1 ଏଚେଟିଏ ମିସର ଦେ଼ସାତା ପ୍ରବୁ ମ଼ସା ଅ଼ଡ଼େ ହାରଣଇଁ ଏଲେଇଚେସି, 2 "ଈ ଲେ଼ଞ୍ଜୁ ମିଙ୍ଗେ ତାକି କାଜା ଲେ଼ଞ୍ଜୁ ଅ଼ଡ଼େ ବାର୍ସାତି ମୂଲୁ ଲେ଼ଞ୍ଜୁ ଆ଼ନେ। 3 ମୀରୁ ଇସ୍ରାୟେଲ ବାରେ କୁଲମିତି ଈ କାତା ୱେହ୍‌ଦୁ, ଈ ଲେ଼ଞ୍ଜୁତି ଦସ ଦିନାତା ମୀ ବାରେ ତାଞ୍ଜିତି ଇଲୁକୁଟମି ଲେକା ତଲେ ର଼ ମେ଼ଣ୍ତା ଡା଼ଲୁ ଅ଼ଦେରି। 4 ଅ଼ଡ଼େ ର଼ ମେ଼ଣ୍ତା ଡା଼ଲୁ ଅ଼ହାଲି ତାକି ଏମିନି କୁଟମି ଊଣା ଆ଼ନେରି, ଆତିହିଁ ଏ଼ୱାସି ଅ଼ଡ଼େ ତାମି ଇଲୁ ଦାରିତି ପା଼ଡ଼ିତି ଲ଼କୁ କାଲ୍‌ହାଁ, ଲ଼କୁତି ଲେକା ତଲେ ର଼ ମେ଼ଣ୍ତା ଡା଼ଲୁତି ଅ଼ନେରି; ମୀରୁ ବାରେ ଜା଼ଣା ତିଞ୍ଜାଲି ଆ଼ଡିନି ବା଼ଡ଼୍‌ୟୁ ତଲେ ମେ଼ଣ୍ତା ଡା଼ଲୁତି ଲେକା କିଦେରି। 5 ମୀରୁ ମେ଼ଣ୍ତା କି ଗରି ମାନ୍ଦାଟି ବକ୍‌ଡ଼ା ଅ଼ଦେରି; ଏ଼ଦାଆଁ ର଼ ବାର୍ସାତି ଏ଼ନି ଗାରି ହିଲାଆ ପ଼ତୁ ଡା଼ଲୁ ଅ଼ଦେରି; 6 ଏ଼ ଲେ଼ଞ୍ଜୁତି ସଦ ଦିନା ପାତେକା ଏ଼ ଡା଼ଲୁତି ଦସାହାଁ ଇଟିଦେରି; ଏଚେଟିଏ ଇସ୍ରାୟେଲ କୁଲମିତି ବାରେ କୁଟମି ମିଡ଼୍‌ଅଲା ବେ଼ଲା ଏ଼ ଡା଼ଲୁତି ପା଼ୟିଦେରି। 7 ଇଞ୍ଜାଁ, ଲ଼କୁ ଏମ୍ବାତି ଇଚାଣି ନେତେରି ଅ଼ହାଁ ଏମି ଏମିନି ଇଲ୍‌କାଣା ଏ଼ ମେ଼ଣ୍ତା ତିନେରି, ତାମି ଏ଼ ଇଲୁତି ଦୁୱେରିବନ୍ଦୁ ଅ଼ଡ଼େ ଦୁୱେରି ଲାକତି କଟ୍‌ଲାତା ରୁବିନେରି। 8 ଅ଼ଡ଼େ ଏ଼ ଲା଼ଆଁୟାଁ ଏ଼ ମେ଼ଣ୍ଡାତି ଊଙ୍ଗା ତିନେରି; ହିଚୁତା ହୂଡାହାଁ ପୁଲା ଆଣ୍ତାଆତି ରୂଟି ଅ଼ଡ଼େ କାମ୍ବେଲି କୁଚା ତଲେ ତିନେରି। 9 ମୀରୁ ଏ଼ ଊଙ୍ଗା ହିଇଃଲାଆଁ କି ଏ଼ୟୁ ତଲେ ୱାଜାହାଁ ତିନଅତେରି, ସାମା ହିଚୁତା ତାନି ତା଼ର୍ୟୁଁ, କଡାୟାଁ ଅ଼ଡ଼େ ତାର୍ନା ପସ୍‌ପାୟାଁ ଆଙ୍ଗା ତଲେ ହୂଡାହାଁ ତିଞ୍ଜେରି। 