1 Kwuye ungwu Ɔzhizɔsi a mbwa apula ɛlɛ lɛɛbi isomo laa enzu, akwɛyi a ka mu Okapanawu. 2 Onzu uwakɔ uwu asozha umba Oroma e yi mɔmɔ uwu bɔkɔ umɛgba wu uwu idɛnyi wu a mwɔnyɛ mo ba a nda la lukwu fo. 3 Tabɔkɔ onzu uwakɔ uwu asozha ele a pwa ɛza iyi Ɔzhizɔsi, akwɛyi a lɔ enzu umbakɔ umba Azhu umbafo tee lo so munyi wu, kaa lo kpa wu ɛshɛku kaa le bo le bo ofya umbwu umɛgba wu ma. 4 O bo mbaa Ɔzhizɔsi, akwɛyi o kpa wu ɛshɛku gyɔɔ o za wu tee, <<Onzu ele e domo tee lo mbwa wu ma.>> 5 E pwu idɛnyi iyi enzu nzu akwɛyi e mbo nzu udaba uwu ɛlu ikpalama.>>

6 Akwɛyi Ɔzhizɔsi a kama mbala mba. Tabɔkɔ a nda laa kwogba fo akwɛyi onzu uwakɔ uwu asozha awu a lɔ ɛmɛza wu kaa lo za laa Ɔzhizɔsi tee, <<Adakwogba, ki lo ɛŋɔ inyashi shaa mo moo mi domo tee kaa fye mogba mi mo, 7 imi ba mi domo tee la mi bo munyi ŋɔ mafyi mi mo. Siso byi, akwɛyi ofya umbwu umɛgba mi u bomo. 8 Imi tete mi yi watekeyi mu kadu mi, asozha umbafo ba o yi mu izhikembo mi tete. Gba mi za laa ele tee, <Sheyimo!> ba e sheyimo; nana gba mi za laa awu tee, <Bo!> ba a nyɔ; mi za laa unye mi tee, <Wo ngyɛlɛ!> ba e wo ngyi.>>

9 Kwuye ungwu bɔkɔ Ɔzhizɔsi a pwa ɛlɛ, i shi wu kenzu iyama; tabɔkɔ e geleyi a ma riba ingyi enzu umba o mbwalu wu, akwɛyi a za mba tee, <<La mi so yi, mu Izirɛ lala mi di fya ikwu idu fulo ɛlɛ tee dɛ mo!>> 10 Akwɛyi enzu umba bɔkɔ o lɔ mba ma awu, o gbama o ka mogba uwu onzu uwakɔ uwu asozha awu akwɛyi o du unye awu tee ofya wu u bo-o.

11 Kwuye bwɛ mu izhikembo iyi ɛnyi, akwɛyi Ɔzhizɔsi a ka mu kwuse kwunyi ungwu bɔkɔ o ya ngwu tee Oneni awu, akwɛyi Wavɔngɔkiya wu mbala enzu riba o kama mbala wu. 12 Tabɔkɔ a nda la kenzugu unga ɔbɛ unga kwuse fo, kyaa ba o yi mu ukpɛzhi uwu onzu i wɔ kwudu, akwu umɛ ɛnyi uwu anyi wu, ba akwu oko u kpo ɔnu ma. Riba ingyi enzu ingyɛkwu ba o wɔ mu kwuse o mbwalu wu. 13 Kwuye ungwu bɔkɔ Ɔkwu a ma oko awu, a ma eyembembyi wu akwɛyi a za wu tee, <<Ki lo oga mo.>> 14 Akwɛyi a ka pwu afyi mu amukwu, akwɛyi enzu umba o shi ukpɛzhi awu o rima. Akwɛyi Ɔzhizɔsi a zɔ tee, <<Umaǃ Mi za ŋa te yimo!>> 15 Akwɛyi ukpɛzhi uwu onzu ele e yimo a ŋɔma akwɛyi e le mu isisomo, akwɛyi Ɔzhizɔsi a gba wu e shi anyi wu. 16 Iyi i wo mbo lɛɛbi akwɛyi ɔ du Ukpo ma. Ɔ zɔ tee, <<Anukenzu uwakwu a wɔ mekeka nzu!>> <<Ukpo e bo kaa la sa enzu wu ma!>>

17 Ɛza iyi kiya ngyɛlɛ ingyi bɔkɔ Ɔzhizɔsi e wo le i fulama munamuna mu ɛzhi iyi Ozhudiya mbala ese iyi i fula yi ma lɛɛbi.

