ubugyi lu lo oga memowu!

26 <<Inyashi iyɛku i rigbo yi lunyi umba bɔkɔ enzu ɔ pwɔ yi ma; moo tatayi gba asɔkwu mba o koko ɔ pwɔ anukenzu umba angba ma le tete.

27 <<Mi so yi lunyi umba lu ye mi mu ipwama: La lu pwu idɛnyi iyi agewa yi, enzu umba bɔkɔ ɔ gyi yi mo ba la lu wo mbo iyeshi, 28 umba bɔkɔ o ta yi kenzu unga ira, la lu ta mba kenzu unga eshi, umba bɔkɔ o wo yi ira, la lu lɛ mba Ukpo uwu eshi. 29 Gba onzu a kpa ŋa afyi mu kwɔngba kwunyi, shi wu ungufo tete; gba onzu a na ŋa ɔriga uwakwu ma, ki nyi wu ɔmu ma mo. 30 Onzu uwunawuna uwu bɔkɔ a nda ŋa kiya ki nyi wu ma mo, tatayi, gba onzu e to ŋɔ kiya ma, ki gba ki yo wu kwuyo ngyi fo. 31 Kyamate uŋɔ ŋɔ gyi tee lo wo ŋɔ awu, gba uŋɔ wo enzu le tete.

32 Gba lu pwu idɛnyi iyi enzu umba o pwu idɛnyi yi kɛɛkyi, ba rigbɛ yi akwu ingyi na? Enzu umba ingbomo lala o pwu idɛnyi iyi enzu umba o pwu idɛnyi mba le tete! 33 Gba lu wo iyeshi la umba o wo yi iyeshi kɛɛkyi, ba rigbɛ yi akwu kwuwongumbe? Enzu umba ingbomo lala o wo ɛlɛ tete! 34 Gba lu lo enzu kwɔkpa umba lu fulo eyi tee o wayi ngwu ma kɛɛkyi, ba rigbɛ yi akwu kwuwongumbe? Enzu umba ingbomo lala o lo enzu umba ingbomo kwɔkpa tete la eyi ifulomo tee ɔ wangu mba ma lɛɛbi! 35 Lunyi, la lu pwu idɛnyi iyi agewa yi, la lu wo mbo iyeshi; la lu lo mbo kwɔkpa la lu fulo eyi te o wa yi ngwu ma mo. Ɛlɛ ii shi yi rigbɛ ingyɛkwu, akwɛyi luu kwu ɛmɛ umba Ukpo edego ala. Moo uwu akwu u wo iyeshi la enzu umba o yi ingbede mo mbala enzu umbira. 36 La lu kwu enzu wa ma inyashi iyi enzu kyamate Ete yi tayi.

37 <<La lu zɔ enzu ombu mo, Ukpo ba a zɔ yi ombu mo; la lu tutu onzu mo mo, Ukpo ba e tutu yi mo mo; la lu gba yi lu kpa enzu, Ukpo ba a gba yi a kpa yi tete. 38 La lu shi enzu kiya, akwɛyi Ukpo ba e shi yi tete. Mu omudu uweshi, uwu o kpa wu ewo sha sha, o wo wu akpa, a nyɔlɔma nzhii ba a za la ifumo gba o mondo ŋɔ le. Omudu uwu ŋɔ mondo laa enzu ma wu, ma wu gba Ukpo e mondo ŋɔ le tete.>>

39 Ɔzhizɔsi a ba mba kwoba tee: <<Onzu upeyi e do tee e yi upi laa upeyi tete mo; moo gba e wo tayi, wepepo mbo o fumo mu kwuvɔ. 40 Umɛ uwu omakarata a ka omale wu ma mo; tetete umɛ uwu omakarata uwunawuna uwu bɔkɔ a mbwa ivɔngɔma ma, e yi kyamate omale wu tete.

41 <<Kimbe ki shi ŋɔ yese kwɔsɛ mu kwuyi ungwu umɛnɛ ŋɔ, ba ŋɔ ma kwutu ungwu kwuwɛyi ungwu kwu yi mu kwuyi ŋɔ mo? 42 Ŋɔ wo la ŋɔ za la umɛnɛ ŋɔ tee, <Umɛnɛ mi, bo ka la mi waŋa la kwɔsɛ ma mu kwuyi,> munɛ ba ŋɔ fa la kwutu ungwu kwuwɛyi mu kwuyi ŋɔ imama? Uŋɔ umwangba ele! Wa la kwutu ungwu kwuwɛyi ungwu kwu yi mu kwuyi ŋɔ ma dɛ, akwɛyi ŋɔ ma kwɔsɛ mu kwuyi ungwu umɛnɛ ŋɔ gede gede.

43 Uwɛyi uweshi u wa la imwuma iyira mo, uwɛyi uwura ba u wa la imwuma iyeshi mo. 44 Ɔ zɔngɔma uwɛyi uwunawuna ma mu imwuma wu. Ɔ bɛ imwuma iyi uwɛyi iyi ofigi mu uwɛyi uwu owula mo, nana ɔɔ bɛ eremi mu uwɛyi uwu ikpɛ ŋa. 45 Onzu uweshi a wa la apula iyeshi iyi bɔkɔ i yi mu akɔ wu le, onzu uwura tete a wa la apula iyira iyi bɔkɔ i yi mu akɔ wu le tete. Kiya ingyi ki yi mu akɔ le gba kenzu kaa wa ngyi le.

46 <<Kimbe ki shi lu ya mi tee, <Ɔkwu, Ɔkwu,> munɛ ba lu wo kiya ingyi mi za yi tee la lu wo mo? 47 Onzu uwunawuna uwu e bo mbaa mi, akwɛyi a pwa iso mi ba e wo ɛduma ma yi - mi zɔ yi kiya ingyi onzu awu o masa wu mbala ngyi. 48 E yi mate, onzu uwu a gyi te le mbo kwogba wu, akwɛyi a vu kwuvɔ fororo akwɛyi e fulo ɔla uwu kwogba mu ɔzɔ tayi. Kwuye ungwu ɔkwu u lomo u sama akwɛyi embyi o ngbɛgbu mu kwogba kwɔngu, kiya kinyinyi ki wo ngwu mo kwuwongu o mbo ngwu ɔnyɛ. 49 Ishi onzu uwu a pwa iso mi ba e wo ɛduma ma yi mo, e yi mate onzu uwu e mbo kwogba wu mu ɛzhi shara ba a la ɔla uwu kwogba dɛ mo tayi; kwuyengwu kwokpo ungwu embyi kwu bo kwu fya mangwu, kwogba kwɔngu kwu shirimo kwu fu mu ɛzhi putuu!>>