10 ଇଞ୍ଜାଁ ଲା଼ଇ ପାତେକା ଏମ୍ବାତାଣି ଇଚାଣି ଇଟଅତେରି; ଇଚିହିଁ ଲା଼ଇ ପାତେକା ଇଚାୟି ଡ଼ୟିନେ, ଏ଼ଦାଆଁ ହିଚୁତା ହୂଡିଦେରି। 11 ଇଲେକିହିଁ ମୀରୁ ଏ଼ଦାଆଁ ତବେ ତିଞ୍ଜେରି, ଇଚିହିଁ ମୀରୁ ଟେଡେଲିତା ଦସାକଡାହାଁ, କଡାୟାଁଣା ସେପୁୟାଁ ତୁର୍‌ହାଁ, କେୟୁତା ବାଡ଼୍‌ଗା ଆସାହାଁ ହାଜାଲିତାକି ତିୟାରା ଆ଼ଦେରି; ଈଦି ପ୍ରବୁତି ପିସ୍‌ପିଆ଼ନି ପାର୍ବୁ।

12 ଏ଼ନିଇଚିହିଁ ନା଼ନୁ ନୀଞ୍ଜୁ ଲା଼ଆଁୟାଁ ମିସର ଦେ଼ସା ମାଦିଟି ହାଜାହାଁ ମିସର ଦେ଼ସାତି ମାଣ୍‌ସି ଅ଼ଡ଼େ ଜ଼ନ୍ତତି ମୂଲୁ ଜାର୍ନାଆ଼ତି ବାରେତି ନା଼ସାକିଇଁ; ଇଞ୍ଜାଁ ମିସର ଦେ଼ସାତି ବାରେ ପେ଼ଣ୍‌କାତି ନୀହାଁୟି କିହାଁ ଡଣ୍ତ ହୀଇଁ; ନା଼ନୁ ପ୍ରବୁତେଏଁ। 13 ଏ଼ଦାଆଁତାକି ମୀରୁ ଏମି ଏମିନି ଇଲୁତା ଡ଼ୟିଦେରି, ଏ଼ ଇଲ୍‌କାଣା ଏ଼ ନେତେରିତି ସିନା ଲେହେଁ ଈଦି ଡ଼ୟିନେ; ଅ଼ଡ଼େ ନା଼ନୁ ମିସର ଦେ଼ସାତି ଡଣ୍ତ ହୀନାଟି ଏ଼ ନେତେରି ମେସ୍ତିସାରେ ମିଙ୍ଗେ ପିସାହାଁ ନ଼କିତା ହାଇଁ, ଅ଼ଡ଼େ ନା଼ସାକିନି ହା଼କି ମିଙ୍ଗେ ତାକି ଆ଼ଏ। 14 ଅ଼ଡ଼େ ଏ଼ ଦିନା ମିଙ୍ଗେ ତାକି ଅଣ୍‌ପିନି ଦିନା ଆ଼ନେ, ଇଞ୍ଜାଁ ମୀରୁ ଏ଼ ଦିନାତି ପ୍ରବୁତି ପାର୍ବୁ ଲେହେଁ ମା଼ନୱି ଆ଼ଦେରି; ଆକୁ ଆ଼ବାୟାଁତି ଲେକା ତଲେ ପା଼ଟୁ ପା଼ଟୁ ତାକି ମେ଼ରା ତଲେ ଈ ପାର୍ବୁ ମା଼ନୱି ଆ଼ଦେରି।"

