1 Ɔnu uwufo Ɔzhizɔsi a ya Wavɔngɔkiya wu wewo la wepo ma, a kpala mba ɛlu akwɛyi e shi mbo ekpasu mbala idomo kaa lo ralaa eyo iyira ma, kaa lo bo efya ma. 2 Akwɛyi a lɔ mba ma tee lo so lo tanu iyi Irɛsu iyi Ukpo, lo bo enzu efya ma. 3 A za mba tee, <<La lu za laa kiya kinyinyi mu luzɛ yi ndɔlɛ mo: la lu za laa upi mo, la lu za laa kwolamba mo, la lu za laa kiya ingyirimo mo, la lu za laa eduwo mo, ba la lu za laa origa uwufo mo. 4 Kwogba ungwunanguna bɔkɔ lu fye ba o nayi ewo epepo, la lu ŋɔ mɔmɔ nzhii ba kwɔfyi ungwu lu bu fulomo mu kwuse kwɔngu; 5 munamuna bɔkɔ enzu o na yi ewo epepo mo, la lu bulɔ kwumburu ungwu alɛ yi ma kwuyengwu lu lafya la kwuse kwɔngu, kaa lakwu izɔgɔ tee o na yi mo kwuyengwu lu bo munyi mbo.>> 6 Akwɛyi Wavɔngɔkiya wu mbamba o lu wu afyima o ka mu ese-ese, o tanu iyi Ilɔ iyi esheshi iyi Ukpo, o gba o bo enzu efya ma muna muna.

7 Tabɔkɔ Ɛrɔdu Ɔsu uwakɔ uwu ɛzhi iyi Ogalili a pwa iyi bɔkɔ i yi mu iwomo lɛɛbi, akwɛyi a ta aka gyɔɔ kwuwongu bɔkɔ enzu umbafo o zɔ tee Ɔzhɔnu uwo obatisima o gbawu laa iyimo mu kwuvɔ. 8 Umbafo ba o zɔ tee Elazha a gba a wɔ kwudu, umbafo kpɔ o zɔ tee anukenzu uwufo uwekyi gba a gba laa iyimo le. 9 Akwɛyi Ɛrɔdu a zɔ tee, <<Ɔzhɔnu mi shi o kpolowu kwoshi mo-o; onzu ele akwu uwe bɔkɔ mi pwa apula ɛlɛ mekeka wu le?>> Akwɛyi e le mu iwomo nzhii tee la ma Ɔzhizɔsi.

10 Wa zɛ ilɔ mbamba o gbama akwɛyi o so Ɔzhizɔsi iyi bɔkɔ umba o wo lɛɛbi. Akwɛyi a kwu mba ma o ka mu kwuse ungwu o ya ngwu tee Ɔbɛsayida, 11 Tabɔkɔ enzu o pwa yi akwɛyi o mbwalu wu mɔmɔ. A na mba ma akwɛyi e so mbo iso iyi Irɛsu iyi Ukpo, akwɛyi enzu umba bɔkɔ o mwɔnyɛ mo e bo mbo efya ma.

12 Kwuye ungwu ɔnu u selemo, wa zɛ ilɔ wewo la wepo mbamba o bo mba Ɔzhizɔsi akwɛyi o za wu tee, <<Shi enzu mbɔlɛ kaa lo so mu ese iyɛri mbala alagba ɛlɛ kaa lo gagyi kiya ingyirimo mbala riyi ingyi inɔma moo munɛ ki ga fɔrɔ ma.>>

13 Ɔzhizɔsi ba a gba mba opwu tee, <<Lunyi la lu shi mbo kiya kaa lo ri.>>

O gba wu opwu tee, <<Ki yi eburedi ɛlɔ mbala emu wepo bi, ishi ba ŋɔ ŋi fye enzu mbɔlɛ lɛɛbi, de ba ki bi ya kiya ingyirimo loo.>> 14 (Enzu anzɔnu mate edubu ɛlɔ tee gba o yi mɔmɔ le.)

