1 Ɔzhizɔsi e yi eyefaa akwɛyi a ma enzu umba o yi kwuwo o yi mu eduwo ilomo mu kakyɔ unga Ɔtɛpu, 2 akwɛyi a ma oko ukpɔnuma ukpɛnyi uwu akwu ɔyirewa a ta anini wu epo mu kakyɔ. 3 Akwɛyi Ɔzhizɔsi a zɔ tee, <<Ongbulolo gba mi so yi le tee oko ukpɔnuma ɔyirewa ele a ta kiya ingyi ki ka ingyi uwewe mo. 4 Enzu mbɔlɛ lɛɛbi o to mu kiya kɛ gyɔɔ mba gba o shi le; oko ele ba e to ingyi e yi ngyi ndii meka iyi rewa wu gba e shi le.

5 Wa vɔngɔ kiya wu umbafo o za laa iso isomo meka iyi bɔkɔ Ɔtɛpu o wo wu ari mu ekyi ireyi mbala rɛshi ingyi enzu o ka laa Ukpo. Akwɛyi Ɔzhizɔsi a za mba tee, 6 <<Apula iyi lu ma yi ele lɛɛbi, kwuye kwu yi mu inyɔma, bɔkɔ kwoki kwukpukpɛnyi tee o shigwobi mu kadu ungufo mo; kwoki ungwunanguna o shiri ngwu mo o fu mɛzhi.>>

7 Akwɛyi o yo Ɔzhizɔsi kwuyo tee, <<Omale,>> <<Kwuye ungwuna bɔkɔ ɛlɛ i bi wo? Kimbe ba akwu kɛzɔ unga kwuyengwu kiya ngyɛlɛ ki bi wo?>>

8 Akwɛyi Ɔzhizɔsi a za mba tee, <<La lu ngbɛndu; onzu le kyoro yi mo mo. Moo enzu gyɔɔ o nyɔ mu ɛnyi mi, akwɛyi oo zɔ tee, <Imi gba mi kwu uwu le< ba, <Kwuye kwu bo-o!> Lunyi la lu mbwalu mba mo. 9 Kwuye ungwu lu pwa akpa iyi ewa mbala ovyo, la lu wiyi mo; moo apula ɛlɛ te i wo keyi mega dɛ, inyi ba i zɔ tee akwu ibomo iyi kwuye mo.>>

10 E so wu mu isomo tee, Ɛzhi iyifo i wa laa ewa i fu laa iyifo; ekeshi umbafo o wa laa ewa o fu laa umbafo. 11 Ɛzhi i nya giri iyɛkɔkɔ, lonzu mbala efya mu kizɛ ikikɔ ikikɔ, apula iyi i lo iyi i wo mbala lɔzɔ ndɔkwu moshi.

12 <<O yi yimo akwɛyi o lo yi inyashi; o kwuyi o re mu idaba iyi ɛlu ikpalama kaa lo ngbɛ yi ombu uwoyi kaa lo fu yi mu ugu ugyi; o nya yi mu idu iyi asu mbala wa to keyi kwuwongu ɛnyi mi dɛ gba ɛlɛ lɛɛbi i bi wo le. 13 Ɛlɛ ba akwa yi kapa unga lu so mbo Iso Iyesheshi ɛlɛ. 14 Kwuwongwu ɔlɛ, la lu bɔ ɛyi kepo mu idu te lu wo idu kpu mu ewo iyi lu bu gbɔ ɛyi ma mo, 15 kwuwongu mi shi yi iso mbala ilukwu iyi bɔkɔ enzu umba rɛnu yi o do tee o towo yimo mo ba o ri kambwu ma yi mo. 16 Umbeteyi mbala umbanyiyi, ɛmanyi yi, enzu umba kwɔmba yi, mbala ɛmɛza yi o to yi o yama akwɛyi o ngbɛ mbafo yi ma. 17 Enzu lɛɛbi o wo anya yi kwuwo mi. 18 Kwunyi ungwu reshi yi kwukpukpɛnyi te ba kwu tomo mo. 19 La lu rima ngiri akwɛyi lu sa ɛyi ma.