15 "ମୀରୁ ସା଼ତା ଦିନା ପାତେକା ପୁଲା ଆଣ୍ତାଆତି ରୂଟି ତିଞ୍ଜେରି; ଇଚିହିଁ ମୂଲୁ ଦିନାଟିଏ ମୀ ଇଜଟି ପୁଲା ହେକ କିଦେରି, ଏମିନିଗାଟାସି ମୂଲୁ ଦିନାଟିଏ ସା଼ତା ଦିନା ପାତେକା ପୁଲା ଆଣ୍ତିତି ରୂଟି ତିନେସି; ଏ଼ୱାସି ଇସ୍ରାୟେଲ ଲ଼କୁ ତା଼ଣାଟି ଏଟ୍‌କା ଆ଼ନେସି। 16 ଅ଼ଡ଼େ ମୂଲୁ ଦିନାତା ମିଙ୍ଗେ ତାକି ସୁଦୁତି ଜାଟୁ କୂଡ଼ା ଆ଼ଦେରି; ଇଞ୍ଜାଁ ସା଼ତା ଦିନାତା ଜିକେଏ ମିଙ୍ଗେ ତାକି ସୁଦୁତି ଜାଟୁ କୂଡ଼ା ଆ଼ଦେରି; ଅ଼ଡ଼େ ଏ଼ ରୀ ଦିନାତା ବାରେ ଲ଼କୁକି ତିନି କା଼ଦି ୱାଜିନି କାମା ପିସ୍‌ପେ ଅ଼ଡ଼େ ଏ଼ନି କାମା କିୟାଲି ଆ଼ଏ, ୱାର୍‌ଇ ଏ଼ କାମା କିହାଲି ଆ଼ଡିଦେରି। 17 ଇଲେକିହିଁ ମୀରୁ ପୁଲା ଆଣ୍ତାଆତି ରୂଟିତି ପାର୍ବୁ କିଦେରି, ଇଚିହିଁ ଏ଼ ଦିନା ନା଼ନୁ ମୀ ମାନ୍ଦା ଲ଼କୁଣି ମିସର ଦେ଼ସାଟି ହ଼ପ୍‌ହା ତାଇଁ; ଏ଼ଦାଣିତାକି ମୀରୁ ଆକୁ ଆ଼ବାୟାଁତି ଲେକା ତଲେ ପା଼ଟୁ ପା଼ଟୁ ତାକି ମେ଼ରା ତଲେ ଈ ପାର୍ବୁ କିଦେରି। 18 ମୀରୁ ମୂଲୁ ଲେ଼ଞ୍ଜୁତି ସଦ ଦିନାତି ମିଡ଼୍‌ଅଲା ବେ଼ଲାଟିଏ କଡ଼େ ର଼ ଦିନା ମିଡ଼୍‌ଅଲା ପାତେକା ପୁଲା ଆଣ୍ତାଆତି ରୂଟି ତିଞ୍ଜେରି। 19 ର଼ ୱା଼ରା ପାତେକା ମୀ ଇଲ୍‌କାଣା ଇଚାୟିୱା ପୁଲା ଡ଼ୟାଆପେ, ଇଚିହିଁ ଏଟ୍‌କାତାସି ଆ଼ପେସି କି ମୀ ଦେ଼ସାତାସି ଆ଼ପେସି ଏମିନିଗାଟାସି ପୁଲା ଆଣ୍ତିତି ରୂଟି ତିନେସି, ଏ଼ୱାସି ଇସ୍ରାୟେଲ କୁଲମିଟି ଏଟ୍‌କା ଆ଼ନେସି। 20 ମୀରୁ ପୁଲା ଆଣ୍ତିତି ଏ଼ନି ରା଼ନ୍ଦା ତିନଅତେରି, ମୀରୁ ଜାହାରା ଜାହାରା ବାରେ ବାସା ଟା଼ୟୁତା ପୁଲା ଆଣ୍ତାଆତି ରୂଟି ତିଞ୍ଜେରି।"

