1 አካዝያሳ አይያ ጎቶላ ባ ናአይ ሀይቅዳይሳ በእዳ ዎደ፥ ደንዳዳ ካዋ ኮቻ ኡባ ይሳሱ። 2 ሽን ካዋ እዮራማ ናእያ፥ አካዝያሳ ምችያ ዮሳቤታ፥ ሀይቃናዉ ደእያ ካዋ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ኤፋዳ ኬን ቆሳዳ፥ ጎቶላ ዎናዳ አሻሱ። 3 ጎቶላ ቢታ ሃርያ ዎደ ኡባን፥ ናአይ ዮሳቤት ማታን፥ ፆሳ ኬን ኡሱፑን ላይ ቆሰትድ ደእስ።

4 ላፑን ላይን ዮዳሄይ ካዋ ናገይሳታነ ካዎ ጋ ናገይሳታ ሀላቃታስ ኪትድ፥ ባኮ ፆሳ ኬ ኤህስ። ኤንታራ ጫቅድ፥ ኤንታ ፆሳ ኬን ጫቅስስ፤ ኤንታ ካዋ ናኣ እዮኣሳ በስስ። 5 እ ኤንታ፥ "ህንተ ኦናባይ ሀይሳ፤ ሳምባታን ናጋናዉ ገልያ ማራይ ጋክዳ ህንተ ሄ ጩጋፐ እስ ጩጋ ካዋ ኬ ናጎ። 6 እስ ጩጋይ ሱራ ፐንግያ ናጎ፤ እስ ጩጋ ናገይሳታፐ ጉየ ባጋራ ደእያ ፐንግያ ናጎ። 7 ሳምባታ ጋላስ ናጎፐ ከይያ ሀንኮ ናምኡ ጩጋይ ኩመ ካዋ ቦላ መቶይ ጋኮና መላ ፆሳ ኬ ናጎ። 8 ኦላ ሚሸ ኦይክድ፥ ካዋ ግዶን ዎድ፥ ካዎይ ከይያ ዎደነ ገልያ ዎደ ኡባን እያራ እስፈ ደኦ። ህንተኮ ሺቅያ ኦናካ ዎተ" ያግስ።

9 ሄ ሀላቃት፥ ካህነይ ዮዳሄ ኪትዳባ ኡባ ኦዶሶና። ኤንቲ ኡባይ ሳምባታ ጋላሳን ናጎ ማራይ ጋክዳይሳታነ ናጉዋ ማራ ፖልዳይሳታ ኤክድ፥ ካህንያ ዮዳሄኮ ይዶሶና። 10 ካህነይ ፆሳ ኬን ደእያ፥ በን ካዋ ዳዊታ ጎንዳለታነ ቶራታ ኡባ ሀላቃታስ እሚስ። 11 ናገይሳት እሶይ እሶይ ኦላ ሚሸታ ባንታ ኩሸን ኦይክድ፥ ፆሳ ኬፈ ሀድርሳ ባጋፈ ዶምድ፥ ኡሻቻ ባጋ ጋካናዉ፥ ያርሾ በሳ ማታንነ ፆሳ ኬ ማታን ካዋ ዩሹዋን ኤቅዶሶና። 12 ዮዳሄይ ካዋ ናኣ ካረ ከስድ፥ እያ ሁጰን ካላቻ ዎስ። ህገ ማፃፋ እያዉ እምድ፥ ትይድ፥ እያ ካዎስ። አሳይ ኩሸ ባቅድ፥ ባ ቃላ ቁ ኦድ፥ "ካዎይ ብራታ ቱሱ ግዶ!" ያግስ።

13 ካውያ ጎቶላ ናገይሳታ ዎጫማነ አሳ ዎጫማ ስእዳ ዎደ፥ አሳኮ ፆሳ ኬ ባሱ። 14 ካዎይ ካሰ ካዎት ሀነይሳዳ ቱሳ ማታን ኤቅድይሳ በአሱ። ሀላቃትነ ሞይዘ ፑነይሳት ካዋ ማታን ደኦሶና። ሄ ቢታ አሳ ኡባይ ኡፋይትድ፥ ሞይዘ ፑንን፥ ጎቶላ ባ ማኡዋ ዳካዳ፥ "ሄኮ፥ ሀይስ ማካላ! ሀይስ ማካላ!" ያጋዳ ዋሳሱ።✝11:14 2 ካዎ 23:3.

15 ካህነይ ዮዳሄይ ቶራ ሞጮናታኮ፥ "ጎቶሎ ፆሳ ኬን ዎፕተ! ኢፐ ያራነ ሃራ ሳልፕዳ ሳልፐታ ግዶን ዎተ፤ እዮ አሻናዉ ቆፕያ አስ ደእኮ ዎተ!" ያግስ። 16 ኤንቲ እዮ ኦይክድ፥ ካዎ ጋ ኤፍድ፥ ፓራ ፐንግያን እዮ ዎዶሶና።

17 አሳይ ጎዳ አስ ግዳና መላ፥ ካዎይ ዮዳሄይነ አሳይ ጎዳራ ጫቃና መላ ኦስ። ቃስ ካዋፐነ አሳፐ ግዱዋን ጫቅስስ። 18 ሄ ዎደ ይሁዳ አሳ ኡባይ ባኣለ ኤቃ ኬ ብድ፥ ሄ ኬ ላልስ፤ ያርሾ በሳታነ እያ ምስለታ ትንቸረስ። ባኣለ ኤቃ ካህንያ ማታና ያርሾ በሳታ ስንን ዎዶሶና።

ሄሳፈ ጉየ፥ ካህንያ ዮዳሄይ ፆሳ ኬን ናገይሳታ ዎስ። 19 ባራ ቶራ ሞጮናታ፥ ካዋ ናገይሳታ፥ ካዎ ጋ ናገይሳታነ ይሁዳ አሳ ኡባ ኤክን፥ ኤንቲ ካዋ ፆሳ ኬፈ ዱገ ኤህስ። ናገይሳታ ፐንግያ ባጋራ ካዎ ኬ እስፈ ገልድ፥ ካዎይ ባ አራታን ኡትስ። 20 ይሁዳ አሳ ኡባይ ኡፋይትዶሶና፤ ጎቶላ ካዎ ጋን ማሻን ሀይቅዳፐ ጉየ ካታማይ ዎፑ ግስ።

21 እዮኣስ ካዎትያ ዎደ ላፑን ላይ ናአ።