ସିଅଁନ୍ ଆଡଲିଲୋଙନ୍ ଦାନିଏଲନ୍
1 ଦାରିଆବସ ଅଡ଼୍କୋନ୍ ଆରାଜ୍ୟ ଆସନ୍ ବସଅ ବଗୁଡ଼ି ଗବର୍ନର୍ମର୍ରନ୍ ତନବ୍ନଙନ୍ ଆସନ୍ 2 ତି ଗବର୍ନର୍ମର୍ରଜି ଏଙ୍ଗାଲେ ଡିଲେ ଇସାବନ୍ ତିୟ୍ତଜି ଡ ରାଜାନ୍ ଏଙ୍ଗାଲେ କି ଅଲାସାବେ, ତି ଆସନ୍ ୟାଗି ମନରାନ୍ ଗନିୟ୍ଗିଜନ୍ ଆସନ୍ ତବ୍ନଙେନ୍; କେନ୍ ୟାଗିଲୋଙ୍ଞ୍ଜି ଦାନିଏଲନ୍ ନିୟ୍ ଅବୟ୍ ଡକୋଲନ୍ । 3 କେନ୍ ଦାନିଏଲନ୍ ଆ ପୁଡ଼ାରାଲୋଙ୍ ମଡ଼ିର୍ପୁଡ଼ାରାନ୍ ଆଡ୍ରକୋଏନ୍ ଆସନ୍ ସୋଡ଼ା ଡର୍ନେମର୍ ଡ ଗବର୍ନରନ୍ ଆତିକିଲୋଙ୍ ଆନିନ୍ ସୋଡ଼ାମର୍ ଡକୋଏନ୍; ଆରି ରାଜାନ୍ ଅଡ଼୍କୋନ୍ ଆରାଜ୍ୟ ଆ ତୋଣ୍ତୁଲୋଙ୍ ତନବ୍ନଙନ୍ ଆସନ୍ ଆନିନ୍ ଇସ୍ସୁମେନ୍ । 4 କେନ୍ ସିଲଡ୍ ସୋଡ଼ାମରନ୍ ଡ ଗବର୍ନରଞ୍ଜି ଆକାବାଡ଼ା ଆବର୍ନେଜି ଦାନିଏଲନ୍ ଆ ଡୋସା ସାଜେଞ୍ଜି; ବନ୍ଡ ଆନିଞ୍ଜି ଇନ୍ନିଙ୍ଜା ଡୋସା ଅଞାଙ୍ଲଜି, ଇନିଆସନ୍ଗାମେଣ୍ଡେନ୍ ଆନିନ୍ ଡନେମର୍ର ଡକୋଏନ୍ ଆରି ଆନିନ୍ ଇନ୍ନିଙ୍ଜାକିୟ୍ କଣ୍ଡାୟ୍ ଡୋସାନ୍ ଇନ୍ନିଙ୍ଜା ଅଃଗିୟ୍ତାଲୋ । 5 ତିଲୋଙ୍ ଆ ମନ୍ରାଜି ବର୍ରଞ୍ଜି, ଇନ୍ଲେଞ୍ଜି ଦାନିଏଲନ୍ ଆ ଇସ୍ୱର ବନାଁୟ୍ବରଜି ଆବିସୟ୍ ଏଞବା । ଆଡୋସାନ୍ ଅଃଞମ୍ଲବୋଡେନ୍ ଆରି ଇନ୍ନିଙ୍ଜା ଆବିସୟ୍ ଡୋସାନ୍ ଅଃଞାଙ୍ବୋ । 6 କେନ୍ ଆସନ୍ ଗବର୍ନରନ୍ ଡ ସୋଡ଼ାମରଞ୍ଜି ରାଜାନ୍ ଆମଙ୍ ଅବ୍ରୁକ୍କୁଡାଲେ କେନ୍ ଏନେଲେ ବର୍ରେଞ୍ଜି, ରାଜା ଦାରିଆବସ ଗୋଗୋୟ୍ ବର୍ରର୍ସେଙ୍ ଅମେଙନ୍ତୁ । 