23 Wao ni watumigwa wa Kilisito? Hata niye ivija, nolonga gago kama chichala, niye ni mtumigwa wa Kilisito kubita wao. Niye nisang’hana sang’hano ndala ng’hani, nikala mdigeleza mala nyingi ng’hani, nitoigwa mala nyingi ng’hani na mala nyingi nikala behi na ifa kubita wao. 24 Mala tano nitoigwa na Wayahudi zija mbalati salasini na tisa, 25 nitoigwa mbalati mala nhatu na Walumi, nitoigwa mabwe mala imwe, mala nhatu nibenekiligwa meli muibahali, na umo niwasa meso chilo yose na kusinda misi yose mmazi.
26 Mmiyanza yangu mingi mhatigwa na bung’hukila ya mazi ya lwanda na bung’hukila za wanyama na bung’hukila kulawa kwa wayangu muiisi na kulawa kwa wanhu wa isi zimwenga na bung’hukila za mzikae na bung’hukila kulawa kwa mbwiga wa uvwizi. 27 Nisang’hanika kwa kudununzika, mala nyingi niwasa meso, nikala na nzala na ng’ilu, mala nyingi nisinda nzala na kukala muimbeho bila chivalo. 28 Mbali ya mbuli zimwenga nyingi, mazua gose ng’hala notonga sang’hano za mabumbila gose ga wamtogole Kilisito. 29 Kama munhu yoyose ni mzidilwa, na niye ivija mzidilwa, munhu yoyose yahatendigwa kutenda malozo, na niye ivija nogwa ludoko.
30 Nihalondeka kuikunga, baho noikunga kwa uzidilwa wangu.