21 ଏଚିବେ଼ଲା ମ଼ସା ଇସ୍ରାୟେଲତି ବାରେ ପ୍ରାଚିନାଙ୍ଗାଣି ହା଼ଟିକିହାଁ ଏଲେଇଚେସି, "ମୀରୁ ମିଙ୍ଗେ ତାକି ମୀ କୁଟମି ଲ଼କୁତି ଲେକା ତଲେ ର଼ ର଼ ମେ଼ଣ୍ତା ଡା଼ଲୁ ତାଚାହାଁ ପିସ୍‌ପିଆ଼ନି ପାର୍ବୁ ତାକି ପୂଜା କିଦୁ। 22 ଇଞ୍ଜାଁ ର଼ କେଜା ଏସବ ଗଚାୟାଁ ଅ଼ହାଁ ସିପାତି ନେତେରିତା ମୁସାହାଁ ଦୁୱେରି ଲାକତି କଟ୍‌ଲାତା ଅ଼ଡ଼େ ବନ୍ଦୁୟାଁଣା ସିପାତି ନେତେରି ରୁବାଦୁ; ଇଞ୍ଜାଁ, ୱେ଼ୟିନି ପାତେକା ମୀ ବିତ୍ରାଟି ଆମ୍ବାଆସି ଇଲୁଟି ପାଙ୍ଗାତା ହାଲାଆପେସି। 23 ଏ଼ନାଆଁତାକି ଇଚିହିଁ ପ୍ରବୁ ମିସର ଲ଼କୁଣି ପା଼ୟାଲି ଏ଼ୱାରି ବିତ୍ରାଟି ହାନେସି; ଏଚେଟିଏ ଦୁୱେରି ଲାକତି କଟ୍‌ଲାତା ଅ଼ଡ଼େ ବନ୍ଦୁୟାଁଣା ଏ଼ ନେତେରି ମେସାହାଁ, ପ୍ରବୁ ଏ଼ ଦୁୱେରି ପିସାହାଁ ନ଼କିତା ହାନେସି, ମୀ ଇଜ ନା଼ସା କିନାୟି ହ଼ଡାହାଁ ନା଼ସା କିୟେଏ। 24 ଇଞ୍ଜାଁ ମୀରୁ ଅ଼ଡ଼େ ମୀ ମୀର୍‌କା ଜୁଗୁ ଜୁଗୁ ପାତେକା ଈ ମେ଼ରା ତଲେ ମା଼ନୱି ଆ଼ଦେରି। 25 ଅ଼ଡ଼େ ପ୍ରବୁ ତାନି ଆ଼ଞ୍ଜାମାନି ଲେହେଁ ମିଙ୍ଗେ ଏମିନି ଦେ଼ସା ହିୟାନେସି, ଏ଼ ଦେ଼ସାତା ହାଚିସାରେ, ଈ ମେ଼ରାତି ମା଼ନୱି ଆ଼ଦେରି। 26 ଇଞ୍ଜାଁ, ମୀ ଈ ସେ଼ବା କିନି ମେ଼ରା ଏ଼ନାୟି ? ଇଲେକିହିଁ ମୀ ମୀର୍‌କା ମିଙ୍ଗେ ୱେଞ୍ଜାତିହିଁ, 27 ମୀରୁ ଏ଼ୱାରାଇଁ ୱେହ୍‌ଦେରି, ଈଦି ପ୍ରବୁତି କ଼ସମି ପିସ୍‌ପିଆ଼ନି ପାର୍ବୁତି ପୂଜା; ଇଚିହିଁ ମିସର ଦେ଼ସାତି ଲ଼କୁଣି ପା଼ୟିତି ବେ଼ଲା ଏ଼ୱାସି ମିସରତା ବାସା କିହାମାନି ଇସ୍ରାୟେଲ ମୀର୍‌କାତି ଇଲୁ ପିସାହାଁ ନ଼କିତା ହାଜାହାଁ ମା଼ ଇଲୁ ଗେଲ୍‌ପା ମାଞ୍ଜାତେସି।" ଏଚିବେ଼ଲା ବାରେ ଲ଼କୁ ତା଼ର୍ୟୁଁ ଲେ଼ସାହାଁ ଜହରା କିତେରି। 28 ଏଚେଟିଏ ଇସ୍ରାୟେଲ ଲ଼କୁ ହାଜାହାଁ ଏଲେକିତେରି; ଅ଼ଡ଼େ ଏ଼ୱାରି ମ଼ସା ଅ଼ଡ଼େ ହାରଣଇଁ ପ୍ରବୁ ୱେସାମାଚି ଲେହେଁ କାମା କିତେରି।