7 ରାଜ୍ୟନ୍ ଆସୋଡ଼ାମର୍ର ଗବର୍ନର୍, ମନ୍ତ୍ରିଞ୍ଜି ଡ ଡେସାନ୍ ଆଗ୍ନିୟ୍ମରଞ୍ଜି ଅଡ଼୍କୋନ୍ ଆବୟ୍ନ ଅମ୍ମେଡାଲନ୍ ଏନେଲେ ଅବୟ୍ ରାଜାନ୍ ଆବନାୟ୍ ରଡୋ କାବ୍ବାଡ଼ା ଲନୁମନ୍ ଆସନ୍ ବନାଁୟ୍ବରନ୍ ଡେନ୍ ଜଡି ଆନ୍ନା ତିରିସି ଡିନ୍ନାଜାୟ୍ ରାଜାନ୍ ଆ କୋଙ୍ଡାୟ୍ ଅମ୍ରେଙ୍ଲେ ଅଡ଼େ ମନ୍ଡ୍ରାନ୍ ଆମଙ୍ ପ୍ରାର୍ତନାତନ୍, ଆନିନ୍ ସିଅଁନ୍ ଆଡଲିଲୋଙ୍ ସେତ୍ତବୋ । 8 ନମିଞେମା ରାଜା ମାଦିଅନ୍ ଡ ପାରସିକମରଞ୍ଜି ଅନଗଡ୍ ଅନ୍ତମ୍ କେନ୍ ଅଲ୍ଲୁମ୍ବୋ ଏଙ୍ଗାଲେ ତିକ୍କିୟୋଙ୍ ଅନ୍ନାନାନେ, କେନ୍ ଆସନ୍ ତିଆତେ ଗବ୍ରିଆ ଡ କେନ୍ ଆ ଇଡଲ୍ ଲୋଙନ୍ ସନ୍ତକଆ । 9 ତିଆସନ୍ ଦାରିଆବସ ରାଜାନ୍ ତି ଆଇଡଲ୍ ଡ ଅଲୁମ୍ବୋନ୍ ଅନଗଡ୍ ସନ୍ତକଏନ୍ । 10 କେନ୍ ଆଇଡଲ୍ ସନ୍ତକଏନ୍ ଗାମ୍ଲେ ଆଜ୍ରନାଏନ୍ ସିଲଡ୍ ଦାନିଏଲନ୍ ଆ ସିଂଙନ୍ ଜିର୍ରେନ୍; ଆସିଙନ୍ ଆ ଜର୍ରକା ଜିରୁସାଲମ୍ଗଡ୍ ଆରୋସାଡ୍ ଡକୋଏନ୍; ଆରି ଆମ୍ମୁଙ୍ ଏଙ୍ଗାଲନ୍ ତିଅନ୍ତମ୍ ବଡିନ୍ନା ୟାଗି ତରା ତୁଡୁମ୍ଡାଲେ ପ୍ରାର୍ତନାଲନ୍ ଡ ପରମେସ୍ୱରନ୍ ଆମଙ୍ ସନେସେନନ୍ ତିଏନ୍ । 11 କେନ୍ ସିଲଡ୍ ତି ଆ ମନ୍ରାଜି ରୁକୁଡାଲନ୍ ଦାନିଏଲନ୍ ଆ ପରମେସ୍ୱରନ୍ ଆମଙ୍ ଆ ପ୍ରାର୍ତନାଲନ୍ ଆତେ ଗିଜେଞ୍ଜି । 12 ତି ଆଡ଼ିଡ୍ ଆନିଞ୍ଜି ରାଜାନ୍ ଆମଙ୍ ଜିର୍ରେ ରାଜାନ୍ ଆନସୟ୍ବର୍ର ଆମୁକ୍କାବାନ୍ ବର୍ରଞ୍ଜି, ଏ ରାଜା ଅଙ୍ଗାଜାକିଁୟ୍ ଆମନରା ବକୁଡ଼ି ଦସ ଡିନ୍ନାଲୋଙନ୍ ଆମନ୍ ଅମ୍ରେଙ୍ଲେ ଆନୁଙ୍ଜାକିୟ୍ ଆ କୋଙଡାୟ୍ କି ମନ୍ରାନ୍ ଆମଙ୍ ପ୍ରାର୍ତନାଲନ୍ଡେନ୍, ଆନିନ୍ ସିଅଁନ୍ ଡଲିଲୋଙନ୍ ପନିଡନ୍ ଡେତେ, ଏଃନେଗୋ ବନାଁୟ୍ବରନ୍ ଅଲାଲୋଙନ୍ ଆମନ୍ ଅଃସନ୍ତକଲୋ ପଙ୍ ? ରାଜାନ୍ ଜାଲଙ୍ଡାଲେ ବର୍ରେନ୍,ମାଦିୟନ୍ ଡ ପାରିସିକମରଞ୍ଜି ଡକୋନେନ୍ ଅନଗଡ୍ ଅନ୍ତମ୍ ତିଆତେ ଆଗବ୍ରିୟ୍ ।
13 ତିଲୋଙ୍ ଆନିଞ୍ଜି ରାଜାନ୍ ଆମୁକ୍କାଲୋଙ୍ ବର୍ରଞ୍ଜି,ଏ ରାଜା ଜିଉଦାନ୍ ଆବଣ୍ତିମରଞ୍ଜିଲୋଙ୍ ଅବୟ୍ନେ ଦାନିଏଲନ୍, ଆମନ୍ ଆସନ୍ତକନ୍ ଆ ଅଲା କି ବର୍ରନେନମ୍ ଆନିନ୍ ଅଃମ୍ମାନ୍ନେଲୋ, ବନଡ୍ ବଡିନ୍ନାଲୋଙ୍ ୟାଗି ତର ଆନିନ୍ ପ୍ରାର୍ତନାତନ୍ । 14 ତିଲୋଙ୍ ରାଜାନ୍ କେନ୍ ଆବର୍ନେ ଅମ୍ଡଙ୍ଲେ ଗୋଗୋୟ୍ ବର୍ରାବେନ୍, ଆରି ଦାନିଏଲନ୍ ଆନ୍ନମ୍ମେଙ୍ ଆସନ୍ ଗବ୍ରିଏନ୍; ଆ ଡନଙ୍ଡଙନ୍ ଆସନ୍ ସାଲୁମନ୍ଜାୟ୍ ଏରେନ୍ ଗୋଜେନ୍ । 15 ତିଲୋଙ୍ ତି ଆ ମନ୍ରାଜି ରାଜାନ୍ ଆମଙ୍ ରୁକୁଡାଲନ୍ ରାଜାନ୍ ବର୍ରେଞ୍ଜି, ଏ ରାଜା ଆମନ୍ ଜନାନ୍ତୁ, ରାଜା ଇନ୍ନିଙ୍ଜାକିୟ୍ ଆନିଃୟମ୍ ଗବ୍ରିଏନ୍, ତିଆତେ ତିକିୟୋଙ୍ ଏଙ୍ଗାଲେ କି ଆନ୍ନାନାନେ, ମାଦିୟ ଡ ପାରିସିକମରଞ୍ଜି ଏନେଲେ ଅବୟ୍ ଅନଗଡ୍ ଡକୋ । 16 ତିଲୋଙ୍ ରାଜାନ୍ ବରେନ୍, ଦାନିଏଲନ୍ ଓରୋଙ୍ଡାଲେ ସିଅଁନ୍ ଆଡଲିଲୋଙ୍ ପିଡେଞ୍ଜି, ଆରି ରାଜାନ୍ ଦାନିଏଲନ୍ ବର୍ରେନ୍, ଆମନ୍ ଅଙ୍ଗା ପ୍ରବୁ ସେବାତେ, ଆନିନ୍ ଆମନ୍ ଆଡଙ୍ ଅମ୍ମେଙ୍ତମ୍ । 