ጎዳን አማነታ
1 ታ ናአዉ፥ ታ ትምርትያ ዶጎፓ፤
ታ ኪታ ነ ዎዛናን ዎ።
2 ኤንቲ ነ ላይ አዱሳና፤
እንጀነ ሳሮተ ነዉ ጉጃና።
3 ሲቆይነ ቱማተ ኔፐ ሃኮፎ፤
ኤንታ ነ ቆን ቃቻ፤ ነ ዎዛናን ፃፋ።
4 ሄሳ ኦኮ ነ ፆሳነ አሳ ስንን
ሳበታናነ ናሸታና።
5 ነ ኩመ ዎዛናን ጎዳ አማነታ፤
ነ አኬካን ዘምፖፋ።
6 ነ ኦሶ ኡባን እያ ስንያ፤
እ ነና ሱረ ኦገ ካለና።
7 ነና ነ ሁጰን ጭንጫ ኦፋ፤
ጎዳ ያያ፤ ኢታፐ ሃካ።
8 ሄስ ነ አሳተስ ፓያተ ኤሀና፤
ነ መቀካ ፃልሳና።
9 ነ ሻሉዋን ጎዳ ቦንቻ፤
ኮይሮ አይፍዳ ካፈ
ባይራ እማዳ እያ ቦንቻ።
10 ሄሳ ነ ኦኮ፥ ነ ሻልያን ካ ኩማና፤
ነ ዳሎይ ዎይነ ኡሻን ኩምድ ፓላሀና።
11 ታ ናአዉ፥ ጎዳ ሴራ ካፓ፤
እ ነና ሴርያ ዎደ ላንጮፋ።
12 አዋይ ባ ዶስያ ናአ ሴረይሳዳ፥
ጎዳይ ባ ዶስያ ኡራ ሴሬስ።
13 ጭንጫተ ደመይነ፥
አኬካ ባዉ ሚሸ ኦያ ኡራይ አንጀትዳይሳ።
14 ጭንጫተ ብራፐ አድ ጎኤስ፤
ዎርቃፈ አድ ማዴስ።
15 ጭንጫተ ዎርቃፈ አድ አልኦ፤
ነ ደማናዉ አሞትያ ኡባይ ጭንጫተራ ግነና።
16 ጭንጫተ ኡሻቻ ኩሸን አዱሳ ላይ፥
ሀድርሳ ኩሸን ዱረተነ ቦንቾ ኦይካሱ።
17 እ ኦገት ኡፋይስያ ኦገታ፤
እ ሆሮጋይ ሳሮ ሆሮጋ።
18 እያ ባና ኦይከይሳታስ ደኦ ም፤
እዮ ምንድ ኦይክያ ኡባይ አንጀትዳይሳታ።
19 ጎዳይ ባ ጭንጫተን ሳኣ መስ፤
ባ አኬካን ሳሎታ ምንስ።
20 እያ ኤራተን ሻፋት ጎጎሶና፤
ሻራታፐ እር ቡኬስ።
21 ታ ናአዉ፥ ሱረ ፕርዳነ
ሻክድ ኤሮ ምንዳ ኦይካ
ኤንቲ ኔፐ ሻከቶፎ።
22 ኤንቲ ነዉ ደኦ ግዳና፤
እንጀነ ኡፋይስ እማና።
23 ሄ ዎደ ነ ህርግ ባይና ሄመታና፤
ነ ቶሆይ በተና።
24 ኔኒ ዝንእያ ዎደ ያያካ፤
ቃማ ኩመ ማልኦ ስኮ ስካና።
25 አኬኮና ጋክያ ጋዶስ ያያካ፤
ኢታት ይያ ዩዋን ዳጋማካ።
26 ጎዳይ ነዉ ዘምፖ ግዳና፤
ነ ቶሆይ ፅሄን ኦይከቶናዳ እ ናጋና።
27 ነዉ ዎልቅ ደእሽን፥
መቶትዳ ኡራስ ሎኦባ ኦሶ አጎፋ።
28 ሀእ ማዳናዉ ዳንዳአሸ ነ ሾሩዋ፥
"ስማዳ ያ፤ ታ ነዉ ዎንቶ እማና" ያጎፓ። 29 ነና አማነትድ፥ ነ ማታን ደእያ፥
ነ ሾሩዋ ቦላ ገነ ኦፋ።
30 ነና ቆሆና ደእሽን፥
አሰ ጮ ሞቶፓ።
31 ገነ ኦያ አሳታ ቃናቶፓ፤
ኤንታ ኢታ ኦሱዋ ካሎፋ።
32 ጎዳይ ኢታ ኦያ አሳታ እፄስ፤
ሽን ሱረታ ዶሴስ።
33 ጎዳይ ኢታ ኦያ አሳ ኬ ባዴስ፤
ሽን ሱረባ ኦያ አሳ ኬ አንጄስ።
34 ኦቶሮን ቀልቅሰይሳታ ጎዳይ ቀልቅሴስ፤
ሽን ባንታና ካዉሸይሳታ ሳቤስ።
35 ጭንጫት ቦንቾ ደማና፤
ሽን ኤያት ካዉያና።