Ezequiel 16

व्यभिचारिणी यरूशलेम

1 बाक यहोवा अन ईद वचन नान हाती पोहचुस्त, 2 "हे मंळसा अन पारा, यरूशलेम इक अदुरव सप्पा बेकार क्याल्सा हेळ बुळ, 3 अदिक अदुर से अन, हे यरूशलेम, प्रभु यहोवा नीन से ईद अनतान: नींद जनम अदिक नींद पैदाईस कनानीगोळ द्याश देल आग्याद; नीन आप्प रा एमोरी नीन मोय हित्तीन ईरोर. 4 नीन जनम हिंग आग्याद कि याता दिशी नी पैदा आद, अदा दिशी नीन नाल कळकु आत, न नी शुद्ध आगोर साटी तोळकु आद, न नीन येनारा ऊप्प मलुसकु आत अदिक न नी येनारा कपळागोळ दा गुंळ्सकु आद." 5 यार्दु दया दृष्टी नीन मा आगीदील कि ई क्याल्सागोळ दा टु नीन साटी ऊंद भी क्याल्सा माळकु आगाईत; बल्की तान जनम इन दिशी नी बेकार आगा कारण खुला मैदान दा भीळसुसकु आगीद. 6 "याग ना नीन हाती टु आगकु होट्टीन, अदिक नीनी रक्ता दा लोट्सतेला नोळदीन, आग ना नीन से अंदीन, हे रक्ता दा लोट्सतेला जीत्ता ईर; हव, नीन से अच ना अंदीन, हे रक्ता दा लोट्सतेला, जीत्ता ईर." 7 बाक ना नीनी केई इन पौधा घाई वाळुसदीन, अदिक नी वाळुस्त वाळुस्त धोड्डेर आगेद अदिक हापाळ सुंदर आगेद; नीन याद्दागोळ सुडौल आदव, अदिक नीनव चुट्टी वाळुसदव, तरी भी नी ऊगळा ईर्या.

8 "ना मात्त नीन हाती टु आगकु होगतेला नीनी नोळदीन, अदिक ईग नी पुरा आर्त आगेगीद; ईदुरसाटी ना नीनी तान कपळा होचकु नीन शरीर होच कोंडीन; अदिक किर्या तीनकु नीन से वादा माळदीन, अदिक नी नानोर आगेद, प्रभु यहोवा अन ईदा वाणी आद. 9 आग ना नीनी नीर देल तोळ्सकु नीन मा टु रक्ता तोळ्द बुट्टीन, अदिक नीन शरीर मा याण्णा हचदीन. 10 बाक ना नीनी बूटेदार कपळा अदिक सूइस इन तोगुल इन जुतागोळ हाकसुसदीन; अदिक नीन नेळु दा सूक्ष्म सन कटदीन, अदिक रेशमी कपळा होचदीन. 11 आग ना नींद श्रृंगार माळदीन, अदिक कय दा बांगळागोळ अदिक कुतक्या दा गरसोली हाकसुसदीन. 12 बाक ना नीन मुग्‍ग दा नत्थ अदिक नीन कीवगोळ दा डोरला हाकसुसदीन, अदिक नीन ताल्ला मा शोभायमान मुकुट ईटदीन. 13 नीन आभूषण व्हान्ना बेळ्ली नव अदिक नीनव कपळा सूक्ष्म सन, रेशम अदिक बूटेदार कपळा अन बन्सदव; बाक नीन भोजन मैदा, शयद अदिक याण्णा आत; अदिक नी हापाळ सुंदर, बल्की रानी आगा लायक आगेद." 14 नीन सुंदरता अन किर्ती अन्यजातीगोळ दा फैलुसेत, यतिकी आ प्रताप इन कारण, जो ना तान दी टु नीनी कोटीदीन, नी हापाळ सुन्दर ईर्‍या, प्रभु यहोवा अन ईदा वाणी आद. 15 "लेकीन नी तान सुंदरता मा भरोसा माळकु तान किर्ती इन कारण व्यभिचार माळली कुर्त, अदिक सप्पा यात्रीगोळ सांगुळ हापाळ कुकर्म माळ्द, अदिक जो यावारा नीनी चाहासोन नी आऊन से अच सिकतोग्या. 16 नी तान कपळा हुडुकु रंग बिरंग धोळ जागा माळ कोंड. अदिक आंदुर मा व्यभिचार माळ्द, हींग कुकर्म माळ्द जो न कभी आग्याव न अदिक आदव. 17 नी तान सुशोभित गहना हुडुकु जो नान कोळ्द व्हान्ना बेळ्ली इनव ईरव, अऊर से मंळसागोळव मूर्ती माळ कोंड, अदिक अऊर से व्यभिचार माळली कुर्त; 18 अदिक तान बूटेदार कपळा हुडुकु आंदरी हाकसुस्द, अदिक नान याण्णा अदिक नान धूप आंदुर मुंद येर्स्द. 19 जो भोजन ना नीनी कोटीदीन, मतलब जो मैदा, याण्णा अदिक शयद ना नीनी तिनसीन, अद सप्पा नी आंदुर मुंद सुखदायक सुगन्ध माळकु ईट्द; प्रभु यहोवा अन ईदा वाणी हुन कि हिंग अच आत. 20 बाक नी तान पोर पारगोळी हुडुकु यारी नी नान साटी जनम कोट्ट, आ मुर्तीगोळी बली माळकु येर्स्द. येन नीन व्यभिचार हिंग श्याण मात ईरोद; 21 कि नी नान चिग्द चिंळ्गेर आ मुर्तीगोळ मुंद बेक्की दा येर्सकु घात माळ्या? 22 नी तान सप्पा बेकार क्याल्सा दा अदिक व्यभिचार माळतेला, तान बचपन इन दीनगोळ्द यागलु सुधी ताकोंडीदील, याग कि नी ऊगळा तान रक्ता दा लथपथ बिदकु ईर्‍या.

