1 ୟାଗିବର୍ସେଙ୍‌ ଆଡିଡ୍‌ ପାରସନ୍‌ ଆରାଜା କୋରସନ୍‌ ଆ ସାସନିଙ୍‌ ବେଲଟତ୍ସର ଆଞୁମ୍‌ଲୋଙ୍‌ ଅବ୍‌ସେକୁଲନ୍‌ ଦାନିଏଲ୍‌ ଆନିନ୍‌ ଆଡଙ୍‌ ବର୍ରନ୍‌ ଡ କେନ୍‌ ଆତେ ଆଜାଡ଼ିନ୍‌ ଅବୟ୍‌ ସୋଡ଼ା ଜୁଜ୍ଜନ୍‌ ଆବର୍ନେ; ଆରି ଆନିନ୍‌ ତିଆତେ ଗନ୍‌ଲୁଡେନ୍‌ ଡ ତି ଆତନାଲ୍‌ମଡ୍‌ ଆବର୍ନେ ଜନାଏନ୍‌ । 2 ତି ଆଡିଡ୍‌ ଞେନ୍‌ ଦାନିଏଲନ୍‌ ୟାଗିପାଲିଜାୟ୍‌ ଡୁକାଡାଲିୟ୍‌ । 3 ୟାଗିପାଲି ଆଡ୍ରେଏନ୍‌ ଞେନ୍‌ ଇନ୍ନିଙ୍‌ଜା ଅଃଜ୍ଜୋମ୍‌ଲାୟ୍‌, ଜେଲୁ ଅଡ଼େ ଦ୍ରାକ୍ୟାଡାନ୍‌ ତଅଡ୍‌ଲୋଙ୍‌ଞେନ୍‌ ଅଃଜ୍ଜିର୍ରୋ, ଞେନ୍‌ ଇନ୍ନିଙ୍‌ ମିଞଲ ଅଃଜ୍ଜଡ୍‌ଲନାୟ୍‌ । 4 ଆରି ଆପ୍ରତମୁନ୍‌ ଆଙ୍ଗାୟ୍‌ ବକୁଡ଼ି ଉଞ୍ଜିଡିନ୍ନା ଆଡିଡ୍‌ ଞେନ୍‌ ଇଦ୍ଦେକଲନ୍‌ ଆଞୁମ୍‌ ସୋଡ଼୍‌ଲନ୍‌ ଅନେଙ୍‌ ବାନ୍‌ ଆଡ୍ରକୋଲନ୍‌ଆଡିଡ୍‌, 5 ଞେନ୍‌ ସାବ୍‌କୁଡ୍‌ମଡ୍‌ଲନ୍‌ ଗିୟ୍‌ଲାୟ୍, ଆରି ଗିୟ୍‌ବା, ଅବୟ୍‌ନେ ଜେଏକାବନ୍‌ ମନ୍‌ରାନ୍‌ ଆନିନ୍‌ ରେବ୍‌ଡୁବ୍‌ଲନ୍‌ ଉପସନ୍‌ ମନଙ୍‌ ଆ ସୁନ୍ନାନ୍‌ ବୟନ୍‌ ଆତବାଡ୍‌ ଡକୋଲନ୍; 6 ଆଡଅଙ୍‌ନିୟ ବିଦୁର୍ଜ ମଣିନ୍‌ ଅନ୍ତମ୍‌ ଡ ଆମୁକ୍କାନ୍‌ କରେଣ୍ଟନ୍‌ ଅନ୍ତମ୍‌ ସାଆର୍‌ ଆମଡନ୍‌ ତରେନ୍‌; ଆଉଲାଙ୍‌ତୋଡନ୍‌ ଅନ୍ତମ୍‌, ଆରି ଆସିଂନ୍‌ ଡ ଆତଲ୍‌ଜଙନ୍‌ ପିତଡ଼ନ୍‌ ଆଉଲାଙ୍‌ ଅନ୍ତମ୍‌ ଡ ଆବାକ୍ୟନ୍‌ ଆସରଙ୍‌ ମନ୍‌ରାରେଙ‌ନ୍‌ ଆସର୍ରଙ୍‌ ଅନ୍ତମ୍‌ । 7 ଆରି ଞେନ୍‌ ଦାନିଏଲ୍‌ ଇନ୍‌ସୟ୍‌ଞେନ୍‌ କେନ୍‌ ଆତନାଲ୍‌ମଡ୍‌ ଗିୟ୍‌ଲୟ୍‌; ଇନିଆସନ୍‌ଗାମେଣ୍ଡେନ୍‌ ସାଙ୍ଗଞେ‌ନ୍‌ଞ୍ଜି କେନ୍‌ ଆତନାଲ୍‌ମଡ୍‌ ଆନ୍ନିଙ୍‌ ଅଃଗିୟ୍‌ଲଜି; ବନ୍‌ଡ ଆନିଞ୍ଜି ଗୋଗୋୟ୍‌ ତକରେଞ୍ଜି କି ରମ୍ମଙ୍‌ ରମ୍ମଙ୍‌ ସନେନ୍ନ୍‌ ଆସନ୍‌ ଜିର୍ରେଞ୍ଜି । 8 ତିଲୋଙ୍‌ ଇନ୍‌ସୟ୍‌ଞେନ୍‌ ଡକୋଲନ୍‌ କେନ୍‌ ସୋଡ଼ା ତନଲ୍‌ମାଡନ୍‌ ଗିୟ୍‌ଲାୟ୍‌ ଡ ଅମଙ୍‌ଞେନ୍‌ ଇନ୍ନିଙ୍‌ଜା ବୋର୍ସାନ୍‌ ଅଃଡ୍ଡକୋଲନ୍‌; ଇନିଆସନ୍‌ଗାମେଣ୍ଡେନ୍‌ ସନାଆର୍ରଞେନ୍‌ ଅଞିଡ୍‌ଲେ ଜିର୍ରେନ୍‌ ଡ ଞେନ୍‌ ଅସୁୟଜାୟ୍‌ ଅବୋର୍ସାଲିୟ୍‌ । 9 ଏଲେଜାକିୟ୍‌ ଡେନ୍‌ ଞେନ୍‌ ଆବକ୍ୟନ୍‌ ଅମ୍‌ଡଙ୍‌ଲାୟ୍‌; ତିଆଡିନ୍‌ ଞେନ୍‌ ଆବର୍ନେନ୍‌ ଆ ସର୍ରଙନ୍‌ ଅମ୍‌ଡଙ୍‌ଲାୟ୍‌, ତିଆଡିଡ୍‌ ଞେନ୍‌ ସତିଙ୍‌ଗାମ୍‌ଲେ ଡିମଲିୟ୍‌ । 10 ତିଆସନ୍‌ ଗିୟ୍‌ବା, ବସିଂ ସୁଙେଲେ ଅବ୍‌ତୁଡ଼ୁମ୍‌ଲିୟ୍‌ ଡ ତାଲ୍‌ସିଞେନ୍‌ ବୟନ୍‌ ଅର୍ରାସାନେନ୍‌ ତିୟ୍‌ଲିୟ ।

11 କବର୍ରପାଙ୍‌ମର୍ରନ୍‌ ଞେନ୍‌ ବର୍ରରିୟ୍, ଏ ଗୋଗୋୟ୍‌ ଡନୁଙ୍‌ୟମର୍ର ଦାନିଏଲ୍‌, ଇନ୍‌ଲେନ୍ ଅଙ୍ଗା ବାକ୍ୟ ବର୍ରତନାୟ୍‌, ତିଆତେ ଗନ୍‌ଲୁଡମ୍‌ତୁ ଡ ସତଙ୍‌ଗାମ୍‌ଲେ ତନଙା; ଇନିଆସନ୍‌ଗାମେଣ୍ଡେନ୍‌ ଇନ୍‌ଲେନ୍ ନମି ମଙ୍‌ବାନମ୍‌ ଅନାପ୍ପାୟନ୍‌ ଡେଲିଁୟ୍‌; ଆନିନ୍‌ କେନ୍‌ ଆବର୍ନେ ଆବର୍ରରିଙନ୍‌ ଞେନ୍‌ ତକ୍କର ତକ୍କରରେ ତନଙ୍‌ଲାୟ୍‌ । 