1 Ɔnu uwufo Ɔzhizɔsi e yi mu Ukpo ilɛma mu riyi ngyifo. Tabɔkɔ a mbwama, akwɛyi onzu ukpɛnyi meka iyi Wavɔngɔkiya wu a za wu tee, <<Ɔkwu, zɔ nzu Ukpo ilɛma, kyamate Ɔzhɔnu a zɔ Wavɔngɔkiya wu awu.>>

2 Akwɛyi Ɔzhizɔsi a za mba tee, <<Kwuye ungwu lu lɛ Ukpo, la lu zɔ tee:

<Ada:

Ɛnyi ŋɔ li fya iduma ma;

Irɛsu ŋɔ li bo.

3 Shi nzu kiya ingyirimo

ingyi ɔnɛ mbala ingyi

kwɔfyi kwɔfyi.

4 Gba laa ingbomo nzu

kpa nzu,

mate bɔkɔ kinzu ki gba laa ingbomo iyi enzu ki.

kpa mba.

Ki shi nzu la ki fye mɛmi iyi ipwama iyɛkɔkɔ mo.>>>

5 Akwɛyi Ɔzhizɔsi a za laa Wavɔngɔkiya wu tee, <<Gba ŋɔ ka mu kwogba ungwu umɛza ŋa mutu uwɔkɔɔ akwɛyi ŋɔ za wu tee, <<Umɛza mi, shɔɔkɔ lo mi kwɔkpa ungwu eburedi ela nɛ. 6 Umɛza mi uwufo uwu a wɔ luzɛ a ŋamima mogba mi kekelele, Imi ba mi yi kiya ingyirimo ingyi mi shi wu mo!>

7 <<Akwɛyi umɛza ŋa awu a gba ŋa opwu mɛmi mɛzawu tee, <Ki wo mi egbo ngɛrɛngɛrɛ mo! Mi koko riku mo-o, ɛmɛ mi ba o yi mbala mi mu kwugodo-o. Mi do tee mi yimo kaa la mi shi ŋɔ kiya kikpikpɛnyi tee mo.> 8 La mi so yi, gba e yi egbo iyi bɔkɔ e shi wu kiya ingyirimo kwuwongu bɔkɔ akwu umɛza wu le mo lala, tetete kwuwongu ɛngɛrɛngɛrɛ iyi onzu ele, e yimo e to e shi wu mate bɔkɔ a gyi awu kwuwongu e wo lovya iyi indama mo.

9 <<Kwuwo kwɔlɛ mi za yi tee: La lu nda akwɛyi o shi yi; lu gagyi lu fya; la lu la kwuwo mu riku, o wu yi ngyi ma. 10 Moo onzu uwunawuna uwu a nda o shi wu, onzu uwunawuna uwu a gagyi a fyama; onzu uwunawuna uwu a la kwuwo mu riku, o wawu riku mo. 11 Lunyi umba ada, uwe mekeka yi bɔkɔ umɛ wu a nda wu umu ba e to ɔkwu e shi wu? 12 Nana a nda kwɔshi ba e to ena e shi wu? 13 Lunyi enzu umbira mbɔlɛ lala lu yitu iyi lu shi ɛmɛ yi rɛshi ingyi esheshi, i bi gyi Eteyi uwu bɔkɔ e yi moshi, e to Kwundu uwu Ukpo e shi enzu umba bɔkɔ o nda wu mo?>>

14 Ɔzhizɔsi e yi mu kwundu ungwura ungwu u tukenzu irima; akwɛyi tabɔkɔ kwundu ungwura kwɔngu kwu wɔma, akwɛyi onzu ele e le mu iso isomo. Riba ingyi enzu mbamba o ya kenzu, 15 enzu umbafo mba ba ɔ zɔ tee, akwu mu ekpasu iyi ɔbɛzɛbu, ɔsu uwu eyo umbeyi gba e ye mbo mu irima le.>>

16 Umbafo ba o gyite lo kpawu kuda akwɛyi o za wu tee le wo apula iyi amɛ kaa li zɔ tee Ukpo a nyama la wu. 17 Ɔzhizɔsi ba e yitu iyi egbo mbo akwɛyi a za mba tee, <<Ɛsu iyi bɔkɔ i ka epo akwɛyi i wo anya iyi esu i kpɛdɔma; tatayi kwogba ungwu kwu ka epo akwɛyi kwu wo anya iyi esu kwu kpomo. 18 Gba ɛsu iyi onzu uwoyi i ka epo akwɛyi i wo anya iyi esu i wo te ba ɛsu wu irima? Lu zɔ tee mi ralaa eyo iyi eyi ma mu ekpasu iyi Ɔbɛzɛbu. 19 Gba mi ralaa eyo iyi eyi ma mu ekpasu iyi Ɔbɛzɛbu, mu ekpasu iyi uwe bɔkɔ wa mbwalu yi o rayima? Wambwalu yi o zɔ yi ombu mu ɛlɛ! 20 Gba akwu mu ekpasu iyi Ukpo gba mi ralaa eyo iyi eyi ma le, de ba ɛlɛ i zɔ tee Irɛsu iyi Ukpo i bo munyi yi-e.

