1 Akwɛyi enzu umba o kpala ɛlu mɔmɔ lɛɛbi o to Ɔzhizɔsi o kawa midu iyi Opayileti. 2 Akwɛyi o mwolo wu, ɔ zɔ tee, <<Ki du onzu ele e yi mu enzu nzu itutumo. A za mba tee lo shi Oba uwɛzhi laa Osiza mo. A gba a zɔ tee uwu gba wakwu Omezaya, Ɔsu le.>>

3 Akwɛyi Opayileti e yo wu kwuyo tee, <<Uŋɔ gba ŋɔ kwu ɔsu uwu Azhu lee?>>

Ɔzhizɔsi a gba wu opwu tee, <<Ee, i yi mate ŋɔ so awu.>>

4 Akwɛyi Opayileti a za laa ebwoshi umbakɔ mbala enzu mbamba tee, <<Mi fya kwuyi ungwu mi ngbɛ onzu ele ombu uwoyi mo.>>

5 Enzu mbamba ba o kpakpɛɛ mu isomo tee, <<A ta enzu ovyo mu Ozhudiya lɛɛbi mu ɛzu wu izɔma. E ye mu Ogalili nzhii ba e bo munɛ-ɛ.>>

6 Kwuye ungwu bɔkɔ Opayileti a pwa ɛlɛ, akwɛyi e yo kwuyo tee, <<Onzu ele akwu onzu uwu Ogalili re?>> 7 Tabɔkɔ Opayileti a pwa tee Ɔzhizɔsi a wɔ mu ɛzhi iyi bɔkɔ i yi mu kwuwo ungwu Ɛrɔdu, a lɔ wu laa Ɛrɔdu, uwu e yi mu Ɔzhɛrusalɛ kwuye kwɔngu.

8 Kwuye ungwu bɔkɔ Ɛrɔdu a ma Ɔzhizɔsi, a mwɔnyɛ gyɔɔ, kwuwongu a pwa ɛza wu akwɛyi a gyi tee la ma wu kwuboo. E yi mu eyifulomo kaa la kiya ingyi kenzu iyama ingyi Ɔzhizɔsi e be wo. 9 Kwuwo kwɔlɛ Ɛrɔdu e yo Ɔzhizɔsi eyo gyɔɔ, Ɔzhizɔsi ba a gba wu opwu mo. 10 Eboshi umbakɔ mbala wazɔ Ɛrama iyi Omosisi o wɔ kwudu o bo mu keyi akwɛyi o mwilo iyɛkuu mu reshi ingyi Ɔzhizɔsi. 11 Akwɛyi Ɛrɔdu mbala asozha wu o le mu Ɔzhizɔsi ɛnɛ iwomo la izhima; akwɛyi o lo wu ɛkiri uwesheshi akwɛyi o gba wu o ka laa Opayileti. 12 Mɔnu mawu Ɛrɔdu mbala Opayileti okwu ɛmɛza; moo mekyekyi umba akwu agewa umbesu.

13 Akwɛyi Opayileti a ya ebwoshi umbakɔ ma, mbala wa to keyi mbala enzu lɛɛbi, 14 akwɛyi a za mba tee, <<Lu ka mi la onzu ele tee uwu gba e lo enzu atiti kaa lo wo ovyo mu kwuse le. Imi ba mi yo wu kwuyo leyi yi-e, ba mi fya kwuyi ungwu ira iyi bɔkɔ lu zɔ tee e wo mo. 15 Ɛrɔdu tete a fya kiya ingyi ira ingyi onzu ele e wo mo gba a gbawu a ka nzu le. Onzu ele e wo kiya kyinyinyi ingyi ki do lukwu mo mo. 16 Kwuwo kwɔlɛ, mi kpa wu ikpa bi akwɛyi mi lu wu afyima.>> 17 Mu Odumudumu uwu Ikalama mba uwunawuna akwu mega kaa Opayileti la walaa onzu ukpɛnyi uwu enzu ɔ gyi mu ugu ugyi kaa le shi mbo.

18 Lɛɛbi mba ba o wo anu mu opwu ukpɛnyi tee, <<Lɔ ngbɛ wu ma! Lanzu afyima laa Obarabasi! 19 (Obarabasi o ta wu mu ugu ugyi kwuwongu a ta ovyo mu kwuse mbala enzu ingbɛma.)

