1 Mu kwuye kwɔngu enzu umbafo umba o yi mɔmɔ o ba Ɔzhizɔsi ɛza iyi enzu umba Ogalili umba bɔkɔ Opayileti a ngbɛ mba ma kwuyengwu o yi mu isabɔ iwomo laa Ukpo. 2 Ɔzhizɔsi a gba mba opwu tee, <<Kwuwongwu bɔkɔ enzu mbɔlɛ o ngbɛ mba ma tayi, mu imama yi ingbomo mbo i ka ingbomo iyi enzu umba Ogalili mbanambana ma re? 3 Mi gyite la mi za yi tee akwu tayi mo ndii! Gba lu kwu ira yi ɔsu mo, lunyi tete lu kpɛdɔma mate umba tayi. 4 Nana enzu wewo la waranda umba bɔkɔ o kpomo kwuyengwu bɔkɔ otowa mu Osilo e shiri e kpo mbo akwɛyi a ngbɛ mba ma awu kɔ! Mu imama yi ingbomo mbo i ka ingbomo iyi enzu mbanambana ma umba bɔkɔ o yi mu Ɔzhɛrusalɛ re? 5 Mi gyite la mi za yi tee, akwu tayi mo ndii! Gba lu kwu ira yi ɔsu mo, lunyi tete lu kpɛdɔma mate umba tayi.>>

6 Akwɛyi Ɔzhizɔsi a ba mba kwoba tee, <<Onzu uwufo e gwu uwɛyi uwu oboriyo mu utu wu. Akwɛyi a ka tee la bɛ imuma wu, ba a fya kiya kinyinyi mo. 7 Akwɛyi a za la onzu u bɔ eyi mu utu ɔnwu tee, <Ata ɛlɛ akwu iyi ɔla bɔkɔ mi bo mbaa imuma iyi uwɛyi ɔlɛ ibɛma ba mi fya kiya kinyinyi mo. Kpolo wu mo! Kuwongwu kwuwongumbe u to kizɛ gbodogbodo shaa te?>

8 Onzu u bɔ eyi mu utu awu ba a gba opwu tee, <Adakwogba, <shiwobi kari ka kpɛnyi kaa la mi bɔ wu eyi kyo akwɛyi mi fu wu emi iyi ɛmu mu undu wu. 9 Gba u muma kari ungafo, ba ishoshi, gba akwu tayi mo, ba ŋɔ kpolo wu mo.>>>

10 Ɔnuwu kwɔfyi ungwu ɛnwu igbomo ungufo tee, Ɔzhizɔsi e yi mu ɛzu izɔma mu udaba uwu ɛlu ikpalama uwu Azhu. 11 Oko uwufo uwu bɔkɔ kwundu ungwura kwu ta wu ofya nzhii ba lɔri luwo la loranda. E ndumo kpɛkpɛ wu ba e do iyimo faa mo. 12 Kwuye ungwu Ɔzhizɔsi a ma wu, a ya wu ma tee le bo keyi akwɛyi a za wu tee, <<Oko ele, ofya ŋa u bomo-o!>> 13 E fulo wu ewo wu akwɛyi e yimo a rima mɔmɔɔmɔ, akwɛyi a du Ukpo ma.

14 U to keyi uwu udaba uwu ɛlu ikpalama ba amba o wo wu kwuwongu Ɔzhizɔsi e bo onzu ofya ma ɔnu uwu kwɔfyi ungwu ɛnwu igbomo, akwɛyi a za la enzu tee, <<Afyi ɛrɛnyi gba akwiyi ɛduma i womo le. La lu bo lo bo yi ofya ma mu afyi ɛnyi mo akwu ɔnu wu kwɔfyi ungwu ɛnwu igbomo mo!>>

15 Ɔkwu ba a gba wu opwu tee, <<Lunyi wamwu angba mbɔlɛ! Lunyi lu vuvu endo yi ma naa azɛki yi ma mu uri lu ka mba mbaa embyi iwomo ɔnu uwu kwɔfyi ungwu ɛnwu igbomo mo? 16 Oko ele akwu umɛ uwu Aburamu, uwu bɔkɔ onzu uwoyi a mawu ma lɔri luwo la loranda; ishoshi tee lo bo wu ofya ma ɔnu uwu kwɔfyi ungwu ɛnwu igbomo mo?>> 17 Tabɔkɔ Ɔzhizɔsi e so iso ɛlɛ, agewa wu kpɛkpɛmba lovya lu wo mbo mo, enzu umba bɔkɔ o gyirima awu ba o mwɔnyɛ mu apula iyi izele iyi bɔkɔ e yi mu iwomo awu.

