10 Nokomeleza kwa kulonga vino, mgangamale kwa Mndewa na kwa kutazigwa na udaho wake mkulu. 11 Valeni migoha mwing’higwe na Mulungu mpate kuzihuma mbuli zihile za Mwenembago. 12 Ng’ondo yenu sio bung’hukila yetu na wanhu, ila ni bung’hukila na jeshi da ubananzi da isi ija haioneka kwa meso. Choitoa na walongozi wakulu na weli na ludabwa na wolongoza isi ija haioneka kwa meso. 13 Kwambuli iyo, soleni migoha ya Mulungu ili zua ijo dihavika mdahe kuihuma bung’hukila ya wahasanyi, na mwahaitoa mbaka hachikomelezo, mokua mng’hali mgangamale. 14 Ivo, itandeni goya. Muifunge mkwiji mvigudi venu, kutogola kwenu kuwe kama ngwamo ya kuikimila mzi mhambaga zenu, 15 kuitanda goya kupwilisa Usenga Unogile wa utindiwala ukale kama vilatu mmagulu genu. 16 Kulu kubita zose kumtogola Mulungu kwenu kuwe kama ngwamo mmakono genu, kuwadahize kuikimila misale ya moto ya ija Mwenembago.

17 Ubokeleni ulohozi kama kofia jenu da zuma, na usenga wa Mulungu kama panga dimwing’higwe na Muhe wa Mulungu.