Salmos 81

ሻቃራ ባኣለ ዎደ የፅያ ሳባ

ዛማረታ ሀላቃስ ፃፈትዳ ሱሱልኤን የፀትያ አሳፋ ማዝሙረ

1 ኑስ ዎልቃ ግድዳ ፆሳስ ኡፋይሳን የፅተ፤

ያይቆባ ፆሳስ እልልተ።

2 የ ዶምተ፤ ካራቦ ባቅተ፤

ዲንነ ማስንቆን የፅተ።

3 አጌን ፄርያ ዎደ፥

ቃስ ማ ኡትያ ዎደ፥

ባኣለ ጋላሳን ሞይዘ ፑንተ።

4 ሄስ እስራኤለ ቢታን ህገ፤

ያይቆባ ፆሳይ እምዳ ዎጋ።

5 እ ግብፀ ቢታ ሾጭዳ ዎደ፥

ዮሰፋ ኮቻስ ሀ ዎጋ አዋጅስ።

ኤሮና ዶናን ሀይሳዳ ያግሽን ስአስ፤

6 "ህንተ ሀሽያ ቶሆፐ፥

ህንተ ኩሽያ ኬሸፐ ሸምፕሳስ።

7 ህንተ መቱዋን ታና ፄግደታ፤ ታ ህንተና አሻስ፤

ታኒ ደችያ ሻራ ግዶፈ ህንተና አላስ፤

ማርባ ፑልቱዋ ማታን ታ ህንተና ፓጫስ።" ሳላሀ

8 "ታ አሳዉ፥ ታ ህንተና ሴረይሳ ስእተ፤

እስራኤለ አሳዉ ህንተ ታና ስእኮ አይቤ?

9 ህንተ ግዶን አላጋ ፆሲ ደኦፖ፤

ሀራ ፆሰ ጎይኖፍተ።

10 ግብፀ ቢታፈ ህንተና ከስዳ፥

ታኒ ጎዳ ህንተ ፆሳ፤

ነ ዶና ሎይዳ ሀካንካ፤

ታኒ እያን ኩንና።

11 "ሽን ታ አሳይ ታና ስእቦኮና፤

እስራኤለይ ታዉ ኪተትቤና።

12 ሄሳ ግሾ፥ ኤንቲ ባንታ ቆፋ ካላና መላ፥

ስሞና ኤንታ ዎዛናስ አዳ እማስ።

13 ታ አሳይ ታና ስእዳኮ አይበ፤

እስራኤለይ ታ ኦግያ ካልዳኮ አይብ ደእ፤

14 ታኒ ኤንታ ሞርከታ ኤሶን ፆናናሽን፤

ኤንታ እፀይሳታ ቦላ ታ ኩሽያ ደንናሽን።

15 ጎዳ እፀይሳት እያ ስንን ሆካና፤

ኤንታ ሴራይ መርናዉ ግዳና።

16 ታኒ ህንተና ሎኦ ግስተ ሙዛና፤

ዛላፈ ከይያ ኤሳን ህንተና ካልሳና።"