1 Tabɔkɔ Ɔzhizɔsi e fye mu Ozheriko akwɛyi a zɛ mekeka iyi kwuse. 2 Onzu ukpɛnyi e yi mɔmɔ o ya wu tee Ɔzakiyɔsu u to keyi uwu oba uwɛzhi inama, uwu ba e yi kwuwo gyɔɔ. 3 A gyi tee la ma Ɔzhizɔsi, ba i wo wu mo mo kwuwongu riba ingyi enzu ri gama uwu ba akwu odari. 4 Akwɛyi a renya a ka keyi akwɛyi a ya mu uwɛyi uwu Osikamo ka la ma Ɔzhizɔsi, kwuwongu Ɔzhizɔsi e yi mu inyɔma mu ɔgwuzɛ ɔwu.

5 Kwuye ungwu Ɔzhizɔsi e bo mu riyi ngyɛngyi, e yese mu oshi akwɛyi a za wu tee, <<Ɔzakiyɔsu, kalama efyefya. Ɔnɛnɛ, mogba ŋa gba mi kpo le.>> 6 Ɔzakiyɔsu a kalama efyefya akwɛyi a na wu laa ɔnyɛ uwakwuu.

7 Tabɔkɔ riba ingyi enzu umba bɔkɔ o yi mɔmɔ o ma ɛlɛ, akwɛyi o le mu anu izɔma tee, <<Onzu ele a ka kwu ugboga uwu onzu uwu <ingbomo!>>

8 Akwɛyi Ɔzakiyɔsu e yimo a rima akwɛyi a za laa Ɔkwu tee, <<Pwa, adakwogba! Kwurizhi ungwu kiya ingyi mi yi ngyi, mi rangyi mi shi ayirewa. Gba mi na kiya ingyi uturimo kikpɛnyi mu kwuwo ungwu onzu, mi wa wu kwɔkpa ngyi ma izhendo.>> 9 Akwɛyi Ɔzhizɔsi a za wu tee, <<Isama i bo mu kwogba ngwɔlɛ ɔnɛ-ɛ, moo onzu ele akwu umɛ uwu Aburamu tete. 10 Umɛ uwu Onzu e bo te la gagyi enzu umba bɔkɔ o tomo kaa la sa mba ma.>>

11 Tabɔkɔ enzu o yi mu iso ɛlɛ ipwama bɛnɛ, akwɛyi Ɔzhizɔsi a gba a ba mba kwoba kwowa. A nda la Ɔzhɛrusalɛ fo akwɛyi enzu o ma te Irɛsu iyi Ukpo i nyɔ mu kwotota kwɔngu. 12 Akwɛyi a za mba tee, <<Onzu uwakwu uwufo a lafya la kwuse wu a ka mu kwuse ungufo ungwu indama kaa lo towu ɛsu dɛ kaa la gbama le. 13 A ya ɛmɛgba wu wewo ma dɛ gba e to ɔgwuzɛ uwu luzɛ wu le. E shi onzonzu kwoso ungwu ogolu kwukpɛnyi akwɛyi a za mba tee, <La lu fulo ewo ma yi nzhii ba mi bi gbama.> 14 <<Enzu umba kwuse wu ba o gyi wu mo akwɛyi o lɔ alɔgbulɔ o mbwalu izhikembo wu kaa lɔ zɔ tee, <Kinzu ki gyi tee onzu ele lakwu ɔsu nzu mo.>