18 Tabɔkɔ Wavɔngɔkiya umba Ɔzhɔnu o so wu kiya ingyi ki wo lɛɛbi, akwɛyi a ya wepo mbo mo, 19 akwɛyi a lɔ mba ma mbaa Ɔkwu kaa lo yo wu tee, <<Uŋɔ gba ŋɔ kwu onzu uwu Ɔzhɔnu a zɔ tee a nyɔ lee, naa la ki fulo eyi iyi onzu awa ŋa?>> 20 Kwuye ungwu enzu mbɔlɛ o bo mbaa Ɔzhizɔsi, o za wu tee, <<Ɔzhɔnu u wo Obatisima a lɔ nzu ma munyi ŋɔ kaa la ki yo ŋɔ tee, uŋɔ gba ŋɔ kwu onzu uwu bɔkɔ ki yi mu eyifulomo tee a nyɔ le nana la ki fulo eyi mu onzu awa ŋa?>> 21 Mu kwuye kwɔngu pwa gba ba Ɔzhizɔsi e bo enzu riba efya ma le, ofya umbu okpakyi mbala ɛndu iyira, akwɛyi a gba e shi wapeyi riba ɛbɛ. 22 Akwɛyi a gba a lɔ alɔgbulɔ mbamba ma tee, <<La lu so kaa lu so Ɔzhɔnu kiya ingyi bɔkɔ lu ma mbala ingyi lu pwa: Wapeyi o fya ɛbɛ ma, wa mu alɛ ma o gba la luzɛ, enzu umba o yi ofya umbu embyimbɔyi u bomo, wa salu o pwama, enzu umba bɔkɔ o kpomo, o gba laa iyimo, ilɔ iyesheshi ɛlɛ ba o ye yi mu anu itama laa. ayirewa. 23 Ɔnyɛ akwu uwu onzu uwu bɔkɔ e yi egbo epo mami mo!>>

24 Mizhikembo iyi alɔgbulɔ umba Ɔzhɔnu o fulomo, akwɛyi Ɔzhizɔsi e le mu iso iyi Ɔzhɔnu isomo laa riba ingyi enzu ngyɛngyi tee: <<Kwuye ungwu lu ka mbaa Ɔzhɔnu mu ɛzhi ɛngbarara awu, kimbe bɔkɔ lu gyi tee la lu ma? Anga iyi ɔsɛ iyi bɔkɔ kwokpo kwu ye yi mu akpa iwomo? 25 Akwu kimbe bɔkɔ lu wɔ kwudu kaa la lu ma? Lu ka tee ka la lu ma onzu uwu bɔkɔ e lo ekpayi iyi abwa? Aayimo! Enzu umba bɔkɔ o lo ekpayi iyi abwa mbala enzu umba bɔkɔ o ri ugyɔ, akwu mu agba iyi asu gba o yi le! 26 La lu so mi, kimbe bɔkɔ lu wɔ kwudu kaa la lu ma? Anukenzu re? Ee, mi za yi tee onzu uwu lu ma awu, a ka anukenzu ma.

27 Moo Ɔzhɔnu gba kwokpo ungwu iso iyi Ukpo kwu siso mawu tee: <Ukpo a zɔ tee, mi lɔ ɔlɔgbulɔ mi ma e to keyi la ŋa kaa la wu ŋɔ ɔgwuzɛ ma.> 28 Ɔzhizɔsi a za mba tee, <<Imi mi gyite laa mi so yi tee enzu umba bɔkɔ ekokpayi ɔ mba lɛɛbi, onzu uwu bɔkɔ a ka Ɔzhɔnu ma e yi mo. Tetete onzu umbwambwa mu irɛsu iyi Ukpo lala a ka Ɔzhɔnu ma.>>

29 Enzu lɛɛbi ikyo wa na oba uwɛzhi, o pwa wu; akwɛyi o zɔngɔma te ɔgwuze uwu Ukpo akwu ongbulolo, kwuwongu Ɔzhɔnu gba e wo mbo obatisima le 30 Afarisi mbala wa zɔ Ɛrɛma ba o towo iso iyi Ukpo mo akwɛyi ɔ nyama te Ɔzhɔnu le wo mbo obatisima mo.