17 ଆରି ଅବୟ୍ ଅରେଙନ୍ ପାଙ୍ଲେ ଆମୁକ୍କାବାନ୍ ଡକୋଏଞ୍ଜି; ଆରି ଦାନିଏଲନ୍ ଆବିସୟ୍ ଏଙ୍ଗାଲେ ଇନ୍ନିଙ୍ଜାକିୟ୍ ଆନ୍ନାଡଙ୍ନେତଡ୍, ତିଆସନ୍ ରାଜାନ୍ ଆଡାବୁନ୍ ଡ ଅମାତ୍ୟମରଞ୍ଜି ଆଡାବ୍ବୋ ବୟନ୍ ତିଆତେ ତୁବେନ୍ । 18 କେନ୍ ସିଲଡ୍ ରାଜାନ୍ ଆସିଙନ୍ ଜିର୍ରେନ୍ କି ଅର୍ରଗାଗାନେନ୍ ତଗଲନ୍ ଡକୋଲନ୍ କି ଡେବ୍ଡେବ୍ତୁଙନ୍ ଆମଙନ୍ ଆପ୍ପାଙ୍ଲାଜି; ଆରି ଆନିନ୍ ତଗଲ୍ ଅଃଡ୍ଡିମଡ୍ଲନ୍ । 19 ରାଜାନ୍ ଡୋତାନ୍ମା ଲଡୁଲନ୍ ସିଂଅଞ୍ଜି ଆଡଲିବାନ୍ ଜିର୍ରେନ୍ । 20 ଆରି ଆନିନ୍ ସିଂଅସିଂଲୋଙନ୍ ତୁଙ୍ଲେ ୟେ ୟେଡାନ୍ ଆସରଙ୍ବାତ୍ତେ ଓଡେନ୍; ରାଜାନ୍ ଦାନିଏଲନ୍ ଆଡଙ୍ ବରେନ୍, ଏ ଆମେଙ୍ ଇସ୍ୱରନ୍ ଆସେବାମର୍ର ଦାନିଏଲ୍, ଆମନ୍ ଆଏଡ଼ର୍ ଆସ୍ରେବାତେନ୍ ଆ ଇସ୍ୱର, ତି ଆ ଇସ୍ୱର ସିଂଅନ୍ଞ୍ଜି ଆମଙ୍ ସିଲଡ୍ ଅଃନ୍ନବ୍ମେଁଙନ୍ ଆସନ୍ ବୋର୍ସା ଡକୋପଙ୍ ? 21 ତିଲୋଙ୍ ଦାନିଏଲନ୍ ରାଜାନ୍ ବର୍ରେନ୍, ଏ ରାଜା ଗୋଗୋୟ୍ ବେର୍ସେଙ୍ ଅମେଙନ୍ତୁ । 22 ଇସ୍ୱରଞେନ୍ ଆ କବର୍ପାଙ୍ମରଞ୍ଜି ଆପ୍ପାୟ୍ଲେ ସିଅଁନ୍ ଆତଅଡ୍ଡ୍ ଡଙ୍ ଡଙ୍ଞେନ୍ କି ଆନିଞ୍ଜି ଞେନ୍ ଇନ୍ନିଙ୍ ଆନେଙ୍ଗାଲିଞ୍ଜି; ଇନିଆନ୍ଗାମେଣ୍ତେନ୍ ଇସ୍ୱରଞେନ୍ଜନା ଞେନ୍ ଡୋସା ତଡ୍; ଏ ରାଜା ମୁକ୍କାଲୋଙ୍ନମ୍ ଇନ୍ନିଙ୍ଜା ଅଃନ୍ନେଙ୍ଗାଲାଜି । 23 ତିଲୋଙ୍ ରାଜାନ୍ ଗୋଗୋୟ୍ ସର୍ରଡାଲେ ଦାନିଏଲନ୍ ଡଲିନ୍ଲୋଙନ୍ ସିଲଡ୍ ତବ୍ଲେ ଅନୋରୋଙନ୍ ଆସନ୍ ବାଞେନ୍ । ସିଲଡ୍ତ୍ତେ ଦାନିଏଲନ୍ ଡଲିଲୋଙନ୍ ସିଲଡ୍ ଅମ୍ଡୁଙ୍ଲାଜି ଡ ଆନିନ୍ଆଡଙ୍ ଇନ୍ନିଙ୍ଜା ଆଚିନ୍ନ୍ ଅଃଗିୟ୍ତାଲୋ, ଇନିଆସନ୍ଗାମେଣ୍ଡେନ୍ ଇସ୍ୱରନ୍ ଆମଙ୍ ଆନିନ୍ ଡର୍ରନେ । 