2 ካዎታ ማፃፋ 4

8 እስ ጋላስ ኤልስ እስ ዱረ ማጫስያ ደእያ ሱኔማ ካታማ ብን፥ ማጫስያ ሾባዳ፥ እያ ካ ሙዛሱ። ሄ ጋላሳፐ ዶምን፥ እ ያራ አያ ዎደ ኡባን ካ ማናዉ እ ሶ ገሌስ። 9 እያ ባ አዝናኮ፥ "ሄኮ፥ ኡባ ዎደ ኑ ማታራ አያ አደይ ፆሳ አስ ግደይሳ ታኒ ኤራይስ። 10 አነ እስ ጉ ክፍለ ፖቅያ ቦላ እያዉ ኬፆስ፤ እያ ግዶን አርስ፥ ኦይደ፥ ፃርጴዛነ ፆምፐ ዎስ። እ ኑኮ ይዳ ዎደ ኡባን ያ ገላናዉ ዳንዳኤስ" ያጋሱ።

11 እስ ጋላስ ኤልስ ሱናማ ካታማ ይድ፥ ባ ክፍልያ ፑደ ከይድ ያን ሸምፕስ። 12 ባ አይልያ ግያዛኮ፥ "ባዳ ማጫስዉ ፄጋ" ያግን፥ ግያዝ ፄግን፥ እያ ያዳ ኤልሳ ስንን ኤቃሱ። 13 ኤልስ ግያዛኮ፥ "ሀ ማጫስያ ሀ ኡባ ኑስ ኦሱ። ኑኒ ነዉ አይ ኦኖ? ኑኒ ብድ፥ ካዋ ዎይኮ ቶራ ሞጮና ኦድሳናባይ አይብ ደእያኮ እዮ ኦይቻ" ያግስ።

ማጫስያ፥ "ታኒ ሀይሳን ታ አሳ ግዶን ደአይስ" ያጋሱ።

14 ኤልስ ግያዛ፥ "ያትን፥ ታኒ እዉ አይ ኦ?" ያግድ ኦይችስ።

ግያዝ፥ "እዉ ናእ ባዋ፤ እ አዝናይ ጭምስ" ያግስ።

15 ኤልስ፥ "ማጫስዉ ፄጋ" ያግስ። ግያዝ እዮ ፄግስ፤ እያ ያዳ፥ ፐንገን ኤቃሱ። 16 ኤልስ፥ "ዎንቶ ላይ ሀኖደ ኔኒ አደ ናአ እድማና" ያግስ።

ማጫስያ፥ "አካይ፥ ታ ጎዳዉ፥ ኔኒ ፆሳ አስ ግድክ፥ ታዉ ዎርዶቶፓ" ያጋሱ።

17 ሽን ማጫስያ ቃንታሱ፤ ኤልስ እዉ ኦድዳይሳዳ፥ ካልያ ላይ አደ ናአ የላሱ።

18 ናአይ ድጭስ፤ እስ ጋላስ ካ ጫክያ አሳታራ ደእያ ባ አዋኮ ብስ። 19 ባ አዋኮ፥ "ዎ ታና ሁጰይ ዎስ! ዎ ታና ሁጰይ ዎስ!" ያግስ።

እያ አዋይ እስ አይልያ፥ "ቶካዳ አየኮ ኤፋ" ያግድ ኪትስ።

20 አይለይ ናኣ ኤክድ፥ አየኮ ኤፍስ። ሴታ ጋላስ ግዳና ጋካናዉ፥ ናአይ ባ አየ ክኦን ኡትስ፤ ሄሳፈ ጉየ፥ ናአይ ሀይቅ አግስ። 21 ማጫስያ ናኣ ፑደ ኤፋዳ፥ ፆሳ አድያ አርሳን ዝንእሳሱ። ያታዳ እያ ቦላ ካረ ጎርዳዳ ባሱ።

22 ባ አዝና ፄጋዳ፥ "ታኒ ፆሳ አድያኮ ኤለ ባዳ ያና መላ፥ አይለታፐ እሱዋነ ሀረታፐ እሱዋ ታዉ የዳ" ያጋሱ።

23 እ፥ "ሀች አጌና ፄሮ ጋላስ ዎይኮ ሳምባታ ግደና፤ ነና እያኮ ኤፈይ አይቤ?" ያግስ።

እያ ዛራዳ፥ "አይብካ ባዋ" ያጋሱ። 24 እያ ሀረ ጫናዳ፥ ባ አይልያ፥ "ሀርያ ላጋ! ታኒ ነዉ ኦዳና ጋካናዉ፥ ለፕ ኦዳ ላጎፋ" ያጋሱ። 25 ማጫስያ ያፐ ደንዳዳ፥ ቃርመሎሳ ዙማን ደእያ ፆሳ አድያኮ ባሱ።

