Êxodo 10

ଆ଼ଟା ଲମ୍ବର ମର୍‌ଡ଼ି - ଗ଼ପ୍‌ଏରିକା

1 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ନୀନୁ ପା଼ର ତା଼ଣା ହାଲାମୁ; ଇଚିହିଁ ନା଼ନୁ ଏ଼ନିକିଁ ଲ଼କୁ ତା଼ଣା ଈ ବାରେ ସିନା ତ଼ହ୍‌ଇଁ, 2 ଇଞ୍ଜାଁ ନା଼ନୁ ମିସର ଲ଼କୁ ତାକି ଏ଼ନା ଏ଼ନାଆଁ କିହାମାଇଁ ଅ଼ଡ଼େ ଏ଼ୱାରି ତା଼ଣା ନା଼ ସିନା ଲେହେଁ ଏ଼ନି ଏ଼ନି କାମା କିହାମାଇଁ, ଏ଼ ବାରେ କାତା ନୀନୁ ଏ଼ନିକିଁ ନୀ ମୀର୍‌କା ଅ଼ଡ଼େ ତାଙ୍ଗା ମୀର୍‌କାଣି ୱେହ୍‌ଦେରି, ଇଞ୍ଜାଁ, ନା଼ନୁ ପ୍ରବୁ ଈଦାଆଁ ପୁଞ୍ଜେରି, ଏ଼ଦାଆଁତାକି ନା଼ନୁ ପା଼ର ଅ଼ଡ଼େ ତାନି ହ଼ଲିୟାଙ୍ଗାତି ହିୟାଁ ଆ଼ଟ୍‌ୱା କିତେଏଁ।"

3 ଏଚିବେ଼ଲା ମ଼ସା ଅ଼ଡ଼େ ହାରଣ ପା଼ର ତା଼ଣା ହାଜାହାଁ ଏଲେଇଚେରି, "ଏବ୍ରିୟ ଲ଼କୁତି ପ୍ରବୁ ମାହାପୂରୁ ଏଲେଇଞ୍ଜି ମାନେସି, ନୀନୁ ନା଼ ନ଼କିତା ଊଣା ମ଼ନ ଆ଼ହାଲି ଏଚର ଦିନା କୂଦି ? ନା଼ ସେ଼ବା କିୟାଲି ତାକି ନା଼ ଲ଼କୁଣି ହାଜାଲି ହୀମୁ। 4 ସାମା ନା଼ ଲ଼କୁଣି ହାଜାଲି ହିୟାଆସାରେ, ମେହ୍‌ମୁ, ନା଼ନୁ ୱିଏ ନୀ ରା଼ଜିତା ଗ଼ପ୍‌ଏରିକା ତାଇଁ। 5 ଏ଼ୱି ବୂମିତି ଇଲେକିଁ ପ୍ଡିକ୍‌ନୁ, ଆମ୍ବାଆସି ଏ଼ୱାଆଁ ମେସାଲି ଆ଼ଡଅସି; ଇଞ୍ଜାଁ ଆ଼ଜି ପିୟୁତଲେ ଏ଼ନାୟି ଡ଼ୟାମାନେ ଏ଼ଦାଆଁ ବାରେ ଏ଼ୱି ତିନୁ, ଇଞ୍ଜାଁ ମୀ ବୂମିତା ନେୟିଁତି ବାରେ ମା଼ର୍‌କା ତିନୁ। 6 ଇଞ୍ଜାଁ ଏ଼ୱି ମୀ ଇଜ, ମୀ ହ଼ଲିୟାଙ୍ଗା ଇଜ, ଅ଼ଡ଼େ ବାରେ ମିସର ଲ଼କୁତି ଇଜ ନେଞ୍ଜିନୁ; ଈ ଦେ଼ସାତା ମୀ ଆକୁ ଆ଼ବାୟାଁ ଅ଼ଡ଼େ ଏ଼ୱାରି ଆକୁ ଆ଼ବାୟାଁତି ଜାର୍ନା ଦିନାଟିଏ ନୀଞ୍ଜୁ ପାତେକା ଏଚେଲା ଇଲେକିଁ ତ଼ଞ୍ଜା ଆ଼ହାହିଲାଉ।" ଏଚେଟିଏ ମ଼ସା ପା଼ର ତା଼ଣାଟି ପାଙ୍ଗାତା ହାଚେସି।

7 ଏଚେଟିଏ ପା଼ରତି ହ଼ଲିୟାଙ୍ଗା ଏ଼ୱାଣାଇଁ ଏଲେଇଚେରି, "ଈ ମାଣ୍‌ସି ଏଚର ଦିନା ମାଙ୍ଗେ ଦୁକୁ ହିୟାନେସି ?" ଈ ଲ଼କୁତି ପ୍ରବୁ ମାହାପୂରୁ ସେ଼ବା କିହାଲି ତାକି ଈୱାରାଇଁ ହାଜାଲି ହୀମୁ; ମିସର ଦେ଼ସା ବାରେ ନସ୍ତ ଆ଼ତେୟିଏ, ଈଦାଆଁ ନୀନୁ ନୀଏଁ ପାତେକା ପୁଞ୍ଜି ହିଲଅତି ?