24 ରାଜା ଆବନାୟ୍, ଦାନିଏଲ୍ ଆବିରୁଡମରଞ୍ଜି, ଆଡାଙ୍ଗଡାଅଞ୍ଜି ଡ ଆଡୁକିରିଞ୍ଜି ଓରୋଙ୍ଲାଜି କି ସିଅଁନ୍ ଆଡଲିଲୋଙ୍ ପିଡେଞ୍ଜି; ଆରି ଆନିଞ୍ଜି ଡଲିନ୍ ଆଜାୟ୍ତାନ୍ ଅର୍ରଙ୍ଅସେଡେନ୍ ସିଂଅଞ୍ଜି ଆଡଅଙ୍ଞ୍ଜି ରମ୍ଲେ ଆଜାଙ୍ଗଞ୍ଜି ଅଡ଼୍କୋନ୍ ଅବ୍ଗୁଣ୍ତାଏଞ୍ଜି । 25 ତିଆଡିଡ୍ ଦାରିଆବସ ଅଡ଼୍କୋନ୍ ପୁର୍ତିନ୍ଡେସାବାଜି, ଅଡ଼୍କୋନ୍ ଆ କେଜ୍ଜା ମରଜି, ଡେସାମରଞ୍ଜି ଡ ଲଙ୍ଲଙ୍ମରଞ୍ଜି ଆମଙ୍ ଆ ଅଲାନ୍ ଇଡେନ୍; ଅମଙ୍ବେନ୍ ସନୟୁନ୍ ଡେଏତୁ । 26 ଞେନ୍ କେନ୍ ଆବନାୟ୍ ଲୁମ୍ତାୟ୍, ଡେସା ଞେନ୍ ଅଡ଼୍କୋନ୍ ଆ ମନ୍ରାଜି ଦାନିଏଲନ୍ ଆ ଇସ୍ୱର ଆମଙ୍ ତରକେଲେ ବତଙେଞ୍ଜି;
"ଇନିଆସନ୍ଗାମେଣ୍ଡେନ୍ ଆନିନ୍ ଆମେଙ୍ ଇସ୍ୱରନ୍ ଡ ଆଏଡ଼ର୍ ଡକୋତନ୍
ଆରାଜ୍ୟନ୍ ଅଃନଞିଡେ;
ଆରି ଆପନ୍ସୁଆତିନ୍ ଆତିନିକିଜାୟ୍ ଡକୋତନ୍ ।
27 ଆନିନ୍ ଅମେଙ୍ଲଙତନ୍ ମା ଡୋବ୍ଡୋବ୍ଲଙତନ୍,
ଆରି ଆନିନ୍ ରୁଆଙନ୍ ଡ ପୁର୍ତିଲୋଙନ୍
ଅନ୍ନମଡନ୍ ଡ ଅଃଗଡେଲେନ୍ ଆକାବାଡ଼ା ଅଡ଼୍କୋନ୍ ଲୁମ୍ତେ;
ଆନିନ୍ ଦାନିଏଲନ୍ ସିଅଁନ୍ ଆମଙ୍ ସିଲଡ୍ ଅମେଙଲଙ୍ତନ୍ ।"
28 କେନ୍ ଅନ୍ତମ୍ ଦାନିଏଲନ୍ ଦାରିଆବସ ଡ ପାରିସିକ କୋରସନ୍ ଆସାସନ ଡିନ୍ନାଇଂ ଗୋଗୋୟ୍ ମନଙ୍ ସାସଏନଞ୍ଜି ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)