1 ፆሳይ እስራኤለ አሳኮ ሀይሳዳ ያግስ፤ 2 "ነና ግብፀፈ አይለተፈ ከስዳ ጎዳይ ነ ፆሳይ ታና።

3 "ታፐ አትሽን፥ ሀራ ፆሰ ጎይኖፋ።

4 "ቦላ ሳሉዋን ደእያባ፥ ዎይኮ ጋርሳ ሳአን ደእያባ፥ ዎይኮ ሳአፐ ጋርሳን ሃ ግዶን ደእያባ አይባካ ነዉ ጎይንያ ኤቃ ዳንሳዳ ኦፋ። 5 ኤንታዉ ሆኮፋ ዎይኮ ኤንታ ጎይኖፋ። አይስ ጊኮ፥ ታኒ፥ ጎዳይ ነ ፆሳይ፥ ታ ቦንቹዋ ሀራ ፆሳታራ ኮፆና ፆሰ። ታና እፅያ አዋታ ናጋራ ግሾ ናይታ ሄን ዎይኮ ኦይዳን የለተ ጋካናዉ ሀንቃና። 6 ሽን ታና ሲቀይሳታነ ታ ኪታ ናገይሳታ ሼሻ ሙኩሉ የለተ ጋካናዉ ኬሀና።

7 "ፆሳ ነ ጎዳ ሱን ሀዳን ደንፋ። ጎዳይ ባ ሱን ሀዳን ደንይሳታ ሴሮና አገና።

8 "ሳምባታ ጌሻ ጋላስ ኦዳ ናጋ። 9 ኔኒ ኦሶ ኦናዉ በሲያ ኡሱፑን ጋላሳት ደኦሶና። 10 ሽን ላፑን ጋላሳይ ኔኒ ጎዳ ቦንችያ ሸምፖ ጋላስ። ሄ ጋላሳን አይባ ኦሶካ ኦፋ። ኔኒ፥ ዎይኮ ነ ናይት፥ ዎይኮ ነ አይለት፥ ዎይኮ ነ መሄይ፥ ዎይኮ ነ ቢታን ደእያ አሳ ጋደ አሳት ሄ ጋላሳን ኦሶ ኦፍተ። 11 ኡሱፑን ጋላሳ ግዶን ጎዳይ ሳሎታ፥ ሳኣ፥ አባነ ኤንታ ግዶን ደእያ ኡባ መስ፥ ሽን ላፑን ጋላሳን ሸምፕስ። ሄሳ ግሾ ጎዳይ ሳምባታ ጋላሳ አንጅስነ ዱማይስ።

12 "ጎዳይ ነ ፆሳይ ነዉ እምያ ቢታን ነ ላይይ አዱቃና መላ ነ አዋነ ነ አይዉ ቦንቻ።

13 "አሳ ዎፓ።

14 "ላሞፋ።

15 "ካይሶቶፓ።

16 "ነ ላግያ ቦላ ዎርዶ ማርካቶፋ።

17 "ነ ላግያ ኬ አሞቶፋ። ነ ላግያ ማችዉ፥ ዎይኮ እያ አይለታ፥ ዎይኮ እያ መህያ፥ ዎይኮ እያ ሀርያ፥ ዎይኮ እያዉ ደእያባ አይባካ አሞቶፋ" ያግስ።

18 አሳ ኡባይ ደሾይ ደቸይሳነ ሞይዘይ ፑነተይሳ ስእድ፥ ዎልአንይ ዎልአመይሳነ ደረይ ጩየይሳ በእድ ያሻን ኮኮርሸ ሃሆን ኤቅዶሶና። 19 ኤንቲ ሙሰኮ፥ "ኔኒ ኑስ ኦዳ፤ ኑኒ ስአና። ሽን ኑኒ ሀይቆና መላ ፆሳይ ኑስ ኦዶፖ" ያግዶሶና። 20 ሙሰይ አሳኮ፥ "ያዮፍተ፤ ፆሳይ ህንተና ፓጫናዉነ ህንተ እያዉ ኪተትድ ናጋራ ኦና መላ እ ይስ" ያግስ። 21 አሳይ ባንታ ደእያሱዋን ሃክድ ኤቅዳሽን፥ ፆሳይ ደእያሱዋ ሙምዳ ሻራኮ ሙሰይ ሺቅስ።

22 ሄሳፈ ጉየ፥ ጎዳይ ሙሰኮ "እስራኤለ አሳስ ሀይሳዳ ያጋዳ ኦዳ፤ ‘ሳሎፐ ታኒ ህንተዉ ኦድሽን ህንተ ታና ህንተ ሁጰን በእደታ። 23 ያንያ ግሾ፥ ብራ ኤቃ ዎይኮ ዎርቃ ኤቃ ህንተዉ ኦድ ታ ቦላ ጉጅድ ጎይኖፍተ። 24 ነን ታዉ ያርሾ በሲ ኡርቃፈ ጊግሳ። ነ ዶርሳታፐነ ነ ቦራታፐ ኤካዳ ፁሳ ያርሾነ እስፈተ ያርሾ እያ ቦላ ያርሻ። ህንተ ታና ጎይናና መላ ታኒ ዶርዳ በሳ ኡባን ህንተኮ ያዳ ህንተና አንጃና። 25 ህንተ ታዉ ያርሾ በሲ ሹቻፈ ኬፅያባ ግድኮ ማሰትዳ ሹቻፈ ኬፆፋ። ኔኒ ማስያ ሚሸን እያ ቦችኮ ቱንሳሳ። 26 ህንተ ከይሸ ካሎቶና መላ ታዉ ያርሾ በሲ ኮዶራ ከይያ በሳን ኬፆፋ’ " ያግስ።