1 Itungo ɨlɨ kʉmʉɨla mʉhangʉ nʉwa kʉaɨɨlya ahʉɨɨli ang’wi Itunda. Tendi anga nɨalagɨɨye ahʉɨɨli ang’wi Itunda nɨa kʉ Galatia kʉtenda. 2 Jumapɨlɨ yɨhi antʉ ɨhi wahole mpia nkeehʉ waibagʉle kʉmpelo. Ingɨ wabagʉle anga mʉkendepewe, anga nɨze kʉleke kʉtula nʉʉhangʉlya. 3 Anga nɨze kitolanyu, kʉalagɨɨlya antʉ ang’wɨ nɨmʉkʉaholania mʉng’wanyu atwale itʉtʉ nɨkɨnyaʉgeni kanyu kʉ Yelusalemu. 4 Anga ɨze inonee ʉnene nongole, itɨ gwa, antʉ nɨanso ninzanilye.

5 Nsɨgile nɨze kitolanyu anga nkɨɨle kʉ Makedonia, kʉnsoko nsɨgile kʉkɨɨla hanza kʉ Mekidonia papo nɨze kʉng’wanyu. 6 Angaiyʉke kikiɨ kitolanyu kitungo ʉdu, ang’wɨ nɨhumile kikiɨ palʉng’wɨ nʉnyenye matungo ɨhi na malila, ingɨ mʉhume kʉnzaɨɨlya nongoleke nʉmʉhɨnzo nʉwane pɨhi kʉ ninzʉɨye. 7 Ndogoelyo shanga ndoilwe kʉkɨɨla kʉng’wanyu nzeniangʉpɨye nʉ mʉhɨnzo, Isekʉlʉ anga walowe nsʉmbɨɨye kikiɨ kʉng’wanyu kitungo ikupɨ.

8 Ingɨ kʉsaga papa pa Epeso kʉpikɨɨla lʉhikʉ nʉla Pentekosite. 9 Lyoma lɨkolɨ kʉnsoko amʉlɨmo wane nɨnkete apa, palʉng’wɨ nʉkʉtula akolɨ antʉ ɨdʉ nɨakʉnkɨngɨla ndeke kitʉma.

10 Ingɨ ʉTimoteo anga waza kʉng’wanyu mʉsɨngɨɨlyi, kendegeeli wishiɨ nɨ matiliga waleke kʉtula nʉwoa, kʉnsoko ʉkitʉma mʉlɨmo wang’wi Isekʉlʉ anga ʉnene. 11 Kʉlʉlo mʉntʉ wɨhi waleke kʉmʉdalaha, ingɨ mʉaɨɨlyi walongoleke nʉ mʉhɨnzo wakwe kʉ matiliga ingɨ wahume kʉtulya kʉng’wane, kʉnsoko ʉnene nʉmʉlindɨɨe waze palʉng’wɨ nɨaluna itʉ.

12 Apolo mʉnyandʉgʉ. Nʉminenile nangalʉ wangʉpe waze kʉng’wanyu palʉng’wɨ nɨanyandʉgʉ angɨza amiʉmbaʉmbɨle kʉng’wanso kʉ Kolinto. Palʉng’wɨ nɨ kɨna shanga ʉloilwe lʉkʉlʉ kɨza itungo ɨlɨ. Itunda anga waaɨɨlye ʉzile ʉdu.

13 Hʉgʉki, mʉkamatɨke lʉkʉlʉ mʉʉhʉɨli, mʉtule mɨagimya ɨze mʉkete ingulu. 14 Itʉmi maintʉ ɨhi kʉ ʉlowa.

15 Ʉnyenye mʉlɨngile kɨna Ʉsitepwano nɨ antʉ amitolakwe wawo aɨahʉɨɨli ang’wandyo mʉ kɨsalɨ ka Akaya, nɨenso ipumilye kʉaɨɨlya antʉ ang’wi Itunda. Anyandʉgʉ ane kʉminena nʉnyenye 16 mʉtyate intendo niya kʉaaɨɨlya ɨantʉ anga nɨɨtenda nɨanso, nintendo niya antʉ ɨhi nɨitʉma mʉlɨmo palʉng’wɨ nɨenso.

17 Niloile nangalʉ kɨna Sitepwana nʉ Politunato nʉ Akaiko apika, alihɨɨla ɨlyoma naza mɨkʉtilɨ ʉnyenye. 18 Amɨloelya ɨnkolo ane nɨnkolo anyu. Kʉlʉlo inonee kʉakɨmbʉka ɨantʉ nɨaitɨ.

19 Ahʉɨɨli ang’wi Itunda nɨakolɨ kʉ Asia amʉlamʉkilye. Kʉ ʉhumi wang’wi Isekʉlʉ mʉlamʉkigwe nʉ Akula nʉ Pilisika palʉng’wɨ nɨantʉ ɨhi nɨang’wi Itunda nɨakolɨ mʉmatolao. 20 Mʉlamʉkigwe nɨanyandʉgʉ ɨhi.

Nʉnyenye ilamʉshi kʉ kɨlɨngasɨɨlyo ka ʉlowa wang’wi Itunda.

21 Ʉnene Paʉlo kʉandɨka ɨmɨlamʉ ɨyɨ kʉ mʉkono wane.

22 Mʉntʉ wɨhi nɨshanga ʉmʉloilwe Isekʉlʉ nʉwazung’we!

Malanata, ndogoelyo akwe Isekʉlʉ witʉ nzʉʉ!

23 Ʉkende wang’wi Isekʉlʉ witʉ Yesʉ ʉtule nʉnyenye.

24 Nʉmʉloilwe ʉnyenye mɨhinɨmʉmʉhʉɨɨe ʉ Kilisito Yesʉ.