12 ତିଲୋଙ୍‌ ଞେନ୍‌ ଆଡଙ୍‌ ବର୍ରିୟ୍, ଦାନିଏଲ୍‌ ବତଙ୍‌ଡଙମ୍‌ତଡ୍‌; ଇନିଆସନ୍‌ଗାମେଣ୍ଡେନ୍‌ ଆମନ୍‌ ଆପ୍ରତମୁନ୍‌ମାନ୍‌ ଗନ୍‌ଲୁଡନ୍‌ ଆସନ୍‌ ଇସ୍ୱରନମ୍‌ ଆମୁକ୍କାଲୋଙ୍‌ ଆମନ୍‌ ଲବ୍‌ଗଡ୍‌ନେନ୍‌ ଆସନ୍‌ ଆମନ୍‌ ମନ୍ନ ନମ୍‌ତିଏନ୍, ତି ଆଡିଡ୍‌ ସିଲଡ୍‌ ବାକ୍ୟନ୍‌ ଅଃନ୍ନମ୍‌ଡଙ୍‌ଲୋ; ଆରି ବାକ୍ୟନମ୍‌ ଆସନ୍‌ ଞେନ୍‌ ଜିର୍ରାୟ୍‌ । 13 ବନ୍‌ଡ ସୋଡ଼ା ପାରସ୍ୟ ରାଜା ବକୁଡ଼ି ଅବୟ୍‌ ଡିନ୍ନାନ୍‌ଜାୟ୍‌ ଞେନ୍‌ ଡଙ୍‌ଡଙ୍‌ଲିୟ୍‌; ବନ୍‌ଡ ଗିୟ୍‌ବା, ସୋଡ଼ା ମରଞ୍ଜିଲୋଙ୍‌ ମିକାୟେଲ୍‌ ଆଞୁମ୍‌ର୍ର ଅବୟ୍‌ନେ ସାୟ୍‌ସାୟ୍‌ନେନ୍‌ ଆସନ୍‌ ଜିର୍ରାୟ୍‌; ଆରି ତି ଆଜାଗାଲୋଙ୍‌ ପାରସ୍ୟନ୍‌ ଆରାଜାଞ୍ଜି ବୟନ୍‌ ଏଡକୋଲନାୟ୍‌ । 14 ନମି ତିକ୍କିୟୋଙ୍‌ ମନ୍‌ରାଞ୍ଜି ଆମଙ୍‌ ଇନିଡେତେ, ତିଆତେ ଅନବ୍‌ଜନାନ୍‌ ଆସନ୍‌ ଞେନ୍‌ ଏଜିର୍ରରାୟ୍; ଇନିଆସନ୍‌ଗାମେଣ୍ଡେନ୍‌ ତନଲ୍‌ମାଡନ୍‌ ଆରି ଗୋଗୋୟ୍‌ ଡିନ୍ନାନ୍‌ଜାୟ୍‌ ଡକୋ । 15 ଆନିନ୍‌ କେନ୍‌ଏଡ୍‌ନେଲେ ବର୍ରନ୍‌କି ଞେନ୍‌ ଲବଗଡ୍‌ ମୁକାଲେ ଆଙ୍ଗାଲିୟ୍‌ । 16 କେନ୍‌ ସିଲଡ୍‌ ଗିୟ୍‌ବା, ମନ୍‌ରାନ୍‌ ଆ ଅନ୍‌ ଅନ୍ତମ୍‌ ଅବୟ୍‌ ମନ୍‌ରାନ୍‌ ତଅଞେନ୍‌ ସୁଙେନ୍‌; ତିଲୋଙ୍‌ ଞେନ୍‌ ବର୍ରନାୟ୍‌ କି ମୁକାବାଞେନ୍‌ ଆତନଙ୍‌ ଆମନରା ବର୍ରାୟ୍‌, ଏ ପ୍ରବୁ କେନ୍‌ ଆତନାଲ୍‌ମଡ୍‌ ଆସନ୍‌ ବତାନ୍‌ଞାଙଲାୟ୍‌ ଞେନ୍‌ ଅସୁୟଜାୟ୍‌ ବୋର୍ସା ଡଙ୍‌ଡଙ୍‌ଲେ ଅର୍ରପ୍ତିୟ୍‌ । 