Akwɛyi Ɔzhizɔsi a za laa Wavɔngɔkiya wu tee, <<La lu shi mbo lo ŋɔma uzhi uwɛkpɛlɔ uwɛkpɛlɔ>> 15 Wa vɔngɔ kiya wu o wo tayi akwɛyi onzu uwunawuna a ŋɔma, 16 akwɛyi Ɔzhizɔsi e to eburedi ɛlɔ mbala emu wepo mbamba, e yi eyefaa e yese moshi, a gbɛlɛ Ukpo ɛnyi akwɛyi a mu yi ma e shi Wavɔngɔkiya wu kaa lo ka yi enzu mbamba. 17 Enzu lɛɛbi o ri ba ubwu e do mbo mo, Wavɔngɔkiya wu o kpala ebwebwede iyi bɔkɔ ishimo ɛlu mu lubiri luwo la lopo.

18 Ɔnu uwufo Ɔzhizɔsi e yi mu Ukpo ilɛma kɛɛkyi wu akwɛyi Wavɔngɔkiya wu o bo munyi wu akwɛyi e yo mbo tee, <<Enzu o so tee mi kwu uwe?>>

19 O gba wu opwu tee, <<Umbafo o zɔ tee ŋɔ kwu Ɔzhɔnu u wo obatisima. <<Umbafo ɔ zɔ tee ŋɔ kwu Elazha, umbafo ba o zɔ tee anukenzu ɛnyi uwekyi a gba a nyi eyimo.>>

20 Akwɛyi e yo mbo tee, <<Lunyi kɔ lu zɔ tee mi kwu uwe?>> Opita a gba opwu tee, <<Ŋɔ kwu Okrasi uwu Ukpo.>>

21 Akwɛyi Ɔzhizɔsi e yi Wavɔngɔkiya wu mu alu iyɛkɔkɔ tee lo so uwewe iso ɛlɛ mo. 22 E kyo a za mba tee, <<Umɛ uwu Onzu a ma inyashi gyɔɔ akwɛyi enzu umbakɔ, ebwoshi umbakɔ, mbala wa zɔ Ɛrɛma iyi Omosisi o towo wu mo akwɛyi ɔ ngbɛ wu ma. Tetete ɔnu uwu kwɔfyi ungwɔla o gba wu laa iyimo mu kwuvɔ.>>

23 Akwɛyi a za mba lɛɛbi tee: <<Onzu uwunawuna uwu a gyi tee la mbwalu mi, mega e towo ɛnwu wu ma akwɛyi e to kwuwɛyi ungwu lukwu wu kwɔfyi kwɔfyi kaa la mbwalu mi. 24 Moo onzu uwunawuna uwu a gyi tee laa sa kwunyɔ wu ma, kwu tomo, onzu uwunawuna uwu bɔkɔ kwunyɔ wu kwu tomo kwuwo mi, ba a sangwu ma. 25 Kimbe bɔkɔ akwu esheshi yi kaa onzu le ri kwule ungwu kwudu kwɔlɛ ma lɛɛbi, ba kwunyɔ wu kwu tomo? I yi mo ndii! 26 Onzu uwunawuna uwu e wo lovya iyi imbwalu mi mbala rɛnu mi, Umɛ uwu Onzu e wo lovya wu tetee kwuyengwu a ba nyɔ mu inzumbɛku wu mbala inzumbɛku iyi Ada mbala iyi alɔgbulɔ wakɛrikɛri. 27 Mi so yi ongbulolo tee, umbafo umba o ri munɛ o ma Irɛsu iyi Ukpo dɛ gba o bo kpomo le.>>