29 ଏଚେଟିଏ ମାଦି ଲା଼ଆଁୟାଁ ବେ଼ଲାତା ପ୍ରବୁ ସିଂଗାସାଣିତା କୁଗାମାନି ପା଼ରତି ପା଼ଣ୍‌ୱା ମୀର୍‌ଏଣା ତା଼ଣାଟିଏ କାୟିଦିତା ମାନି ପା଼ଣ୍‌ୱା ମୀର୍‌ଏଣା ପାତେକା ମିସର ଦେ଼ସାତି ବାରେ ପା଼ଣ୍‌ୱା ମୀର୍‌କା ଅ଼ଡ଼େ ଜ଼ନ୍ତତି ମୂଲୁ ଜାର୍ନାଆ଼ତି ପ଼ତୁୟାଁ ବାରେ ପା଼ୟିତେସି। 30 ଏଚେଟିଏ ପା଼ର ଅ଼ଡ଼େ ତାନି ହ଼ଲିୟାଙ୍ଗା ଇଞ୍ଜାଁ ମିସରତି ଲ଼କୁ ବାରେ ଲା଼ଆଁୟାଁ ନିଙ୍ଗିତେରି; ଇଞ୍ଜାଁ ମିସର ଦେ଼ସାତା ହା଼ରେକା ଡ଼ୀକି ଆ଼ତେ, ଇଚିହିଁ ଇଲେତି ଇଲୁ ହିଲାଆତେ କି ଏମିନି ଇଲୁତା ରଅସି ହା଼ହା ହିଲଅସି। 31 ଏଚେଟିଏ ଲା଼ଆଁୟାଁ ବେ଼ଲା ପା଼ର, ମ଼ସା ଅ଼ଡ଼େ ହାରଣଇଁ ହା଼ଟିକିହାଁ ଏଲେଇଚେସି, "ମୀରୁ ଅ଼ଡ଼େ ଇସ୍ରାୟେଲ କୂଡ଼ାତେରି ନିଙ୍ଗାହାଁ ମା଼ ଲ଼କୁ ତା଼ଣାଟି ହ଼ଚା ହାଜୁ, ମୀ କାତା ଲେହେଁ ପ୍ରବୁଇଁ ସେ଼ବା କିୟାଲି ହାଜୁ। 32 ମୀ କାତା ଲେହେଁ ମୀ କ଼ଡି ଗରି ବାରେ ଅ଼ହିଁ ହାଜୁ, ଇଞ୍ଜାଁ ମାଙ୍ଗେୱା ବ଼ର ହିୟାଦୁ।"

33 ଏଚିବେ଼ଲା ମିସର ଲ଼କୁ ଇସ୍ରାୟେଲ ଲ଼କୁଣି ତାମି ଦେ଼ସାଟି ତବେ ପାଣ୍ଡାଲି ବିଲ୍‌କି ଆ଼ତେରି; ଇଚିହିଁ ଏ଼ୱାରି ଏଲେଇଚେରି, "ମା଼ମ୍ବୁ ବାରେ ହା଼ତି ଲେହେଁ ଆ଼ହାମାନମି।" 34 ଏମ୍ବାଟିଏ ୱୀସ୍‌କିତି ଗୁଣ୍ତା ପୁଲା ଆଣ୍ତାଆ ନ଼କେଏ ଲ଼କୁ ଏ଼ଦାଆଁ ଅ଼ହାଁ ଗୁଣ୍ତା ୱୀସ୍‌କିନି ସିପାୟାଁ ବାରେ ତାମି ହିମ୍ବରିକାଣା ମ଼ଟା ପଜାହାଁ ବମିତା ଡେ଼କିତେରି। 35 ଇଞ୍ଜାଁ, ଇସ୍ରାୟେଲ ମୀର୍‌କା ମ଼ସାତି କାତା ଲେହେଁ ମିସର ଲ଼କୁଣି ୱେଣ୍ତି ଅ଼ଡ଼େ ବାଂଗାରା ସାଜୁ ଇଞ୍ଜାଁ ହିମ୍ବରିକା ରୀସ୍ତେରି। 