17 ଇନିଆସନ୍‌ଗାମେଣ୍ଡେନ୍‌ ପ୍ରବୁଞେନ୍‌ କେନ୍‌ ଆସେବାମର୍ର ଏଙ୍ଗାଲେ ଞେନ୍‌ ବୟନ୍ ‌କଡ଼ାଡିଲନ୍‌ ରପ୍ତିତେ ? ତେତେନ୍‌ ବୋର୍ସାଞେନ୍‌ ଅସୋୟ୍‌ ଜାକିଁୟ୍‌ ତନଙ୍‌ୟମ୍‌ ଅଃଡ୍ଡକୋଲନ୍‌ । 18 ତିଆଡିଡ୍‌ ମନ୍‌ରାନ୍‌ ଅନ୍ତମ୍‌ ଆତୁବ୍‌ତୁବନ୍‌ ଆମନ୍‌ଡ୍ରା ଞେନ୍‌ ଆରି ବତର ସୁଙେଲେ କି ବୋର୍ସାଲିୟ୍‌ । 19 ଆନିନ୍‌ ବର୍ରନ୍‌, "ଏ ଗୋଗୋୟ୍‌ ଡନୁଙ୍‌ୟୋମ୍‌ ଆମନରା ବତଙ୍‌ଡଙମ୍‌ତଡ୍‌; ସୟୁଡେଅନ୍ତୁ, ଅବ୍ବୋର୍ସାନାବା, ଅବ୍ବୋର୍ସାନାବା !" ଆନିନ୍‌ କେନ୍‌ ଏନେଲେ ବରିଁୟ୍‌, ଞେନ୍‌ ବୋର୍ସାଡାଲେ ବର୍ରନାୟ୍‌, "ପ୍ରବୁ ଞେନ୍‌ ବରିୟ୍‌ ଇନିଆସନ୍‌ଗାମେଣ୍ଡେନ୍‌ ଆମନ୍‌ ଞେନ୍‌ଆଡଙ୍‌ ଅବୋର୍ସାଲିୟ୍‌ ।" 20 ତିଲୋଙ୍‌ ଆନିନ୍‌ ବର୍ରନ୍‌, "ଞେନ୍‌ ଇନିଆସନ୍‌ ଅମଙ୍‌ନମ୍‌ ଏଜିର୍ରାୟ୍‌, କେନ୍‌ ଆତେ ଆମନ୍‌ଜନା ପଙ୍‌ ? ନମିଞେନ୍‌ ଞେନ୍‌ ପାରସ୍ୟ ସୋଡ଼ାମରଞ୍ଜି ବୟନ୍‌ ଜୁଜନେନ୍‌ ଆସନ୍‌ ଏୟର୍ରନେବା; ଆରି ଞେନ୍‌ ଡୁଙ୍‌ଲନାୟ୍‌ ଗିୟ୍‌ବା ଗ୍ରିସ୍‌ ଆସୋଡ଼ାମର୍ର ଜିର୍ରତାୟ୍‌ । 21 ବନ୍‌ଡ ଆଜାଡ଼ିନ୍‌ ଆ ବଇ ଇନିଆଇଡିଡ୍‌ ଡକୋ, ତିଆତେ ଞେନ୍‌ ଏବ୍‌ଜନାତମ୍‌; କେନ୍‌ ଆବିରୁଡଲୋଙଞ୍ଜି ଞେନ୍‌ ସନାୟୁମ୍‌ ଆସନ୍‌ ମିକାଏଲନ୍‌ ଅମ୍‌ରେଙ୍‌ଲେ ଆରି ଆନ୍ନିଙ୍‌ ତଡ୍‌ ।"