እዮባ ማፃፋ 17

1 ታ ሸምፖይ ከዬስ፤

ታ ላይይ ቃምስ፤

ታዉ ዱፎይ ጊግስ።

2 ታ ቦላ ቀልቅሰይሳት ታ ዩሹዋን ደኦሶና፤

ኤንቲ ታና ይሎይዳ መላ አይስዶሶና።

3 አቤት ፆሳዉ፥ ኔፐ ሀር ታና ማደይ ባይና ግሾ፥

ነ ታዉ ዋሰ ግዳ።

4 ኤንቲ አኬኮና መላ ኤንታ ቆፋ ጎርዳዳሳ፤

ሄሳ ግሾ፥ ነ ኤንታዉ ፆኖ እሞፋ።

5 ሚሸ ደማና ግድ፥

ባ ላገታ አድ እምያ ኡራ ናይታ አይፈይ ቆቃና።

6 ፆሳይ ታና አሳስ ሚቻስ አግስ፤

አስ ጩትሸ አያ አስ ግዳስ።

7 ታ ዳሮ ካዮትዳ ግሾ ታ አይፈይ ኤይስ፤

ታ አሳተይ ላፍድ ኤሾ ግድስ።

8 ኬሀ አሳት ታና በእድ ዳጋምዶሶና፤

ሱረት ፆሳ አማኖናይሳታ ቦላ ይሎትዶሶና።

9 ግዶሽን ፅሎት ባንታ ኦግያፐ ደሾኮና፤

ሱረት ዎልቃ ጉጅ ጉጅ ቦሶና።

10 ሽን ዛሪድ ኡባይ ታኮ ሃ ዪተ!

ታ ህንተ ግዶፈ እስ ጭንጫ አስ ደምከ።

11 ታ ደኦ ላይይ ዉርስ፤

ታ ሀልቾይ ሀዳ ግድስ፤

ታ ዎዛና አሞይ ጮ አትስ።

12 ታ ላገት ቃማ ጋላስ ጎሶና፤

ማ በእሸ ‘ፖአና ሀኔስ’ ያጎሶና።

13 ታ ኡፋይሳን ናግያ ኬይ ዱፎ፤

ታ ሂፃ ማን ሂፃይስ።

14 ዱፎኮ፥ ‘ነ ታ አዋ’ ያጋና፤

ጉፁነኮ፥ ‘ነ ታ አዮ ዎይኮ ታ ምቾ’ ያጋና።

15 ያትን፥ ታዉ አይ ኡፋይስ ደኢ?

ታዉ ኡፋይስ ግድያባ ኦን ደማናይ?

16 ታ ኡፋይሳይ ታራ ዱፎ ባንዴ?

ኑ እስፈ ቢታን ዱገ ገላኔ?" ያግስ።