18 Akwɛyi Ɔzhizɔsi e yo kwuyo tee, <<Irɛsu iyi Ukpo i yi tee? Mi masa yi mbala mbe? 19 I yi mate kwuyi ungwu omusita ungwu bɔkɔ onzu a ka e so mu utu wu. Kwu bulɔma kwu kwu uwɛyi, akwɛyi afyi umba oshi o kpo mu ende ngwu.>>

20 Akwɛyi Ɔzhizɔsi a gba e yo kwuyo kpɔ tee, <<Mi masa Irɛsu iyi Ukpo mbala mbe? 21 I yi mate otutu owuna uwu bɔkɔ okokpayi e to a vyi wu ma mbala etasa ɛla iyi umbwu nzhii ba i fye mɛsu.>>

22 Tabɔkɔ Ɔzhizɔsi e to ɔgwuzɛ e sheye mu Ɔzhɛrusalɛ, akwɛyi a zɛ mu ese iyɛku mbala iyɛri laa enzu ɛzu izɔma. 23 Akwɛyi onzu uwufo e yo wu kwuyo tee, <<Adakwogba, enzu umba bɔkɔ o fya isama o yi kɛkyi bi?>>

Ɔzhizɔsi a gba mba opwu tee, 24 <<La lu kpapyi ka la lu zɛ mu kenzugwu kambwe, kwuwongu umbafo gyɔɔ, o gyakpɔ tee lo fye mo ba o fɔma. 25 Gba ada uwu kwogba e yimo e koko riku mo dɛ, lu ri mu kwudu mu kwuwo ilama mu riku lu zɔ tee, <Ada, shɔɔkɔ wanzu riku mo nɛ!> uwu ba a gba yi opwu tee, <Mi yi mbaa bɔkɔ lu wɔ mo!>

26 <<Akwɛyi lunyi lu gbawu opwu tee, <Kinzu ki ri ba ki wo mbala ŋa, ŋɔ zɔ ɛzu mu ese nzu tete!>

27 Uwu ba a za mba kpɔ tee, <Mi yi mbaa bɔkɔ lu wɔ mo. La lu zɛ gbo minyi mi, lunyi enzu umbira mbɔlɛ!>

28 <<Kwuye ungwu bɔkɔ lu bu ma Aburamu mbala Aziki mbala Ɔzhɛkɔbu mbala anukenzu umbu Ukpo lɛɛbi mu Irɛsu iyi Ukpo, lunyi ba o toyo pyo mu kwudu, kwuye kwɔngu gba lu lɔga mbala ɛnyi ila mesu le! 29 Enzu o wɔ mu ɔnu kwoto mbala ononoyo, okanga uwu ɔnu kwoto mbala okanga uwu ononoyo, o ŋɔma mbaa odumudumu uwu Irɛsu iyi Ukpo. 30 La lu yitu yi tee, enzu umba bɔkɔ akwu wambwambwa le kekelele, umba gba akwu wayemo le, umba bɔkɔ akwu wayemo le kekelele ba umba gba akwu wambwama le.>>

31 Mu kwuye kwɔngu kya akwɛyi Afarisi umbafo o bo mbaa Ɔzhizɔsi, akwɛyi o za wu tee, <Lafya la kizɛ ngyɛlɛ kaa so munyawa, moo Ɛrɔdu a gyi tee la ngbɛ ŋɔ ma.>>

32 Ɔzhizɔsi a gba opwu tee, <<La lu so kaa la lu za la kangboga kanga tee: ɔnɛ mbala kwɔnyi kwɔlɛ mi ralaa ɛndu iyi ira ma, mi bo enzu ofya ma, ɔnu uwu kwɔfyi ngwola ba mi mbwa ɛduma mi ma.> 33 Tetete, ɔnɛ mbala kwɔnyikwɔlɛ mbala kwoyile kwɔle mi sheyimo la luzɛ mi; moo i shoshi tee lɔ ngbɛ anukenzu uwu Ukpo ma munamuna mo gba akwu mu Ɔzhɛrusalɛ mo.

34 <<Ɔzhɛrusalɛ, Ɔzhɛrusalɛ! Ŋɔ ngbɛ anukenzu umba Ukpo ma, alɔgbulɔ umba bɔkɔ Ukpo a lɔmba munyi ŋɔ ba ŋɔ to mbo ekyi! Izhɛvɔ bɔkɔ mi gyikpɔ tee la mi kpala ɛmɛ ŋɔ ɛlu, kyamate ɛnu a kpala ɛmɛ wu ɛlu mu ekowo wu, ba lu nya mi ma mo! 35 La lu yese, Ɔtɛpu yi o lu wu yi afyima-a. Gba mi so yi ele, lu gba lu ma mi fo nzhii ba ɔnuwu lu bu zɔ tee, <Esheshi akwiyi onzu uwu bɔkɔ e yi mu inyɔma mu ɛnyi iyi Ɔkwu.>>>