यरूशलेम इन जीवन ऊंद रांड्या अन घाई

23 "नीन आ सप्पा बुराई इन हींद येन आत? प्रभु यहोवा अन ईद वाणी आद, हाय, नीन मा हाय! 24 नी ऊंद गुम्मट माळसुस कोंड, अदिक हर ऊंद चौक दा ऊंद ऊँचा जागा माळसुस कोंड; 25 अदिक ऊंद ऊंद सळक इन सिरे मा भी नी तान ऊंचा जागा माळसुसकु तान सुंदरता बेकार माळ कोंड, अदिक हर ऊंद यात्री इक कुकर्म इन साटी कारकु महाव्यभिचारिणी आगेद. 26 नी तान बाजुवाळेर मिस्त्री लॉकुर से भी, जो मोदा ताजा आर, व्यभिचार माळ्द अदिक नानी सिट्ट कोळोर साटी तान व्यभिचार वाळुसतोद. 27 ई कारण ना तान कय नीन विरूद्ध वाळुस्कु, नींद हर रिज इन भोजन कम माळदीन, अदिक नीन दुश्मन पलिश्ती आर्तेर जो नीन महापाप इन चाल देल शरमुसतार, आंदुर इच्छा मा ना नीनी बिट्ट बुट्टीन. 28 तरी भी नीन तृष्णा बुझुसीदील, ईदुरसाटी नी अश्शूरी लॉकुर से भी व्यभिचार माळ्द; अदिक आंदुर से व्यभिचार माळदुर मा भी नीन तृष्णा बुझुसीदील. 29 बाक नी लेन देन इन द्याश दा व्यभिचार माळ्त माळ्त कसदीगोळ द्याश ताका पोहचुस्द, अदिक अल भी नींद तृष्णा बुझुसीदील.

30 "प्रभु यहोवा अन ईद वाणी आद, कि नीन दिल ह्यांग चंचल आद कि नी ईव सप्पा क्याल्सा माळत्या, जो बेसरम वेश्या नव अच क्याल्सा हुव! 31 नी हर ऊंद सळक इन सीरा मा जो तान गुम्मट, अदिक हर चौक दा तान जागा माळसुस्या, येन नी ईदुर दा अच रांड्या घाई ठहरूसीदील? यतिकी नी ईत्ता कमाई मा नेगत्या. 32 नी व्यभिचारिणी हिंग्स आय. नी पराया मंळसागोळी तान गांड उन बदला दा ग्रहण माळत्या. 33 सप्पा रांड्यागोळी रा पैस्या सिकताव, लेकीन नी तान सप्पा संगीगोळी खुद पैस्या कोटकु, अदिक आंदरी लालच तोर्सकु कारस्या कि आंदुर नाकु दी टु बंदकु नीन से व्यभिचार माळुल. 34 ई प्रकार इन व्यभिचार अन्य व्यभिचारीगोळ से उलटा आद. नीन हींद याऊ व्यभिचारी नळालुन, अदिक नी यारदु से दाम ताकोमाल, बल्की नीना कोळत्या; ईदा कारण नी उलटा ठहरूस्द.

