ହାନାୟି 2

5 ଏଚେଟିଏ ପା଼ରତି ମା଼ଙ୍ଗା ଏ଼ୟୁ ମୀହାଲି ନିଲ କାଡାତା ୱା଼ତେ, ତାନି ହ଼ଲେଣିସିକା କାଡା ଗିଚୁତା ରେ଼ଜିମାଚୁ। ଏଚିବେ଼ଲା ଏ଼ଦି ନା଼ଡାୟାଁ ଡାଙ୍ଗୁତା ର଼ ପେ଼ଡ଼ା ମେସାହାଁ ଏ଼ଦାଆଁ ତାଚାଲି ତାନି ହ଼ଲେଣିନି ପାଣ୍ତିତେ। 6 ଏ଼ଦି ପେ଼ଡ଼ା ଦେଚାଲିଏ କକାଣି ଡା଼ଲୁଇଁ ମେସ୍ତେ; ଇଞ୍ଜାଁ ଏ଼ କକାସି ଡ଼ୀହିଁ ମାନେସି; ଏଚେଟିଏ ଏ଼ଦି କାର୍ମା ଆ଼ହାଁ ଏଲେଇଚେ, "ଈୱାସି ର଼ ଏବ୍ରି କକାସି।"

7 ଏଚିବେ଼ଲା ତାନି ତାଙ୍ଗି ପା଼ର ମା଼ଙ୍ଗାନି ଏଲେଇଚେ, "ନା଼ନୁ ହାଜାହାଁ କକାଣାକି ପା଼ଲୁ ଊଟ୍‌ହାଲି ଏବ୍ରି ଇୟାସିକା ବିତ୍ରାଟି ର଼ ହ଼ଲେଣିନି ହା଼ଟା ତାଇଁ କି ?"

8 ଏଚେଟିଏ ପା଼ର ମା଼ଙ୍ଗା ଏଲେଇଚେ, "ହାଲାମୁ," ଏଚେଟିଏ ଏ଼ ପ଼ଦା ହାଜାହାଁ କକାଣି ତାମି ଆୟାନି ହା଼ଟା ତାତେ। 9 ଏଚେଟିଏ ପା଼ରନି ମା଼ଙ୍ଗା ଏ଼ଦାଣି ଏଲେଇଚେ, "ନୀନୁ ଈ କକାଣାଇଁ ଅ଼ହାଁ ନା଼ ତାକି ପା଼ଲୁ ଊଟ୍‌ମୁ; ନା଼ନୁ ନିଙ୍ଗେ ଡାବୁୟାଁ ହିୟାଇଁ," ଏଚେଟିଏ ଏ଼ ଇୟା କକାଣାଇଁ ଅ଼ହାଁ ପା଼ଲୁ ଊଟ୍‌ହେ।