28 I yi mate afyi ɛranda tee mu izhikembo iyi bɔkɔ Ɔzhizɔsi e siso ɛlɛ, akwɛyi e to Opita, Ɔzhɔnu mbala Ozhemisi o ka mu kadu unga Lɔwa kaa lo lɛ Ukpo. 29 Tabɔkɔ e yi mu Ukpo ilɛma, akwɛyi ureyi wu u vindɔma, ekpayi wu i vindɔma i ŋɔ purɛtɛtɛ mate imingɔma iyi kawu tayi. 30 Enzu wepo ɔ wɔ kporo akwɛyi o le mu iso isomo mbala wu. Enzu mbɔlɛ akwu Omosisi mbala Elazha, 31 bɔkɔ ɔ wɔ mu inzumbɛku iyi oshi akwɛyi o siso mbala Ɔzhizɔsi meka iyi lukwu undu bɔkɔ e kpo mu Ɔzhɛrusalɛ kaa laa nyɔlɔ iyi Ukpo a gyi. 32 Opita mbala umba bɔkɔ o yi mbala wu ondo u yi mbo mo gyɔɔ, kwuyengwu ba o nyeyimo mu ondo, o ma Ɔzhizɔsi mu inzumbɛku wu mbala enzu wepo umba bɔkɔ o ri mbala wu. 33 Tabɔkɔ enzu mbamba o lafya laa Ɔzhizɔsi o sheyimo, akwɛyi Opita a za wu tee, <<Ada kwogba, ishoshi bɔkɔ ki yi munɛ le! Ki la ɛnu ɛla, kwunyi akwu ungwaŋa, kwunyi akwu ungwu Omosisi ungufo ba akwu ungwu Elazha.>> (Uwu ba e yitu shɛ kiya ingyi e yi mu isomo mo.) 34 Tabɔkɔ e yi mu iso ɛlɛ isomo bɛnɛ, akwɛyi kwɔmu kwu wɔ kwu koko mbo mo; akwɛyi iyi i wo Wavɔngɔkiya mo, kwuwongu kwɔmu kwɔngu kwu koko mbo mo. 35 Akwɛyi opwu u wɔ mu kwɔmu kwɔngu akwɛyi u zɔ tee, <<Ele akwu Umɛ mi, uwu bɔkɔ mi ŋa - la lu pwa iso wu!>>

36 Tabɔkɔ opwu ɔwu u lafyima laa iso isomo, akwɛyi o ma Ɔzhizɔsi tee a ri kɛɛkyi wu ŋa. Wa vɔngɔ kiya wu ba o shi apula iyi i wo le laa ɛmba, o so onzu ɛnyɛnyi te kiya ingyi bɔkɔ o ma kwuye kwɔngu mo.

37 Mu eyi i lama, kwuye ungwu bɔkɔ Ɔzhizɔsi mbala Wavɔngɔkiya wu wala mbamba o kalama mu Lɔwa, akwɛyi riba ingyi enzu o bo du wu. 38 Onzu uwufo mɛmi iyi riba ingyi enzu mbamba e to opwu tee, <<U zɔ kiya! Mi-i kpa ŋa ɛshɛku, shɔɔkɔ yese umɛ mi - ukpɛnyi kɛɛkyi uwu mi yi wu le! 39 Kwundu ungufo kwu koko kwu fye mawu akwɛyi a byi ikyakwokwo iyi ɔkpɔ akwɛyi aa wa la kwɔnzhɛ mu kenzu; kwu lu wu afyima efya mo ba kwuu nɛ wu kanɛ iyɔkpɔɔ! 40 Mi kpa Wavɔngɔkiya ŋa ɛshɛku tee lo ra ngwu ma ba ɔ fɔma.>>

41 Akwɛyi Ɔzhizɔsi a gba opwu tee, <<Lunyi enzu umba ɔyi uwura ɔlɛ bɔkɔ lu yi ikwu idu fulo mo le! <<Mi ŋɔ mbala yi nzhii ba kwuyengwu na? Kwuye te bɔkɔ mi to kaa la mi yidu mbala yi?>> Akwɛyi a za laa onzu awu tee, <<Bo laa umɛ ŋɔ awu munɛ.>>

42 Kwuye ungwu bɔkɔ umɛ awu e yi mu inyɔma akwɛyi kwundu ungwura kwɔngu kwu yi wu kwu fya wu mɛzhi laa ipwulama. Ɔzhizɔsi ba a kpa kwundu ungwura kwɔngu ɛyi, e bo umɛ awu ofya ma akwɛyi a gba wu e shi ete wu. 43 Izele i yi enzu umba bɔkɔ o yi mɔmɔ lɛɛbi mo kwuwongu imbulama iyi ekpasu iyi Ukpo.

