1 Mu afyi ɛnyi Ɔsu Ɔgɔsitu a ta ɔkpa tee lɔ wa enzu umba Ɛzhi iyi Oroma ma lɛɛbi. 2 Ɛlɛ gba akwu iwama iyi kwonze le mu kwuyengwu bɔkɔ Ɔkwiriniyɔ akwu ogwomina uwu Osiriya awu. 3 Akwɛyi onzonzu a ka mu kwuse wu kaa lɔ ka ɛnyi wu ma.

4 Ɔzhɔsɛfu tete e yimo mu kwuse ungwu Ɔnazarɛti mu ɛzhi iyi Ogalili a ka mu kwuse ungwu Ɔbɛtilɛhɛ, kwuse ungwu Odevidi mu ɛzhi iyi Ozhudiya kwuwongu a wɔ mu ɛdɔ iyi Odevidi. 5 A ka tee lɔ ka ɛnyi wu ma mbala Omeri uwu bɔkɔ e yewu mu iluma bɛnɛ awu. Kwuye kwɔngu ba Omeri a za laa rifo, 6 akwɛyi tabɔkɔ o yi mɔmɔ mu Ɔbɛtilɛhɛ bɛnɛ, akwɛyi afyi iyi kwɔmba wu i gyirima. 7 Akwɛyi a mba umɛ wu uwu kwonze, umɛ ɔnzɔnu, e wuwumo mu ekpayi akwɛyi e fulo wu mu kwuwoyo - kwuwongu o fya riyoga mo.

8 Wa pya luzhi o yi kɛlɛ mu kwuko ngwu ɛzhi ɛnyi mɔmɔ, o yi mu luzhi mba igbomo mutu. 9 Akwɛyi ɔlɔgbulɔ uwu Ɔkwu e bo mbaa mba, akwɛyi inzumbɛku iyi Ɔkwu i lemo mamba kyamate ɛbɛ tayi. Iyi i wo mbo mo gyɔɔ. 10 Ɔlɔgbulɔ uwu Ukpo awu ba a za mba tee, <<La lu wiyi mo! Mi ka yi laa ɛza iyeshi iyi i ka laa enzu lɛɛbi ɔnyɛ uwakwu. 11 Ɔnɛnɛ ɔ mba yi Usama mu kwuse ungwu Odevidi - Okrasi Ɔkwu! 12 Ɛlɛ gba akwa yi kɛzɔ le: lu du umɛ uwelu o wuwumo mu ekpayi akwɛyi o fulo wu mu kwuwoyo.>>

13 Akwɛyi kporo ba uzhi uwu alɔgbulɔ umba Ukpo o wɔ moshi mbala ɔlɔgbulɔ uwu Ukpo uwu kwonze awu akwɛyi o le mu Ukpo iduma, o zɔ tee:

14 <<inzumbɛku akwiyi Ukpo moshi,

mu kwudu kwɔlɛ ba, oloto lu yi mbala enzu umba bɔkɔ Ukpo a mwɔnyɛ mbala mba!>>

15 Kwuye ungwu bɔkɔ alɔgbulɔ umba Ukpo mbamba o lu mba afyima o gba o ka ma moshi, akwɛyi wa pya luzhi mbamba o so esu tee, <<La ki so mu Ɔbɛtilɛhɛ kaa la ki ma kiya ingyi ki wo ingyi bɔkɔ Ɔkwu e so nzu ele.>>

16 Akwɛyi o yimo efyefya ɔ ka, akwɛyi o du Omeri mbala Ɔzhɔsɛfu mbala umɛ awu, uwu o shi wu a nɔma mu kwufolo. 17 Tabɔkɔ wa pya luzhi mbamba ɔ ma wu, akwɛyi ɔ ba ɛza laa enzu iyi bɔkɔ ɔlɔgbulɔ uwu Ukpo e so mbo mu reshi ingyi umɛ awu. 18 Enzu lɛɛbi umba ɔ pwa ɛza iyi bɔkɔ wa pya luzhi mbamba o so mbo, izele i yi mbo mo. 19 Omeri ba e shi apula ɛlɛ ma lɛɛbi mu egbo wu laa egbo ibyima ma yi. 20 Akwɛyi wapya luzhi mbamba o gba o kama mbaa ɛduma mba, laa Ukpo iduma mbala ɛnyi igbɛlɛma kwuwongu apula iyi bɔkɔ umba o pwa ba o ma i yi kyamate bɔkɔ ɔlɔgbulɔ uwu Ukpo e so mbo tayi.

