1 ታ ናአዉ፥ ኢታ አሳታ ቃናቶፓ፤

ኤንታራ ላገታናዉ አሞቶፋ።

2 ኤንቲ ኡባ ዎደ ኢታባ ማቀቶሶና፤

ባንታ እንፃርሳን ገነ ሃሳዮሶና።

3 ኬ ጭንጫተን ኬፀቴስ፤

አኬካን ምኔስ።

4 ኤር ደእኮ፥ ቆልእ

አልኦባንነ ሎኦባን ኩሜስ።

5 ጭንጫ አስ ዎልቃማ አሳፐ አስ፤

ኤራ አስ ምኖ አሳፐ ሎኦ።

6 ኦላስ ከያናፐ ኮይሮ ሀልቻናዉ ኮሼስ፤

ዳሮ ዞረ ዞርያ አሳታን ፆኖይ በንቴስ።

7 ኤያ አስ ጭንጫተ አኬካናዉ ዳንዳኤና፤

ሺቆ በሳን እ ኦድያባይ አይብካ ባዋ።

8 ኢታ ኦናዉ ቆፕያ አስ

ገነ አስ ጌተቴስ።

9 ኤያ አሳ ቆፍ ናጋራ፤

ቀልቅስያ አስ እፀቴስ።

10 መቶ ዎደ ነ ዶልእኮ፥

ነ ዎልቃይ ጉ።

11 ፕርድ ባይና ሀይቆስ በይሳታ አሻ፤

ሹከታናዉ ብያ ዎደ ስእ ጋዳ ፄሎፋ።

12 ነ፥ "ታ ሄሳ ኤርከ" ግኮ፥

ዎዛና ኤርያ እ፥ በኤኔ?

ነ ደኡዋ ናገይስ ኤረኔ?

አሳ ኡባስ እያ ኦሱዋዳ ኦሱዋዳ ዛረኔ?

13 ታ ናአዉ፥ ኤስ ሎኦ ግድያ ግሾ፥

ኤስ ማ፤ እልሎ ኤስ ማልኤስ።

14 ጭንጫተካ ሄሳዳ

ነ ሸምፑዋስ ማልኦ ግደይሳ ኤራ።

ኔኒ እያ ደምያባ ግድኮ፥

ስንራ ያና ኬሀይ ነባ፤

ነ ኡፋይሳይ የና።

15 ፅሎ አሳ ኬ ቦንቃናዉ ናጎፓ፤

እያ አቁዋ ይሳናዉ ደንዶፋ።

16 ፅሎ አስ ላፑን ቶሆ ኩንድኮካ ደንዴስ፤

ሽን ኢታት ጋዶን ያና።

17 ነ ሞርከይ ኩንድያ ዎደ ኡፋይቶፋ፤

እ በትያ ዎደ ሀሹ ጎፓ።

18 ጎዳይ ሄሳ በእድ ኡፋይተና፤

እያ ሀንቀቶና አጋጋና።

19 ኢታ ኦይሳታ ጋሶን ህርጎፋ፤

ኤንታ መላ ግዳርክና ጋዳ ቆፖፋ።

20 ኢታ አሳስ ስንራ ያና ኬህ ባዋ፤

ኢታታ ፆምፐይ ቶአና።

21 ታ ናአዉ፥ ጎዳነ ካዋ ያያ፤

ኤንታ ቦላ ማካለይሳታራ ሄመቶፋ።

22 ሄሳ መላ አሳታ ቆፖና መቶይ ጋኬስ፤

ካዋፐነ ጎዳፐ ያና መቶ ኦነ ኤረይ?

23 ጭንጫት ጉጅድ ሀይሳዳ ያግዶሶና፤

ሶምኦ በእድ ፕርዶይ ሎኦ ግደና።

24 ቆህዳይሳ ሎኦ ኦዳሳ

ግያ ዳይና፥ አስ ባዳና፤

ካዎተት እያ እፃና።

25 ቆህዳይሳ ነ ባላ

ግያ ዳይናት ሎኦባ ኤካና

ዳሮ አንጆ ደማና።

26 ቱማ ዛሮ ዛርያ አስ፥

ቱማ ላገ መላ።

27 ካሰታዳ ነ ጋድያ ጎያ፤ ካ ዘራ፤

ሄሳፈ ጉየ፥ ነ ኬ ኬፃ።

28 ነ ሾሩዋ ቦላ ጋሶይ ባይና ማርካቶፋ፤

ነ ዶናን ጭሞፋ።

29 "እ ታዉ ኦዳይሳዳ ታ እያዉ ኦና፤

ታ እያዉ ኩሸ ዛራና" ያጎፓ።

30 ታኒ ቦዛ አሳ ጎሻራ አስ፤

አዛላ አድያ ዎይነ ጋደራ ካንስ።

31 አጉንነ ሻራፍ ጎዝ ዎስ፤

ዩሾን ደእያ ድርሳይካ ላለትስ።

32 ታኒ እያ በእዳ ዎደ ቆፓስ፤

እያፐ ትምርተ ኤካስ።

33 ኔኒ ጉ ሊጳ፤ ጉ ስካ፤

ነ ኩሽያ ሺሻዳ ጉ ሸምፓ።

34 ሽን ማንቆተ ፓኖዳ ያና፤

ዱሳ ዋየይ ኦላ ሚሸ ኦይክዳ አሳዳ ፑቱ ጋና።