1 እስራኤለ አሳይ ግብፀፈ ከይዳ ሄን አጌናስ ኮይሮ ጋላሳን ሲና መላ ቢታ ጋክዶሶና። 2 ኤንቲ ራፍድማፐ ደንድድ ብድ፥ ሲና ዙማ ስንን ደእያ መላ ቢታን ኡትዶሶና።

3 ሙሰይ ፆሳራ ጋሄታናዉ ዙማ ቦላ ከይስ። ጎዳይ ዙማ ሁጰፐ እያ ፄግድ፥ "ያይቆባ ሼሽ ግድዳ እስራኤለታስ ሀይሳዳ ያጋ፤ 4 ‘ታኒ ግብፀታ ቦላ ኦዳባነ አርጋን ባ ናአ ባ ቀፍያን ቶከይስዳ ታ ህንተና ዋታ ቶካዳ ታኮ ኤህዳኮ ህንተ ህንተ ሁጰን በእደታ። 5 ሀእ ህንተ ታዉ ኪተትኮነ ታ ጫቁዋ ናግኮ፥ ቢታ ኩመይ ታባ ግድኮካ ህንተ ታዉ ዶረትዳ ደረ ግዳና። 6 ህንተ ታዉ ጌሻ ደረ ግዳና፤ ህንተ ካዎተን ካህነ ግድድ ታና ሀጋዛና።’ ኔኒ እስራኤለታስ ኦዳና ቃላይ ሀይሳ" ያግስ።

7 ሙሰይ ጉየ ብድ፥ ዙማኮ ጭማታ ፄግ ሺሽድ፥ ጎዳይ ኦድዳ ቃላ ኡባ ኤንታዉ ኦድስ። 8 ኤንቲ፥ "ጎዳይ ግዳባ ኡባ ኑኒ ኦና" ያግዶሶና። ሙሰይ ኤንቲ ግዳይሳ ጎዳስ ኦድስ።

9 ጎዳይ ሙሰኮ "ታኒ ኔራ ሃሳይሽን አሳይ ስአናዳነ ኤንቲ ነና ኡባ ዎደ አማናናዳ ታኒ ሙምዳ ሻራራ ኔኮ ያና" ያግስ። ሄሳፈ ጉየ ሙሰይ አሳይ ግዳይሳ ጎዳስ ኦድስ።

10 ጎዳይ ሙሰኮ "ኔኒ አሳኮ ባዳ ሀችነ ዎንቶ ታራ ጋሄታናዉ ባንታና ጌሻና መላ ኤንታዉ ኦዳ። ኤንቲ ባንታ ማኡዋ ሜጭድ፥ 11 ሄን ጋላሳስ ጊገቶ። ሄ ጋላስ አሳ ኡባይ ታና በእሽን ታኒ ሲና ዙማ ቦላ ዎና። 12 ኔኒ ሀ ዙማ ዩሹዋን ዛዋ ዎ። አሳይ ዙማ ከዮና ቦላ መላ ዎይኮ ዙማ ፃጱዋ ቦቾና መላ ኤንታዉ ኦዳ። ዙማ ቦችዳ ኦንካ ሀይቃና። 13 ሄ ኡራይ ሹቻን ጫደትድ ዎይኮ ዶንገን ዱከትድ ሀይቆ፤ እያ ኩሸን ኦንካ ቦቾፎ። መሄይ ዎይኮ አስ ሄሳዳ ሀይቆ። ሞይዘይ ፑነትያ ዎደ ኤንቲ ዙማ ቦላ ከያናዉ ዳንዳኦሶና" ያግስ።

14 ሙሰይ ዙማ ቦላፈ ዎድ፥ አሳይ ፆሳ ጎይናናዉ ባንታና ጊግሳና መላ ኦድስ። ኤንትካ ባንታ ማኡዋ ሜጭዶሶና። 15 ሙሰይ አሳኮ፥ "ሄን ጋላሳስ ጊገትተ፤ ህንተ ማቸታራ አቆፕተ" ያግስ።

16 ሄን ጋላስ ዎንታ ጉራ ደሾይ ደችስ። ዎልአንነ ሳካና ሻር ዙማ ማእድ በንትስ። ዎልቃማ ሞይዘ ዋሶይ ስኤትስ። አሳይ ዱንካንዳ በሳ ኡባን ያሻን ኮኮርዶሶና። 17 ሄሳፈ ጉየ፥ ሙሰይ አሳ ፆሳራ ጋናዉ ኤንታና ዱንካንያፐ ከስድ ኤፍስ፤ ኤንቲ ዙማ ፃጶን ኤቅዶሶና። 18 ጎዳይ ሲና ዙማ ቦላ ታማ ላጮራ ዎዳ ግሾ ሲና ደረይ ጩያን ካመትስ። ግታ ጮጨፐ ጩይ ከየይሳዳ እያፐ ጩይያ ዙለይ ሱረ ከይስ። አሳ ኡባይ ዳሮ ኮኮርዶሶና። 19 ሞይዝያ ዋሶይ ዳር ዳር ብዳ ዎደ ሙሰይ ኦድን፥ ፆሳይ ደሾን እያዉ ዛርስ። 20 ጎዳይ ሲና ዙማ ሁጰ ቦላ ዎድ፥ ሙሰ ፑደ ዙማ ቦላ ፄግስ። ሙሰይ ዙማ ቦላ ከይስ። 21 ጎዳይ እያኮ፥ "ኔኒ ዱገ ባዳ አሳይ ታና በአና ግድ፥ ዛዋ አና መላነ ኤንታፈ ዳሮይ ሀይቆና መላ ኤንታዉ ኦዳ። 22 ሀር አቶ ጎዳ ማት ሺቅያ ካህነትካ ባንታና ጌሾ። ኤንቲ ሄሳ ኦና እኮ ታ ኤንታ ሀንቃና" ያግስ።

23 ሙሰይ ጎዳኮ፥ "ኔኒ ዙማ ዱማይዳ ግሾነ ዛዋ እምዳ ግሾ አሳይ ዙማ ሁጰ ከያናዉ ዳንዳኦኮና" ያግስ።

24 ጎዳይ እያኮ፥ "ኔኒ ዱገ ባዳ አሮና ኔራ ኤካዳ ያ። ካህነትነ አሳይ ዛዋ ካንድ ታኮ ይሸ ዮና መላ ኤንታዉ ኦዳ" ያግስ። 25 ሄሳ ግሾ ሙሰይ አሳኮ ዎድ ጎዳይ ግዳይሳ ኤንታዉ ኦድስ።