Enzu o degbo mu kenzu iyama bɛnɛ mu apula lɛɛbi bɔkɔ Ɔzhizɔsi e yi mu iwomo, akwɛyi a za laa Wavɔngɔkiya wu tee, 44 <<La lu ngbɛ alu mamari mu kiya ingyi mi gyi tee la mi so yi ele! O to Umɛ uwu Onzu o shi enzu umba o yi idomo.>> 45 Wa vɔngɔ kiya wu ba o zɔngɔma yi ma mo. O nvye yi mbo mo kaa lo zɔngɔma yi ma mo, umba ba o riyi kaa lo yo wu kwuyo.

46 Kaambu ka wɔ meka iyi Wavɔngɔkiya wu tee uwe bɔkɔ a ka meka mba. 47 Ɔzhizɔsi ba e yi egbo mbo awu akwɛyi e to umɛshɛri uwɛri uwufo, e shiwu a rima kɛlɛ mbala wu, 48 akwɛyi a za mba tee, <<Onzu uwunawuna uwu bɔkɔ a na umɛshɛri uwɛri ele kwuwo mi, Imi gba a na mi le; onzu uwunawuna uwu bɔkɔ a na mi, a na onzu uwu bɔkɔ a lɔ mi le. Moo onzu uwu bɔkɔ a nyɛma a ka le meka yi uwu gba a ka le.>>

49 Akwɛyi Ɔzhɔnu e to opwu tee, <<Adakwogba, ki ma onzu uwufo e yi mu ɛndu iyira irama mu ɛnyi ŋɔ, ba ki nyiwu ma, moo e yi mbala nzu mo.>>

50 Ɔzhizɔsi a za mba tee, <<La lu nyiwu ma mo,>> moo onzu uwu bɔkɔ akwu ogewa yi mo akwu uwayi.>>

51 Tabɔkɔ kwuye kwu ndama fo ungwu o to Ɔzhizɔsi o rewo moshi, Ɔzhizɔsi ba e shi egbo wu tee e re mu Ɔzhɛrusalɛ. 52 Akwɛyi a lɔ alɔgbulɔ lo to keyi lo fye mu kwuse kwukpɛnyi ungufo mu Osamariya kaa lo nɔngɔ ingyinangyina ma lo she wu. 53 Enzu umba kwuse kwɔngu ba o na wu mo kwuwongu a zɛ e sheye mu Ɔzhɛrusalɛ. 54 Kwuye ungwu Wavɔngɔkiya wu Ozhemisi mbala Ɔzhɔnu o ma tayi, akwɛyi ɔ zɔ tee, <<Ɔkwu, ŋɔ gyi tee la ki ya ɔyi ma moshi kaa lu bo mɛzhi ka lu pwu mbo mo re?>>

55 Ɔzhizɔsi ba e fulo biri akwɛyi a kpa mba ɛyi. 56 Akwɛyi Ɔzhizɔsi mbala Wavɔngɔkiya wu o kama mu kwuse kwowa.

57 Tabɔkɔ o yi mu luzɛ mu ɔgwuzɛ, onzu uwufo a za wu tee, <<Mi mbwalu ŋɔ muna muna bɔkɔ ŋɔ ri.>>

58 Ɔzhizɔsi a gba wu opwu tee, <<Lɔngbɔga lu yi ɛbwu mba, afyi umba oshi o yi igwu mbo, Umɛ uwu Onzu ba e yi mɔgɔ uwu bɔkɔ e lo reshi wu mo.

59 Ɔzhizɔsi a za la onzu awa tee, <<Mbwalu mi.>> Onzu awu ba a gba wu opwu tee, <<Ada kwogba, mi ri mi byi pwu ada mi ma dɛ.>>

60 Ɔzhizɔsi a za wu tee, <<Shi ɛkpɛzhi lo so lo pwu ɛkpɛzhi mba ma. Uŋɔ ba so kaa tanu iyi Irɛsu iyi Ukpo.>>

61 Onzu uwufo kpɔ a gba a za wu tee, <<Ada kwogba, mi mbwalu ŋɔ, shi mi kaa mi so mi wo agba mi ungbo dɛ.>>

62 Ɔzhizɔsi a gba wu opwu tee, <<Onzu uwu e yi kwuwo mu ɔbwa te a gbama akwɛyi a ma mu eyi igelemo mu kembo, e do ɛduma iyi Irɛsu iyi Ukpo iwomo mo.>>