15 <<Tetete o towu ɛsu akwɛyi a gbama e bo mogba. Tabɔkɔ e fye mogba akwɛyi a lɔma laa ɛmɛgba wu umba bɔkɔ e shi mbo eduwo awu kaa le yo kwuyo ungwu kwule ungwu o fya. 16 <<Umɛgba uwu kwonze e bo akwɛyi a zɔ tee, <Adakwogba, mi gba mi fya esepo iyi ogolu uwo mi kyo mu ogolu kwukpɛnyi ungwu ŋɔ shi mi awu.> 17 Adakwogba a gbɛlɛ wu ɛnyi a za wu tee, <Gbɛgyɛ iyi iwomo, ŋɔ kwu umɛgba uwesheshi!> Kwuwongwu ŋɔ bɔ eyi mu kiya ingyɛri awu, mi shi ŋɔ ɛsu iyi ese uwo.> 18 Umɛgba uwopo e bo akwɛyi a zɔ tee, <Adakwogba, mi gba mi fya esepo iyi ogolu ɛlɔ mi kyo mu ogolu kwukpɛnyi ungwu ŋɔ shi mi awu.> 19 Adakwogba a za wu tee, <Mi shi ŋɔ ɛsu iyi ese ɛlɔ.> 20 Umɛgba uwufo e bo akwɛyi a zɔ tee, <Adakwogba, kwoso ungwu ogolu ŋɔ kwu ŋɔ le; mi nvye ngwumo mu kwukokpayi. 21 Mi wiyi ŋɔ, kwuwongu ŋɔ kwu onzu uwu a kɔma. Ŋɔ to kiya ingyi bɔkɔ akwu ingyaŋa mo, ŋɔ lɔ mbaa ŋɔ somo mo.>

22 Akwɛyi Adakwogba wu a za wu tee, <mu ogolu kwukpɛnyi ungwu ŋɔ shi mi awu.> Uŋɔ umɛgba uwu ra ele! Iso iyi kenzu ŋɔ gba mi ra yi mi zɔ ombu ŋɔ le! Uŋɔ ŋɔ yitu tee mi kwu onzu uwu a kɔma, mi to kiya ingyi bɔkɔ akwu ingyami mo ba mi lɔ mbaa bɔkɔ mi somo mo. 23 Kimbe ki wo ba ŋɔ shi eduwo mi mu ugu uwu eduwo kaa kwuyengwu mi gbama, la mi na yi ma mbala kwule mo?> 24 <<Akwɛyi a za laa umba bɔkɔ o ri kɛlɛ mbala wu awu tee, <La lu na kwoso ungwu ogolu kwukpɛnyi kwɔngu ma mu kwuwo wu kaa lu shi ngwu onzu uwu e yi esepo iyi ogolu uwo awu.>

25 Umba ba o za wu tee, <Adakwogba, moo ele e yi esepo iyi ogolu uwo-o mɛɛ!> 26 Uwu ba a gbamba opwu tee, <Mi gyite lami so yi tee onzu uwunawuna uwu bɔkɔ e yi kiya, o kyo wungyi mo; onzu uwu bɔkɔ e yi kiya mo, ingyi e yi ngyi bwɛɛ awu lala o na wu ngyi ma. 27 Kekelele enzu umbeyi mi umba bɔkɔ o gyi tee la mi kwu ɔsu mba mo awu, la lu bo mbo tee kaa lu ngbɛ mba ma mu idu mi!>>>

28 Mizhikembo iyi Ɔzhizɔsi a mbwa ɛlɛ isomo, akwɛyi e to keyi o le mu luzɛ o sheye mu Ɔzhɛrusalɛ. 29 Tabɔkɔ a ka kɛlɛɛ mbala ese iyi Ɔbɛtifagi mbala Ɔbɛtani mu Lɔwa undu Olivu, o ya wu tee Lɔwa ungwu Olivu awu, akwɛyi a lɔ Wavɔngɔkiya wu wepo ma, a za mba tee, 30 <<La lu so mu kwuse ungwu kwu ŋɔ mu keyi yi awu; gba lu yi mu ifyemo, lu ma ɔzɛki ta o ma wu ma mɔmɔ, uwu bɔkɔ o do ya ma wu dɛ mo. La lu vuvu wu ma ka lu ka mi wu munɛ. 31 Gba onzu uwunawuna e yo yi kwuyo tee, kimbe ki wo ba lu vuvu wu ma, la lu za wu tee, Adakwogba e yi ugɔ wu.>>>

