1 बाक यहोवा अन ईद वचन नान हाती पोहचुस्त: 2 "हे मंळसा अन सन्तान, तान बाय मागोग द्याश इन गोग इन दी माळकु जो रोश, मेशेक अदिक तूबल उन प्रधान आन, आऊन विरूद्ध भविष्यवाणी माळ, 3 अदिक ईद अन, हे रोश, मेशेक अदिक तूबल उन प्रधान, परमेश्वर यहोवा ईद अनतान: नोळ, ना नीन विरूद्ध आईन. 4 ना नीनी तीर्गुसकु तराईन, अदिक नीन जबळागोळ दा आकळागोळ हाक्कु नीनी तेगाईन; अदिक नीन सप्पा सेना अक भी मतलब घ्वाळा अदिक सवारगोळी जो सप्पा च्या सप्पा कवच हाक्कु ऊंद धोळ भीळ आद, जो फरी अदिक ढाल हुडुकु सप्पा च्या सप्पा तलवार नळसावाळेर ईत्तार; 5 अदिक अऊर सांगुळ फारस, कूश अदिक पूत उक, जो सप्पा च्या सप्पा ढाल हुडुकु अदिक टोप हचकु ईत्तार; 6 अदिक गोमेर अदिक आऊन सप्पा सैनिक दलगोळ इक, अदिक उत्तर दिशा अन दुर दुर द्याशगोळ तोगर्मा अन घराना, अदिक आऊन सप्पा दलगोळी तेगाईन; नीन सांगुळ हापाळ सा द्याश इन लॉकुर ईत्तार. 7 ईदुरसाटी नी तैयार आगेग; नी अदिक याट भीळ नीन हाती जमा ईत्तीत, तैयार ईरेत, अदिक नी आंदुरव अगुवा आगेत. 8 हापाळ दीनगोळ बीतुसदुर मा नीन सुधी ताकोमकु आदीत; अदिक आखरी इन वर्षगोळ दा नी आ द्याश दा बंद्या, जो तलवार इन वश दा टु बिटकु ईत्तीत, अदिक यदुर निवासी हापाळ सा राज्यगोळ दा टु जमा आदार; मतलब नी इस्त्राएल इन पहाळीगोळ मा बंद्या जो निरन्तर उजाळ ईताव; लेकीन आंदुर द्याश द्याश इन लॉकुर वश टु बुळ्सकु आगकु सप्पा च्या सप्पा निडर ईत्तार. 9 नी चळाई माळ्या, अदिक आंधी इन घाई बंद्या, अदिक तान सप्पा दलगोळ अदिक हापाळ द्याशगोळ लॉकुर सांगुळ बरफ इन घाई द्याश मा छाउसेद्या." 10 "परमेश्वर यहोवा ईद अनतान: आ दिशी नीन दा ईत्ता ईत्ता मातगोळ बंदव कि नी ऊंद बुरा युक्ती भी तेगद्या; 11 अदिक अंद्या, ना बिन शहरपनाह अन ऊरगोळ द्याश मा चळाई माळाईन; ना आ लॉकुर हाती होगाईन जो चैन देल निडर ईरतार; जो सप्पा च्या सप्पा बिना शहरपनाह अदिक बिना बेळीगोळ अदिक पल्लागोळ बसुसकु आर, 12 ताकी कसुकु नी आंदरी लुट्‍स अदिक तान कय आ खण्डहरगोळ मा वाळुस जो मात बसुसकु आग्याव, अदिक आ लॉकुर विरूद्ध होगुल जो राज्यगोळ दा टु जमा आगीदुर अदिक पृथ्वी इन बोमली मा बसुसकु जनावर अदिक अन्य सम्पत्ति ईटतार. 13 शबा अदिक ददान इन लॉकुर अदिक तर्शीश इन व्यापारी तान द्याश इन सप्पा हारोद हुल्ल इन सांगुळ नीन से अंदार, येन नी लुटसोर साटी बरत्या? येन नी धन कसोर, व्हान्ना-बेळ्ली नेगोर, जनावर अदिक अन्य सम्पत्ती वोयोर साटी, अदिक धोळ्द लुट अपनुसोर साटी तान भीळ जमा माळ्या?" 