20 Opayileti ba a gyi tee la lafya laa Ɔzhizɔsi, kwuwo kwɔlɛ a kpa mba ɛshɛku kpɔ. 21 Umba ba o kpakpɛɛ mu uzhi iwomo tee, <<Lo ngbɛ wu ma! Lo ngbɛ wu ma!>>

22 Opayileti a gba e so ungwɔla kpɔ tee: <<Ira iyina ba e wo? Imi mi ma kiya kikpikpɛnyi ingyi bɔkɔ e wo bɔkɔ ki do lukwu mo mo! Kwuwo kwɔlɛ, mi kpawu ikpa akwɛyi mi lu wu afyima kaa le sheyimo iyawu.>>

23 Enzu ba o kpakpɛɛ mu uzhi iwomo mu opwu uwɔkwu tee, lo ngbɛ Ɔzhizɔsi ma akwɛyi uzhi mba u na kizɛ ma lɛɛbi. 24 Opayileti a nya mba ma akwɛyi e wo iyi bɔkɔ umba o gyi. 25 A lafya la onzu uwu bɔkɔ o ta wu mu ugu ugyi kwuwongu ovyo iwomo mu kwuse mbala enzu ingbɛma, uwu bɔkɔ umba o nda kwoya wu awu, akwɛyi a ralaa Ɔzhizɔsi e shi mbo kaa lo wo iyi bɔkɔ ɔ gyi.

26 Tabɔkɔ asozha o za laa Ɔzhizɔsi o sheyimo, akwɛyi kpolo onzu uwufo uwu o ya wu tee Ɔsamɔ uwu Osarini, uwu bɔkɔ e yi mu i fye mu kwuse. O yi wu akwɛyi o to kwuwɛyi ungwu lukwu kwɔngu o fulo wu kaa la mbwalu Ɔzhizɔsi mizhikembo.

27 Enzu riba o mbwalu wu, i kyo mbala ekokpayi umba bɔkɔ o za laa oga ilomo mbala ubugyi iwomo kwuwongu Ɔzhizɔsi. 28 Ɔzhizɔsi e geleyi e yese mbo akwɛyi a za mba tee, <<Eko umba Ɔzhɛrusalɛ! La lu loga kwuwo mi mo, la lu loga kwuwongu ɛyi mbala ɛmɛ yi. 29 Moo kwuye kwu yi mu inyɔma bɔkɔ enzu o zɔ tee, <Ɔnyɛ akwu uwu eko edogyi, umba bɔkɔ o do mba ma dɛ mo, umba bɔkɔ o do yi ɛmɛ dɛ mo!> 30 Mu kwuye kwɔngu enzu o za laa lɔwa tee, <Shirimo kaa kpo ma nzu!> O gba o za laa edudu tee, <La lu nvye nzu mo!>

31 Moo gba enzu o wo apula ɛlɛ te la kwuwɛyi ungwewu, kwu bu shirima ba o mbwa te?>>

32 O kwu enzu umbira wepo o kyo mbala Ɔzhizɔsi o she mbo mbaa ingbɛma tete. 33 Kwuye ungwu o bo mu kizɛ ingyi o ya ngyi tee <<Kwukɔgɔ ungwu reshi,>> mɔmɔ gba o kpa Ɔzhizɔsi iba mu kwuwɛyi le, mbala enzu umbira wepo mbamba, ukpɛnyi mu kwuwo ungwungyi wu, uwufo ba mu kwuwo ungwɔzu wu. 34 Akwɛyi Ɔzhizɔsi a zɔ tee, <<Ada, gbayi kaa kpa mba! Moo o yitu iyi kiya ingyi bɔkɔ o yi mu iwomo mo.>>

O kwɛpa akwɛyi o ka ɛriga wu ma mbala esu. 35 Enzu o rima mu iyesemo, watokeyi umba Azhu ba o wo wu ɛnɛ, o zɔ tee, <<A sa enzu umbafo ma; la sa ɛnwu ma ŋanɛ kaa la ki ma gba akwu Omezaya ngboro uwu bɔkɔ Ukpo a ŋa!>>

36 Asozha tete o wo wu ɛnɛ: o bo munyi wu akwɛyi o shi wu owanyi uwu iwuma, 37 akwɛyi o za wu tee, <<Gba ŋɔ kwu ɔsu uwu Azhu ngboro, de ba sa ɛŋɔ ma ŋanɛ!>>