ኤልስ ማጫስው ሃሆን በእድ፥ ባ አይልያ ግያዛ፥ "በአ፥ ሱናማን ደእያ ማጫስያ ያዉሱ። 26 እዮ ሞካናዉ ዎፃ ባዳ፥ ‘ኔኒ ሳሮ? ነ አዝናይ ሳሮ? ነ ናአይ ሳሮ?’ ያጋዳ ኦይቻ" ያግስ።

ማጫስያ፥ "ኑኒ ኡባይካ ሳሮ" ያጋሱ።

27 ማጫስያ ዙማ ቦላ ደእያ ፆሳ አድያኮ ጋክዳ ዎደ፥ ሆካዳ እያ ቶሁዋ ኦይካሱ።

ግያዝ ማጫስዉ ድጋናዉ ሺቅስ፤ ሽን ፆሳ አደይ፥ "አጋ! እያ ግታ መቶን ደአዉሱ፤ ሽን ጎዳይ ታፐ ሄሳ ገንስ። እ መቱዋ ታዉ ኦድቤና" ያግስ።

28 ማጫስያ፥ "ታ ጎዳዉ፥ ኔኒ ታዉ ናአ እማና መላ ታኒ ነና ኦይቻድና? ታኒ ነና፥ ‘ታና ጮ ጭሞፋ ያጋብክና?’ " ያጋሱ።

29 ኤልስ ግያዛኮ፥ "ነ አዱሳ ማኡዋ ነ ሳቅያን ስርቃ፤ ታ ፃምአ ኤካዳ ኤለሳ። ኦገን ኦደራካ ጋሄትኮ፥ ሳሮፋ፤ ኦንካ ነና ሳሮትኮ፥ ዛራዳ ሳሮ ጎፓ። ታ ፃምአ ናኣ ሶምኡዋ ቦላ ዎ" ያግስ።

30 ሽን ናኣ አይያ፥ "ደኦ ጎዳይ ኤርያ መላ፥ ነ ሸምፖይ ኤሮ! ታኒ ነና የጋዳ ቢከ" ያጋሱ። ኤልስ ደንድድ፥ እዮ ካልስ። 31 ግያዝ ኤንታፈ ስንትድ ብድ፥ ፃምአ ናኣ ሶምኡዋ ቦላ ዎስ። ሽን ግርስ ዎይኮ ሸምፖይ ባዋ። ያትን ግያዝ ኤልሳራ ጋሄታናዉ ስም ይድ፥ "ናአይ ባርክቤና" ያግድ ኦድስ።

32 ኤልስ ሶ ገልድ፥ ሄኮ፥ ናኣ አሀይ እያ አርሳን ዝንእዳይሳ በእስ። 33 ባ ቦላነ ናኣ ቦላነ ካርያ ጎርድድ፥ ጎዳ ዎስስ። 34 ናኣ አሀ ቦላ ከይድ፥ ባ ዶና እያ ዶናን፥ ባ አይፍያ እያ አይፍያን፥ ባ ኩሸታ እያ ኩሸታራ ጋድ ዝንእስ፤ ናኣ አሳተይ ሆእስ። 35 ኤልስ ደንድድ፥ ሶ ግዶን ያ ሃ ስመረትስ። ናምአን ስሚድ፥ ናኣ ቦላ ዝንእስ፤ ናአይ ላፑን ቶሆ ሀሽዳፐ ጉየ ፄልስ።

36 ኤልስ ግያዛ ፄግድ፥ "ሱናማ ማጫስዉ ፄጋ" ያግስ። ግያዝ እዮ ፄግን፥ እያ ይዳ ዎደ፥ ኤልስ፥ "ነ ናኣ ኤካ" ያግስ። 37 ማጫስያ ኤልሳ ቶሁዋ ቦላ ኩንዳዳ፥ ሳአን ጉፋናሱ፤ ባ ናኣ ኤካዳ ካረ ከያሱ።