21 Ɔnu uwu bɔkɔ umɛ awu e yi afyi ɛranda, akwɛyi ɔ zɛ wu ɛsɔ ma akwɛyi o kpowu ɛnyi tee Ɔzhizɔsi, iyi bɔkɔ akwu ɛnyi iyi ɔlɔgbulɔ uwu Ukpo e shi ngbaa kwuyengwu o do shi rifo wu mo.

22 Tabɔkɔ kwuyengwu iwuluma mbakwu womo, kyamate ɛrama iyi Omosisi i so mbo, akwɛyi Ɔzhɔsɛfu mbala Omeri o to wu o ka wu mu Ɔzhɛrusalɛ kaa lo ra wu lo shi Ɔkwu, 23 kyamate bɔkɔ o ka mu ɛrama iyi Ɔkwu awu tee: <<Umɛ ɔnzɔnu uwu kwonze uwunawuna, akwu mɛga kaa lo ya wu tee Ɔkɛrikɛri uwu Ɔkwu.>> 24 O kyo o ka kaa lo wo isabɔ iyi agarikwokwo wepo nana atatabiri wepo, kyamate ɛrɛma iyi Ɔkwu i so tee lo wo awu.

25 Kwuye kwɔngu onzu uwufo o ya wu tee Ɔsamɔ , onzu uwu ototo u bɔ kwuyi mu ɛduma iyi Ukpo, e yi mɔmɔ mu Ɔzhɛrusalɛ. A rigbo kaa la ma U sa uwu Izirɛ. Kwundu uwu Ukpo ba e yi mbala wu 26 ba e so wu kpeke-e tee a ma Omezaya uwu bɔkɔ Ɔkwu e to mbo ishi tee a nyɔ dɛ gba e kpomo le. 27 Kwundu e yi Ɔsamɔ mo akwɛyi a ka mu Ɔtɛpu. Kwuye ungwu ete wu mbala anyi wu o bo laa Ɔzhizɔsi mu Ɔtɛpu kaa lo wo wu iyi bɔkɔ Ɛrama mba i zɔ tee lo wo, 28 akwɛyi Ɔsamɔ e to umɛ awu mu ewo wu akwɛyi a gbɛlɛ Ukpo ɛnyi a zɔ tee:

29 <<Ɔkwu mi, kekelele lafya laa umɛgba ŋa kaa le somo moloto bi ŋa moo iyi bɔkɔ ŋɔ so ŋɔ shimɛzhi awu, ŋɔ nyɔlɔ yi ma-a.

30 Eyi mi i ma isama ŋa,

31 iyi ŋɔ nɔngɔ mu eyi iyi enzu lɛɛbi-e tee:

32 E shi enzu umba bɔkɔ akwu Azhu mo, ɛbɛ,

akwɛyi e shi enzu ŋɔ, Izirɛ igba.>>

33 Ete uwu umɛ awu mbala anyi uwu o ya kenzu meka iyi iso iyi Ɔsamɔ e so mu reshi ingyi umɛ ele. 34 Akwɛyi Ɔsamɔ a ta mba kenzu ungeshi akwɛyi a za laa Omeri, anyi wu tee, <<Umɛ ele Ukpo a ŋa wu tee kaa lakwu kwuyi ungwu ikpa mɛzhi mbala iyimo iyi enzu gyɔɔ mu Izirɛ, akwu kɛzɔ unga Ukpo unga bɔkɔ enzu riba ba towo ngo mo, 35 kwuwongu umɛ ele, egbo iyira iyi enzu gyɔɔ i ta kwudu pepee. Uŋɔ ba ŋɔ wo idu shariri kyamate o la ŋa kepo mu idu tayi.>>