यरूशलेम इक परमेश्वर उन दण्ड

35 "ई कारण, हे रांड्या, यहोवा अन वचन केळ, 36 प्रभु यहोवा हींग अनतान: नी व्यभिचार दा अति बेशरम आगकु, तान शरीर तान संगीगोळी तोर्स्द, अदिक तान मुर्तीगोळ से बेकार क्याल्सा माळ्द, अदिक तान चिकोर्द रक्ता वाहुसकु आंदरी बली येर्सद, 37 ई कारण नोळ, ना नीन सप्पा संगीगोळी जो नीन प्रेमी आर अदिक यास से नी प्‍यार हच्या, अदिक यास मुंदुर नीन से दुश्मनी ईट्यार, आ सप्पा अक नाकु दी टु नीन विरूद्ध जमा माळकु आंदरी नीन शरीर ऊगळा माळकु तोर्साईन, अदिक आंदुर नीन तन नोळ्यार. 38 आग ना नीनी हींग दण्ड कोळाईन, ह्यांग व्यभिचारिणीगोळी अदिक रक्ता वाहुसाळेर आर्तेरी कोटकु आगतद; अदिक सिट्ट अदिक जलन इन सांगुळ नींद रक्ता वाहुसाईन. 39 ई रिती देल ना नीनी आंदुर वश दा माळ कोमाईन; अदिक आंदुर नीनव गुम्मटगोळी ढाऊस कोंडार, अदिक नीन ऊँचा जागागोळी मुरू बुट्टार, आंदुर नीनव कपळा जबरदस्ती ईळस्यार, अदिक नीनव सुन्दर इसरा कसु कोंडार, अदिक नीनी ऊगळा माळकु बीट्ट बुट्टार. 40 आग नीन विरूद्ध ऊंद सभा जमा माळकु आंदुर नीन मा पथराव माळ्यार, अदिक तान तलवागोळ देल आरपार छेद माळ्यार. 41 आग आंदुर बेक्की हचकु नीन घेरागोळी होताक बुट्टार, अदिक नीनी हापाळ सा आर्तेर नोळतेला दण्ड कोट्टार; अदिक ना नीन व्यभिचार बन्द माळाईन, अदिक नी बाक रांड्यापण इन साटी दाम कोळतीदील. 42 याग ना नीन मा पुरा जलजलाहट प्रगट माळ कोमाईन, नीन मा अदिक होततीदील बल्की शांत आगेगाईन, अदिक बाक न सीट्टी बरतीदील. 43 नी जो तान बचपन इन दीनगोळ इक याद ईटीदील, बल्की ई सप्पा मातगोळ द्वारा नानी चिळुस्द, ई कारण ना नीन चाल चलन नीन ताल्ला मा हाकाईन अदिक नी तान सप्पा पयला अन बेकार क्याल्सागोळ से अदिक येक्कुल महापाप माळतीदील, प्रभु यहोवा अन ईदा वाणी हुन.