38 O ka ɛzu o kpa mu kadu wu tee: <<Ele gba akwu ɔsu uwu Azhu le.>>

39 Ukpenyi meka iyi enzu umbira umba bɔkɔ o kpa mba mu kwuwɛyi ungwu lukwu awu a kpa wu ari a za wu tee: <<Akwu ŋɔ gba ŋɔ kwu Omezaya le mo re? Sa ɛŋɔ ma nɛ kaa sa nzu ma tete!>>

40 Onzu uwopo wu ba a kpa wu ɛyi, a za wu tee, <<Ŋɔ riyi iyi Ukpo moo?>> Kwuwongwu rinye ŋɔ ri yi kya mbala ingya wu le gba ŋɔ kpawu ari le? 41 O lo nzu inyashi kwuwongu kiya ingyira ingyi ki wo. Onzu ele ba e wo kiya ingyira kikpikpɛnyi mo.>>

42 Akwɛyi a za laa <<Ɔzhizɔsi tee, <<Lolo mbaa mi kwuyengwu bɔkɔ ŋɔ bi ŋɔma mu ɛsu irimo ŋɔ!>>

43 Ɔzhizɔsi a gba wu opwu tee, <<Ongbulolo gba mi so ŋɔ le tee, ɔnɛnɛ ŋɔ yi mbala mi mu Oparadasi.>>

44 Ina mu ɔnɔnda nzhii ba ɔnu u selemo ipwu i kpo mɛzhi ɛnyi lɛɛbi. 45 Ɔnu u lafya laa ilama. Okpayi uwu Ɔtɛpu a ka epo. 46 Ɔzhizɔsi a yama mu opwu uwɔkwuu tee, <<Ada! Mi ra la kwunyɔ mi mi lo ŋɔ mɔwu.>> Tabɔkɔ a mbwa ɛlɛ isomo, akwɛyi a ta kwunyɔ ma.

47 U to keyi uwu asozha, tabɔkɔ a ma kiya ingyi ki wo akwɛyi a du Ukpo ma, a zɔ tee, <<Onzu ele akwu onzu uwu ototo kego!>> 48 Kwuye ungwu enzu umba o bo mba iyesemo o ma kiya ingyi ki wo, o lo ewo mbo mesu o kama iyamba laa ubugyi. 49 Enzu lɛɛbi umba bɔkɔ o yi Ɔzhizɔsi, ikyo ekokpayi umba bɔkɔ o wɔ mu Ogalili o mbwalu wu, o rima shaaru mu iyesemo.

50 Mu kwuye kwɔlɛ onzu ukpɛnyi uwu o ya wu tee Ɔzhɔsɛfu, onzu uwu kwuse ungwu Arimatiya mɛzhi iyi Ozhudiya. Onzu ele akwu onzu ototo, e kyo mu udaba uwu enzu umbakɔ, 51 tetete uwu a nyama mbala kiya ingyi bɔkɔ o wo le mo. Uwu a rigbo laa Ɛsu irimo iyi Ukpo. 52 Ɔzhɛsɛfu a ka mbaa Opayileti kaa lo shi wu ukpɛzhi uwu Ɔzhizɔsi. 53 Akwɛyi a kala wu ma mu kwuwɛyi ungwu lukwu e bo mu ɛzhi akwɛyi e wuwumo mu okpayi uwu ɔlinɛ, e shi wu a nɔma mu Ogariwu uwu a vu mu ɔzɔ uwu bɔkɔ o do ta onzu mawu dɛ mo. 54 Kwɔfyi kwɔngu ba akwu kwɔfyi ungwu o yi mu ɛnwu iyimo iyi kwɔfyi ungwu ɛnwu igbomo ungwu bɔkɔ kwu ndama fo.

55 Ekokpayi umba o mbwalu Ɔzhizɔsi ngbaa mu Ogalili awu, o mbwalu Ɔzhɛsɛfu akwɛyi o ma Ogariwu awu mbala ewo iyi bɔkɔ o shi ɛnwu iyi Ɔzhizɔsi mawu. 56 Akwɛyi o gbama mogba o kɔ nɔngɔ apula iyi umbwɔ ferere mbala oturare.

Akwɛyi ɛnwu i gbo mbo mo mu Kwɔfyi ungwu Ɛnwu Igbomo mate ba Ɛrama iyi Omosisi i zɔ.