8 ଏଚେଟିଏ ମ଼ସା ଅ଼ଡ଼େ ହାରଣ ଅ଼ଡ଼େ ୱେଣ୍ଡେ ପା଼ର ତା଼ଣା ତାପି ଆ଼ହାଲିଏ, ଏ଼ୱାସି ଏ଼ୱାରାଇଁ ଏଲେଇଚେସି, "ହାଜୁ, ମୀ ପ୍ରବୁ ମାହାପୂରୁଇଁ ସେ଼ବା କିଦୁ; ସାମା ଆମ୍ବା ଆମ୍ବାଆତେରି ହାଜେରି ?"

9 ଏଚେ଼ଟିଏ ମ଼ସା ଏଲେଇଚେସି, "ମା଼ମ୍ବୁ ମା଼ କକାରି ପ଼ଦାୟାଁ, ବୁଡ଼୍‌ହା ବୁଡ଼୍‌ହି ବାରେ ହାନମି, ଅ଼ଡ଼େ ଗରିୟାଁ ମେ଼ଣ୍ତାୟାଁ, କ଼ଡି କ଼ଡ୍ରୁ ମା଼ ତଲେ ଅ଼ନମି, ଏ଼ନାଆଁତାକି ଇଚିହିଁ ପ୍ରବୁତି କ଼ସମି ପାର୍ବୁ କିହାଲି ଆ଼ନେ।"

10 ଏଚେଟିଏ ପା଼ର ଏ଼ୱାରାଇଁ ଏଲେଇଚେସି, "ଆ଼ପେ, ପ୍ରବୁ ମୀ ତଲେ ମାନାପେସି, ନା଼ନୁ ମିଙ୍ଗେ ଅ଼ଡ଼େ କକାରି ପ଼ଦାଁଣି ହାଜାଲି ହିୟାଇଁ; ସାମା, ଜାଗ୍ରାତା, ମୀ ନ଼କିତା ଲାଗେଏତାୟି ମାନେ। 11 ଇଲେକିଁ ଆ଼ଏ, ମୀରୁ ଏଚେକା ଆ଼ବାୟାଁ ମାଞ୍ଜେରି, ହାଜୁ, ପ୍ରବୁତି ସେ଼ବା କିଦୁ; ଇଚିହିଁ ଈଦାଆଁ ମୀରୁ ଅଣ୍‌ପିମାଞ୍ଜେରି।" ଏଚେଟିଏ ଏ଼ୱାରି ପା଼ର ନ଼କିଟି ପେ଼ର୍‌ୱି ଆ଼ତେରି।