ह्यांग मोय हांग पोर

44 "नोळ, सप्पा कहावत अनावाळेर नीन बारा दा ईद कहावत अंदार, ‘ह्यांग मोय हांग पोर.’ 45 नीन मोय जो तान गांड अदिक चिकोर से नफरत माळ तोगोर, नी ठीक आकिन पोर ठहरूस्द; अदिक नीन आकतींगेर जो तान तान गांड अदिक चिकोर से नफरत माळतोगोर, नी भी ठीक आंदुर आकतींग होट्ट. नीन मोय हित्तीन अदिक आप्प एमोरी ईरोन. 46 नीनोर धोड्डेर आकतींग शोमरोन हुळ, जो तान पोरगोळ सांगुळ नीन ऊजवा दी ईरतार, अदिक नीन श्याण आकतींग, जो नीन डाक्या दी ईरतार आक पोरगोळ सांगुळ सदोम दा आर. 47 नी आंदुर घाई चाल नळदीदील, अदिक न आंदुर घाई बेकार क्याल्सा देल संतुष्ट आद; ईद रा हापाळ श्याण मात ठहरूसेत, लेकीन सप्पा चाल चलन आंदुर से भी येक्कुल बीगळुसेत. 48 प्रभु यहोवा अन ईद वाणी आद, नान जीवन इन किर्या, नीन आकतींग सदोम तान पोरगोळ सांगुळ नीन अदिक नीनोर पोरगोळ घाई क्याल्सा माळीदील. 49 नोळ, नीन आकतींग सदोम इन अधर्म ईद ईरोद, कि आक तान पोरगोळ सांगुळ घमण्ड माळोर, व्हाट्टा तुम तुमकु तीनोर अदिक सुख चैन देल ईरतोगोर; अदिक कठिन समय इक ईल अंजोर. 50 अत: आक गर्व माळकु नान मुंद बेकार क्याल्सा माळ कुरतुर, अदिक ईद नोळकु ना आंदुर दुर माळ कोंडीन. 51 बाक शोमरोन नीन पापगोळ मुंद आरधा पाप भी माळीदील, नी आकिन से येक्कुल वाळुस्कु बेकार क्याल्सा माळ्द, अदिक तान घोर बेकार क्याल्सागोळ द्वारा तान आकतींगेर से जीकसेद. 52 ईदुरसाटी नी जो तान आकतिंगेर्द न्याय माळ्द, ई कारण शरम माळ, यतिकी नी आंदुर से वाळुस्कु बेकार पाप माळ्या; ई कारण आंदुर नीन से कम दोषी ठहरूस्यार. ईदुरसाटी नी ई मात देल शरम माळ अदिक शरम माळतेला ईर, यतिकी नी तान आकतींगेरी कम दोषी ठहरूस्या.

सदोम अदिक शोमरोन इन पुर्नस्थापना

53 "याग ना आंदुर मतलब पोरगोळ सांगुळ सदोम अदिक शोमरोन इक बंधुआई टु वापस तराईन, आग आंदुर बीच दा अच नीन बंन्दीगोळ इक भी वापस तराईन, 54 यदुर देल नी शरम माळतेला ईर, अदिक तान सप्पा क्याल्सागोळी नोळकु शरम माळ, यतिकी नी आंदुर शांती इन कारण आग्या. 55 नीनोर आकतींगेर सदोम अदिक शोमरोन तान तान पोरगोळ सांगुळ तान पयला दशा दा मात्त होदार, अदिक नी भी तान पोरगोळ सांगुळ तान पयला अन दशा दा मात्त होद्या. 56 यागासताका नीन बुराई प्रगट ईला आगीत, मतलब याता समय ताका नी आसपास इन लॉकुर सांगुळ अरामी अदिक पलिश्ती आर्तेर इन जो ईग नाकु दी टु नीनी बेकार जान्सतार, हेसुर हुड्या, 57 आ तान घमण्ड इन दीनगोळ दा रा नी तान आकतींग सदोम इन हेसुर भी ईला ताकोम्या. 58 लेकीन ईग नीन इक तान महापाप अदिक बेकार क्याल्सागोळ्द भार खुद अच नेगोद बीदाद, यहोवा अन ईदा वाणी आद.

ऊंद वादा जो सदा ताका ठहरूसीत

59 "प्रभु यहोवा ईद अनतान: ना नीन सांगुळ हींग अच बरताव माळाईन, ह्यांग नी माळ्या, यतिकी नी रा वादा मुरूकु किर्‍या अक तुच्छ जानस्या, 60 तरी भी ना नीन बचपन इन दिनगोळ्द वादा याद ईटाईन, अदिक नीन सांगुळ हमेशा अन वादा कटाईन. 61 याग नी तान आकतींगेरी मतलब तान धोळ अदिक श्याण आकतींगेरी ग्रहण माळ्या, आग नी तान चाल चलन याद माळकु लज्जित आद्या; अदिक ना आंदरी नीन पोरगोळ ठहरूस बुळाईन; लेकीन ईद नीन वादा अन अनुसार माळतीदील. 62 ना नीन सांगुळ तान वाचा स्थिर माळाईन, अदिक आग नी जान्स कोंड्या कि ना यहोवा हुईन, 63 यदुर देल नी याद माळकु लज्जित आद्या, अदिक शरम इन मारा बाक यागलु बाय खोल्सतीदील, ईद आ समय आदीत, याग ना नीन सप्पा क्याल्सागोळी होचाईन, प्रभु यहोवा अन ईद वाणी हुन."