32 Ɛmɛgba umba bɔkɔ o lɔ mba ma awu o ka mɔmɔ akwɛyi o du yi kyamate ba Ɔzhizɔsi e so mbo awu. 33 Tabɔkɔ o yi mu ɔzɛki awu ivuvuma, akwɛyi ada uwu kiya e ngyi akwɛyi e yo mbo tee, <<Kimbe ki wo bɔkɔ lu vuvu ɔzɛki ele ma?>> 34 O gba wu opwu tee, <<Adakwogba e yi ugɔ wu,>> 35 akwɛyi o to ɔzɛki awu o ka wu laa Ɔzhizɔsi. O fulo ekpayi mba mu kadu unga ɔzɛki akwɛyi o to Ɔzhizɔsi o fulo mawu. 36 Tabɔkɔ o zɛ o sheyimo, enzu o ya ekpayi mba ma mu ɔgwuzɛ.

37 Kwuye ungwu e bo kɛlɛɛ mbala Ɔzhɛrusalɛ, mbaa bɔkɔ ɔgwuzɛ u solo u ka mbaa Lɔwa undu Olifu awu, akwɛyi riba ingyi Wavɔngɔkiya wu lɛɛbi o le mu Ukpo ɛnyi igbɛlɛma laa iduma wu mu opwu uwɔkwu kwuwongu ɛduma iyi izele iyi bɔ o ma: 38 O za la isomo tee, <<Ukpo le shi ɔnyɛ laa ɔsu uwu bɔkɔ e bo mu ɛnyi iyi Ɔkwu! Oloto moshi mbala inzumbɛku akwiyi Ukpo!>>

39 Akwɛyi Afarisi umbafo mɛmi iyi riba ngyɛ ngyi o za laa Ɔzhizɔsi tee, <<Omale, kpa Wavɔngɔkiya ŋa ɛyi kaa lo kpala kenzu mo!>>

40 Ɔzhizɔsi a gba mba opwu tee, <<Mi so yi, gba enzu mbɔlɛ o kpala kenzu mo lala, ekyi ɛlɛ i le mu anu iwɔma.>>

41 Matee ba e bo kɛlɛɛ mbala Ɔzhɛrusalɛ akwɛyi a ma kwuse kwɔngu, e loga kwuwongu, 42 akwɛyi a zɔ tee, <<Gba uŋɔ ele la ŋɔ yitu iyi kwɔfyi kwɔlɛ kiya ingyi ki ka ŋa la oloto! Kekelele ba ŋɔ do te ŋɔ ma yi mo! 43 Kwuye kwu yi mu inyɔma bɔkɔ agewa yi o mbo kwukoga o lo yi meka, o lo yi kwukpo akwɛyi o fula yi ma munamuna. 44 Uŋɔ mbala enzu ŋɔ lɛɛbi o ngbɛ yi ma; o lafya laa kwokyi kwukpɛnyi te mu riyi ngwu mo, kwuwongu ŋɔ zɔngɔma kwuye ungwu Ukpo e bo te kaa laa sayima mo!>>

45 Akwɛyi Ɔzhizɔsi e fye mu ɔtɛpu akwɛyi e le mu enzu umba bɔkɔ o ya apula ma irama, 46 a za mba tee, <<O ka yi ma mu kwokpo ungwu Iso iyi Ukpo tee, <Ɔtɛpu mi akwu kwogba ungwu Ukpo ilɛma.> Lunyi ba lu rangwu lu wo kizɛ ingyi invyemo ingyi awɛlɔ!>>

47 Kwɔfyi kwɔfyi Ɔzhizɔsi a zɔ ɛzu mu Ɔtɛpu. Eboshi umbakɔ, mbala wazɔ Ɛrama iyi Omosisi mbala wa to keyi umba enzu mbamba ba o gyi tee lɔ ngbɛ wu ma, 48 umba ba o fya ɔgwuzɛ wu ma mo kwuwongu enzu lɛɛbi o ŋɔma o yi mu iso wu ipwama, o gyi tee iso wu ikpikpɛnyi te li pika mba mo.