36 ଏଚେଟିଏ ପ୍ରବୁ ମିସର ଲ଼କୁ ନ଼କିତା ଇସ୍ରାୟେଲ ଲ଼କୁଣି କାର୍ମା ମେସ୍‌ପି କିୟାଲିଏ, ଏ଼ୱାରି ଏ଼ୱାରାଇଁ ଏ଼ନାଆଁ ରୀସ୍ତିହିଁ, ଏ଼ୱାରି ଏ଼ ବାରେ ହୀତେରି। ଇଲେକିହିଁ ଏ଼ୱାରି ମିସର ଲ଼କୁତି ଦ଼ନ ମୀଞ୍ଜିତେରି।

37 ଏଚେଟିଏ ଇସ୍ରାୟେଲ ମୀର୍‌କା ଊଣା କକାରାଇଁ ପିସ୍‌ପେ ୱାର୍‌ଇ ଆ଼ବାୟାଁ ସ଼ ଲାକେ ଆ଼ବାୟାଁ ପା଼ୱୁଲି ତଲେ ତା଼କିହିଁ ରାମିସେସ୍‌ଟିଏ ସୁକ୍‌କତ ୱାକି ହାଚେରି। 38 ଇଞ୍ଜାଁ, ଆଣ୍ତ୍‌ୱିଆ଼ତି ଲ଼କୁତି ର଼ ହା଼ରେକା ମାନ୍ଦା ଅ଼ଡ଼େ ଜ଼ନ୍ତଜିୱେଡ଼ି ହା଼ରେକା କ଼ଡି ଗରି ବାରେ ଏ଼ୱାରି ତଲେ ହାଚୁ। 39 ଏଚେଟିଏ ଏ଼ୱାରି ମିସର ଦେ଼ସାଟିଏ ତାଚାମାଚି ୱୀସ୍‌କିତି ଗୁଣ୍ତା ତଲେ ପୁଲା ଆଣ୍ତାଆତି ରୂଟି କିତେରି; ଇଚିହିଁ ଏ଼ଦି ପୁଲା ଆଣ୍ତା ହିଲାଆତେ; ଇଚିହିଁ ଏ଼ୱାରି ମିସରଟି ପେ଼ର୍‌ୱି ଆ଼ହାମାଚେରି, ଏ଼ଦାଆଁତାକି ୱେ଼ଡ଼ା କିଆଲିଏ ଜାହାରା ତାକି ରା଼ନ୍ଦା ୱାଜାଲି ଆ଼ଡାହିଲାଆତେରି।

40 ଇସ୍ରାୟେଲ କୂଡ଼ା ସା଼ରି ୱାଞ୍ଜା କଡ଼େ ଦସ ବାର୍ସା ପାତେକା ମିସର ଦେ଼ସାତା ବାସା କିହାମାଚେରି। 41 ଏ଼ ସା଼ରି ୱାଞ୍ଜା କଡ଼େ ଦସ ବାର୍ସା ରା଼ହିମାଚି ଦିନା ପ୍ରବୁତି ବାରେ ମାନ୍ଦା ଲ଼କୁ ମିସର ଦେ଼ସାଟି ହ଼ଚା ୱା଼ତେରି। 42 ମିସର ଦେ଼ସାଟି ଏ଼ୱାରି ହ଼ଚା ୱା଼ତାକି ଏ଼ଦି ପ୍ରବୁତି କ଼ସମି ହା଼ରେକା ମା଼ନୱି ଆ଼ନି ଲା଼ଆଁୟାଁ; ଏ଼ଦି ପ୍ରବୁତି ଲା଼ଆଁୟାଁ ଇଞ୍ଜିଁ ଇସ୍ରାୟେଲ ମୀର୍‌କାତି ଆକୁ ଆ଼ବାୟାଁ ଲେକା ତଲେ ହା଼ରେକା ମା଼ନୱି ଆ଼ନାୟି ଆ଼ତେ।