21 <<Gba onzu uwu ekpasu a rima mbala ewulo iyi ewa wu, ee gbo kwogba wu ma akwɛyi apula iyi kwogba wu i shi kyoo. 22 Gba onzu uwu bɔkɔ a ka wu ekpasu ma ba a wa wu laa ewa akwɛyi a bi wu ma, aa na ewulo iyi ewa wu iyi bɔkɔ onzu awu e fulo idu ma yi awu ma, akwɛyi a ka apula iyi bɔkɔ akwu awu ma.

23 <<Onzu uwu bɔkɔ e yi mbala mi mo akwu ogewa mi; onzu uwu bɔkɔ a mbwa mi ma mu ɛlu ikpalama mo de ba e ye yi mu i kpashaa.

24 <<Gba kwundu ungwura kwu wɔma mu ɛnwu iyi onzu kwuu kpɛvyɛ mbaa bɔkɔ embyi o yi mo kaa la kwu fya kizɛ ingyi ɛnwu igbomo. Gba kwu fya mo, akwɛyi kwuu za laa ɛngwu tee, <Mii gba mi re mu kwogba mi ungwu bɔkɔ mi wɔ awu.> 25 Kwuye ungwu kwu gbama akwɛyi kwu du kwogba kwɔngu te o vyɛ ngwu ma sɛsɛsɛ, 26 akwɛyi kwuu wɔ kwudu kwuu ngye la ɛndu iyi ira erewo iyifo iyi bɔkɔ i ka yi ira ma akwɛyi ii ŋɔ mɔmɔ. Imbwama iyi onzu awu ii ka ira la iyi kwonze.>>

27 Tabɔkɔ Ɔzhizɔsi e siso ɛlɛ, akwɛyi okokpayi uwufo a wa laa opwu uwɔkwuu mu riba ngyɛngyi tee, <<Ɔnyɛ lakwu uwu Oko uwu bɔkɔ a mba ŋa ba e yi ŋɔ awu!>>

28 Ɔzhizɔsi ba a gba wu opwu tee, <<A kwu tayi mo, umba bɔkɔ o pwa iso iyi Ukpo ba o mbwalu yi gba o yi ɔnyɛ le!>

29 Tabɔkɔ riba ingyi enzu ri le mu ikyomo mbaa Ɔzhizɔsi, akwɛyi e le mu isomo tee, <<Enzu umba ɔyi ɔlɛ akwu enzu umbira! O gagyi kɛzɔ unga amɛ, tetete ba o shi mbo ikpikpɛnyi mo, ba tee unga Ozhona lo. 30 Kyamate Ozhona ba akwu kɛzɔ e shi enzu umba Ɔninɛvɛ awu, tegba Umɛ uwu Onzu aakwu kɛzɔ e shi enzu umba ɔyi ɔlɛ le. 31 Ɔnu uwu Kwɔfyi ungwu Ombwu Izɔma, Omakazhiya uwu Osheba a rima a ngbɛ enzu umba ɔyi ɔlɛ ombu uwoyi, a wɔ ngbaa mu ɛzhi wu iyi indama i bo tee la pwa ɛzɔ iyi ilukwu iyi Ɔsɔlɔmɔ; Imi ba mi so yi tee, onzu uwu a ka Ɔsɔlɔmɔ ma e yi munɛ! 32 Ɔnuwu Kwɔfyi ungwu Ombwu Izɔma enzu umba Ɔninɛvɛ o rima akwɛyi o za yi tee lunyi lu wo ɔnyɛ mo, moo mba ɔ kwu ira mba ɔsu kwuyengwu o pwa anu itama iyi Ozhona; Imi ba mi so yi tee, onzu uwu a ka Ozhona ma e yi munɛ!

33 I yi onzu uwu bɔkɔ a byi kambwu ɔyi ba e shi ngo mu riyi ingyi invyemo mo, nana mu ubwu uwu kwugodo mo. E fulo ngo mu kana unga ɔyi kaa onzu uwu bɔ e yi mu ifyemo la ma ɛbɛ. 34 Eyi ŋɔ gba akwu ɛbɛ iyi ɛnwu ŋɔ le, gba eyi ŋɔ i shoshi, ɛnwu ŋɔ ngyɔɔ akwu ɛbɛ; gba eyi ŋɔ i shoshi mo, ɛnwu lɛɛbi i yi mu ipwu. 35 Kwuwo kwɔlɛ, la lu ngbɛndu kaa ɛbɛ iyi i yi ma yi ele li vindɔ ipwu mo. 36 Gba ɛnwu yi ngyɔɔ akwu ɛbɛ, ba i yi kwuko ungwu kwu yi mu ipwu mo, ɛnwu lɛɛbi akwu ɛbɛ, kyamate ɛbɛ iyi kambu unga ɔyi i fu ma yi tayi.>>