12 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ନୀନୁ ଗ଼ପ୍‌ଏରିକା ତାକି ମିସର ଦେ଼ସା ଲାକ ନୀ କେୟୁ ଦା଼ହ୍‌ମୁ, ଏଚେଟିଏ ଏ଼ୱି ମିସର ଦେ଼ସାତା ୱା଼ହାଁ ଆ଼ଜି ପିୟୁ ତଲେ ଡ଼ୟାମାନି ବୂମିତି ଆର୍ନା ଜା଼ଡ଼ା ବାରେ ତିନୁ।" 13 ଏଚେଟିଏ ମ଼ସା ମିସର ଦେ଼ସା ମୁହେଁ ତାନି ବାଡ଼୍‌ଗା ପେର୍‌ହାଲିଏ, ପ୍ରବୁ ଏ଼ ଲା଼ଆଁୟାଁ ମାଦେନା ୱେ଼ଡ଼ା ହ଼ପୁ ୱାକିଟି ଗା଼ଲି ୱା଼ୱିକିତେସି; ଲା଼ଇ ୱେ଼ୟାଲିଏ ୱେ଼ଡ଼ା ହ଼ପୁ ୱାକିତି ଗା଼ଲି ତଲେ ଗ଼ପ୍‌ଏରିକା ୱା଼ତୁ। 14 ଏଚେଟିଏ ବାରେ ମିସର ଦେ଼ସାତା ଗ଼ପ୍‌ଏରିକା ଏଜାହାଚୁ, ମିସର ରା଼ଜିତି ବାରେ ନା଼ସ୍‌କାଣା ଗ଼ପ୍‌ଏରିକା ରିତୁ; ଏ଼ୱି ହା଼ରେକା ଆଜିହ଼ପେତାଇ ମାଚୁ; ଇଲେତି ଗ଼ପ୍‌ଏରିକା ଏଚେଲା ଆ଼ହାହିଲାଆତୁ, କି ଅ଼ଡ଼େ ଏଚେଲାୱା ଆ଼ଉ। 15 ଏ଼ୱି ବାରେ ବୂମି ପ୍ଡିକ୍‌ହାତୁସ୍ତୁ ଇଞ୍ଜାଁ ଏ଼ୱାଆଁ ତଲେ ଦେ଼ସା ଆନ୍ଦେରି ଆ଼ହାହାଚେ, ବୂମିତି ଏମିନି ଜା଼ଡ଼ା ଅ଼ଡ଼େ ମା଼ର୍‌କା ଅ଼ଡ଼େ ଏ଼ନି ପା଼ଡ଼େୟି ଆ଼ଜି ପିୟୁଟି ଗେଲ୍‌ପି ଆ଼ହାମାଚେ, ଏ଼ ବାରେ ଏ଼ୱି ତିଚୁ; ଏଚେଟିଏ ବାରେ ମିସର ଦେ଼ସାତା ଏ଼ନି ମା଼ର୍‌ନୁ କି ଗୁଡିୟାତି ହିଃଲି ଜା଼ଡ଼ା ଇଚାୟି ଜିକେଏ ଡ଼ୟାଆତେ।

16 ଏଚେଟିଏ ପା଼ର ତବେ ମ଼ସା ଅ଼ଡ଼େ ହାରଣଇଁ ହା଼ଟିକିହାଁ ଏଲେଇଚେସି, "ନା଼ନୁ ମୀ ପ୍ରବୁ ମାହାପୂରୁ କ଼ପାଟି ଅ଼ଡ଼େ ମୀ କ଼ପାଟି ପା଼ପୁ କିହାମାଇଁ। 17 ବାତିମା଼ଲି ମାଞ୍ଜାନମି, ଈ ପା଼ଲି ତାକି ମା଼ ପା଼ପୁ ମ୍ଣେକ୍‌ହାଁ, ମା଼ ତା଼ଣାଟି ଈ ହା଼କି ଗୁଚି କିହାଲି ମୀ ପ୍ରବୁ ମାହାପୂରୁ ତା଼ଣା ପ୍ରା଼ତାନା କିଦୁ।" 18 ଏଚେଟିଏ ଏ଼ୱାସି ପା଼ର ତା଼ଣାଟି ହାଜାହାଁ ପ୍ରବୁ ତା଼ଣା ପ୍ରା଼ତାନା କିତେସି। 19 ପ୍ରବୁ ୱେ଼ଡ଼ା କୂଡ଼୍‌ନି ୱାକିଟି କାଜା ଗା଼ଲି ତାଚାହାଁ ଏ଼ ବାରେ ଗ଼ପ୍‌ଏରିକା ଊପ୍‌ହା ଅ଼ହାଁ ସୁପ ସାମ୍‌ଦୁରିତା ମେତ୍‌ହେସି; ଏଚେଟିଏ ମିସର ଦେ଼ସାତା ର଼ ଗ଼ପ୍‌ଏରି ଜିକେଏ ଡ଼ୟାଆତେ। 20 ସାମା ପ୍ରବୁ ପା଼ରତି ହିୟାଁ ଆ଼ଟ୍‌ୱା କିତେସି, ଇଞ୍ଜାଁ ଏ଼ୱାସି ଇସ୍ରାୟେଲ ଲ଼କୁଣି ହାଜାଲି ହୀଆତେସି।