31 Ɔzhizɔsi e so wu mu isomo tee, <<Enzu umba kwushi kwɔlɛ mi manda ba mbala kimbe? O yi mate kimbe te? 32 O yi mate ɛmɛshɛri umba o ŋɔma mu rishi akwɛyi o ya esu mo tee: <Ki so yi amwu iyi okopo itomo, ba lu komo mo! Ki so yi amwu iyi lukwu, ba lu lo oga mo!> 33 Ɔzhɔnu u wo obitisima e bo, e ri kiya mo ba e wo embyi umba imwuma iyi uwɛyi uwu oboriyo mo, akwɛyi lu zɔ tee, <E yi kwundu ungwura!> 34 Umɛ uwu Onzu e bo, e ri e wo akwɛyi lu zɔ tee, <Lo yese onzu ele! Akwu u ri kwuri ungwu ubwu mbala u wo atɛ, umɛza uwu wa na oba uwɛzhi mbala enzu umba ingbomo!> 35 Tetete, enzu umba ɔ nyama laa ilukwu iyi Ukpo ba ɔ zɔ yi tee akwu ongbulolo.>>

36 Ɔnu uwufo Ofarisi ukpɛnyi a lɔ laa Ɔzhizɔsi kaa le bo le ri kiya ingyi onoyo mbala wu, akwɛyi Ɔzhizɔsi a kama mogba uwu Ofarisi ele a ka ŋɔma kaa le ri kiya. 37 Okokpayi ɛnyi uwu bɔkɔ e yi meka iyi ingbomo e yi mu kwuse kwɔngu. Tabɔkɔ a pwa tee Ɔzhizɔsi e yi mu kiya irimo mu mogba uwu Ofarisi ele, akwɛyi e bo laa ɔgya uwu anyi umba umbwɔ ferere 38 akwɛyi a rima mbaa alɛ iyi Ɔzhizɔsi mizhikembo wu, laa oga ilomo, e fu ɛnyɛ mu alɛ wu akwɛyi a wuyi ma mu inyi wu, a kpa yi idu akwɛyi a la yi anyi umba umbwɔ ferere mbamba.

39 Tabɔkɔ Ofarisi ele a ma tayi, akwɛyi e le mu isomo mu egbo wu tee, <<Gba Onzu ele lakwu anukenzu uwu ngboro, ba le be yitu iyi okokpayi uwu e yewu mu afyi ipwu ma le; tee okokpayi ele akwu onzu uwu ingbomo!>>

40 Ɔzhizɔsi a gba wu opwu tee, <<Ɔsayimɔ, mi yi iso iyi mi gyi tee la mi so ŋɔ.>>

Akwɛyi Ɔsayimɔ a za wu tee, <<Omale, so mi.>>

41 Ɔzhizɔsi a ta wu kwoso tee, <<Enzu wepo o ra laa akpa iyi onzu u lo akpa ɛnyi.>> Ukpɛnyi a ra laa kwɔkpa ungwu ederi ɛlɔ iyi esiliva, uwufo ba uwo ɛkpɛlɔ. 42 Wepepo mbo o yi eduwo iyi o wa akpa ɛlɛ ma mo, akwɛyi onzu ele a lu yi mba afyima wepepo mbo. Mu imama yi, uwuna meka mba bɔkɔ a gyi onzu u lo akpa le a ka?>>

43 Ɔsayimɔ a gba wu opwu tee, <<Mi ma tee onzu uwu kwokpa wu kwu ka le awu.>> Akwɛyi Ɔzhizɔsi a za wu tee, <<Ŋɔ so kyaa.>> 44 Akwɛyi Ɔzhizɔsi e shi eyi mbaa oko ele akwɛyi a za la Ɔsayimɔ tee, <<Ŋɔ ma oko ele? Mi bo mogba ŋa, ba ŋɔ shi mi embyi kaa mi gbɔ alɛ mi ma mo, uwu ba a gbɔ alɛ mi ma mu ɛnyɛ wu akwɛyi a wu yi ma mu inyi wu. 45 Ŋɔ kpami idu kaa bwa mi ma ɔnyɛnyɛ mo, oko ele ba ta mi fye mogba ŋa le gba e yi mu alɛ mi iwuma le. 46 Ŋɔ shi mi anyi kaa mi ngbɛ mu reshi mi mo, oko ele le ba a ngbɛ mi anyi umba umbwɔ ferere malɛ. 47 Kwuwo kwɔlɛ, la mi so yi tee, ingbomo wu iyi riba ɛlɛ o gba yi o kpa wu oo, kwuwongu a zɔ idɛnyi gyɔɔ. Moo onzu uwu o gbayi o kpa wu bwɛɛ a zɔ idɛnyi bwɛɛ.>>

48 Akwɛyi Ɔzhizɔsi a za laa oko awu tee, <<O gba laa ingbomo ŋɔ o kpa ŋa.>>

49 Akwɛyi agboga umba bɔkɔ o yi mu kiya irimo mbala wu mɔmɔ o le mu isisomo mbala esu tee, <<Onzu ele akwu uwe dɛ, bɔkɔ a gba laa ingbomo a kpa?>>

50 Ɔzhizɔsi ba a za laa oko awu tee, <<Ikwidufulo ŋɔ i sa ŋa ma-a; somo moloto.>>