20 <<Kwuye ungwu lu ma asozha o lo Ɔzhɛrusalɛ meka, lunyi la lu yitu tee imbwama ngwu i nda fo. 21 Kwuye kwɔngu enzu umba bɔkɔ o yi mu Ozhudiya lo renya lo so mu edudu; enzu umba bɔkɔ o yi mu kwuse ba lo wɔ kwudu, enzu umba bɔkɔ o yi mu kwudu awu ba lo fye mu kwuse fo. 22 Moo kwuye kwɔlɛ akwu <Kwuye ungwu Inyashi ilomo,> kaa Iso iyi Ukpo iyi o ka lɛɛbi mu kwokpo li nyɔlɔma. 23 Inyashi iyɛku akwiyi eko umba rifo mbala eko umba o ra laa ɛmɛ mu kwuwo kwuye kwɔngu! Moo wɔnu umbɔku u ŋu fye mu ɛzhi ɛlɛ, akwɛyi amba umba Ukpo o fu mu enzu mbɔlɛ. 24 Umbafo o ngbɛ mba ma mu ukpandɛrɛ, akwɛyi umbafo mba ba o yi mbo mo akwu enye mu ɛzhi ewa; akwɛyi enzu umba bɔkɔ akwu Azhu mo o kpa Ɔzhɛrusalɛ alɛ nzhii ba kwuye mbo kwu nyɔlɔma.

25 <<Lɔzɔ undu lu liyi lu wɔ mu ɔnu, ɔvya mbala elovyo. Mu kwudu kwɔlɛ ba enzu o fye mu iyi iwuma iyi anu iyi risu mbala agba iyi embyi. 26 Enzu o zɛ ɛnyɔ ma kwuwongu iyi iyi kiya ingyi ki bi wo mu kwudu kwɔlɛ, moo apula iyoshi o wo yi akpa.

27 Akwɛyi o ma Umɛ uwu Onzu te e yi mu inyɔma mu amu laa ekpasu iyɛku mbala inzumbɛku wu. 28 Kwuye ungwu apula ɛlɛ i le mu iwomo, la lu yi ɛnwu yi ma moo isama yi inda fo.>>

29 Akwɛyi Ɔzhizɔsi a ba mba kwoba tee: << La lu yese uwɛyi uwu oboriyo mbala ɛwɛyi lɛɛbi. 30 Kwuye ungwu i le mu epu itumo, lu yitu tee iwo i nda fo. 31 Tayi gba i yi le, kwuyengwu lu ma apula ɛlɛ tee i yi mu iwomo, la lu yitu tee Ɛsu Irimo iyi Ukpo i nda fo.

32 <<Ongbulolo gba mi so yi le tee, enzu umba ɔyi ɔlɛ o kpomo ndii dɛ gba apula ɛlɛ lɛɛbi i bi wo le mo. 33 Oshi mbala ɛzhi i bomo, iso mi ba i bomo gbee mo.

34 <<La lu ngbɛndu kaa la lu tutu kwuye yi ma mu odumudumu iwomo mbala atɛ iwomo mbala egbo igigidi iyi kwudu kwɔlɛ mo, moo kwɔfyi kwɔngu kwu bi yi yi mo kporo 35 kyamate kwuda tayi mo. Moo kwu nyɔ mu enzu lɛɛbi munamuna umba o yi mu kwudu kwɔlɛ. 36 La lu ngbɛndu la lu lɛ Ukpo kaa la lu vuluma mu i yi bi wo le lɛɛbi, kaa lu fya ekpasu iyi irima mu idu iyi Umɛ uwu Onzu kego.>>

37 Kwɔfyi kwɔfyi Ɔzhizɔsi a zɔ ɛzu mu Ɔtɛpu, mu onoyo ba a ka mu Lɔwa undu Olifu. 38 Enzu lɛɛbi o ka munyi wu mu kwoto mu kwoto kaa lo pwa iso wu mu Ɔtɛpu.