36 Kwuye kwɔngu, anukenzu okokpayi uwufo e yi mɔmɔ tete, o ya wu tee Ana, uwu bɔkɔ ete wu o ya wu tee Ɔfanuwɛ uwu kenzu unga Asha. Ana ba e yi lɔri gyɔɔ, e wo lɔri lorowo mbala ɔnuwu bi 37 akwɛyi ɔnu wu e kpomo. Kwuye ngwɔlɛ e yi lɔri uwo ekperanda la londo. A ŋɔ mu Ɔtɛpu; mu Ukpo ɔya igbomo,mbala Ukpo ilɛma mbala kenyo irima lutu lɔnu. 38 Tabɔkɔ Ɔsamɔ e yi mu isisomo laa Omeri mbala Ɔzhɔsɛfu bɛnɛ akwɛyi Ana e le mu Ukpo ɛnyi igbɛlɛma, e so iso gyɔɔ meka iyi umɛ ele laa enzu lɛɛbi umba bɔkɔ ɔ rigbo isama iyi bɔkɔ Ukpo a ba sa Ɔzhɛrusalɛ.

39 Kwuye ungwu Ɔzhɛsɛfu mbala Omeri ɔ mbwa iyinayina iwomo mate Ɛrama iyi Ɔkwu i zɔ, akwɛyi ɔ gba ɔ kama iyamba mu kwuse mbo ungwu Ɔnazarɛti mu ɛzhi iyi Ogalili. 40 Umɛ ele a bulɔma laa ekpasu, a nyɔlɔma laa ilukwu. Esheshi iyi Ukpo ba iyi mbala wu.

41 Kari kari ete uwu Ɔzhizɔsi mbala anyi wu ɔ ka mu Ɔzhɛrusalɛ mbaa Odumudumu uwu Ikalama. 42 Kwuye ungwu Ɔzhizɔsi e yi lɔri luwo la lopo akwɛyi ɔ ka mbaa odumudumu iwomo mate bɔkɔ akwu ukwu mbo awu. 43 Tabɔkɔ o mbwa odumudumu iwomo mo, ete wu mbala anyi wu o to ɔgwuzɛ uwu kwogba, Ɔzhizɔsi ba a rima mizhikembo mu Ɔzhɛrusalɛ. Ete wu mbala anyi wu ba o yitu mo; 44 O ma kyamate Ɔzhizɔsi e yi mbala enzu umba ɔ zɛ kya awu ŋa. Ɔ zɛma undu kwɔfyi kwunyi akwɛyi o le wu mu igagyima mbaa ɛmɛza mba mbala enzu umba ɛdɔ mba. 45 Tabɔkɔ o ma wu mo, akwɛyi o gba kembo o ka mu Ɔzhɛrusalɛ kaa lo gagyi wu. 46 Mizhikembo iyi afyi ɛla akwɛyi o du wu mu Ɔtɛpu mbala wazɔ ɛzu mu alu ingbɛma mbala eyo iyomo. 47 Onzu uwunawuna uwu bɔkɔ a pwa iso wu, a ya kenzu kwuwongu ilukwu wu mbala opwu igbama wu. 48 Kwuye ungwu ete wu mbala anyi wu ɔ ma wu, akwɛyi izele i yi mbo mo, akwɛyi anyi wu a za wu tee, <<Umɛ mi, kimbe ki shi ŋɔ wo nzu tee? Ada ŋa mbala mi, egbo nzu i tutumo gyɔɔ kwuwongu ki ma ŋa mo.>>

49 Ɔzhizɔsi ba a gbamba opwu tee, <<Lu gagyi mi iyi kwuwongumbe? Lu yitu tee i fate la mi yi mu kwogba ungwu Adami mo re?>> 50 Umba ba ɔ zɔngɔma iso iyi e so mbo le ma mo.

51 Akwɛyi a mbwalu mba ɔ gba ɔ kama mu Ɔnazarɛti laa ilomo laa ete wu mbala anyi wu. Anyi wu ba e shi apula ɛlɛ lɛɛbi mu akɔ wu. 52 Ɔzhizɔsi e le mu ibulɔma mu ɛnwu mbala ilukwu, a fya inzumbeshi mbaa Ukpo mbala enzu.