37 Kwuye ungwu bɔkɔ Ɔzhizɔsi a mbwa iso isomo, akwɛyi Ofarisi ɛnyi a lɔ la wu tee le bo le ri kiya mbala wu; akwɛyi Ɔzhizɔsi e fyemo akwɛyi a ŋɔma kaa le ri kiya. 38 Ofarisi awu ba a ma tee Ɔzhizɔsi e shishi kwuwo mo dɛ kaa le ri kiya le mo, akwɛyi i shi wu kenzu iyama. 39 Akwɛyi Ɔkwu a za wu tee, <<Lunyi Afarisi lu gbɔ kwudu ungwu kaatu mbala kagɔ, mɛmi ba lu nyɔlɔma laa ekweyi mbala ira. 40 Lunyi efyo mbɔlɛ! Akwu Ukpo uwu e wo ɛmi le gba ba e wo kwudu le tete mo re? 41 La lu ralaa kiya ingyi ki yi mɛmi iyi kaatu mbala ago la lu shi ayirewa akwɛyi ingyinangyina ki wulu yi ma. 42 <<Gbetu yi lunyi Afarisi! Lunyi lu to kwukpɛnyi meka iyi uwo iyi apula iyi ɔsɔ mate, imadu, okwonu mbala epu iyɛri iyɛri iyi utu yi lu ka laa Ukpo lunyi ba lu lafya laa ongbulolo mbala idɛnyi iyi Ukpo. La lu wo apula ɛlɛ lɛɛbi mbala iyifo ɛnyi tete.

43 <<Gbetu yi lunyi Afarisi! Lunyi lu gyi iŋɔma mu lɔgyi undu lu shi iŋɔma lu ka mu idaba iyi ɛlu ikpalama mbala ɛnyi igbɛlɛma mu rishi.

44 <<Gbetu yi! Lunyi lu yi mate agariwu iyi bɔkɔ o wo yi kɛzɔ mo, enzu o zɛ ma yi ba o yitu mo tayi.>>

45 Akwɛyi u zɔ ɛzu iyi Ɛrama iyi Omosisi ukpɛnyi a gba wu opwu tee, <<Omale, ta ŋɔ yi mu ɛlɛ isomo le, ŋɔ ye nzu mu ari ipemo tetee!>>

46 Ɔzhizɔsi a gba opwu tee, <<Gbetu yi tete lunyi wazɔ ɛzu iyi Ɛrama iyi Omosisi! Lu nɔngɔ ewulo iyi ɔlu laa enzu iyi i kɔ mu ishimo, lunyi ba lu la ɛfyi ma yi kaa la lu mbwamba ma mu ewulo ɛnyi itomo mo.

47 <<Gbetu yi! Lu mbo agariwu iyesheshi laa anukenzu umba Ukpo anukenzu umba bɔkɔ asɔkwu yi ɔ ngbɛ. 48 Kwuwo kwɔlɛ i zɔ tee lunyi lu nyama laa iyi bɔkɔ asɔkwu yi o wo awu; asɔkwu yi ɔ ngbɛ anukenzu ma, akwɛyi lunyi ba lu mbo mbo agariwu. 49 Kwuwo kwɔlɛ Ukpo a zɔ ilukwu wu akwɛyi a zɔ tee, <Mi lɔ mba laa anukenzu mbala wa zɛ ilɔ; umbafo mbo o ngbɛ mba ma umbafo ba o lo mbo inyashi.> 50 Kwuwo kwɔlɛ enzu umba ɔyi ɔlɛ o ngbɛ mba ombu uwoyi kwuwongu anukenzu lɛɛbi umba bɔkɔ ɔ ngbɛ ngbaa mu iyemo iyi kwudu kwɔlɛ, 51 i na mu lukwu undu Ɛbɛlu i so mu lukwu undu Ozakaraya, uwu bɔkɔ o ngbɛ wu ma mu kwudɛka ungwu kwumbu ungwu isabɔ mbala Riyi ingyi Ɔkɛrikɛri. Ee, mi so yi, enzu umba ɔyi ɔlɛ o ngbɛ mba ombu uwoyi kwuwo mbo lɛɛbi.

52 <<Gbetu yi lunyi wazɔ ɛzu iyi Ɛrama iyi Omosisi! Anu iyi kwogba ungwu iyitu lu to yi mo; Lunyi lu fyemo mo, ba lu se ɔgwuzɛ ma laa umba bɔkɔ o yi mu iwomo kaa lo fyemo!>>

53 Tabɔkɔ Ɔzhizɔsi a lafya laa riyi ngyɛngyi, akwɛyi Afarisi mbala wa zɔ ɛzu iyi Ɛrama iyi Omosisi o le wo mu ikpafyifyi mu eyo iyomo iyi apula guruguru, 54 ɔ gyi tee lo kpa wu kuda kaa lo yi wu mo mu iso iyi bɔkɔ e be so.