1 ሀላቃራ ካ ማናዉ ኡትያ ዎደ፥

ኔራ ደኤይሳ አኬካ።

2 ኔኒ ዳሮ ያራምባ አስ ግድኮ ናገታ።

3 እ ነና ፓጫናዉ ዳንዳእያ ግሾ፥

ማልኦ ካስ ያረቶፓ።

4 ዱረታና ጋዳ ዳቡሮፓ፤

ነ ቆፋ ሃራናዉ ጭንጫ ግዳ።

5 ሄሳ መላ ዱረተ ነ ፄልሽን ያና፤

ቀፈ ከስድ አርጋንዳ ሳሎ ፓላና።

6 ኡዘ አሳ ካ ሞፓ፤

እያ ማልኦ ካይ ነና አሞዮፖ።

7 ቆፐ ቆሞን "ማ፤ ኡያ" ጌስ፤

ሽን እያ ዎዛናይ ኔራ ግደና።

8 ነ ምዳ ጉ ካካ ጮያና፤

ነ ጋላታይ መላ ግዳና።

9 ነ ጭንጫተ ሃሳያ ካያ ግሾ፥

ኤያ አሳስ ፓፃባ ሃሳዮፓ።

10 በን ዛዋ ሾዶፋ፤

ይኦ ናይታ ዛዋ ሱጎፓ።

11 ኤንታ አሽያ ጎዳይ ምኖ ግድያ ግሾ፤

እ፥ ኤንታ ግሾ ኔራ ሞተታና።

12 ነ ዎዛና ዞረ ቃላኮ፥

ነ ሀይ ትምርተኮ ዛራ።

13 ናአ ሴሮና አጎፋ፤

ነ እያ ፕርጮን ሾጭኮ እ ሀይቀና።

14 ነ እያ ፕርጮን ሾጭኮ፥

እያ ሸምፑዋ ሀይቆፐ አሻሳ።

15 ታ ናአዉ፥ ነ ዎዛናይ ጭንጫ ግድኮ፥

ታ ዎዛናይ ኡፋይታና።

16 ነ እንፃርሳይ ሱረባ ሃሳያ ዎደ፥

ታ ጋ አሳተይ ኡፋይቴስ።

17 ናጋራንቾታ ቃናቶፓ፤

ሽን ኡባ ዎደ ጎዳ ያያ።

18 ያትኮ ነዉ ስን ደኦይ ሱራና፤

ነ ኡፋይሳይ የና።

19 ታ ናአዉ፥ ስአ፤ ጭንጫ ግዳ፤

ነ ዎዛና ሱረ ኦግያን ናጋ።

20 ዳሮ ዎይነ ኡሹ ኡየይሳታራነ

አሾ ማናዉ ያረተይሳታራ ሄመቶፋ።

21 ማተይሳትነ ያራምባት ማንቃና፤

ስኮ ዳሮይ ጩርቃ ማይዜስ።

22 ነና የልዳ ነ አዋይ ኦድያባ ስአ፤

ነ አይያ ጭምዳ ዎደ ካፓ።

23 ቱማ፥ ጭንጫ፥ ሴራነ

አኬካ ሻማፈ አትሽን፥ ባይዞፓ።

24 ፅሎ ናአ አው ዳሮ ኡፋይቴስ፤

ዎዛናማ ናአ የልዳ አስ እያን ጬቀቴስ።

25 ነ አዋይነ ነ አይያ ነናን ኡፋይቶ፤

ነና የልዳራ ሀሹ ጎ።

26 ታ ናአዉ፥ ነ ዎዛና ታዉ እማ፤

ነ አይፈት ታ ኦግያ ካሎ።

27 ላይማ ማጫስ ጪሞ ሃ መላ፤

ላገ ማጫስ ፁን ኦላ መላ።

28 እያ ፓኖዳ ዙጋዳ ናጋዉሱ፤

አማነቶና አደታ ዳርሳዉሱ።

29 ዋሶይ ኦሴ? አዛኖይ ኦሴ?

ኦሽ ኦሴ? ዙዙን ኦሴ?

ጋሶይ ባይና ማዱንፀ ኦሴ?

አይፈ ዞኦይ ኦሴ?

30 ዎይነ ኡሹ ኡይሸ ዎደ ኦንገይሳታሳ ግደኔ?

ዋላሄትዳ ዎይነ ኡሻ

ጋንፅድ በኤይሳታሳ ግደኔ?

31 ዎይነ ኡሽ ዞእዳ ዎደ፥

እያ ማላይ ብርለ ግዶን ጶልያ ዎደ፥

ኡይን ማልእሸ ገልያ ዎደ እያ ፄሎፋ።

32 ዉርሰን ሾሻዳ እ ዱኬስ፤

ኢታ ሾሻዳ ባ ማርዝያ ፑኬስ።

33 ነ አይፈይ በእ ኤሮናባ በአና፤

ነ ዎዛናይ ሱረ ቆፓናዉ ዳንዳኤና።

34 ኔኒ አባ ግዶን ዝንእዳ፥

ማርካብያ ቱሳ ቦላ ካትዳ አሰ ዳናሳ።

35 ኔኒ፥ "ኤንቲ ታና ደችዶሶና፤

ሽን ታ ቆሄታብከ።

ኤንቲ ታና ዋዶሶና፤

ሽን ታዉ ኤረትቤና።

ሀራ ኡሹ ኡያናዉ

ታኒ አዉደ ደንዳኔ?" ያጋና።