ନ଼ ଲମ୍ବର ମର୍‌ଡ଼ି - ଆନ୍ଦେରି

21 ଅ଼ଡ଼େ ପ୍ରବୁ, ମ଼ସାଇଁ ଏଲେଇଚେସି, "ନୀନୁ ହା଼ଗୁ ୱାକି କେୟୁ ଦା଼ହ୍‌ମୁ; ଏଚେଟିଏ ମିସର ଦେ଼ସାତା ଆନ୍ଦେରି ଆ଼ନେ ଅ଼ଡ଼େ ଆନ୍ଦେରି ତାକି ଲ଼କୁ ବାରେ ଇନି ଏନି ପା଼ର୍‌କିନେରି।" 22 ଏଚେଟିଏ ମ଼ସା ହା଼ଗୁ ୱାକି କେୟୁ ପେର୍‌ହାଲିଏ, ତୀନି ଦିନା ପାତେକା ମିସର ଦେ଼ସାତା ସା଼ରିୱାକି ଗାଡି ଆନ୍ଦେରି ଆ଼ତେ, ଇଲେତି ଆନ୍ଦେରି ଆ଼ତେ ଆମ୍ବାଆସି ଆମ୍ବାଆରାଇଁ ମେସାଲି ଆ଼ଡାଆତେରି। 23 ଅ଼ଡ଼େ ତୀନି ଦିନା ପାତେକା ଆମ୍ବାଆରି ଜାହାରା ଟା଼ୟୁଟି ନିଙ୍ଗାଲି ଆ଼ଡାଆତେରି; ସାମା ଇସ୍ରାୟେଲ ଲ଼କୁତି ବାରେ ବାସା ଟା଼ୟୁତା ଉଜେଡ଼ି ମାଚେ।

24 ଏଚେଟିଏ ପା଼ର ମ଼ସାଇଁ ହା଼ଟିକିହାଁ ଏଲେଇଚେସି, "ମୀରୁ ପ୍ରବୁତି ସେ଼ବା କିହାଲି ହାଜୁ; ସାମା ମୀ କ଼ଡି ଗରି ମାଣ୍‌ମ୍ବୁ, ମୀ କକାରି ଜିକେଏ ମୀ ତଲେ ହାଲାପେରି।"

25 ଏଚେଟିଏ ମ଼ସା ପା଼ରଇଁ ଏଲେଇଚେସି, "ମା଼ମ୍ବୁ ମା଼ ପ୍ରବୁ ମାହାପୂରୁ କ଼ସମି ଏମିନି ପୂଜା ଅ଼ଡ଼େ ହିଚୁତା ହୂଡିନି ପୂଜା ହେର୍‌ପିନମି, ଏ଼ଦାଆଁ ଜିକେଏ ନୀନୁ ମା଼ କେୟୁତା ହିୟାନାୟି ମାନେ। 26 ମା଼ ଜ଼ନ୍ତ ଜୀୱେଡ଼ି ମା଼ ତଲେ ହାନୁ, ର଼ କୁରା ଜିକେଏ ଇମ୍ବାଆଁ ଡ଼ୟେଏ; ଇଚିହିଁ ମା଼ ପ୍ରବୁ ମାହାପୂରୁ ସେ଼ବା ତାକି ଏ଼ୱାଆଁ ବିତ୍ରାଟି ପୂଜା କିୟାଲି ଆ଼ନେ; ଇଞ୍ଜାଁ ଏ଼ନାଆଁ ହୀହାଁ ପ୍ରବୁତି ସେ଼ବା କିହାଲି ଆ଼ନେ, ଏ଼ଦି ଏମ୍ବାଆଁ ଡ଼ୟାଆସାରେ ମା଼ମ୍ବୁ ପୁଞ୍ଜାଲି ଆ଼ଡଅମି।"

27 ସାମା ପ୍ରବୁ ପା଼ରତି ହିୟାଁ ଆ଼ଟ୍‌ୱା କିତେସି, ଇଞ୍ଜାଁ ଏ଼ୱାସି ଏ଼ୱାରାଇଁ ପିସା ହିୟାଲି ରା଼ଜି ଆ଼ଆତେସି। 28 ଏ଼ଦାଆଁତାକି ପା଼ର ଏ଼ୱାଣାଇଁ ଏଲେଇଚେସି, "ନା଼ ତା଼ଣାଟି ହେକ ଆ଼ମୁ, ଜାଗ୍ରାତା ନୀନୁ ନା଼ ମୂମ୍ବୁ ଅ଼ଡ଼େ ଏଚେଲାୱା ମେସ୍ତଅତି; ଏମିନି ଦିନା ନା଼ ମୂମ୍ବୁ ମେହ୍‌ଦି ଏ଼ ଦିନା ହା଼ଦି।" 29 ଏଚେଟିଏ ମ଼ସା ଏଲେଇଚେସି, "ନୀନୁ ନେହିଁ କାତା ୱେସ୍ତାତି, ନା଼ନୁ ଅ଼ଡ଼େ ଏଚେଲା ନୀ ମୂମ୍ବୁ ମେସ୍ତଅଁ।"