14 "ई कारण, हे मंळसा अन सन्तान, भविष्यवाणी माळकु गोग से अन, परमेश्वर यहोवा ईद अनतान: या समय नीन प्रजा इस्त्राएल निडर बसुसकु ईत्तीत, येन नीनी ईदुर्द समाचार सिकतीदील? 15 नी उत्तर दिशा अन दुर दुर जागा टु बंद्या; नी अदिक नीन सांगुळ हापाळ सा राज्य अन लॉकुर, जो सप्पा च्या सप्पा घ्वाळागोळ मा नीदुरकु ईत्तार, मतलब ऊंद धोळ्द भीळ अदिक बलवन्त सेना. 16 ह्यांग बादल जमीन मा छाऊसेगतद, हांग अच नी नान प्रजा इस्त्राएल उन द्याश मा हींग चळाई माळ्या." ईदुरसाटी हे गोग, अन्त इन दिनगोळ दा अच हिंग आदीत, कि ना नीन से आन द्याश मा ईदुरसाटी चळाई माळसुसाईन, कि याग ना राज्यगोळ इक नोळतेला नीन द्वारा तान इक पवित्र ठहरूसाईन, आग आंदुर नानी अरू कोंडार.

17 "परमेश्वर यहोवा ईद अनतान: येन नी आवा आलच यार्द चर्चा ना पुराना समय दा तान दासगोळ, मतलब इस्त्राएल उन आ भविष्यवक्तागोळ द्वारा माळीदीन, जो आ दिनगोळ दा वर्षगोळ ताका भविष्यवाणी माळतेला होदुर, कि यहोवा गोग से इस्त्राएलीगोळ मा चळाई माळसुस्यान? 18 या दिशी इस्त्राएल इन द्याश मा गोग राजा चळाई माळ्यान, अदा दिशी नान जलजलाहट नान बाय टु प्रगट आदीत, परमेश्वर यहोवा अन ईदा वाणी आद. 19 ना जलजलाहट अदिक सिट्ट इन बेक्की दा अंदीन कि नि:सन्देह आ दिशी इस्त्राएल इन द्याश दा धोळ भूकम्प आदीत. 20 नान दर्शन देल समुद्र अन मेनगोळ अदिक आकाश इन पक्षी, मैदान इन जनावर अदिक जमीन मा यास जीव जन्तु रांग्सताव, अदिक जमीन इन म्याकुच यास मंळसागोळ ईरतार, सप्पा नळ्गकु येद्दार अदिक पहाळीगोळ केळसुसकु आदव; अदिक चळाईगोळ नष्ट आदव, अदिक सप्पा दिवालगोळ बीदकु मुण्ण दा मिलुसेदव. 21 परमेश्वर यहोवा अन ईदा वाणी आद कि ना अदुर विरूद्ध तलवार नळ्सली तान सप्पा पहाळीगोळी कारसुसाईन अदिक हर ऊंद उन तलवार आऊन वार्टुन विरूद्ध येद्दीत. 22 ना मरी अदिक रक्ता अन द्वारा आऊन से मुकदमा आळाईन; अदिक आऊन मा अदिक आऊन दलगोळ मा, अदिक आ हापाळ सा राज्यगोळ मा जो आऊन हाती ईत्तीत, ना धोळ्द झळी हचाईन अदिक ओला अदिक बेक्की अदिक गन्धक बरूसाईन. 23 ई प्रकार ना तान इक महान अदिक पवित्र ठहरूसाईन अदिक हापाळ सा राज्यगोळ मुंद तान इक प्रगट माळाईन. आग आंदुर जान्स कोंडार कि ना यहोवा हुईन."