43 ଅ଼ଡ଼େ ପ୍ରବୁ ମ଼ସା ଅ଼ଡ଼େ ହାରଣଇଁ ଏଲେଇଚେସି, "ପିସ୍‌ପିଆ଼ନି ପାର୍ବୁତି ମେ଼ରା ଈଦି; ଏମିନି ଏଟ୍‌କା ଦେ଼ସାତି ଲ଼କୁ ଏ଼ଦାଆଁ ତିନଅରି। 44 ସାମା ୱେଣ୍ତି ଟାକାୟାଁ ତଲେ କଡିତି ବାରେ ଲ଼କୁତି ହ଼ଲିୟାଙ୍ଗା ତାମି ତ଼ଲୁ ଦା଼ପିକିହା କଡିତିହିଁ ଏ଼ଦାଆଁ ତିଞ୍ଜାଲି ଆ଼ଡିନେରି। 45 ଏ଼ ଟା଼ୟୁତା ବାସା କିହାମାନି ଏମିନି କୂଲି ବେଟାଆ଼ହିମାନି ହ଼ଲେଏସି ଏ଼ଦାଆଁ ତିଞ୍ଜାଲି ଆ଼ଡଅସି। 46 ରଣ୍ତିଏ ଇଲୁ ବିତ୍ରା ଏ଼ଦାଆଁ ତିଣ୍‌ମ୍ବିଆ଼ନେ; ମୀରୁ ଏ଼ ଊଙ୍ଗା ଇଚାଣିୱା ପାଙ୍ଗାତା ଅ଼ଅତେରି; କି ଏ଼ଦାଆଁତି ର଼ ଡୁମୁ ଜିକେଏ ଡ଼ିକ୍‌ଅତେରି। 47 ଇସ୍ରାୟେଲତି ବାରେ କୁଲମି ଏ଼ଦାଆଁ ମା଼ନୱି ଆ଼ନେରି। 48 ଇଞ୍ଜାଁ ମୀ ତଲେ ବାସା କିହିମାନି ଏଟ୍‌କା ଦେ଼ସାତି ଲ଼କୁ ବିତ୍ରାଟି ଏମିନିଗାଟାସି ପ୍ରବୁତି ପିସ୍‌ପିଆ଼ନି ପାର୍ବୁ ମା଼ନୱି ଆ଼ହାଲି ମ଼ନ କିନେସି, ଆତିହିଁ ଏ଼ ଇଲୁତି ବାରେ ଆ଼ବାୟାଁ ତ଼ଲୁ ଦା଼ପି କିପାରି, ଏଚେଟିଏ ଏ଼ୱାସି ଦାରି ୱା଼ହାଁ ପାର୍ବୁ ମା଼ନୱି ଆ଼ପାସି; ଆତିହିଁ ଏ଼ୱାସି ଦେ଼ସାତା ଜାର୍ନାଆ଼ତି ଲ଼କୁ ଲେହେଁ ଆ଼ନେସି; ସାମା ଆମିନି ତ଼ଲୁ ଦା଼ପି ଆ଼ଆତି ଲ଼କୁ ଏ଼ଦାଆଁ ତିଞ୍ଜାଲି ଆ଼ଡଅସି। 49 ଅ଼ଡ଼େ ଦେ଼ସାତା ଜାର୍ନା ଆ଼ତି ଲ଼କୁ ଇଞ୍ଜାଁ ମୀ ବିତ୍ରା ବାସା କିହାମାନି ଏଟ୍‌କା ଦେ଼ସାତି ଲ଼କୁ ତାକି ରଣ୍ତିଏ ମେ଼ରା ଆ଼ନେ।" 50 ଏଚେଟିଏ ଇସ୍ରାୟେଲତି ବାରେ ମୀର୍‌କା ଏଲେକିତେରି; ମ଼ସା ଅ଼ଡ଼େ ହାରଣକି ପ୍ରବୁତି ହୁକୁମି ଏ଼ନିକିଁ ମାଚେ, ଏଲେକିଁ ଏ଼ୱାରି କିତେରି। 51 ଇଲେକିହିଁ ଏ଼ ଦିନା ପ୍ରବୁ ମାନ୍ଦା ଇସ୍ରାୟେଲ ମୀର୍‌କାଣି ମିସର ଦେ଼ସାଟି ହ଼ପ୍‌ହା ତାତେସି।